Эрязденть арсезь (2010)/Пичепень налксемкужосо
| ←Орданьбуесь — монь лавсем. Вастома | Эрязденть арсезь (2010) by , edited by Разгуляева Т. В. Пичепень налксемкужосо |
Театрасто — колхозов→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 203—207 |
[203]
| Пичепень налксемкужосо |
ЧОКШНЕ — ульцяв.
Истя мертяно кизэнь шкава ве таркас од ломанень пурнавомадонть. Эрьва пенть-куринканть — эсензэ тарказо. Кочкави чаво, эрицявтомо кудо. Седеяк вадря, улиндеряйть икелензэ — озамо таркакс — чочкот. Берянезэ а ули эзементькак. Мекс эрицявтомо, содави: а налкставтомс азортнэнь кортамосонок, раксемкасонок, моросонок. Удомась тандады, карминдеряйть вальмат ало валскень зоряс викнеме гармония ды жойнеме морот. Пачколить кой-зярдо кужозонок лия пень цёраткак. Од шкась ков а ветятанзат?! Те тенек а вечкеви. Мокшнаскак пачколетяно. Эно кода? Каня макссак вечкевикс тейтереть, мазый килейнеть, кодамо-бути лия пень лытыця псаканень?
Шлинь-нардынь, оршия ашо парсеень панаром, понань коцтонь дюм раужо тюс понксон, карсинь ашо «гулькан» ды, ансяк сась чокшнесь, — Андреень вальмалов, ульцяв. Икеле, покштянок покштяст, «ульця» валонть эзизь марсеяк. Тарказонзо ульнесь — «куро». Седе сеедьстэ, ламо смустьсэ вастневсь ды кирдевсь течинь чис, кадык румозьгак, «кужо» валось. Те «ульцядонть» мерильть «налксемкужо».
— Шумбра чокшне, цёрат-тейтерть! — арсинь Пичепень кужос монь шкань-иень пуромозтненень.
Цёратненень, кода весе тейнить, венстинь-максынь кедь. Содавиксэкс теевкшнемс эзь саво. Кадык мезе полавтовськак иень ютазь, кияк эзимим стувто, киньгак, содазь, эзинь стувто монгак.
— Шумбрат, шумбрат, ошонь цёра! — дильнезевсть тейтерень вайгельть.
Кой-кить эйстэст мелят эзть сакшно тей, эзть кенерекшне, ялатеке содавсть весе: Паволонь Манька, Черькаень Лиза, Бозань Рая, Ивакань Надя, Сёдоронь Лиза, Ёгань Манька... Минденек кавто-колмо иеде однэтнень — эсест «тингелангост».
Тейтертнень вановтост оршавксон вакска эзть юта. Сельмень тетькезь, редия, ванность чоподасонть седеяк неявикст ашо панаром ды ашо котан. Кода а ванномс? Прядовсь войнась. Ютасть кавксо иеть. Кой-мезесь полавтовсь. Сюпавчитне ялатеке эзть пачколе. Паро куш кши пачкодсь стувортнэнь лангс, кутьмересь-пекесь копачавсть. Тейтертнень лангсо кумажадо алга, нурька ожа, каркске марто эрьва кодамо тюсонь ситцань платиинеть. Пильгсэст ашо носкинеть, ке-
[204] Бакусто самдо мейле. Озадо аштить керш ёндо витев: патям Надяй, авам, Ёга Васют, ды сазором Вера. Ашо панарсо — ялаксом Коля. Орданьбуе, 1953 ие.
[205] день раужо тапкат. Цёратнень пилысэ кумажа видьга кедень стака кемть, монь — вармамевть коцтонь ашо котат! Панаром парсеень.
Кортыть... эрзякс! Пилесэнь элякалить эрзянь тошказь, марямга ёвтазь валт, пеедькшнемат, хрусталекс жойниця гайтть. Кунсолок, цёра, кунсолок! Ие, кувака ие эзик марсе те музыканть. Самай секс истя — сонзэ кувалма! — правтыть кадомс нефтань чинесэ лексиця ят масторонть. Кунсолок!
Гармониясь вакны кеняркс ёжодонть, седи-псилгали, мель путы икелензэ киштицятненень. Сынь, тейтертне, кавонест-кавонест, вейкест-вейкест полавтнезь ды кирьксканть чаразь, нурька морынесэст ёвтнить вечкемадост, згилить, шныть седицянть, Паволонь Андреень, раксить.
Пизи лембе пиземне, |
Андрей исяк чокшне Валянь Сядо ветексть палызе, — чапизе-шнызе гармонистэнть Паволонь Манька ды кенерезь ламарь раужо сельмсэнзэ кончтась тензэ.
Эйстэнзэ эзь кадово сехте паро ялгазо, аламодо седе алкине, валдо черь Бозань Рая, поладынзе валонзо:
Минь якинек экшелямо, |
Зярс Рая, Бозань Рая ве таркасо аштезь ёвтнесь «экшелямодонзо» ды «алуждонзо», Маня ялгазо, пилысэнзэ чавозь, тейсь кирькс ды стясь Раянь таркас валонь кирдеме:
Вармась пуви, чувтт чаравты, |
Раянь ды Манянь моронь паргинест чамсь. Саты. Тейтертне стясть ялгаст юткс. Каштмолезевсь седямканзо марто седицяськак. Ансяк каштмолемась куватьс эзь кирдеве. Мелест киштемс, невтемс эсь пряст лия тейтертненьгак.
