Эрязденть арсезь (2010)/Ниле чить Эрзянь Масторонть седейсэ
| ←Тесэяк сезевсь кемеманок | Эрязденть арсезь (2010) by , edited by Разгуляева Т. В. Ниле чить Эрзянь Масторонть седейсэ |
Раськень Озкс→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 288—293 |
[288]
| Ниле чить Эрзянь Масторонть седейсэ |
Ламо таркава, ошка-велева савкшнось тень ульнемс эрзянь келень тевтнень яксевтемга. Ламоксть пачколинь Самарав ды ёнксозонзо — Шенталань, Похвистневань, Исаклань буетнес, пачколинь Ульяновскоев ды буезэнзэ, Пензав, Бугурусланов, Казанев, Московов, Марш"! Элэв, Эстонияв, Финляндияв. Ардтнинь теке мелявксонть марто, кода таргамс отьмастонть чачома келенек, Нижноевгак. Тов аволь весть.
Нижноев, Обран ош ёнов сакшномсто превсэнь типельдсь лия мель — ютамс, муема шка ды ярмакт, таркатнева, косо чавсь Эрзянь Масторонть седеезэ, косо нармунтне морасть эрзякс, виртне увность эрзякс, косо мольсть тюремат неть мазычитнень ды олячинть кис. косо эрясть ды прядовсь эрямост Эрзямасонь Олёнань, Василень Несмеянонь, Алексеень Кузьмань ды лиятнень-лиятнень, косо пурьгинекс зэрнесь Пургазонь вайгелезэ.
1998-це нень медьковонь прядома малава, сюкпря ярмаконь кис Мордовиянь Масторпромксонтсньды сонзэ прявтонтень Валерий Алексеевич Кечкиннэнь, сыргинь арсезенть топавтомо — варштамс модатнень-лейтнень, ломантнень лангс, косо кезэрень пингстэ саезь эрясть эрзят ды косоль Эрзянь Масторонть, Чачома Масторонок куншказо.
Сыргамодо икеле телефон-сёрма вельде тевесь арсезель-кортазель Аношонь Тумай — Аношкин Н.И. (Лукояновасто) ды Грязнов Николай (Васол-Константиновань буестэ) марто. Кавонест музеень прявтт. Лукоян ошсо Саран — Нижний Новгород [289] автобусонтень озась Тумай, ды поладынек кинек вейсэ. Курок ульнинек Васол-Константиновасо, таркатнесэ, косо кассь-кепетсь, «ичевсь» эрзянь историянть покш пельксэзэ, косо мольсть тюрематне Эрзянь Масторонть кис.
Муинек Грязновонь музеензэ. Теевинек содавиксэкс эсензэ ды музеензэ марто. Теске, ковгак апак яка, ярсынек-теинек мартонок саезтнеде ды шкань апак таргсе сыргинек книгатнень коряс содавикс велетнева. Ардынек, васняяк, Сарлеев. Кие аламнеде содасы раськенек эрямопингензэ, содасы мезде корты те лемесь. Ламо-о-до. Самай те велесэнть 1743-це иень панжиковонь 18-це чистэ гувкадекшнесь православиянть каршо колмо иень перть молиця войнась. Прявтсонзоль Василень Несмеян. Те аволь вишкине территориясь яволявтозель эсь олясо эрицякс. Тесэ пельиеде ламо эзть кунсоло а Петербургонть, а Московонть, а Нижноенть. Ней тензэ меревельть независимая, непризнаная Республика Эрзяния, кода Абхазиясь, Осетиясь, Приднестровьесь ды Мода-масторонь ламо лия таркатне. Петербургонть каршо кепсевицянть, эсь раськензэ кис стякшныцянть, Василень Несмеянонь, тесэ, Сарлейсэ, пултызь эрийстэ толпандясо. Ульнинек пултамо таркасонть. 12—13-це пингетнестэ тесэ ульнесь калмазырь. Эйстэнзэ мезеяк эзь кадово. «Раужо чувныцятне» вешнесть сюпавчить, «кладт», колхозонь прявттнэ озавтнесть умарькст, конатнень мейле сандясть-таргсесть бульдозерсэ... 1743-це иень сундерьковонь 26-це чистэ стякшныцятне тапазельть. 83 ломанть маштозельть. Весемезэ эрьва кода чавозельть-нарьгазельть 282 ломанть. Несмеянонь васень лездыцязо Семенов Помраз — повазель. Поптнень каршо тюремась прядовсь ансяк 1745-це иестэ.
