Эрязденть арсезь (2010)/Маряса тетянь лексеманзо...
| ←Чипаень штелькст | Эрязденть арсезь (2010) by , edited by Разгуляева Т. В. Маряса тетянь лексеманзо... |
Тень эйсэ «пиже шканть» мазычизэяк→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 16—19 |
[16]
| Маряса тетянь лексеманзо... |
ТЕТЯМ — агроном. Важоди Дубинькань МТС-сэ, машинань-тракторонь станциясо. Савкшны тензэ ульнемс буень весе велетнесэ, ванкшномс, кода-мезе касы вейсхозонь паксятнесэ, кодамо шумбрачист сюротнень ды канстьнень-мезтнень. Ялго а ютасыть. Буесь покштояк покш. Секскак ули тарантасс кильдтневиця лишмезэ. Бояр! Революциядо икеле истя ардтнесть ансяк сюпавтне. Каня тетям а аштесынзе! Каня аламо сындест содамочинзэ-превензэ!
Вечкан кузнемс ды таркань полавтнезь ойсемс ниле чарос, эчке
[17] Сюкпря, тети, тагояк мерян...
илёвсто кодазь, тетянь валсо ёвтазь, «экипажонтень», марямс эсь прям покшокс ды набоекс. Озан эйсэнзэ коське тикшенть лангс истя, озан лиякс, икелев, удалов... Паро!
Тарантасонь кутьмерень нежедема таркась удалга-верьга мазылгавтнезь ашназасэнь суликань лапужкайсэ. Кодат мазыйть! Кода истя, содамс, сынь теевить? Кода «педявтневить»-ладсевить илёвтнес? Ванан неть цитниця, эрьгедьёжонь пургондавтыця суликатнень лангс, ванан — лип сельмсэнь а теян. Мазыйть!
...Эйкакшчи, эйкакшчи! Кодамо цивтёрдыцякс неяви теть перькат эвтиця эрямось! Эрьва косо мазый тюст, гайтть, тевть. Ков те весе ёми? Мекс а ванстови те оймень дёлиця мазычись педе-пес?...
...Сась, редия вальмава ванозь, тетям. Ношкстынь вастомонзо. Сон перьгавты лишменть. Пельдензэ марязь валтнэде анокан тёкадемс кудопря видьс.
— Ванды, цёрам, сыргатано мартот Кайбизелев куяр мельга, — кецневтимим тетям, олгонь тюс муюконзо пачка мизолдозь. Вайгелезэ аволь алкине, аволь сэрейгак, чевте.
Стявтомс эзинь саво.
Пингстэнь тетям ливтизе кардазсто Ашнаень ды кундась кильдемензэ. Мон поцорсо кузинь «экипажонтень», озынь тикшестэ теезь озамо таркантень. Чевте. Вадря! Валскень экшеськак а маряви. Тетям прядызе кильдеманть, ливтсь кескавт, ёртынзе пильге пес ды саинзе лишменть лангс каязь кшнань ведьметнень.
...Чипаесь пачкодсь тёкшкезэнзэ. Пси. Вармань зэхельнеяк а ютни. Чуросто сравтневезь ашо, сэняжа алкс, мезде-бути нусманясто арсиця пельтнень ютксо налкси-кувтолды налсонзо келей чама чипаесь. Чатьмонить тия-тува кинть чирева вастневиця, псиденть нувара калькуракштне, чатьмонезь вастымизь Петровка вирень «нереськак».
Сатано кудов. Кадовсь пельки. Куярдо пешксе вейке [18] кескавось сюлмазь тарантасонть удалце пес, кутьмеренек удало, омбоцесь — озамо таркасо, тетянь вакссо. Мон — элесэнзан, Ведьметне тетянь кедьсэть: ноцковты састыне витев, ноцковты — кершев. Лишмесь кунсолы, эскели тов, ков мери. «Ван, те кода истя! Истямо покш, истямо виев ускицянок, сонсь кунсолы ламоксть сондензэ лавшонть, — яксить-теить прясон арсематне, — паряк, моненьгак кармавтоволь? Мекс тетям а макссынзе ведьметнень? Монгак сонзэ кондякс ветявлия Ашнаень ков эряви...»
Тетям прок маринзе арсеман.
— Кирдтя, куярнэ! — каятотсь чевте, зярдояк а сеериця, вечкеви пес вайгелезэ, ды путынзе коморозон ветямопельтнень.
Сеске тень эзь кемеве. Каня мондень те?
Кедьсэнь ведьметь. Ускса, зярдо эряви, дух виень апак путо, ве пенть, лишмесь сан ве ёнкс, эль ускса омбоценть — лия. Ван, лиси, покш цёран, лишме, кода Толяненьгак, ветяви, виеван. Маряви тень. кузинь сэрей-сэрей ватола пандопряс, ды ваныть лангозон авам. патян, ялаксом, ваныть веленек. «Ванодо, ванодо, кодамо превей ды виев Ёгань Олонь цёразо!» — кайсетить-гайгить пилесэнь та-косто верде пачколиця вайгельть.
Маряса човонезэнь тетянь лексеманзо. Шкань-шкань козкстни ды, содан, мельспародонть мизолды. Истямо уш сон, тетям. Эйкакш лангс аволь кедь, вайгельгак зярдояк а кепеди. Ней сон, паксянь коень содыця, агроном, седеем мари. ванны перьканзо сравтневезь ожолдыця товзюронь-розень паксятнень лангс, кецни маней чинтень, эрямонтень.
* * *
Те кенярксто пешксе кизэнь чиденть ледстнезь, сакшныть превзэнь кавто кевкстемат. Мезес пачкодевлинь, кодамокс лисевель уцяскам, аволь прядовояк тетянь эрямо кизэ шкадо икеле? Зяро превень ды ёжонь эрьмечнть максоволь тень. савольгак эрямс мартонзо аволь кавксо иеть, а седе ламо? Теке марто, анокан, тети, арамс икелеть кумажалангс кавксо иень перть оймень лембеть максоманть кисэ. Сынь, неть нурька иетне, ульнесть тень келей эскельксэкс эрямонь леентень эскельдямсто.
Тетям ды течинь эйкакштнень-одтнэнь тетяст... Мезе сынь, содазь, аволь вейкень пес, максыть тарадост туртов эрьва [19] чистэ, иестэ иес «начксто»-иредьстэ сакшномасост? Косто саеви, кона ёндо пачкоди ванькс-валдо эрямось истя эрязь?
Сюкпря, тети, тагояк мерян, оймеёжонь лембеть кисэ.