Эрязденть арсезь (2010)/Васенце тешкс, якстере
| ←Эрямос совамо. Икельце вал | Эрязденть арсезь (2010) by , edited by Разгуляева Т. В. Васенце тешкс, якстере |
Кие казни ёрокчитнень?→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 8—9 |
[8]
| Васенце тешкс, якстере |
ЗЯРО иестэ саезьломаненть превсэ ушодыть кирдевеме васень эскелькстэнзэ, эйкакшпингедензэ ледстнематне? Омбоцестэ, колмоцестэ эли, паряк, ветецестэ саезь? Зярдо неявиксэкс тееви перьканзо лакиця эрямось? Неть кевкстематне содавтнесамизь аволь чуросто. Тень кувалма шкань-шкань пшкалян эсь, допрок пиже, стувор алга чийниця шкам туртов, путнян неезь, превсэ ванстовозь картинкатнень се шкадонть содавикс книгасто-косто саезтнень ваксос.
... Вальмалонок анис чинесэ качадыця пиже лугиненть лангс урнозь лоткась чопода-пижестэ артозь сталмонь усксема машина. Кузовасонзо стядо аштить ламо ломанть. Кортыть паро ёжонь марязь, сеерезь. Пеедькшнить-раксить. Седе ламо цёрат. «Го-го...» — маряви сынст кортамост. Оршазь покшчинь оршамосо. Машинанть бортонзо кувалт педявтозь якстере-якстере коцт леха. Ланганзо ашосо рисовазь кодат-бути, малав боканть сэрьсэ, тешкст. «Вай, кодат мазыйть! Те мезть истятнэ?» — кодаяк а саеви эйстэст вановтом. Монь та-кие, паряк, авам, саимим кавалалдо ды венсгимим кузовасонть аштицятненень. Аштян, кабинантень нежедезь, сгадо. Кие-бути кирди кед те. Аламос учозь, эськанзо урныця-мотордыця машинась сыргась. Пильгень ало, маряви, кияксось сорны.
... Кодамо-бути покш, келей кузтема чувтонь кудо. Икелензэ эвтить ламо ломанть, апак лотксе лисить-совить. Марявить вайгельть, лимкить мизолдыця чамат, портретт, якстере флагт... Велькссэнек певтеме, келей-кувака, эль марямга гайгиця сэняжа пакся. Лекси-пувси, черть вадяши лембине варма.
* * *
Сась шка ды карминь содамо: те ульнесь 1938-це иестэ, «вечкевикс тетянок», инедеяк инесь, ютавтсь те иестэнть СССР-нь Тёкш Советс певтеме «олячисэ» кочкамот. Неть шкатнестэ жо кемекстазель весемеде, кода ней кортыть, демократияв, эрьва ёндо паро Сталинэнь Конституциязо. Каня Неенсесь истямокс а ловови? Конёв лангсо сынь весе вадрят. Тевсэ...
Ульнесть тень сестэ ниле иеть. Някине. Кизэнь маней се чистэнть, лисни, ниле иесэ, васенцеде якинь депутатонь кочкамо. Кирдевить превсэнь седе икелень лия мельпенетькак, ансяк весемеде пек пряудемезэнь совасть ды ванстовсть эйсэнзэ валгиця чипаекс палыця якстере коцтонь лехась ды салава урныця [9] машинась. Паряк, рангиця те тюсось оймеёжонь сыргавтницятнестэ, весемеде виевтнестэ? Паряк, сонзэ вельде эйденть превс-седейс совавтовить лия эрьва кодат содамочитнеяк? Паряк, касомстонзо тетянтень-авантень седе сеедьстэ невтнема тензэ те тюсонть? Якстерестэ артозь налкшкеть, оршамопельть, стуворт-эземть, якстерестэ палыця чивалгома...