Эрязденть арсезь (2010)/Чипаень штелькст

From Wikisource
Jump to navigation Jump to search
Эрязденть арсезь  (2010)  by Нуянь Видяз, edited by Разгуляева Т. В.
Чипаень штелькст
Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 15—16

[15]

Чипаень штелькст

ИТНЕНЬ лажнома-ордакшкалема, чинек-венек эрязкалема шкаст ютась. Пирень моданок ланга солыця ловось кадсь эсь обуцядонзо «сёрмадовкст»: покш ды вишкинедеяк вишкине, тей-тов менчевиця, прок сыре ломанень кедь ланга сант, чувовкскеть.

Модась соркстась. Молеват апак вайсе.

Эскелян кардаз удалдо саезь пиренек песэ лейненть видьс. Эскелян цяк-цяк. Сельмень апак кончтне ванкшнан тей-тов [16] менчевиця чувовкскенть, аволь умонь чудильманть, потмакска. Понгсь церепка пельксстэ теезь повне. Зепс. Маштови. Повтне, мерема, вастневить аволь чуросто. Ялганзо марто патям налксекшнесть эйсэст. Тия-тува ёмсильть.

Вешнян-мучкан седе тов. Хоп! Сельмень икеле — чоподасэнь, валанядояк-валаня, чинть каршо цивтордыця суликань штелькс. Ма-а-зый! Зярошка! Зепс. Курок седе, курок! Эно ков? Ютыя пель-ким. Бабань пеште! — мезеяк седе покш, чуросто вастневиця сельмень икелев эзь понго. Варяв колошасон эскелян седе тов. Окойники, лей-латко чирентень аламнеде апак пачкоде, икелень чудикерькс «саннэнть» потмаксто — эзь кемевеяк! — прянзо невтизе вардоньсюро. Коминь. Саия кедькоморозом. О-о! Те вана муевкс! Покш, сювозь кода човинестэ! Истямо арась Эрьмай ялганьгак. Невтьса тензэ, сявадовтсынь сельмензэ.

Текекс састо, прок черепаха, молян мекев кудо ёнов. Муевкстнэде, тундонь валдодо пешксе чиденть оймем пешксе кенярксто. Течис саты. Ванды лисян одс ды таго муян мезеяк мазый, мелень витиця, мезекскак маштовиця...

 

*  *  *

Се, мезесь сыречисэ маряви-неяви стяконь тевекс, пиже пакшантень канды седеень токнома, од содамочи маряви цяк а сырнень поколекс. Вельдензэ сон панжи кенкшенть Масторонтень, конань лемезэ — эрьва мезде пешксе эрямо. Эйзэнзэ совамсто сон неяви седе валдокс, ваньксэкс, паро ёжонь раштыцякс. Уцяскав кармат, кадовиндеряй теть истямокс седе товгак, меельце лекстямозот.