Эрямос совамо/Андрей Понксарев/2

From Wikisource
Jump to navigation Jump to search
Андрей Понксарев  (1936)  by Раптанов, Тимофей Алексеевич, edited by Лукьянов А.
II-це пелькс
Т. А. Раптанов. Эрямос совамо. Ёвтнемат. — Мокшэрзянь государственной издательствась, Саранск, 1936. — с. 83—85
[ 83 ]

II

Андреень кудосо эрямозо мольсь а евтавияк кода парсте. Но кудо ушосо Андреень тевензэ мольсть эсь кияваст. Сеедьстэ якась командировкав. Райнсто туемстэ, ладсесь чи ды кодамояк учительница учось се чинть. Сон учительницантеньгак алтась урьвакстомс. Арась, а учови Андреень пельде семиянь счасливой васень чись, секс, што уш лия районсо. Ладси кутмори лия тейтерь. Алты сень, мезе ансяк может улемс семейной счастливой эрямосо. Алты дружна, вечкема эрямо. Тейтересь кемсы ды радовазь мельс паросо аравтсы паламс штеканзо...

Андрей а стувты сетьненьгак, кона марто савкшнось эрямс прок козейка марто ие эли пель ие. Сон сермалесь районсто сермат весеме енов ды энялдсь, што бути ули ямксошка вечкема седейсэть, то кучт [ 84 ]курок серма, истямо адрес: Чибучаевский район, почта, до востребования Андрею Каяковичу Понксареву. Ледстяса одов, кучт куроксто, — тестэ курок проводясамизь Владивостоков. Ульть шумбра. Можот курок велявтан, карматан, нейке а евтави, кода парсте эрямо. Седей пельксэт Андрей.

Андрей, алкукскак, ответнэнь получась куроксто. Умок кадозь, манязь авинетне кемсть тензэ. Пестэ пес сермадылизь эрямост ды энялдсть сельведь марто куроксто велявтомадо.

Кудосо сон якась Валя козейканзо мельга. Чевтестэ, парсте кортнесь мартонзо. Лездась кудо ютконь тевень теемстэ.

Валя мельс паросо арьсекшнесь эсь потмованзо „кодамо паро ломанесь. Питне пезэ арась. Превтеметь жо ломантне ульнесть, — эсть эря мартонзо“. Валя таргсесь районсто Андреень туевть гостинецтнэнь, рамсевкстнэнь ды кортась:

— Андрей, седейнем, бути тон уш допрок отказыть тонавтнемадонть нолдамак монь тонавтнеме, — Валя якстерьгадозь ладсо варштась пешксесэ пекензэ лангс, — те а карми мешамо, — лиякс а кода. Истямо паро эрямосо — эрямс, кенярдомс. Андрей аламос арьсезевсь. Кундызе Валянь улонзо — палызе.

— Тонавтнек.

Валя седеяк радувась: „кодамо паро ломанесь“.

Весть лись истямо тев. Август ковсто Андрей получась отпуск, чокшне кудов сась иредьстэ.

— Эх, Валя, — кенгшка совамсто пижнесь Андрей, — отпуск получинь, ков мольдян оймсеме?!

Валя содась, што сон иредстэяк а азаргали. Иредстэяк мартонзо можна тевде кортамс.

— Вана мезе, Андрей, мон араселинь Московсо, неемс мелем ули. Ды ялгамгак тосо ули, тошнаинь кисэнзэ, адя Московов.

— Адя.

— Адя, — ды тусть.

[ 85 ]Кода бути весть, Московсто туемадост икеле чинть, колмонест мольсть кинов. Валя Анфиса ялганстэнь шнась яла мирденть. Андрей лангс ваномс ульнесь виев, куратной, шумбра. Сон мольсь куншкасо ды кавол алдо саезь ветясь кавнест ялгатнень.

Киносо озасть таркань апак кочсе. Валянь ялгась озась куншкас. Валя ды Андрей кавто бокаванзо. Андрей вансь картинанть лангс ды прок апак фатя яла неждясь тейтерентень. Тейтеренть чевте, лембе телазо солавтсь Андреень рунгонть. Анфиса васня чаркодевсь, што сон айги таркастонзо. Но ведь сонзояк улить ломанень чувстванзо, сонгак чиремсь Андреень енов.

Валя теде эзь думаяк ды эзь фатя, кода сынь уш сюворясть вейкест-вейкест кедест.

Московсто туемстэ неявикс тев прок арасельгак. Андрей тейтеренть лангс салава варштнесь мазый, вечкиця вановтсонзо, тейтересь истяжо салава ды прок визьдезь отвечась налксиця цимболды вановтсонзо ды паро. Валя покш мельс паросо кудостонть лисемстэ проштямсто кортась Анфисанень.

— Мольть миненек. Минек ошсо седе сэтьме, ломантнедеяк седе аламо. Андрей муи теть робота.

Валя сювордызе ялганзо кеденть ды мик паласть. Тейтересь веньстизе кеденьзэ Андрейнень ды пшкадсь:

— Андрей, — чиремтизе тейтересь прянзо, ве лавтовонть аламодо кепедизе. Кель прясо, кольневтезь поладызе кортнеманзо, — муят тень робота?

Андрей кашт мольсь. Тейтересь пейдезь велявтсь Валянень.

— Энялдт тон, Валя, — сонсь эзь нолда кедьстэнзэ Андреень кеденть ды ракась,

— Мутан, — пшкадсь Андрей.