Эрязденть арсезь (2010)/Олячинь аразенть "танстезэ"...
| ←Чатьмонезь тонавтыцят | Эрязденть арсезь (2010) by , edited by Разгуляева Т. В. Олячинь аразенть «танстезэ»... |
Гипноз→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 188—191 |
[188]
| Олячинь аразенть «танстезэ»... |
Чикуншка. Ютко шка. Срадсть важодиця ялган кие-ков. Кие кудов, кие вейсэнь ярсамо таркав. Мон ковгак а якан, ярснян теске, «зепсэ», сценанть ве ёно нупальнесэ. Минденек башка антрактсто тей свал совсить актёртнэ. «Стуворнэм» свал мартон: розень кшикочом, кавто-колмо чурькапрят ды конёв потс тапардазь салнэ. Чурькан ламбамот, аволь кежейть, потмост сэньшть мерить. Истят [189] Ордань-буесэ эзинь некшне. Кшинь-салон нилевемга кечинестэ копорян крансто нуртязь ведь. Тантей салсо почодозь кшись! Порян мельспаросо. Ламо иень перть вачочинь кирдематнеде мейле истямо «стуворось», эйсэнзэ кшитне-салтнэ, марявить тень инязоронсетнедеяк сюпавокс.
...Театрас васенцеде совамодон мейле ютась ков. Важодеман кис эрямосон васенцеде макссть тень ярмакт. Важпитне. (Кеман туи, совавтындерятано «зарплатанть» таркас истямо вал!). «Менюм» аламнеде полавтовсь. Совасть эйзэнзэ, велень коряс, асодавикс танстть-растт ды чинеть. Вант, раман ашо чевте, теке толгань тодовне, сюкоро, вант, ламбамо чайнеде копорян... Аламонь-аламонь пачкодинь мик минтай калонь икрас! Тесэ сон мезекскак а ловови. Питнезэяк трёшникть. Мекс а рамамс?
Састь ялган буфетстэ-косто. Вейкесь мерсь, сайнесь та-кодамо бифштекс ды харчо; омбоцесь — суп с фрикадельками ды биточки. Седеяк сеедьстэ марсеви «котлета» валось. Мезде кортыть, сынсь содыть. «Гуляш», виде, марсекшнынь. А «котлетась»... те мезе истямось? Мезе марто сонзэ ярсыть? Кодамо чинезэ? Котлета ды котлета...
Весть ютко шкасто лисинь ушов: саема мезеяк пей алов. Совинь театранть вакссо покш, Пичепень кувалмосо «Гастрономс». Ваннозь эскелян лавсятнень вакска: ламбамкайть, печеният, банкасо салтозь, пуштазь, чентязь калт, икра... Кода калтомо Каспий чиресэ?! Сывелень микшнема пелькссэнть вановтом эртевсь самай неть котлетатнес. Кода а саемс?! Текень марсян ялгатнень кургсто. Тантейть, бешоком, келеть нильсак.
— Ики, ики, мазый кыз, — бажан меремс тесэнь эрицятнень кельсэ лавсянть тона ёно онкстнэнь вакссо аштиця однэ, чентязь тюс чама тейтерентень, монсь сурсон невтнян витринань суликанть тона ёно котлетатнень лангс. — Ики, ики! Кавто, кавто!
Тейтересь чарькодимим. Тапардынзе конёвне потс вешезетнень ды венстинзе тень.
— Рахмет, — меринь прянь шназь, кончтынь теке басом тейтерентень ды лисинь лавкастонть.
Совинь важодема тарказонок. Лакавтынь-теинь чай. Озынь ярсамо. Таргия кшим. Чурькадонгак эзинь катставо. Сускан кши, чурькине, мельганзо — сускомне котлетастонть. Сускан кши, котлеткине... «Вай, ды мезень кис шныть эйсэст, неть котлетатнень?! А тансть эйсэнзэ, а раст. Чинеяк а [190] марян. Сёвонь теке... Мезе мусть эйстэст?» — абунгалян эсь пачкан, монсь яла сусконян, поладан ярсамонь кирдам.
Ялган педявтызь, ванан, сельмест эйзэнь. А чарькодян, мезень апаро мусть эйстэнь? Мезе а истя теян? Варшты вейкесь, варшты омбоцесь. Вейкесь эйстэст, Грант Артюнян, армянонь цёрась, кавтошка иеде мондень сыре, эзь кирдеве:
— Ты чё. или того? Котлеты-то сырые!
— Их жарить надо, — сэтьместэ, мелень ванозь мерсь ведьгеменьшка иесэ шержей пря Давлатьян Шмавон. Сонгак армян.
Шмавон лелям мелезэнь тукшны валонь кирдеманзо ды а сезневиця, вейкеть обуцянзо кис. Мезе а чарькодеви, ёвтнесы вайгелень апак кепсе, ёвтневксэзэ петнявкскень пес сови превзэть. Сон — вете эйкакшонь тетя.
Визделгадынь. А кармат ёвтнеме, прянь идеме: неть ярсамопельтнеде эзинь марсеяк. Рестамс-арась, косто тень содамс? Пурнынь, тапардынь од ярсамкан пуворязь конёвсо, лисинь нупальстэнть ды ёртыя тапаркскенть урнас.
Омбоце чистэнть, ансяк частнэ пнкадсть кемгавтово, ялган кода свал тукшность кие-ков. Кадовсь, мекс-бути эзь туе покшонок, Шмавон лелям. Мон лакавтынь-пидинь чай. таргия «пештором» ды озынь ярсамо.
— Содат мезе? Гаянэ азоравам кучсь тонеть а покшке казне, — мерсь Давлатьян юдмасонзо каштордозь сокарямсто, — на, кирдть!
Сыре ялгам келемтизе-панжизе юдмастонзо таргазь пачк невтиця конёвсто теезь тапаркскенть ды путызе икелень стуворонть лангс. Эйсэнзэ ульнесть оев. тюжа кувосо вельтязь кавто котлетат. Чинест, а уш чинест...
— Шмавон леляй, те мезекс, мезень кис монень? — эзия сае, шаштыя стуворонть чирес тапаркскенть. — Мон каня ванан? Монськак раман... Рестазь.
— Рамат-арась — тонь тевесь. Нетнень вана варчить, кармат содамо, кода тантейстэ пици-пани Гаянэ патят. Порть, иля ордале. Мон сыргинь.
Каваницям саизе юдманзо ды лиссь.
* * *
Те ульнесь 1952-це иень омбоце пельксстэ. Одтнэнень, войнадо мейле чачозетненень, кить эзизь варчне вачочинть, седеень нурьгатоманть, эзть юта пупиця кевсэ ацазь 40—50-це иетнень китнева, [191] паряк, а чарькодевияк те ёвтнеминесь, ловсызь раксемкакс. Аволь ансяк од тнэнень. Ламот сыретнестэяк а арситькак чулгомс пештенть: мекс истя, певтеме асатыксчисэ ды майсемасо эринек ды эрятано?