Эрязденть арсезь (2010)/Весемеде покш казнекс...
| ←Эрьва шканть казнензэ эсензэ | Эрязденть арсезь (2010) by , edited by Разгуляева Т. В. Весемеде покш казнекс... |
Ояксчисэ эрязь...→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 95—96 |
[95]
| Весемеде покш казнекс... |
ЧОПОДАДОЯК чоподальть войнань иетне. Ялатеке, кадык чуросто, чипаесь невтнизе прянзо раужо кежей пельтнень потсто, варштнесь нарьгазь, раздезь, пултазь моданть ды лангсонзо майсемасо ботыця эрицятнень лангс. Неть варштавкстнэ ульнесть казнекс Вере Пазонть пельде.
Изнямонь чиденть мейле иень ютазь прядыя нилеце классом. Меельце урокстонть Анна Яковлевна тердимим икелев, стуворонзо ваксс ды мерсь:
— Вадрясто тонавтнемат кис, верка, максови теть шнамо конёв, тетрадь ды карандаш.
— Сюкпря, — меринь каршонзо ды, кецнезь, ютынь мекев тарказон.
Тетрадесь ланговтомо. Карандашось простой. Теяк паро. Ансяк ие, кода прядовсь войнась. Лията а мезе учомс. Теяк вадря.
Казнень путынь парта потс. Ойминь, ансяк а куватьс. Эзинь кирдеве, ёлск таргинь мекев ды карминь ванкшномост. «Кодат парт казнетне! Тетраденть линиянзо ушкс-кувалт. Конёвось валаня.» — кирдевсь мельсэнь. Кеняркстонть оймем налксезь налкси, а кельги мештезэнь.
* * *
Казне мельга зярдояк эзинь пансе. Максыть кодамояк грамотыне — паро, а максыть — пеняцямс а мезть, лисни, а мезень кисэ. Чумось монсь. Беряньстэ тевень теян. Истямо мель марто эринь малав сыречис. Кеминь, паро тевень теицянть казнесь сонсь мусы, сонсь путы питне. Вейкень редясы — тейсы героекс, омбоцень — лауреатокс, колмоцень — заслуженнойкс, нилецень... «Э-э, атя, вельть сокорсто эрямот эрик!» — панжовсть весть сельмень, зярдо вейке содавиксэнь туртов, аваломаннень, кона, ловт, культурасонть, кода ашо варакась нотань грамотасонть, сень кис маштсь кунсоломо, сюконякшномо, ды кой-кодамо лия тевень тейнеме, венстясть культурань заслуженной роботникень лем. Истя вана, шержей кренч!
Мертядо, эсь прям истя оймавтан? Превскак а сакшны! Видечись, мерян сядоцеде, эри эйкакшонь сельмсэ ды [96] сонзэ превсэ-мельсэ. Каравдашонь(?)-мезень кис сюконямот сон а соды. Эзинь стякшно кумажа лангс а классто класс куземстэ, а мейле. Тень кис самай эзизь максо тень лемтнень-медальтнень, конатнень умок максомальть пингем перть топавтозь ламо-ламо тевень кис. А эрявитькак. Весемеде покш, сырнень казнекс кадовсть тень войнадо мейле казезь кши печтесь, тетрадесь ды сёрмадомань кедьёнкскесь.