Эрязденть арсезь (2010)/Паронь паросо паронзо эзть пандово

From Wikisource
Jump to navigation Jump to search
Эрязденть арсезь  (2010)  by Нуянь Видяз, edited by Разгуляева Т. В.
Кодамо кельсэ? Паронь паросо паронзо эзть пандово
Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 328—331

[328]

КОДАМО КЕЛЬСЭ?
Паронь паросо паронзо эзть пандово

Сеедьстэ апак кевкстне совсить ды талайс кадновить превезэнь кевкстематне: мезень кис? мезень тееме сакшнынь моданть элес? балягав луганзо ланга якамо? мезе мельган кадан? видестэ-аволь эрия эрямом? мезе полавтовлинь, савольгак ютамс ютазь китнева-янтнэва омбоцеде? кодат а истя теезь, нолажа чалгавкст кадовить апаро ледстнемакс? зяро янксемат таштавсть седейзэнь?

Кевкстемат, кевкстемат... Удомань саиця кевкстемат.

 

*  *  *

Сакшны мелезэнь валдодо пешксе ацамковонь нусманя чись, вальманок каршо лекшесэ лексиця кальтне, олажа-сэнь менелесь. Ушосонть аштесь аволь цят якшамо. Те нусманясто чатьмониця чистэнть педе-пес, зярдояк а стувтовомга чарькодия, мария седей ёжосом кикс тень ульнесь эрямонь казицям — авам.

Меельцеде, састыне молезь, кандозь ютавтынек велень курованть. Калмазырев. Калминек. Туемадонок икеле кие-бути марнэнть колмо ёнга узерьсэ «керясь», кода керсесть церьковатнень самодост икеле, «вальмат» ды «кенкш». Кува эно, сындеряй мелезэ, варшты ушов трицянок-кастыцянок? Кува лиси-сови? Сынек кудов. Шлинек-ёрвалдынек, коенть коряс, кеденек, совинек кудос ды ойсинек стуворонть перька авань лемензэ кундамо. Васенцеде Ёгань Васют арасель вете эйкакшонзо ютксо, эзь маряво истя содавикс чевте сэтьме вайгелезэ, ормадонзо козкстнемазо. Эль марямга пикстердсь пазаватнень икеле штатолнэсь. Сравтневсь солыця штань вечкевикс чине.

«Те кода истя, мекс аштетяно сонстемензэ?» — яла эзь [329] кемеве — зярдояк уш а озы мартонок, зярдояк уш а ёвтасы «эйкакшт» валонзо.

Ярсынек-теинек, стинек, аштинек аламос, ды мон аламонь-аламонь, чатьмонезь кундынь пурнамо-сэрнямо кувака килангов, шалныця-зэрниця ошом пелев. Якан кудованть, теке мезеяк ёмавтынь. Тей варштан, тов... Чамсь эрямо тарканок, маряви, мик покшолгадсь.

Кона ёнов ды зярдо эзинь тукшно, кудосто лисемстэнь авам свал костояк ды муиль, чатьмонезь шикадиль зепезэнь кшико-чомне. Зярдояк тень эзизе стувтне, свал мельсэнзэль. «Авань, аволь аваломанень, седей», — ней тенень истя меревлинь. Се, васов кадовозь ловов чистэнть, авань калмамодо мейле туемстэнь, кияк эзимем кевксте: пей алов путомс саить мезеяк? Кияк зепедень эзь ледстя. А мелень ваныця патям, а сазором. Аваксон кшипечтьке тень кияк эзь венсте. Превсэяк, маряви, киньгак арасель.

«Я, те кода истя?» — арсезевинь, теке пупординь кудо кенкшенть панжомсто. Седеем седеяк нуваргадсь. Сехте малавиксэнь чатьмонемаст ульнесь ледстямокс авань ине тевдензэ, чирень а содыця талномадонзо ды мелявкстонзо минек кис. Домкат, келейть, а солавтовицятды арсевтицят валтнэ: «Чарькодеви ды максови питне тенень-тонанень ансяк ёмавтомстонзо». Зярс икелеть, вакссот, зепсэть, стуворот лангсо, мезекскак сонзэ а ловат. Теке истя эрявияк, ды свал истя карми улеме. Ёмавтсак, прядови, мезесь свал ульнесь, сестэ уш... Пароль теемс мекевланг, ды а теят: те лувось чачсь ломаненть чачомадонзо икеле.

Свал та-ков капшинь, бажинь, прок нармунь, верев, пельтнень ёнов, вийть путынь мезе-бути теемс, кода монень марявсь, лия, седе редявикс, покш ды ламонень эрявикс. Мель аванень, зяро явомаль ломанекс монь ливтеманзо кис, эзинь яво. Паронь паросо паронзо эзть пандово. Ды зярдояк уш а пандовить. Седе ламо, визькс ёвтамскак, арсинь эседень, эсь тевдень. Те тень кадовсь янксемакс, седей сардокс меельце лекстямозон. Ламо — мейсэяк а онкстави — максыть тень, тирякай! Берянь, эзь максово теть тонь эседень пек вечкемась. Теке марто ней, сыре телень киява яказь, истят мельтькак валгонить превзэнь: мезе лисевель мода-масторонть лангсо, вечке-вельтькак а прядовиця вечкемасо — ломантне, нармунтне, пачатне... — ансяк-ансяк аваст?

