Эрязденть арсезь (2010)/Мезень кис?..

From Wikisource
Jump to navigation Jump to search
Эрязденть арсезь  (2010)  by Нуянь Видяз, edited by Разгуляева Т. В.
Мезень кис?..
Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 57—59

[57]

Мезень кис?..

ЧОПОНЬПЕЛЬКС. Толонь вельмевтема шкась зярс эзь са. Керосинэськак кадовсь аламо. Ванстома.

Тыжныть, нузякссто ченярдыть жестьсэ оршавтозь голландкасонть начко пенгтне. Кукшкадынек вейкенек-вейкенек эйс, теке тарькс чистэ озязт, голландка кургонть каршо. Яла седе лембе. Чатьмонтяно. Шкань-шкань маряви авань а кирдевиця ильсезь лайшемазо. Лотки-лотки аламос, таго: и-и-и... Ванды тердить эйсэнзэ Дубинькань военкоматов. Чарькодинек: тетядонок сась апаро куля.

Совась Бозань Нюра, кудонь трокс шабранок. Сон тонавтыцям. Авам ашти празь кониксэ. Сыцясь айгсь стул, озась ваксозонзо.

— Иля, иля мелявто, Васют пати, шкадо икеле пря иля чаво, — ладси, оймавты авань Анна Яковлевна. — Те, улема, кучизь Олодя лелянь аттестатонзо. Моньгак тень кувалма тердтнимизь. Оймак, оймак...

Валонзо невтть, седейс токицят. А редяви аламнеде судонь пачк кортамонь асатыксэзэяк.

Аванень вал каршо а ёвтави, аварди, пря чави ризкстэнть.

Пикстердить голландкасонть пенгтне. Качамо чине. Якшамо.

Нусманя чатьмонема.

Берянь ёжодонть авам а муи эстензэ тарка. Стясь, лиссь [58] ушов, совась мекев...

Телень валске. Вальманок икеле ломанень сэрьсэ шушмот. Веньперть вармась аксунгалесь, машнетезь ливтнесь кудотнень юткова, совсесь, ордакш, кардазонь латотнень алов, салсесь кудотнесэ эль кирдевикс лембенть. Энгамсь ашолгадома малава. Якшамось ялатеке тензэ эзь потавтово...

Чикуншка. Кельмезь вальмасуликатнесэ сияждыця минень-сюнонь артовкст. Балягат, тарадт, тештть... Сурсо солавтозь варинева ваннотано ушов. Учотано Дубинькасто авань самонзо.

«Сы, сы!» — васенцекс редизе Коля ялаксом.

Видеяк, раужо кувака шубась — тетянок ставтокшнызе! — сонзэ. Вантано: тейсь зярыя эскелькст кузтемпенть пелев ды та-кода лавшомсь, чиремсь, сэрьсэнзэ прась лов шушмонть чамас. Патянок, Надяй ды Раюш, ёртозь ёртовсть ушов. Кепедизь кавалалдо ды совавтызь кудос. Аванок оршнезь-карсезь празь прась кенкшенть вакссо коникентень.

— Мезень кис?! Мезень кис?! — верьга вайгельть лайшеманзо пачк перьгелесть валонзо. — Охо-хо-хо, охо-хо-хо, мезе, мезе ней карман тееме?.. Мезень кис нельгизь? Мезень чумозо?..

— Оймак, оймак, авай, — лездасть куш валсо тейтерензэ, Надяй ды Раюш. — Кодаяк уш, мезеяк а полавтат...

Тетястонок явовинек 1942-це иенть ушодовомсто. Ялатеке сон ульнесь седейсэнек, ютксонок, мартонок. Ялатеке кеминек: вастовтано. Арась, иень ютазь «Чачома Масторонзо» кис «героекс маштовомадонзо» конёвось путсь те кемемантень пе. Ниленьгемень колмо иесэ трицянок-кастыцянок прась немецень пулядо Нева леенть чиресэ ловонть лангс, прась ды уш эзь стя...

 

*  *  *

1943-це иень якшамковонь сельведьсэ шлязь се чиденть мейле ламоксть лиснесь ды чопавтнесь менелькирьксэнть экшс чипаесь. Тундонь шкава ламоксть почколесь пиренек пева чудиця Кардалейнесь. Ансяк ризкстэ пешксе авань валонзо аштить мельсэнь, иетненень эзть нардаво течис: «Мезень кис?..»

«Мезень кис, алкукскак? — кевкстнян сырепрясон. — Масторонзо? Сон арасель. Келензэ? Сонзэ верензэ валсть, кода маштсть, иестэ иес, пингестэ пингес. Моронзо-коензэ? Эйкакшонзо? Кода меремс... Паряк, тетянзо кис, кона цёранзо маштовомадо мейле иень ютазь кулы вачодо?..»

[59] Весе войнатне мода-масторсонть ветявить кодамояк масторонь кис. Ве ёнксось бажи сонзэ саемс, нельгемс, лепштямс; омбоцесь — сти, вийть путы — а максомс. Тетянь Масторозо арасель. Сон умок-умок нельгезель. Эно мезень кис сестэ саизь оймензэ?