Эрямос совамо/Андрей Понксарев/5
| ←IV-це пелькс | Андрей Понксарев (1936) by , edited by Лукьянов А. V-це пелькс |
VI-це пелькс→ |
| Т. А. Раптанов. Эрямос совамо. Ёвтнемат. — Мокшэрзянь государственной издательствась, Саранск, 1936. — с. 91—94 |
V
Андрей кенярдозь, мельс паросо валгсь поездстэнть, ливчанясто тусь ялго колоньгемень километрат Анфисанень. Сон мезекскак тень эзь путо, ансяк содась вейке — вечкемс ды улест ламо сонзэ вечкицянзо.
Анфиса апак учо вастызе Андреень. Андрей капшазь евтнизе, што Анфисанень эряви сыргамс тонавтнеме. Анфиса трокс варштась лангозонзо ды пшкадсь:
— Тонтемет содан! Бути арьсят улеме ялгакс, кадовт. Валянь — ялгам, кона марто ютась эйкакш пингенэк, тонь лангс а полавтса, — вырк велявтсь ды тусь. Чополгадсть Андреень сельмензэ, талакадсь. Превензэ велясть. Велязь лиссь велестэнть тестентень.
Тестень велентень эщо ульнесь васоло. Вень чоподась копачась коштонть. Аламо шкань ютамс сельмс нерькстак — а неяви. Андрей васов кадызе кинть. Васня арьсесь пачкодемс видьстэ, кивтеме, курок плутаявсь, емась енксозо. Валксь кодамо бути сэрей латкос, чоподанть марто неяви, латкось седеяк сэрей, крута, севонь каладовкст. Латконть потмакссо лыман, а таргави пильгезэ, сон сизесь, майшсь моцезэ, чиремсь каладовксонтень ды вайгельсэ видькстась эстензэ:
— Чаво прясь спокой пильгтненень а максы, — ды тейсь таргамс. Пильгсэнзэ ведесь ботьмождсь.
Андреень паметезэ эзь машт. Таркастонзояк эзь сыргавт ды нать эзь снартне сыргамояк. Кедензэ пильгензэ новольсть, рунгозо лавшомсь. Кунст ашти лымансонть ды мездеяк апак арьсе, сельмень апак конштне ваны раужо кошмасо копачазь менелентень. Менельстэнть лиясто аламодо срадыть пельтне ды те юткстонть Андреень чамас пры тештень тюжа валдось. Перьканзо ульнесь сэтьме, а куш а каш.
[ 92 ]Латконть эйстэ а пек васоло Жабинань паксянь стан. Сокиця трактористнэ валскень экше коштсонть тантейстэ удость. Паксянь станонть ванстыцясь шумбра, эрикс ломань Федот лиссь ведра марто, домкасто таргизе оймензэ экшесэнть прок ливчакадсь. Варштась аштиця кельме трактортнэ лангс, соказь раужо моданть лангс ды тусь латконтень ведьс.
Андреень маласо ульнесь лисьма. Федот ютамсто фатясь: болотасонть таго мезе жив. Путызе ведранзо, ваны, диви. Малав молемадо мейле содызе, те ламань эль тарны. Сон кепидизе кедензэ лангс ды ливтизе станонтень.
Теде мейле курок стякшность трактористнэяк, пурнавсть Андреень перька ды ушодсть кевкстнеманзо. Андрей эщо эзь чаркодть косо ашти, эзь снарт валонь панжомо, ансяк чаравтнесь прясонзо, аулясь кедьсэнзэ.
Федот кильдсь алаша. Андреень озавтызе.
— Вельсоветэв? — Федот велявтсь Андреень пелев. Андрей стакасто велявтсь келензэ:
— Терентий Захаровичнэнь...
— Знакомой теть? — Одов кевкстизе Федот. Андрей комавтсь прясонзо.
Терентий талакадсь, кода неизе содамонзо. Машнитсь, кевкстнесь Федотонь. Сон таргась вина, кайсевтизе содамонть, оршневтсь лия оршамот, пижнесь:
— Не дай бог содамс кить чавизь, паро а неить!
Теке марто прядовськак.
Омбоце чинть, обедтэ мейле, тестенть одижасо юты ульцяванть. Косто а косто каршонзо понгсь содавикс тейтерь, конанень эщо тунда алтась улемс мирьдекс. Андрей велявтсь, кекшсь кардонть экшс, учизе, кода юты тейтересь. Андрей сеске-жо исковизе мезть тейни тесэ те тейтересь. Сонензэ евтнизь, сон сась эйкакшонь тонавтомо ды буто эрямо ладить эйсэнзэ сонзэ тестентень. „Ай авакай“ — арьсезевсь Андрей. Варштась тейтеренть мельга, — алкукс совась Терентийнень. „Рудазов тевесь“ — пшкадсь эстензэ Андрей ды тусь велестэнть.
[ 93 ]Терентий кувать учось Андреень. Пельдензэ совет учось — нолдамс-ли эрямо учительницась, а сыть ли сынсь эрямо велев. Эзь учов. Ансяк чокшне кие бути пачтясь куля, Андреень неизь станциясто, тусь кудов. Кирвайсь Терентий, машнитсь аванть лангс:
— Сон мошенник, сатоць совестезэ саемс остатка паро оршамом! Сась манимизь ды утю-тю! Те остаткадо. Иляк чалксе монь кенкш лангс пильгет, монгак а молян. Куть месть тейнест! — Терентий лоткась козейканзо икелев ды эзь мерь молемадо ошов.
Андрей эщо эзь пачкодть квартирас, евтасть, Валянь стака ежозо. Седе мейле Андрей овсе эзь моль Валянень, мик ознось: „Куловоль бу шачтамсто, меневель оймем эйстэнзэ“ ды тусь симеме пивнойс. Валя пек майсесь, лездыця кияк арась. Сон вешсь лезкс, кияк арась. Больницяв а пачкоди. Ансяк чоподь енов азор авась ды шабрань ава ветизь больницяв.
Ирецтэнть марто Андрей согласясь молеме кудов ды доконямс Валянь, кияк а карми содамо, шачтамодо кулось ды паро. Кода Андрей мольсь кудов, орта лангсо эщо пижнесь:
— Валя седейнем, седей пелькскем, шумбра эйкакш эрявсь. Эх, а эрямс тонтемет, — прянзо кайсесь аварьдеме. Кудосо евтасть, што Валя больницясо, сон лабордсь: „те седе паро, тосо седе курок венеми“.
Валскенть Андрей арьсесь роботамо молеме сехте икеле. Яла теке тосо уш роботниктнэ ульнесть ды пек кортасть Андреень роботадонть. Андрей чувтомсь кенш лангс ды нолдызе прянзо. Роботниктнэ трокс варштасть лангозонзо, поладсть кортамост:
— Панемс роботасто!
Мирем ульнесть ве мельсэ: „панемс роботасто“.
Андрей пекстызе кенкшенть, лиссь. Орта лангсо арьсесь, ков молемс? Валянень допрок отказась молеме. Мейле аулдась кедьсэнзэ ды тусь пивноев.
Андрей колмо чить симсь, валяясь лазонь тротуартнэ ало. Ансяк ветеце чинть сон пурнась-сэрьнясь козейканть [ 94 ]вастомо. Сон пек кеместэ кемсь, што Валя кулось. Тевесь лиссь мекев лангт. Родильнясто вальмаванть Валя невтнесь эйкакшонть ды пейдезь утякснесь эйсэнзэ.
— Вейксэ пель марто фунт, — пижни вальмаванть Валя. Андрей а мельсэ пеедсь, эсь потмованзо сюдось весе светэнть.