— Саты теть, Андрей, нувсемс. Матедеват. Селяка тенек! — серьгедсь Черькаень Лиза, сэрей, мазый, якстере умарь чама тейтересь.
Андрей аволь кода лиятне, покшкавтнеме эзь карма. Нулновтызе прянзо, ды суронзо таго чийнезевсть повнетнень ланга, [206] ушодызе «Подгорноенть».
Листь киштеме, Надя ялгай, |
лиссь кирьксэс ды яволявтсь Лиза.
Кирьксэнтень сеске совась се, кинь тердизе киштеме Лиза, — Ивакань Надя. Сон ушодсь потмонзо чамдомо:
Ушка, молян киштеме, |
Истя, вейкест-вейкест полавтнезь, морасть зярыя вишка морынеть.
Меельцекс Лиза, пильгензэ кайсезь, тейсь кирькс, теке ковось моданть перька, стясь чочктнень каршо келей чама Надя ваксос, неевлизь весе, ды кавонест серьгедсть сюкпрянь морыне:
Эрьга, ялгай, вейсэ-вейсэ |
Нусманя пешксе ковось апак кончтне ваны лангозонок ды, паряк, арси: «Мезе пельдест саят — од ломанть, самай мазый шкаст, кадык элякалить, кенярдыть сэняжа кельме валдозонгак». Пелькстнить вень азоронть перька — кие цивтёрды седе валдосто, седе наянсто — тешттне.
Аштян озадо сехте вере чочконть лангсо. Ванан, арсян. Абунгадат: овсе а умок сельмень икеле невтнесь киткавчинзэ Мольерэнь Скопенэзэ, эрясть Николай Островскоень «Не было ни гроша, да вдруг алтын» пьесанть героензэ, течи... неть киштема марто нурька морсематне. Эрямось ошсо ды тесэ, велесэ, — тунь а вейке. «Ульцянь» коесь маряви тень шкань стяконь ютавтнемкакс, сёлтонь кондямокс алкуксонь, покш, эрявикс тевтненень.
Стинь, сыргакшнынь уш кудов. Варштавинь та-кода вить ёнов, ды вановтом вастовсь Бозань Раянь вановт марто. «Вай»! — каятотсь пилесэнь цийнемань кондямо эль маряв! же вайгель. Кодамо-бути ____ лепштим___ мекев чочконтень ды салызе превстэнь кудов туемань меленть. «Парсте киштить тейтертне! — сынь мельс. — Цёковокс цёкордыть. Каня истят тейтерть некшнить Бакусо?!»
[207]
* * *
...Покш, сэрей-келей залось сундерькс шкадояк чопода. Верде, алдо, эрьва ёндо певтеме равты «бом-бом». Тень лемезэ — музыка. Зэрнить неть «бомтне» — пилеть потомить, секень вант, сельметь-каклисить. Чоподасонть бизмолдыть, бриксгяить, ноцковтневить сулеень кондят. Киштить истя. Кие прянзо лангс кирнявтни, кие прясонзо нулновтни, мерят туевель эрямостонть, аватне пукшососг тей-тов юводить. Кирнявтнить, чарыть, менчевить, ахолить кедьсэст, прок превстэ лисицят, лавтовост сорновтнить... А вайгельть, а кортамот, а морот. Тарказосг пурьп тень зэртть, оймамонь а содыця «бом-бом»-т. Ламот киштицятнестэ эль аштевить пильге лангсо.
Тень лемезэ — дискотека. Сон сась налксемкужонть таркас.
Од ломантне кода ансяк апак оршне! Веенстнэнь ансяк визькс таркаст кекшезь, лиятне тенсить платиясост кияксонть, колмонстнэ.. . Суркс эрьва сурсо. Кой-кинь панжадо мештьсэ почос нурьги мокшнашка крёст, пилекст сырнень, сиянь, платинань, суликань... Кедте кедьс кундазь, те «мазычинть» марто эскелить палыця ведьсэ экшелямось, наркотиксэ «вадрялгавтозь» эрямось, ярмаконь кис прянь микшнемась... Бр-р-р!
Анокан куземс кудопряс ды зяро виень серьгедемс: «Кодамо видечисэ, ваньксстэ-превейстэ минь, сыретне, эринек!». Кузян, рангстан... Лезэсь мезень? Пелян тень теемс седеяк: эрьва кирдась-поколениясь сялды мельганзо сыцятнень ды шны эсь од шканзо. Ялатеке мерян: минек, 30-це иетнестэ чачозетнень, панжиков шканок, эрямонок седе малавиксэль пертьпельксэнтень, секскак ульнесь седе ванькс, сэтьме, визьксэнь содыця.
Ламонь пельде марсинь:
— Германиясо вадрясто эрить!
— Швециясо, келя, седеяк парсте!..
А кеман истя кортыцятненень. Монень маряви, Орданьбуень Пичепень налксемкужосо эрямось кизэнь шкава-малава ульнесь швециятнеде мазый, ванькс ды секскак кеменьксть вадря.