Эрязденть арсезь (2010)/Икельце вал
| ←Эрязденть арсезь (оглавления) | Эрязденть арсезь (2010) by , edited by Разгуляева Т. В. Эрямос совамо. Икельце вал |
Васенце тешкс, якстере→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 5—7 |
[5]
| ЭРЯМОС СОВАМО |
| Икельце вал |
...КИЗЭНЬ куншка. Тенек састь оймсеме ды пиче вирень коштсо лексеме Московонь содавиксэнек: нинь ялгазо Шура, Опереттань театрань пианисткась, ды полазо Куксо Леонид, конась од шкастонзо ульнесь циркень клоунокс, мейле—поэтэкс, драматургокс, музыкантокс. Згили, эрьва мезде ёвтни — ансяк кунсолок.
Течи вирьчиресэ кудынесэнек озязонь нернешка покшчи. Лёнянень, кода мертяно эсь юткованок Леонидтэ, топодсть сизьгемень сисем. Аволь аламо. Ялатеке, лангс ванозь, зняро а максат. Лездыть тенень певтеме пеедькшнеманзояк. Нинек таргасть, кода кортыльть икеле эрзятне, стувор. Помидорт, куярт, рестазь модамарть, колбаса... ну, чарькодеви, «гуень ведь» марто кедьгине. Каванямкатнеде пешксе стуворось верандасо. Сеськтнеде! Тедедень коряс кежейть, маряви, зярдояк арасельть. Теке пинеть кайсевить лангозот.
Ниленек. Те тукшны монь мельс. Ламо ютксо улемстэ педи эйзэнь тошначи, салава карман кургонь автнеме ды часон лангс ванкшномо, а саеви тень ёнкс: кинь кунсоломс, кинь марто кортамс? Цяркадо-кавтодо мейле инжетне истя «псилгадыть»-превиить, истя шалнозевить ды кедьсэст ушодыть ахолямо, кунсолыця эйстэст кияк а кадови. Нилененек — тевесь лията.
Пештнинь цяркатнень.
— Мон Лёнянень, полам туртов, арсян, васняяк, шумбрачи ды оймень паро ёжо. Сынст эйстэ лиси эрямонть мазычизэ. Сынь лездыть тензэ седе курок прядомс книганзо-ледстнеманзо, мельганзо нолдамс омбоце, колмоце. Шумбрачи теть, монь кемемам ды свалшкань нежем! — прядынзе валонзо Шура, копордызе рюмкантень каязенть ды, турванзо салфеткасо нардтнезь, озась тарказонзо.
Кайсинь омбоцень-омбоцень. Шумбрат-парт Лёнянень арсинь монгак. Кельтне, а мезть сёпомс, тертест юксизь. Шурань [6] вакскаяк те эзь юта.
— Содат, Видяз, Леонид од шкастонзо циркень клоуноль. Важодсь вейсэ Никулин Юра марто, ламоксть вастневсь Утёсов Лёня мартояк. Циркензэ марто косо ансяк арасель! Советской Союзонть трокс-кувалт ардтнизе. Зяро тамашат соды се шкань эрямодонть... Кадык сонсь ёвтни. Марят, Лёня? — пейдезь пшкадсь вакссонзо аштиця мирденстэнь авась.
Аштевинек талайс. Эрьва кодамо темас педсинек. Кортынек, содави, сёрмадомань тевтнедеяк.
— Арсян сёрмадомс кувака ёвтнема эсь эрямодом, — ёвтыя потсом талайс кирдевиця меленть, зярдо Леонид прядызе эсь книгадонзо ёвтнеманть.
— Мемуарт? — нилизе поревксэнзэ ды каясь каршон вал тона. Вансь лангозон, учось мезе мерян.
— Кода меремс... — моткодезевинь, сеске эзь муеве эрявикс валось.
— Ёвтык, кода арсят, — мерсь ялгам, ды сянгинезэ совавтсь, козонь эряви, колбаса палнэ.
— Арсян вана кода. Ёвтнемась карми ставомо вишка ёвтнеминестэ.
Эрьвась эйстэст — эрямостон саезь башка ледстнема. Васняяк, эйкакшпингедень ды од шкадон. Мезть лиснесть мартон сеть иетнестэ, ванстовсть превсэнь седе нардевстэ.
Леонид-Лёня нилизе пеензэ лангс саезь-порезь колбаса пелькскенть ды ёвтызе эсь мелензэ.
— Мон истя меревлинь: содама, мезекс ды мекс пурнат-сэрнят те книганть; содама, кодамо од мель арсят ёвтамс сонзэ вельде ломантненень. Кочказь эпизодтнэсэ невтевезэ аволь ансяк тонь, эсеть эрямот...
— Теде содан, — арсезевезь меринь каршон аштиця атянтень превс путомадонзо мейле.
— Сестэ эно мезть тей-тов кайсевемс! Илештить ожат — ды ажиятнень юткс, — пеедькшнезь «озавтымим» икелень клоунось. — Циркесь, арневикс Видяз, нолажа таркасо аштицят а вечки. Мерезь — теезь! Ансяк истя. Лиякс циркезэть кись кирмалавсо вельтяви.
Виде, теде соды ручка марто конёв велькссэ эрьва котьмицясь. Свал превсэть кирдевезэ, мезе ёвтавлить вакссот ды мельгат сыця эрицятненень, мезе од, седейс педиця карми [7] ёвтнемасот, книгасот, кодамо мель карми ютамо пачканзо васенце ёнкскестэнть саезь.
Кизэнь се чокшнестэнть мезеяк од эзинь маря. Ялатеке Лёня атянь валонзо ульнесть кармавтыцякс. Арсезевинь. Мезде карми, алкукскак, эседень ды эсень вельде лиятнеде те ёвтнемась? Кодамо од мель карми кандомо? Кодат ёжот кирвазти ловныцянть мештьсэ?
Шкадо икеле мельпаргом панжомо а карман. Кеман, ловныцясь сонсь мендердясы, мезде ды киде сёрмадовксось, редясы талномам, несы, ютазь шкатнеде ловнозь, эсь эрямонь кинзэ, муи вал а таштомиця кевкстематнень каршо: мезекс сынь моданть лангс? чарькодия-арась эрямонть зэмензэ? мезе кадан мельган?
Чарькодемс вейке-вейкень — канстось, кортыть шержейтне, аволь шождыне. Кой-кинень таркастонзояк а сыргавтови. Кандомадонзо ледстнемскак а мезть. Арсиця ловныцянтень ялатеке истямокс сон а ули — сыргавтсы, кепедьсы, кандсы.