Эрямос совамо/Андрей Понксарев/6
| ←V-це пелькс | Андрей Понксарев (1936) by , edited by Лукьянов А. VI-це пелькс |
Андрей Понксарев (оглавление)→ |
| Т. А. Раптанов. Эрямос совамо. Ёвтнемат. — Мокшэрзянь государственной издательствась, Саранск, 1936. — с. 94—97 |
VI
Ютась колмо иеть. Андрей кода понгсь ютавтсь распутной эрямонзо. Ламоксть орголесь козейканть эйстэ, ламоксть велявтнесь мекев. Эйкакшось кассь шумбрасто, яла теке эзь витевкшнев Андреень мелезэ Валя содась Андрейде ламо берянь тевть, яла пеняцясь. Сестэ Андрей туиль симеме, эли салава туи кодамояк районов роботамо.
Меельсь шканть Андрей якась фотографияв тейтерь марто ды карточкатнень кучинзе лелянстэнь, сермадсь: „кадса ташто козейканть, тень сайса“. Весть Андрей совнозевсь. Валя эйкакшонть марто озась икелензэ ды энялдозь пшкадсь:
— Андрей, оймавт, мон пешксесан, те церась касы, — энялдсь Валя. Валя эрьва кода арьсесь семиянь ладонть кемекстамо. Андрей яла калавтсь.
Валянь самодо мейле Андрейнень а кода ульнесь кадовомс районсонть роботамо. Тейтересь уски эстензэ, Валя эстензэ.
— Адя, Валя, монь шачума велев, — ладсесь Валянь, сонсь арьсесь козоньгак кадоманзо ды саемс тейтересь. Валя согласясь, ансяк бу эряволь семиясо, кода эрить ломанть, веселасто, вейкень-вейкень вечкезь, мелень ванозь, эйкакшонь кастазь.
Тейтересь а нолды. Андрей кортась:
— Ильтяса ды велявтан, розвод саинь уш.
Согласясь тейтереськак. Андрей сермадсь серма колмонест лелятненень, сы инжекс. Ве лелясь содась Андреень вейке козейка, омбоцесь содась омбоце, колмоцесь — колмоце ды эрьвась кучсь серма се [ 95 ]козейкантень, конань сон содасы, тердсь инжекс, сермадсть — сы Андрейгак.
Ки лангсо Андрей марто теевсь покш а паро. Ве станциясо савсь теемс пересадка ды аштемс савсь кавто чить. Сон лись станциястонть ошов. Кенгшнэ лангсто карадо-каршо вастсь ташто, умок кадозь козейканть марто. Андрей курок кекшизе чаманзо ды ютась кинть вакска, тусь нилеце классонть енов. Козейкась ульнесь багаж марто, эзизь нолда вакзалонтень, кучизь нилеце залонтень богажнойс. Андрей варштась: козейкась моли мельганзо, а ков кекшемс, совась отхожеев ды тосо аштесь знярдс козейкась эзизе макст багажнойс багажонзо.
Кайсь прязо Андреень. Сон содась: козейкась моли то енов, ков молить сынь ды эщо ве поездсэ. Андрей салава мольсь Валянень ды мери:
— Течи а туевдяно, арасть таркат. Тон аштек теск, мон молянь ошонь станциянтень, нейке аран очередьс.
Валя седейшкава кемизе. Но сон чокшне кармась содамо, што билетнэде ламо. Валя машнетсь эйкакшонть марто вень перть апак удо, сельмень апак коня. Андрей валскес симсь пивнойсэ ды саськак иредьстэ. Валя кармсесь пеняцамо, Андрей чикоргавтыньзе пеензэ. Валя срамонь а теемань кисэ општ мольсь. Салава тусть сельведензэ.
Эсист станциясо лелязо учось подвода марто. Ансяк поездэсь лоткась, Андрей ливтнесь вештянзо, остаткакс ливтизе церанзо, вастызе лелясь. Лелясь радувакшнось, кутморясь, палсесь Андреень, палсесь эйкакшонть, здоровакшнось Валя марто.
