Эрязденть арсезь (2010)/Ульнинек эсенек лангсо азорт
| ←Дезертир | Эрязденть арсезь (2010) by , edited by Разгуляева Т. В. Школа. Ульнинек эсенек лангсо азорт |
«Вень бояр»→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 70—73 |
[70]
| ШКОЛА |
| Ульнинек эсенек лангсо азорт |
ОКОЙНИКИ Долгов Але кирдажом максызе тень алтазенть — тракторонь покш подшипникенть. Ой потсо, прок од, тракторскак мерят эзизь путне. Таня патязо, маряви, туизе, сон «кшнинь айгорсо» важоди — трактористка. Цёратнень ильтизь «тов», тол паксяв, секскак важодить трактортнэсэ тейтерть ды ават.
Сынь кудов.
Эрявсь кундамс тевс. Муинь эрявикс эчксэ олога. Анокстынь кедьёнкст: мушкор, пилыне, узере, эскть... Пштинь эрявикс кувалмосо цюркине. Лаксия-валакавтыя ды «озавтыя» истя анокстазь петькелентень подшипникенть. Ней мезе? Кедьсеерьксэнь эчксэ ажиякс ёразь кавто ологатнень киртинь эрявикс кувалмосо. Керсинь некеть ологатнень човине пестэст трокскеть. Теде мейле ажиян покш эсксэ чавинь петькелентень, лангаст — трокскетнень. Носкинь, якинь-вешнинь а стяко. Курок ве чарос крандазкем аноколь. Аволь тетям, аволь кияклия — монсь теня! Паро лиссь. Шождыне. Ансяк ускт. Лездась тень Коляяк. Кавонек лелят-ялакст сонзэ «сювордынек»!
Пурнынь вальмалксонь келес ёртнезь узерень-мушкорон, совавтынь кардазс ды путнинь таркаваст.
— Ванды чикуншкадо мейле молят паксяв марч мельга, — кармавтсь авам вейсхозонь паксясто самсто. Мерсь ды совась кардаз кенкшка кудос.
— Молян, молян, авай! — серьгединь тензэ кецнезь.
Кода а молемс? Мезень кис эно лелят-ялакст зняро псилгалинек, теинек налкшкень кондямо крандазке?
«Эряви варчамс теезенть — маштови-арась... — сынь мельс. — Молян Долговнэнь, невтьса Алёнень».
Ливтия «лишмем» кардазсто ды сыргинь Алёмезнень.
— Несак, кодамо усксемапель пурнынь-стынь?! — «судонзо [71] алов» кирякстовтыя чарынькаем, шныя прям сынст вальмало мартонзо вастовомсто.
— Неян, неян... Ажиятнень петькелентень кавтонь-кавтонь эсксэ чавомальть, прянь шныця, — сялдымим ялгам, тевень содазь, пштистэ «айгором» ванкшномсто.
— Эскень эзть сато.
— Вешнемаль... Авам мерсь ванды молемс паксяв, — ютась лия валс сялдыцям Але.
— Моньгак. Сестэ вейсэ, истя?
— Вейсэ, вейсэ! — мекс-бути пейдезевсь, кончтась ялгам ды тусь икельдень, чатьмонезь совась кудос.
Омбоце чистэ чикуншка малава пурнавинек кеменынканек. Эйпаро ушмо. Долгов Але, Немой Ваня, Пронянь Коля, Теряень Коля, Эремкань Миша... Кирдтяно ки Карганчей пакся ёнов. Тосо аванок нуить — трудочить топавтыть. Нуемстэ лехинень-лехинень вастневи «якстере пильге» марчонь сымесь. Сон ловови седе «тантейкс». Нарыть сонзэ ды сравтнить мельгаст. Анокстыть миненек.
«Ардтано» марчс мельга-мельцек. Жой маряви апак вадне подшипниктнестэ. Ванодо, ванодо зяронек! Кодамо вий эйсэнек! Вачочинтень а сасавтано! А изнявтано войнантеньгак!
Сяв розесь урядавсь, пачкодсть тундонсетнескак. Пулттнэнь, седе сеедьстэ веть — илязт певере товост, — усксить ве таркас ды вачкить сэрей-покш копоняс. Седе тов, покш тевтнень сявордомадост мейле, теле ёнов, кундыть пивсэмест. Шкась моли. Капшама. Фронтось учи. Эрьва кува педявтнезь: «Весе фронтонтень — весе изнямонтень!»
Ярсамопельденть башка, арсема лембедентькак. Телесь самонзо а стувтсы. Пенгть, пенгть эрявомо кармить! Кие анокстасынзе? Велесэнть ават ды эйкакшт. Атятнестэ ламот прок кенерезь пештть певерсть вачочиденть... Кемемась, кадык аволь покш, минек, кумажадо алга лазнотозь, ципушкав пильге цёрынетнень лангс.
