Эрязденть арсезь (2010)/Весть коввалдо вестэ

From Wikisource
Jump to navigation Jump to search
Эрязденть арсезь  (2010)  by Нуянь Видяз, edited by Разгуляева Т. В.
Кинь вешнема. Весть коввалдо вестэ
Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 130—131

[130]

КИНЬ ВЕШНЕМА
Весть коввалдо вестэ

Сыргозинь стядо аштезь. Те кода истя — удомс стядо? А кемеви?

Сыргозинь. Сынь превс. Кода-бути чарькодевсь: таркась — ушкс-каршо шабранок, Игань кудыкельксэсь Дюм чопода. Капазь муия кенкшкундамонть. Ноцковтынь весть, омбоцеде. Кенкшесь лык эзь тее. «Стяко, тона ёндо тулодозь», — сынь мельс. Серьгедемс «Панжодо?!» — авадря. Ней мезе теемс?! Кода мезе? Кудов мурдама, мезть шканть таргсят! Ютынь кузтемпес. Ушов кенкшесь келес панжадо. Те вадря. Ансяк... каршонзо мадезь аштиця сеясь теке монь учоськак! Лодорк стясь кавто пильге лангс ды аравтынзе — анок лазомс — пшти сюронзо монь эйс. Вай, авакай! Юрк кекшинь кенкшенть удалов. Учан, тарск а теян. Ванан, сюракшовось оймась. Мадсь. Ушодсь, теке мезеяк арасельгак, пореманзо пореме. Мон кирнявтынь вельксканзо ды дубор-дубор валгинь кузтемаванть. Кечкерек неи вана, анамаз пона! Чиинь видьстэ-видьстэ куринканть трокс кудов.

Сэняжа чама пешксе ковось валсь экше нусманя валдонзо ды сэтьме вановтсо вансь лангозон. «Косто истямось саевсь? Мезть варс веть, самай тантей удома шкасто лыты? Мезензэ ёмавтызе?» — певерсть кевкстнематне эйстэнзэ ды сравтневсть кудотнень икельга сэнь луганть ланга.

Вастымим авам.

— Вай, тон косолить? Мон цяк превстэ эзинь лисе тонь вешнезь! Арсинь васня, венелев лисить. Учан — арасят, учан — арасят. Инешкипаз, те мезе истя? Стинь, лисинь ушов. Совсинь, вень куншка лангс апак вано, шабратнененьгак. Стяко, арасят. Пелинь лисьмадонть. Каршонок. Тозоньгак варштнинь. А куш а каш. Косолить? Мезе мартот тейневсь? — кевкстнесь [131] тошказь, илязт сыргозе лиятне, талномадонть сорныця вайгельсэ.

— Авай, мон мезеяк эзинь маря. Удынь. Мик онгак эзинь нее. Сыргозинь — Игань кудыкелян. Удомань пачк пачкодинь сыненст. Кода ютынь удозь, сельмень конязь куронть-ульцянть трокс, кода кузинь кузтемаванть ды, панжия кенкшенть, превс а саеви. Сыргозинь. Панжинь сельмень — сят чопода. Кода содавсь косан, кинь кудыкелян, теяк тамаша.

— Паронь паросо эно теть, — арсесь тень авам, сонсь тей-тов якась кияксканть. — Эцек седе курок вельксэть алов, поладык удомат. Мезень дюния мартот лиснесь?..

Авам ютась чалгамонть икелев ды кузсь каштлангс. Мон сеске мадинь кияксс нуласто-валасто ацазь тарказонок, Коля ваксс. Матедевинь, ансяк кенеринь сельмень пекстамо.

Мондень мейле, зярыя шкань ютазь, «апак терде инжекс», текекс вень куншкава, якась ялакскем Коля. Мезе парось, васов, монекс, эзь орголе. Удозь мольсь Эремканень, малавикс шабранок туртов, сэтьминестэ, теке эсензэ кудосо, мадсь Миша ялгань ваксс ды поладызе, теке мезеяк арась, од таркасо удоманзо.

 

*  *  *

Веть азгондиця эйкакшт вастневсть ды, кеман, вастневить аволь уш пек чуросто. Истят тевтне седе сеедьстэ, келя, лиснить ковов вестэ. Секскак рузокс лемдизь «лунатикекс». Те, монень маряви, «келят», моронь тансть марто ёвкст. Истя-аволь, леди мелезэнь умонь-умонь се дюниясь ды пран мельс: кодамо эряза, пешксе эрямосо эри покш эрямонтень совицясь, эйдесь, зяро мельть-арсемат чарыть-велить превсэнзэ, натой а оймавтовить, а мадстевить удомантеньгак. Ледстневи се тюнихань тевесь тедеяк: авам тень пеедькшнезь, лемень таркас, талай мернесь Ковонькай. Виде, минь, велень эйкакштне, ульнинек седе малавикст чипаентень, ковонтень, тешттненень. Секскак авань мельс тукшнось те лемесь ды байтяксть пшкалесь тень эйсэнзэ.

Пароль чопавтемс омбоцеде се ковов вентень, ютамс Иганень ды мекев коввалдодонть сиякс кувтолдыця тикшенть ланга, марямс авань талныця вайгелензэ, варштамс сиземадо, мелявксто пешксе сельмезэнзэ. Пароль, ды вана эрямованть ветиця суресь се ёнкстонть эзь марсеяк, апак кавтолдо вети допрок лия ёнов.