[330] Мештем панжия — а...

Савольгак эрязенть эрямс одс, омбоксть, кодаяк ды туевлинь, прям аволия тонго рузонь ашконтень. Вант вана, пинге, ловт, ускинь рузонь улавонть! Кода а ускомс, бути школань кенкшенть васенцеде панжомсто саезь мерькасть эйсэнь тиринь авань казненть, — эрзянсенть, Пазонть пельде максозенть. Туевлинь... Кода, зярдо школань ды лия-мезень тонавтыцятне ливезь валсть, виень апак вансто эцесть удемезэнь, эйкакшонь ванькс оймезэнь рузонь ойме?

Кодаяк ды туевлинь...

Ков?

Ков сельмень неить!

Чачинь одс, зярдо сынь Чачома Масторозон. Пачкодинь эйзэнзэ умок уш аволь од ломанекс. Топодекшнесть тень пулыне марто ведьгемень. Ламо сэпей иеть ульнинь рузонь полонсо. Рузонь культуранть лангс важодезь, эйсэнзэ эрязь, кандынь покштояк покш зыян эсь раськем туртов. Кортынь, ловнынь, арсинь, сёрмадынь — натой аванень сёрматкак — рузокс, ванынь рузонь спектаклят, «кинот», кунсолынь, сёрмадынь ды ловнынь лекцият таго... Мик тундоськак сакшнось рузонь! Андсть эйсэнь те кашадонть кирьгакстнемазон. Эрзянь ульнесь ансяк школав молема кись ды тов молемадо икеле эйкакшпингем. Сизьгеменде ламотнестэ — сисем иеть. Ансяк. Васень классто саезь... рузонь-рузонь «ярсамопельть»! Паро куш церьковатне арасельть, эзть каваня Иисусонь «святой» ведьсэ ды текень кондямо валсо.

Весемеде покш манявксон — урьвакстокшнынь рузонь тейтерь лангс ды ойме путынь, тринь-кастынь эйдень рузокс, эзинь снартне тонавтомост эрзякс кортамо. Лиси, превть, карязт яжинь лия, ят раське лангс. Кие чумось? Монсь? Паряк, зярояк монськак. Теке марто, а эряви стувтнемс: эйдесь чумо а эрси, видечись эри сонзэ сельмсэ. Эрзянь историянть эйстэнь кекшнесть. Сонзэ асодамодо а чарькодилинь: мон рузонь раськенть туртов — уреде уре, рузыявтомась поти, саи эйстэнь ловажа удемень пес. Виде теяк, ламот эрзянь цёратне никс сайнесть, ды сайнить нейгак, эрзянь тейтерть — эйкакшост тонавтызь ды тонавтыть ансяк рузокс кортамо, ахолдасть, сельгеть лисьмантень, кона ламо иеть симдсь эйсэст, симдсь [331] сынст чачтыцяст. Те аволь сурсо невтнема, аволь прянь идема! Пежетем, чумом тетянь, авань, покштянь ды покшавань икеле, раськем икеле мейсэяк, кодаяк а нолдави.

Сы, тердьсамам Каштмолиця Авась ды сайсамам Тов, косто мекев ветиця ки арась, сайсамам мелем апак вите: «Данконь тевесь» тень эзь топавтово. Мелем — стядо, эрзят, эрзянь эрямонть кис — ёвтыя. Мештем панжия — неемс эзимизь нее, мельган валдос молицят эзть муеве, эзть сырга. Ве таркасо шешкицятнень мельс дюм чопода, тандавтниця кашторкссто пешксе вирьсэ эрямось седе тукшны. Раськем теевсь-кадовсь — седеем ризкстэнть лажны — мезескак а чарькодиця, а маштыця, мезескак а бажиця, сокор ды амариця ошмокс. Сы, маряви, шка ды туи, васня ниреждезь-кувсезь, мейле — каштмолезь, монь мельга тов, шкань асодыця Масторов, эрзякс меельце кортыцясь. А кадови Моданть лангс вейкеяк эрзя...

Арсезеван истя, ды юты пачкан сурневкс, прок валыть ланган анксемасто ансяк таргазь ведь. Каня алкукс тевесь тенень моли? Каня стяко тердинь, мелявтынь, превть-вийть ютавтынь, зняро иеть максынь шумбрачинь апак вансто Пазонь тевентень? Каня алкукс а кадыть кодамояк тешкс цярахманонь пачка ютазь вайгельпем? Каня а улить ветицякс Валдочинь Масторонтень?