Кудов пачкодемстэ Андреень мелсь ледсь: „ведь тейтеренть карточкась лелянь стенасо. Валя таго карми севномо. Коть лелятне пингстэ аволь эряв“. Кардайсэ тошкадсь лелянтень:
— Седе курок совак, кекшик карточканть, — сонсь Андрей ертовсь Валянень.
— Вана сынек, — ды эрьва мезде евтни. Лелясь [ 96 ]ертыньзе ождятнень, совась кудов. Карточканть капшазь кекшизе столь потс.
Ушодовсь вастомась. Симить, радувакшныть. Валянь мельскак ульнесь паро. Вастызь парсте. Аламо шкань ютазь лелясь таргизе столь потсто тейтерьнень карточканть:
— Уряж, ванта.
Валя ужаксь, такода новольсь. Прась лангозонзо сталмо. Андрей совась иредезь, турвастонзо новольсь ождяшка слюна, курго уголсонзо човт.
— Лоткак ведьма! — стукась столенть. Валя ризназь авардсь. Ней уш алкукс фатясь, мартонзо а эряват.
— Леляй ильтимизь мекев, еман мартонзо, — энялдсь Валя.
— Ступай, сатана! Саты, пидик оймем, — рангсь Андрей.
Ломантне, конат ульнесть, срадсть. Эйкакшонть марто тусь Валяяк. Чопонь пелев окольцясто васодсть кавто од авинеть, оршазь куратнасто, ош ладсо. Лоткасть сынь ды кевкстнесть вейкест-вейкест, косо эри истямо ломань. Ансяк остаткань пелев чаркодсть, сынь кавнест вешнить Понксаревонь. Яла теке согласясть молеме тензэ.
Кода аватне совасть, кудосонть ульнесть колмо-ниле ломань. Андреень бозакадозь сельмензэ вастасть содавикс аватнень кежей вановтост марто.
— Тынь, таскушкат, косто?! Лиседе! Монь козейкам вана... — кепедизе карточканть.
Рузонь авинесь Таганрогсто мольсь малазонзо ды пшкадсь:
— Жалкое существо. Тебя оплевала жизнь. Ты спустился в бездну, эх!..
— Аха-ха-ха! — раказевсь Андрей. — Черенк кувакат, превтне нурькинеть... Лиседе! — Андрей сайсь бутулка, арьси ертомо.
— Уливлитькак превей, истямос эсь прят аволик ветя. Кият ней тон? Кие енов молят? Кадовт. Минь [ 97 ]эстенек семея мутано, тон пужат, лемень кундыцят а карми улеме, — ды авинетне тусть.
Валскенть Андреень прясь сэредсь. Сон арьсесь ледстнемс мезе ульнесь исяк. Ламо эзь повня.
— Молян лелянтень, евтнеса, — пшкадсь эстензэ.
Лелясь аштесь столь экшсэ. Андреень совамонтень прок эзь фатяяк, эзь варштаяк лангозонзо. Андрей прок кельмень чавовт новольсь столь пентень.
— Леляй, косо Валя?
Лелясь стясь столь пестэнть ды лиссь кудостонть. Уряжось икелензэ ердсь Валянь пельде серма ды кашт молезь лиссь. Андрей ловнызе серманть: „Тон нарьгить весе минек лангсо, наргить монь лангсо ды эщо арьсят маньчеме лият. Проштяй, эзинь сода, што истямат. Истямо семеясо мон больше а эрицян“. Андрей сювордызе серманть мештезэнзэ ды тусь омбоце лелянтень. Лелясь вастызе истяжо, кода васенцесь. Тусь колмоценть, сеяк вастызе истяжо, кода кавтотне. Тусь ялганстэнь. Ялгась эзизе макст кедензэ, эзь здоровакшно мартонзо. Андрей кадовсь ломань юткс ломантеме.