Эрямос совамо/Андрей Понксарев/1

From Wikisource
Jump to navigation Jump to search
Андрей Понксарев  (1936)  by Раптанов, Тимофей Алексеевич, edited by Лукьянов А.
I-це пелькс
Т. А. Раптанов. Эрямос совамо. Ёвтнемат. — Мокшэрзянь государственной издательствась, Саранск, 1936. — с. 80—83

[ 80 ]

АНДРЕЙ ПОНКСАРЕВ

 

I

АНДРЕЙ эсинзэ пиньгензэ эрямс ульнесь ламо таркава: Самарсо — Таганрогсо, Уфасо — Казаньсэ, Бакусо — Батумсо, Туласо — Ростовсо. Те весе эзь юта тензэ стяко.

Весе не ютазь оштнэде мейле Андрей кармась роботамо Рав маласо, вейке а покш ошсо. Васень шканть Андрей ваннось ошонть ды перьканзо тапардавт эрямонть. Ваннось, мезть тейнить, кодат ломанть эйсэнзэ.

Се, мезе мольсь ошонть эйсэ, истя пек эзь эряво Андрейнень. Нузяксто вансь строявиця од кудонть лангс. Лоткась ды вансь, кода асфальтсэ валсть тротуаронть. Ды секе нузякс молевтьсэнзэ тусь икелев.

Видьстэ меремс, Андрей овси аволь теде арьсесь содамо. Сонензэ эрявсь мазый тейтерь, блондинка, улезэ куратной, вечкевикс. Сонензэ ульнесь васень тевекс, штобу муемс тейтерь мельс туиця, седейс педиця.

... Маштыця ломаннень те мезеяк араськак. Аволь ламо шкань ютазь сон мусь тейтерьне. Якась-тейсь мартонзо ды урьваксь лангозонзо.

Тевесь эщо а теньсэ, тевесь икеле. Кода Андрей кортась эстензэ козейкакс Валянь, сон евтнесь:

[ 81 ]— Валя, разводонь тейнема чумонть а эряви каямс ансяк цератнень лангс. Мон евтнян вейке исторя ды тон евтык эсить мелет, кие чумось — церась эли авась.

— Паро, — согласясь Валя ды веселасто пейдезь варштась Андрей лангс. Андрей аламос арьсезевсь, мейстэ ушодомс, мызолгадсь ды кармась веселасто евтнеме:

— Монь ули вейке содавикс ломанем. Сон урьваксь ветексть. Вана кунсолок. Сон ульнесь бедной, бедной. Васня лелязо силой урьвакстызе. Силой урьвакстозь кодамо эрямо? Кадызе. Омбоце лангс урьваксь, — се шканть уш ломанькс лисеме кармась. Козейкакс понгсь велень, ревнивой „Лоткак, келя, общественной роботань тееме, сайть стада“. Зняро кортнема тензэ эзь корта — лезэ арась Таго кадызе. Урьваксь колмоцеде Понгсь салыця. Козонь эрямо а молить, — пеняцить лангозонзо. Снартнесь чавозьгак. Арась лезэ. Мейле сайнесь буто подходявой. Кувать эрясть ладнойстэ. Те нилецесь салава оргодсь эйстэнзэ. Ветецеде урьваксь. Тусь ков бути. Те шкамс а содан, — эри ли мартонзо эли таго теевсь мартонзо мезеяк.

Валя варштась Андрей лангс, кувакасто укстазевсь ды пшкадсь:

— Те мень бути тамашат евтнят. Тесэ уш церась а чумо. Истят а путнойть прасть долязонзо, — ды нолдызе прянзо, арьсезевсь.

Андрей неть валтнэде кадовсь мельс парсо. Те лангс апак вано скирявсь седеезэ. Лаказь лакась верезэ. Сон арьсесь: коли а чумонды те церанть, можна видькстамс, што сон — Андрей урьваксь Валя лангс ветецеде. Валя лиссь мирьденень вечкевикс Андреень экшес.

— Тонь марто Андрей эзь ульне ли истямо тев? — Валя сельмень апак коншта вансь Андрей лангс.

Ошонь ульцяванть сынь мольсть стамбарнэ. Андрей ваннось ютыця аватне мельга ды кашт мольсь. [ 82 ]Икелест мольсь апек сэрей, эчке, куя ава. Оршазь ульнесь раужо ожавтомо платиясо. Андрей бойкасто молезь усксь мельганзо Валянь. Яла эзь кадов авастонть. Сонзэ мелезэ ульнесь неемс аванть икельде, мазы-чинзэ. Но авась мольсь видьстэ ды эзь пурдакшно кона еновгак.

Валя дивазевсь Андреень кашт молемантень. Сон кежеявтозь ладсо ноцковтызе сонзэ кеденть, пшкадсь:

— Мекс а отвечат ды ков мольдян? — Валя лоткиксэль, но Андрей келейстэ эськильдсь. Икелест молиця авась совась магазинэв. Андрей кортазевсь Валянень:

— Соватан магазинэв, паряк улить эйкакшонь экшелямс ваннат.

Валя чаравтсь прясонзо. Арьсесь меремс: „рана заботят“, но сескежо арьсезевсь: „ломанесь семейной“.

Но тесэ лись таго истямо тев: сынь ансяк пурдасть магазинэнтень, икелест молиця авась лиссь каршост. Андрей талакадозь каявсь ваномо аванть чамас, мик пупорьдясь крилицянь чалгамонь трокс. Кода маластонзо авась сыргась, Андрей фатясь, што авась вить пильгсэнть кроможды. Сон сельгсь, яходизе кедензэ ды кежевстэ мерсь:

— Адя, Валя, а эряви ваннаськак! — Андрей сыргась икелев, Валя нузяксто тусь мельганзо.

— Монь койсэ истят аватнень срамамс прясто-пильгс, конат ломаненть пингестэнзэ нельгить сехте счасливой семиянь эрямо чинзэ, конат макшосо почодыть ломанень седеенть... — Валя эзь кенерь валонзо прядомо, Андрей пшкадсь:

— Мон пек счасливоян тонь марто. Те шкас монень кияк арасель седей марицякс. Неть ниле а путной кезейкатне ютасть монь прява...

Валянь кедесь новольсь Андреень кавол алдо.

— А мейсь, Валя, апаргалемс. Эйкакшт ведь монь киненьгак эзть кадов. Тон парсте чаркодик тевенть, [ 83 ]што мон а чуман. — Андрей кундызе Валянь кеденть. Валя кельместэ варштась лангозонзо.

Валя кудосо арьсезевсь. „Стяко машнитян, Андрей алкукс ломанесь семиянь вечкиця. Вечксамам моньгак. Неяви, што пек тусь седеезэ эйзэн. Мик пели илязан туй киньгак лиянь мельс. Учи пельден эйкакш. Кадык, мезе ульнесь, мезе ютась сень а велявтсак. Паряк алкукс сон а чумо“. Валя кайсесь ды мадсь.

Андрей мекс бути стакасто арьсезь нурьгсь столенть велькссэ. Валя варштась лангзонзо одеялонть алдо, мейле чевтестэ пшкадсь:

— Вечкевикс, Андрей, мейсь истя стакасто укстат, мейсь тапат седеет? Тон а чумат. Минь карматоно эрямо парсте. Улеме кармить эйкакшт, весе стувтови. Куть тень а паро. Простятан. Сак мадть, — Валя штавтызе одеялонть. Андрей варштась куратной рунгонзо лангс, сэрей мештензэ лангс, веселасто пейдезевсь.

Сынь мадсть ды кувать палсесть.