Удынек Грязновонь кедьсэ. Валскестэнть буень прявтось максызе (сюкпря тензэ) «Волганзо», ды ношкстынек Вишка Сеськевелев. Эйстэнзэ вайгельпень-кавтонь тарка Грязнов ветимизь телимс. Вайгельпешка эскелинек ялго. Начкодонть машинась седе малав эзь ютаво. Пачкодинек ансяк ветицянок туртов содавикс, куракш, сэрей чувто юткова янга. Телимесь — те эрьва ёндо сэрей-сэрей латксо пирязь тусто чопода вирьсэ тарка, козонь сакшность-пурнавкшность эрицятне яттнэнь каявомсто. Эйстэнзэ аволь васоло, 1805 — 1809-це иетнестэ ютавтнесь озномат Алексеень Кузьма. Кунсоломонзо сакшность ламо велетнестэ вете тёжа малава. Неень шканть коряс те пек ламо. Сон тердсь, сон энялдсь ванстомс [290] эрзянь озномань-варамонь койтнень, илатнень, покшчитнень, эрзянь келенть. Кирдийтнень те скирдинзе марявиксстэ. «Коень нолсицянть» кундызь, тюрьмасо эрьва кода нарьгамодо, поркснемадо ды томбсемадо мейле панизь Сибирев, тозонь ёмаськак.
Мекев самсто токинек Мокруша велинеденть аволь васоло умонь-умонь шкань ознома-отендяма таркантень. Мелем арасель. Арсинь тосо мезеяк сельмень кецневтиця арась. Путымим превс — молемс — Грязнов. Видестэ тейсь. Абунгавтымизь, васняяк, пекшетне. Сыненст, эчкест коряс, 300 — 400 иеть. Сыреть. А кутмордавить колмо цёраненьгак. Од шкастост, кемеви, сакшныльть алост Инешкипазнэнь озномо. Истя лисськак.
Сыргиксэлинек мекев. Кардымизь Аношонь Тумай. Сон чарась-велясь «сырькайтнень» перька ды мусь, серьгедимизь, вакссост мааронь кадовкс. Докат, Тумай! Сават шнамс. Кавто-колмо пингеде икеле — сэреель, ней матрась, моли панжакай ёнов. Кодаткак кавтолдомат эзть кадово: аштетяно умонь шкань ознома маар вакссо. Теде, мерема, корты маласо велиненть лемезэяк. Ансяк аволь Мокруша, «мокрый» валстонть, кода кемевтсь Грязнов, а «маар» ды «кужо» валтнестэ.
А содан, ули-арась кодамояк лия раськень истямо коезэ — марамс, ды истя, кода эрзятне, маар? Монень маряви, арась. Озномо самсто эрьвась свал кандыль эрямо таркастонзо саезь ознозь мода коморнэ ды почодылизе ве таркас. Эрьвась! Истя иестэ-иес, пингестэ-пингес, ламо шкань перть касыль-кепетиль маар. Цисланть-эрьганть смустезэ: эрямось ушодкс ды пе а соды; минь вейсэ — ве раське; модастонть лисинек, модас тутано; тоначив туицятнень меленьзэ ванома. Малав эрьва веленть ульнесь эсензэ маарозо. Те илась вастневи ансяк Обран ош ёнга, Эрзянь Масторонть куншкава. Аношонь Тумай маар муекшнэсь Шаткень буень Килейвеле ваксто вирьстэнть. Сон панжозель-отяндязель 1996-це иень медьковонь 28-це чистэ. Кирвазтезель штатол. Пшкадезель Инешкипазонтень.
Туемадонок икеле муезь мааронтень путынек лув кши.
Васоло Константинова — Вишка Сеськевеле — Маркужо — Покш Сеськевеле. Тесэ, те зярдо-бути эрзянь покш велесэнть, 18-це пингстэ чачсть ды эрясть каштанчинек, ине ломаненек: Василень Несмеян ды Алексеень Кузьма. «Кода эрят, эрзянь веле?» — тарнось кельпрясон журналистэнь штампось велентень «Волгасонок» совамсто. Кодаяк а эри. Сон уш умок, аволь вейке [291] пинге — рузонь. Теке басом содыть: «Говорят, мы были мордва. ..» — мерсь тенек вейке авась. Зяро эзинек кевкстне, эзинек искува, эзинек кунсоло — валгак эрзянь эзинек маря. Ужодо-ужодо, лытагайть! Вейке сыре авась ёвтась тенек мик колмо валт: «репештя», «патяй», «леляй». Меельце кавтотнень марсинзе войнадо мейле торфонь таргамо якамсто эрзянь аватнень пельде. Репештясь вана — сынст. Истя мерить вирьсэ ве таркадонть. Сондензэ башка мезеяк эрзянь эзь лиядо. Ме-зе-як! Весе. Пе.
Истя прядовсь экспедициянок васень пельксэзэ.
Вень ютазь — Эрзямас. Ней тензэ мерить Арзамас. Рузокс. Синдтрезь. Мезде корты те лемесь, кияк а соды. Ошсонть улемстэнь мельсэнь кирдинь седе домкасто содамс кавто уликсчить. Тесэ, Эрзямас ало Казаконь Слободасо чачсь Ине авась — Эрзямасонь Олёна, конань Эрзянь Масторонть ванстоманзо кис 1670-це иень ацамковсто Темников ошсо масторонь сайницятне пултызь эрийстэ. Омбоце уликсчись. Те ошсонть теке иестэнть маштозельть ламо-ламо эрзят. Муемс те тарканть.
