Эрямос совамо/Стака иетнестэ/10
X.
Ошонь эрицянь орта лангсо аштесь Астакан ды яла эзь снартне валгомо улавстонть. Пулев кияванть самсто истя пульсэ вадевсть сельмензэ, кодаяк а панжовить, мик канзердыть; сон кувсезь нартнесь эйсэст кодстонь нуласонть. Калиткастонть лиссь кудряв, раужо сельме тейтерь. Сон ульнесь а пек сэрей, куя. Кругловой штекасонзо яминеть. Мазый турванзо прок якстере жомка, ашосо карксазь. Оршазь ульнесь ожавтомо платиясо, цитнесь сэрей мештезэ. Астакан эщо яла эзь варштавт. Уряжось вансь тейтеренть лангс, прок арьсесь: „те эли а те кудось?.. Адресэнь коряс прок те“...
— Мезе тенк эряви? — човине, чевте вайгельсэ пшкадсь тейтересь. Астакан силой варштазевсь. Сон [ 49 ]ульнесь а эсь енов молиця. Пулев, тоштя, сельмензэ нулковт.
— Станислав Захарченко тесэ эри? — пшкадсь Астакан.
— Тесэ, — отвечась тейтересь.
Астакан таргизе зепстэнзэ Валерьянонь серманть ды венстизе тейтерентень. Тейтересь варштась канвертэнть лангс ды мик пижакадсь.
— Валерьян! — ды ношкстась кудов.
Аламо шкань ютазь лиссть семиянек. Сонсь Станислав панжизе ортанть. Тейтересь ды авась мольсть Астаканонь малас. Кардайсэнть тейтересь кундызе Астаканонь кедьте ды мерьсь:
— Валк, мон тонь ветятан кудос, — тейтересь яла эзь нолда кедензэ.
Астакан виздезь ладсо сорнось, ды кода ушодсь валгомо, — марявсь тензэ эрьва чирькамось а истя.
— Вана тей, витев — пшкадсь тейтересь ды кирьдсь кедензэ Астаканонь кавол ало. Совасть кудов. Тейтересь озавтызе Астаканонь ды сонськак озась ваксозонзо.
— Неяви, пек сэредить сельмет, — кортась тейтересь.
— Од шкастон вана эль сокоргадан, — отвечась Астакан.
— Аштек аламос, — пшадсь тейтересь ды лиссь.
Азор авась чарась Астаканонь уряжонть перька. Кевкстнесь Валерьяндо. Азорось чамдась сюронть.
Комнатась ульнесь ванькс, кияксось красязь, вальматнесэ занавест, столенть лангсо столешник, цецят. Астакан арьсезевсь: „парсте эрить, мейсь тусь роботникекс Валерьян“. Се шканть совась Станислав Степаныч. Сон кашт молезь озась ваксозонзо, кортазевсь:
— Ну, Астакан, значит лечамо сыть. Эряви. Кармат эрямо минек кедьсэ, — Станислав комась аламодо, кедензэ путыньзе кумажанзо лангс ды ванны Астаканонь.
[ 50 ]— Стака эрямось. Революциянть ютавтынек, азорт арасть, вана заводтнэ яла а нолдавить. Комсь ветее иеть тесэ роботан. Туемскак арась мелем. Ламо тусть велев. Мон арьсян учомс, кода карми роботамо эзь заводонок. — Станислав таго варштась Астакан лангс. — Кода тынь Валерьян марто теевиде однасумокс?
— Эрямось теимизь, — отвечась Астакан. Сон ушодсь евтнеме. Станислав тень эзизе марсе церанзо пельде. Ней натой апаргадсь. Обидявозь ледсь мелезэнзэ Валерьян.
— Нужась муи ялга, — мерсь Станислав ды Астакан лангс варштазь стакасто укстась. Мейле варштась перть пельга комнатаванть ды аламос чатьмонемадо мейле пшкадсь.
— Вадря теть тесэ ули. Виемат аламодо, мольдян заводонть ванносынек. Марчнэнь ушодсть урядамо вакстонзо...
Астакан чатьмонезь комавтызе прянзо ды а тонадозь таркасо визьдеманть марто сюворясь суронзо, полавтнесь тарканзо. Станислав стясь ды туемстэ мерсь:
— Валске Раиса ветятанзат больницяв, — кортазь лиссь комнатастонть.
Астакан нувсесь. Штобу иляст фатя, сон тейнесь эрьва мезть, ансяк панемс удомась. Раиса совась се шканть, зярдо Астакан кавто кедьсэнзэ езась сельмензэ
— Чулкситить, Астакан? — пшкадсь Раиса, молсь малав, варштась сельмезэнзэ.
— Кинетить, — отвечась Астакан мызолгадозь.
— Зярдо тон ужинат, мон теть ацан тарка, — пшкадсь Раиса.
Тайтересь кандсь ярсамс ды кармась ацамо.
Раиса эзь капша ацамо, сон чевтемтнесь, рестеесь тодовонть, алксонть. Ацамсто кортась:
— Эринек седе парсте. Ней ойнанть ды вачо иенть [ 51 ]марто сэвинек. Ансяк вана мезе неят, некетьнень тетям кадыньзе. — Раиса озась коник пентень ды вансь Астаканонь пондакш прянтень ды месть буту арьсесь.
Астакан айгинзе икельдензэ ярсамо-пеленть ды шаштсь стольстэнть.
— Аламо ярсыть, Астакан. Тесэ тонеть эряви виемемс, — Раиса пурныньзе столенть лангсто ярсамо пеленть, нардызе столенть, таго витизе тарканть, ды Астаканонь вакс молезь пшкадсь:
— Мать монь таркас. Проштяй валскес, — мерсь Раиса туемстэ.
— Валскес. — отвечась Астакан.
Раиса лиссь потазь ды кенкшканть лисемстэ мельс паросо мызолдозь варштась Астакан лангс.
Астакан мадсь, рунгозо ваясь чевте перинантень.