Эрямос совамо/Стака иетнестэ/11
XI
Валске стенасо понгавтозь частнэ чавсть кавксо. Комнатантень совась азор авась. Сон лоткась Астаканонь вельксэсь ды такода аварьдевть, жалямо вановтсо вансь лангозонзо. Мейле токизе одиялонть ды пшкадсь:
— Стяк, эйднем...
Астакан аволь сеске панжинзе сельмензэ. Кода эрьва валске, истя нейгак эрявсть лутамс сельме керьтнень.
Авась озась ваксозонзо ды ушодсь кортамо:
— Мон ванан лангозот ды пек жаль марявт. Токавсь седеем... Монь покш церанть маштызь кулаконь восстаниясо. Седе мейле атясь прок а эсь ежосонзо, мик лиясто а мельсэ ваны велень ломань лангс... — авась састо аварьгадсь.
Астакан иеде покш Валерьяндо, Раиса колмо иеде вишкене Астакандо. Сынь колмонест ульнесть одт, вечкевикст. Ды авантень Астакан марявсь эсинзэ, [ 52 ]маласо ломанекс. Авась вансь Астакан лангс ды жалясь Валерьянонь, арась сон сынст вакссост. Секс авась ней ашти нурьгамозь.
— Астакан, эйднем, тон панжик потмот: жив Валерьян эли арась? Велесэнть ванат эщо эзть ойма, пелян кисэнзэ... Мезеяк авольть тее мартонзо... — авась комась Астакан малав ды никнетезь, чамастонзо гевердсть салов, пси сельведензэ.
Астакан нежедсь кенере пакарензэ лангс ды арьсесь отвечамо, се шканть кеншенть лангс появась Раиса. Сон тандадозь лоткась. Капшазь, талакадозь вановтсонзо кармась ваномо мезе теевсь, мейсь аварьди авазо.
— Ризнамс а эряви. Валерьян жив... Ды велеськак ней оймась. Бедняктнэ пек кеместэ сюлмазь советэнь властентень. Коть сюпавт минек велесэ аштить прявтокс, яла теке виесь ней минек ено.
Авась чаравтнесь прясонзо ды яла кортась „истя, истя“. Раиса кедензэ путызе аванзо лавтов лангс ды сорновт вайгельсэ пшкадсь:
— Авай, мейсь аварьдят? Ведь тетям таго карми машнетеме.
Авась стясь таркастонть, нардынзе сельведензэ, сыргамсто кортазевсь.
— Алкукс, сон а мери аварьдеме... Раиса, тынь вейсэ ярснеде. Седе а тошнаи Астакангак, — ды лиссь комнатастонть.
Раиса столь потмосто таргась тарелкат, чашкат. Мейле велявтсь Астакан енов ды мерсь:
— Тусь мелзэт минек кедьсэ?
— Да. Мон прок эсинек кедьсан, Раиса. Посиба, пасиба тенк.
— Тон месть, Астакан? Минь теевинек прок лелят сазорт, маласо ялгакс, — визьдезь ладсо мерсь Раиса, ды кармась ярсамс пурнамо.
Сынь ярсась кашт молезь.
Ярсамодо мейле Раиса совась лия платиясо. Куш [ 53 ]аволь партнэде лангсонзо ульнесь платиясь, яла теке ванькс ды куратнасто аштесь мазый рунгонзо лангсо. Менель пона сельмензэ пейдезь пеедсть Астакан икеле. Бути авольть чулксете сельмензэ, улевель шумбра ды... аволь уле седейсэнзэ Аганя, сестэ Астакан веньстевлиссе кедензэ Раисанень ды меревель: „Раиса, мон тонь вечктан... Вечкимак моньгак“...
Астакан кувакасто укстазевсь, прянзо нолдызе алов ды визьдезь ладсо кевкстизе:
— Тон ков бути сыргамо арсят?
Раиса шаштсь малазонзо ды веселасто пшкадсь:
— Мон тонь ветятан больницяв... — молсь зеркаланть икелев, кекшинзе черензэ пацянть алов ды сынь сыргасть.
Ошонь ульцяванть сынь мольсть апак капша. Астаканнэнь стака ульнесь ваномс чинть каршо, секс Раиса мерсь, што сынь больницяв молить садонть пачк. Сон саизе Астаканонь кедь алдо ды садонь экше таркаванть молезь пачкодсть больницянтень.
