Эрязденть арсезь (2010)/Кодат минсь?..

by Нуянь Видяз

[132]

Кодат минсь?..

Те ульнесь гитлертнэнь-гиммлертнэнь поркснемадо мендень омбоце иестэнть. Эрямонь паро, валдосто цитниця ёнкстнэ, кода эзть кечкере зыянтнэ-асатыкстнэ, апак эрязкале ушодокшность совамо вийс. Пазось эли Вере эрицятнестэ кияк лия венстсь тень казнекс акварелень артомат. Кирдевсть неть кирьксаня повнетне жестень коробкинесэ, тескель цёкинеськак. Ниле иень перть, зярс зэрнесь чивалгомась, истямо сюпавчиде арсемскак ульнесь а мезть. Ак-ва-рель... Валонтькак а содылия.

Германиясто-косто сыця ушмантнэ тукшность мартост немецень мазыйдеяк мазый, покш ды вишкине покшолмань налксема картат. Монень кияк эзь уско. Тетям Изнямо чинтень эзь пачкоде. Маштовсь Ленинградонь перька пирявксонть, блокаданть, сеземстэ. Куролимим нусманячи, сявалесть сельмень: ялгань улить тетясткак, истят налксема картасткак, весемест ули. Монь... мон «тетяй» валонтькак а марсеса, а кинень ёвтамс.

«Ах!» — меринь эстень весть, зярдо седеем машнететсь авидечиденть, ды максынь эстень вал теемс «немецень картатнедеяк» парт. Улезт артомат, мекс а теемс? Тесэ акварелень артовкстнэ...

Муинь калгодо эчке конёв. Эзганзо кавто ёндо печатазь вишка-вишка букват ды цифрат. Кадык. Кажось а покш. Косто ней муят ашо, ванькс, кис ёмавтызе? Керсинь васоньпеельсэ эйдинень кедь-коморошка лопинеть. Мейле конёвсто жо керсинь червинь, крестинь, бубинь, виннинь сырькст. Путса истямонть анокстазь лопиненть лангс, ваднеса якстере эли раужо артовкссо — ловт, вейкесь анок. Мельганзо саян. ваднян омбоце, колмоце, нилеце... Веенстнэ якстереть, лиятне — раужот. Тевем моли. Час, омбоце, ды...

Ней кияк а мери: а тетят, а картат! Вана сынь!

...Тонавтнетяно нилеце классо. Ушосонть эйзюрков, лембе, секс лембе классонтькак. Кайсезь аштетяно. Каршо чистэнть, исяк теезь прянь шнамкан — мартон. Партанть потсо. «Кодат мазыйть, калгодот, кодат кедьс саевицят! Прок алкуксонь. Конёвось эчкс, валаня. Истят киньгак арасть, налксек, зяро мелеть», — истя арсезь, таргинь налкшкень книга потсто ды рожодоминь, карминь салавине ванномост. Эзия редя, кода кедем кепедевсь партанть потсто ды лиссь ушов. Мезде ёвтнесь Анна Яковлевна тонавтыцянок, эзинь маря. Сень кис сон [133] редизе: икеле партасо сельмензэ икеле тонавтницясь а кунсолы, педясь кодамо-бути лия тевс, ваны алов; эзь юта вановтонзо вакска, неизе ювк ливтезь картантькак. Аволь чийсь, карциганокс каявсь эйзэнь. Комась, варштась элезэнь, партань паргинентень. Мезеяк эзь муе. Эзь кенере. Кувтанть-колоданть юрк 1пикадиякемем потс! Вешнек, Анна Яковлевна...

— У-у, а кирдевикс! — кежейстэ тошкстась ды прякасмовам нерекс мендязь сурсонзо зыкадимим Кавксть-колмоксть.

 

*  *  *

Сыретне сялдсть, сялдыть ды кармить сялдомо одтнэнь, полавтыцяст. «Ковгак а маштовить мельганок молицятне! — пеняцясь та-косо Грециясо ламо пингеде теде икеле вейке арсицясь. — Мель а ваныть, симить, нузякст, визькстэметь, тетяст-аваст мезекскак а ловить...» Текекс, кода гректне, пеняцятано одтнэнь лангс ней, XXI-це пингенть ушодовомсто. Теке марто допрок а сакшнотано мельс: кодат минсь ульнинек? Сы шка, ды «берянтне» тагояк беряньстэ кармить кортамо мельгаст сыцятнеде. Истямо лувсо эрямось моли пингеде пингес, моли эсензэ кива, моли киньгак апак кунсоло...