Эрязденть арсезь (2010)/Чатьмонезь тонавтыцят

From Wikisource
Jump to navigation Jump to search
Эрязденть арсезь  (2010)  by Нуянь Видяз, edited by Разгуляева Т. В.
Чатьмонезь тонавтыцят
Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 185—188

[185]

Чатьмонезь тонавтыцят

ИСТЯТНЭДЕ, варштындерят перькат, аволь аламо. Каштмолезь тонавтыть эйсэнек кодамокс улемс, кода ветямс прянок, зярдо стямс-мадемс, тешттне, чипаесь, пельтне, чувтотне, эсь сельменек-пиленек... А марят пельвалгак превень васень максыцянть, книганть пельде. Паряк, сонзэ вельде ломанесь лемдизеяк эсь прянзо инязорокс пертьпельксэнть ды весе Мода-масторонть лангсо?

Сисем, кадык кемень класст — те тонавтнемань [186] кузтемне. Ушодкске содамочинь кудонтень совамсто. Алкуксонь школась — эрямось, сонзэ сумборя ды чипай валдо чинзэ, телензэ-кизэнзэ, сюронь чачтыця-раштыцяпаксянзо... Эрьванть эрямозо эсензэ. Эрьванть школазояк эсензэ.

Бакусь — азербайджан раськенть прявтошозо. Тесэ кортамаль малав весеменень сынт кельсэ. Арась, тевесь аламнеде лиякс ашти. Лавкасо, киносо, автобуссо ламот кортыть рузокс. Мезе парось, кенкштнень ваксс, вельксс понгавтозь лем марто «лазтнэ» ды «лазнэтне» сёрмадозь азербайджанонь ды, седе вишка буквасо, рузонь кельсэ. Те тукшны мелезэнь.

Тукшны вана мекс.

...Валгинь келей кузтемаванть ды ютынь вокзалонь каршо таркантень. Самай тесэ аволь умок эль эзимизь норгсекшнэ азербайджан-алятне. Киров лемсэ курованть апак капша эскелян важодеме. Валскень коштось экше, ванькс. Вечкеви. Якицятнеде зярс аламо. Шкам ули. Молемс а кувать. «Микшнян» сельмень. Вана «Горный институтонть» вакссо кавто этажсто кудонть кенкшензэ велькска мазыйстэ артозь-теезь кавто букват «ЭТ». Превть яжамс: мезе те, а сави. Седе алга, кадык ламоксть вишкинестэ, ёвтави: «мясо». Совак, кочкак, рамак сывель. Кодамо мелезэть туи.

Эскелян седе тов. Содан, — тонадынь уш — эйстэнь керш ёно апокшке ларёк. Конясонзо эседензэяк келей «лаз». Сэнь. Ланганзо букватне — «Сулар» — ашот. Тердить сынь симемат явавтомо. «Су» — ведь, «лар» — ламо, эрьва кодамо. Рашид, мизолксонь явшиця цёрась, нурти теть куш кемень стопкат! Ансяк трешникеть улезт.

Летиндеряй мелезэть салтонь эли лия кодамояк кал, икрыне, совак «Балыкс». Кодат калт ансяк а микшневить эйсэнзэ! Костязь, чентязь, салтозь, салтомо... Соват — чинеденть пешкедят. Никсек зяро мелеть, ярмакт тень кис пандомс а эряви. Монь эзимизь тонавто тантеень кочксеме, секскак те, суликань кенкш лавкантень совсинь ансяк весть, варштамо — мезе те «балыкесь»?

Зярс ютаса вокзалсто театрас вайгельпешка ютконть, вастован «Чорек» кшинь лавканть марто. Киров лемсэ куростонть пурдынь витев. Те курось келей, кавто ёнганзо сэрей умонь шкань кудот. «Имени Мирзы Фатали Ахундова» — сёрмадозь вейке кудонть стенас чавозь кшнинь таблицасонть. «Юноенек» каршо — Оперань ды балетэнь театрась. Сонгак Фатали Ахундов лемсэ. Кудось ташто. Мазыйгавтозь барокконь стильсэ, [187] нильтякавтыця «педякайсэ». Рузокс — лепкасо.

«Операс» апак пачкоде мизолды тень, маряви, вечкевикс «Китаблар» лавкам. Вете этажонь кудонть васенцеде этажсонзо микшневить книгат. Сынст марто чачинь-касынь, ульнесть тень аволь ансяк оякс, нежекс, превень максыцякс стака, «вачодо пешксе» шкатнестэ. Книгатне казнесть тень ламодояк ламо кеняркст, ламо вастневемат ды кортнемат превей-паро ломань марто. Ды кода а совамс тезэнь, улиндеряй шкат?!