Больницясо Раиса кевкстизе Астаканонь:
— Учотан?
— Пачкодян ськамон, Раиса, — отвечась Астакан. Эсь потмованзо арьсесь: „Паро бу улевель учовлимимдеряй...
— Сестэ мон туян, — пшкадсь тейтересь, ды тусь.
Астакан ськамонзо кадовамодо мейле арьсесь эрьва мезьде, эрьва кода. Сон арьсесь эсинзэ кудо юрттонть: Ули-паронь кисэ судямодонть. Икеле пелев Аганянь марто семиясо эрямодонть. Ды сех пек кудонь кардазонь пурнамодо. Теке марто кепетець а мацьтявиця кежесь Макин лангс. Ансяк сон эзь чаркодть ды мелезеэяк арасель чаркодемс, мекс Макин прясто пилькс советэнь властенть кисэ. Ледсь мелезэнзэ, кода Макин кавто колмо иеде икеле прянек-пильгенек чавсь советэнь властенть каршо, эсь прянзо эзь жаля... Ды теке марто ледсь мелезэнзэ Мотай, кона пингезэнзэ пиштсь нартимкс сэпев эрямосонть. Эзь ней оля-чи, эзь штюпа [ 54 ]таньтей, пекень пешкедемс ярсамо-пель. Астакан арьсесь мезть ней карми тейнеме Мотай? Видевтезэяк малав арась... Ломанть коть видсть. Сынь получасть государстванть пельде лезкс ды сокарить модасост, конатнень эзть сато видьмест, заемить, путыть модарькат, макснить чачк видемс модат. Арьсить лисемс нужастонть. Сонзэ мельс ледсь Лена, коната кадызе эсь родной велензэ, — тусь, ков сельмензэ неить... Паряк лиси ломанькс!.. Те шкастонть панжовсь кенкшесь ды серьгедизе врачось.
Врачось илиштиньзе сельме керьтнень, ды дивазь мерсь:
— Здорово запустил, парень... Э-э... у мордвов не глаза, а черт знает что, трахома вечная! Ты скажи, кто тебе набороздил внутри?
— Ворожейка, сахором, — отвечась Астакан.
Врачось больше эзь карма кортамо, сайсь сэнь-кев ды вадиньзе сельтнень. Кирвайсь Астакан. Лондаць мастор алов. Сормизе пуярмонзо, кирмицявсь. Врачось кедезэнзэ тонгинзе рецептнэнть, омбоцентень нерькстась вата.
— Выходите. Вызовите следующего, — пшкадсь врачось.
Астакан кадовсь кенкш удалов. Панжсыньзе сельмензэ, сельведь валсыньзе ды паметень маштомс сэви. Оконики лисевсь кустем пес, тосо чи валдо, сельтне а панжовить. А ков молемс. Майшсть превензэ. Таймаскадозь неждясь стенантень.
— Астакан, мезе теевсь? — марявсь содавикс Раисань вайгелесь. — Мон содынь истя лиси мартот, секс велявтынь учомат.
— Мон а повнян кода лисинь тей, майшсь дарманом, майшсть превен, — Астакан кавто кедьсэ сювордыньзе сельмензэ ды кукорьгадсь. Раиса саизе кавол алдо ды тусть. Кияванть молемстэ Астаканонь пилес марявсь: „однэть эщо, уш сави майсемс. Козейкась вадря, а визьдияк мартонзо“. Но кортамотнень каршо [ 55 ]конасткак эзь отвеча, прок а сыньдест кортастькак, прок сынь эзть маря. Кашт молезь пачкодсть кудов.
Те чистэнть саезь Раиса теевсь Астаканонь мельга якицякс.
Кода бути весть Раиса каясь Астаканонь сельмес надобия. Лись кустим лангс ды арьсезевсь: „лелям мирьдекс эзизе кучт ли те ломаненть монень Повняса, кода эщо вишка пингстэ, налксемстэ лелям тукшнось тень покш кудат. Вана уш покш ульнинек, кода сон тусь Сибирев прянь трякшномо, мерсь: „Иля аварьдть, мирьде теть кучан“. Те, намо, пеедсь сон сестэ, ней мон кода бути тонадынь эйзэнзэ, сюлмавинь те ломаненть марто“...