Тесэ, Эрзямассо, 1670-це иень ацамковсто ды 1671-це иень васень ковтнестэ ютавтовсь верень пир. Эрьва кода томбсемадо-яжамодо, кедень-пильгень сезнемадо, модас эрийстэ калмамодо мейле... маштозельть 11 тёжадо ламо, васняяк, эрзят.
Вана «Иванонь пандочамаськак». Самай тесэ, Тёша леенть чиресэ ильтезельть Тоначив олячинь кис аштицятне. Якан коськана лугинесэ вельтязь пандочамаванть. Ваннан перькан. Ютасть колмо пингеть ды пель. Чопода-якстере челькетне сеть умонь иетнеде ванстовсть, абунгадынь, течис. Таркатне, козонь кирьга видьга пайстомотнень вальсесть модас, а стака редямс нейгак.
«Таргодо ламонь перть марявсть акирдевикс сэредькстнэде, майсематнеде кувсемат, пыткань таркатнень велькска ливтнесть сывельде ярсыця нармунть... — сёрмадсь Соловьев историкесь. — Ошось мольс «ад ёнов».
Неть тандавтниця таркатнесэ ульнесть Горький А.М. ды Короленко В.Г. 1894-це иестэ меельценть лиссь «Божий городок» статьязо. Эйсэнзэ ёвтневсь: «... видечинь кисэ аштицятнень, бунтонь кепсицятнень усксесть тей эрьва ёндо. Китнень кувалт стявтнесть повсемань палманть, пезэмкст (колият), конатнень лангс озавтнесть керязь прят ды ломанть, аравтневсть прянь керсема мукорть, эйзэст сялгозь узере марто».
Авторось сёрмадсь: «Было это время С. Разина. Настроили [292] заплечные мастера целый лес столбов с перекладинами, и к вечеру народ глядел с горы на гору, как качались, рисуясь на алом небе, тёмные тела удалых молодцов-атаманов и своей арзамасской вольницы, приставшей к кровавому пиру...»
Иисус, спаситель! Мекс эзить иде, мекс не спас чумовтомо, олячинь ды видечинь кис аштицятнень? Тон нерьгить тенек «бачкатнень», идиця, спаситель! Тон совавтозят малав эрьвань превс! Мекс мезеяк эзить тее лездамга, мекс кедь эзить максо майсевицятнень, эсь масторост, эсь Модаст кис аштицятнень?
Мезекс теекшнызе ине Русесь-Россиясь Эрзямасонть 17 — 18-це пингетнестэ, мондень парсте ёвтнить рузонь «покш» ломантне.
Штрихи к портрету усмиренного Эрзямаса
Екатерина И: — «Арзамасский ужас»
Лев Толстой: — «Город-сон»
Максим Горький: — «Тишина поглотила все, как смерть»
В. Курбатов: — «Кровью плещется Арзамас»
М. Горький: — «Аштян, нильнян пси коштонть, ледстнян ломантнень кортамост, тейневксэст, неть ломантнень чамаст, ванан ошонть лангс, кона вельтязь пси, киртавозь сувсонть. Кода эряви те ошось ды ломантне, конат эрить эйсэнзэ?
Тесэ Лев Толстой васенцекс маризе эрямонь апаронть — «арзамасской», эрзянь апаронть. Каня ансяк текень кис эрясь ды эри ошось Иван Грозноень шкасто саезь?»
«Ошке», ёвтнема
Б.Белик: — «Слуги земного и небесного царей добились безмолвия после того, как залили Арзамас потоками крови. Нет, недаром именно этот город был главным местом казней разинцев и других мятежников и недаром здесь в течение веков сохраняли, выставляли на всеобщее обозрение орудия пыток и казней. Это делали, как писал Максим Горький в очерке «Городок», «в память городу: не бунтуй!»
«Юность», № 12.1970
* * *
2010-це иень даволковонь 17-це чистэ кулось Валерий Алексеевич Кечкин, Мордовиянь Масторпромксонь Прявтось, Конституциянь коряс васень прявтось, мокшонь алкуксонь цёрась. Кулось се, кона 1998-це иестэ валсо-превсэ ды ярмаксо лездакшнось ютавтомс те экспедициянть, вастовоматнень Эрзянь [293] Масторонть марто. Ульнесь сон чарькодиця, седеймариця ломань. Кода маштсь лездась эрзянь келень идема Ине тевентень. Сонзэ кенкшезэ икеленек эзь пекстневе. Арась, эзь менстяво доктортнэнень эйстэнзэ ормась. Сави тагояк меремс: «Превейтне, чевте седейтне, тевень содыйтне эрявить Тоначисэяк».