Ким прядовома лангсо. Апак пачкоде молема тарказон — киоск. Эйсэнзэ микшневить газетат ды журналт, азербайджанонь ды рузонь кельсэ, маркат, конвертт, блокнотт... Совсян тезэнь аволь чуросто. Сайнян «Бакинский рабочий» газетанть. Умок теевинек содавиксэкс Илхам микшницянть марто. Мелезэнь тукшныть муюконзо: раужот, пондакшт, пшти пест малав пилес.

— Салам алейкум! — совамсто арсян шумбрачи азоронтень.

— Алейкум салам! — «тонетькак шумбрачи», мери каршон, ды ванан уш венсти вечкевикс газетам.

Мелезэнь тусть аволь ансяк Илхам ды «сюпав» муюконзо. Киосконть лемезэ — «Азатлык», рузокс — «Свобода», эрзякс — «Олячи».

...Кудосо, сырепатянь цёранзо книгаст ютксто понгсь кедезэнь азербайджанонь кельсэ «Букварь». Сон, куротнеде мейле, весемеде кемевикс чатьмонезь тонавтыцям. Панжия. Ванан. Вай, ды тесэ содамочинь лисьмапря! Эрьва картинканть ало — вал чачома ды рузонь кельсэ, чарькодеви. Зярыяксть книганть панжтнезь, карминь содамо аволь аламо азербайджанонь валт.

 

*  *  *

Пингем перть янксян, мекс эзинь кундакшно сестэ, Бакусо, седе домкасто тюркань ламо кельтнестэ куш вейкень тонавтнеме. Мезеяк аволь аште кемгавксово иесэ теемс сонзэ, эрзянь ды рузонь кельтнеде башка, колмоце келекс, седе келейстэ кармавлинь содамонзо мода-масторонь культуранть. Келя, чиемстэ васенцекс финишс сакшны васень эскельксэнть ёнсто, седе ливчанясто теицясь. Эрямонь кияванть чиемстэяк теке: изни од шкастонзо эрязасто ды парсте ушодыцясь. Аволинь тее ильведькс, теевлинь од шкастон азербайджанонь келенть марто оякс.

...Ведьгеменде ламо иеде икеле васенцеде неия Саран ошонть.

[188] Лазонь тротуартнэде, кавто-колмо автобусонь маршрутнэде ды чувтонь кудотнеде башка ламо-мезе эйсэнзэ полавтовсь. Покшолгадсь сэрьс-келес. Эзь полавтово вейкесь: эзь тееве эрзянь ды мокшонь ошокс. Ульнесь рузонь, рузонсекс кадовськак. Эрзякс кортамо, иля арсеяк, — а марят. Мазый кудотнень конясто, кенкшест вельксстэ а неят эрзянь пельвалнэяк. Азербайджанонь келесь, зяроксть снартнизь, эзь нилеве. Нилицясь васня шилтаететсь, мейле — кокнозевсь. Эрзянсенть вана...

Ниле класст прядынь эрзянь кельсэ. Рузонсенть макснесть кода «предмет». Ветеце классто саезь тейсть мекевланг: весе тонавтнемапельтнень тонавтыцятне нерьгсть, ведрасо кайсесть удемезэнек рузонь кельсэ, эрзякс — ансяк эрзянь келень уроксо. Сеяк таргозонзо весть-кавксть. Истямо лувсо тевенек мольсть сисем классонь прядомс. Кавксоце-кеменце классо эрзянь келенть тонавтнинек уроктнень ютксо ютко шкасто, коридорсо ды школадо мейле. Мик физкультурантькак ютавтсть рузокс. Раз-два, раз-два... Чийнек рузокс, кирнявтнек рузокс, ланчик рузокс, лексекак рузокс. Рузокс, рузокс, рузокс...

Ней эсь прям лован чачома келем аволь беряньстэ содыцякс. Косто, кодамо содыцян! Сеедьстэ сакшны мелезэнь: кодамокс улевель, максовольтькак тенек весе пелькстнэнь-предметтнэнь эрзянь кельсэ кемень иень перть! Кода сон гайгевель, кодамо сюпав улевель валсо-мельсэ. Кеман, истя сеедьстэ, кода ней, валкстнэс аволинь лопавтне. Сынь, тиринь валтнэ, ламот-ламот, муевельть таркине превпаргинесэнь ды, зярдо эряви, ойсевельть мельцек-мельцек конёв кикстнэнь лангс. Ней вана...

Бакунь ульцятне-куротне лездакшность тень куш чульть-чальть содамс азербайджанонь келенть, Саранонсетне, куш череть раздить, — лездыть куловтомс эрзянсенть.