Марч мельга якамодонок мейле ютась таргошка. Валске марто паксяв туемадо икеле авам мери:
— Кода крандазкеть? Эзь сизе? Вирев молемс мелезэ арась?
Чарькодия, мезень кувалма пеедькшни.
— Ды мон Эремка Миша, Эрьмай марто уш якинь. Исяк. Каня эзить нее пенгтнень? — кецневтия. — Эйпаро ускинь.
— Эзинь.
— А-а, оно кода. Мон тозонь эзинь варштне! — ахолдась тень кедьсэнзэ ды лиссь кудостонть.
...Петровка вирь. Кевев, пиземень шканеяк рудазонь-нолажань а содыця кияванть «каргонь керьксэнск» капши тов. Пенгс. Икеле дирни Эрьмаень «чарынькаезэ», удалонзо — Немой Ванянь. Мельганок — седе «одтнэ», сисем-кавксо иесэ нолгартне. Кись валаня. Кавто ёнганзо нуезь паксят. Мизолды чипаесь. Ди-и-и-рь... — прок цирькунт морыть морынест крандазкенек подшипникест.
Вана виреськак.
Ниленьгемень васенце иень ацамковонь пейсэст чикордыця якшамотне сирттнень допрок костизь. Васняяк одтнэнь, вейке-кавто иень касовкстнэнь. Эрий куракштне пря шныть пиже лопасост. Нетне вана... Вешнетяно коськетнень ды синдтретяно сынст уштомапелекс.
— Сака тей! — серьгедсь Эрьмай.
Лисинь вайгелезэнзэ.
— Неят? — мизолкстонть автень курго кевкстимим ялгам. Сельмензэ цитнить кеняркстонть.
— Неян, — текекс, кецнезь меринь тензэ.
Икеленек сиртень келей куротояра. Тусто. Мукорьстэнть лисекшнэстъ аволь аламо тарадт. Ней коськть. Ансяк яжак.
Шпанк! — комась, синдсь васенцекс Миша.
Пакшт! — синдинь эрявикс кувалмосо монгак.
Синдтрян, керьмень-керьме ливтнян кичирес, «лишменек» ваксс. Кандынь омбоцеде, колмоцеде. А удыть лия «алятнеяк». Эвтезь эвтить, теке коткудавт, — эрьвась эстензэ улав пурны.
— Саты, саты! — сергедсь кие-бути.
Кавонькирда, лепштнезь, трокскестэ трокскес сюлмсинь крандазкезэм пенгтнень. Коминь ды кепединь «ажиятнень», «Стака?» — онкстнян эсь пачкан. «Кодаяк лисемс вирьстэнть, седе тов, калгодо кияванть, эрьгеласто тевтне туить», — оймавтыя эсь прям. Содынь, теке басом, «ажия» петне марявить шождынекс ансяк васень саемстэст.
Лексезь-пувсезь, мельга-мельцек лисинек вирьстэнть. Вельксканок сравтовсть певтеме, сэрей-келей валдосэнь ёнкстнэ, оймень эждиця вановтсо варштась лангозонок якстерть-ожо чама азорост.
[73]
* * *
Эйкакшчим ды од шкам ашосо копачазь умарь чувтокс эзть ульне. Савсь кирдемс телень цят якшамот, пиземеть-цярахмант, пултыця-чентиця псить. Эрьва мезть ульнесть. Кеняркст, покордамот, покш ды вишкине ризкст... Ансяк савольгак таго ютамс текень пачк, седе лембе таркат, седе шоада янт вешнеме аволинь карма. Мезекс? Мон ды ялган-кирдажон ульнинек эсенек лангсо азорт. Эйсэнек, кода ней, эзть ноцковтне: тов иля яка — пине сусктанзат, атякш калгатанзат, тезэнь иля оза, иля чийне, иля кеверькшне, иля тёкие... Певтеме «илят». Сестэ... ков мелеть — тов мольть, мезе мелеть — сень, берянде башка, тейть. Вензэ лангс якинь лишмень ваномо, ардтнинь ласте, крандазсо, тракторсо-комбайнасо. Эйкакшонь вийсэнь, кода маштынь, топавтынь кудоютконь тевтнень. Апак кармавто, апак тандавтне, апак нерне. Эсень мельсэ тевень теемась ульнесь авань валдонзояк виев. Ды вечкевикс. Эринек эйкакшонь эрямосо. Олячинь ламбамо, ванькс кошттонть лексинек апак карда. Самай сонзэ, олячинь коштонть кис, ютавлиньгак, савольгак, таго секе умок ютазь кияванть.