Эрязденть арсезь (2010)/Валонь вий
| ←Истятолинек | Эрязденть арсезь (2010) by , edited by Разгуляева Т. В. Валонь вий |
Явовома→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 250—256 |
[250]
| Валонь вий |
Карьсэ ды — кодамо якшамо, кодамо кандылов илязо уле ушосонть — варьгавтомо школав яксема шкастон Аркадий Иванович тонавтыцянок — эрзякс Пошань Аркай — ёвтнекшнесь гипнозсо удомас совавтозь ломантнеде.
Мериндеряй, келя, гипнотизёрось истятнэнень: сась тундо, солавты, ков а варштат — чудикерькст — сельмест икеле шалнозеви чадыведь. Цёратне, тень неезь, илештякшносызь — илязт начко — понкс Пильгест, тейтерьаватне, вайкстнезь-цирнезь, кумажадо верьга, карксамга кепедьсызь паляст-панарост. Визькс? Кодат визькст, зярдо эйсэть сасы ды, секень вант, копачатанзат кельме, эседетькак сэрей ведькеверькс!
Ёвтниль Аркадий Иванович — прок чиньжарамонь видьметь чулгсиль. Сондензэ валаня кель ды ламонь содыця ломань, кадык арасельгак «корказо», Орданьбуесэ арасель. Кунсолылинек [251] ёвтнеманзо оймень апак таргсе. Чичав Палюяк, классонть весемеде акирдевиксэсь, оймиль. «Те кода истя? Кода? Кемемс-арась? А манчи Аркадий Иванович?» — кортавтылинек марязенть урокто мейле, яла тенек а кемевиль.
Ды вана...
ПСХИ-нь, кода нурькинестэ сёрмадови Пензань велень хозяйствань институтонок лемезэ, прявт корпусонть икеле яволявтомань лазонтень понгавтсть мазыйстэ печатазь-теезь конёвлопа. «Гипноз» — васолдо неявсть якстере покш букватне. Молинь малав. Седе ало ёвтневсь сеансонь ютавтомадонть — зярдо, косо. Башка тешкстазель совамо билетэнть питнезэ.
Кода а молемс! Кода а ваномс, мезде ёвтнекшнесь Аркадий Иванович эйкакшпингстэнь! Ансяк вана питнесь... Кольсь ёжом. «Да-а, — ёзынь човонем. — Пурнавить зняро? Сатыть целковоень сы стипешкас? Бюджетэм монь теке, стипендиясь».
Арсезеват... Кудосто авань пельде лездамот иля учне. Косто? Ды визькскак. Умок уш аволь эйкакшан. Сюкпря, пильге лангс стявтымим. Саты. Эстень мелявтома. Паро, лангозон каямс кой-мезе ули. Институтто икеле кавто иеть важодинь. Прям, вадрясто-беряньстэ, оршия. Мелявтома пекеденть. Васень курссо стипешкадонть пандсть колмосядтнэнь малава, ней — седе ламо. Сатыть. А сатыть — сатстнесыть. Эно ков молят? Аволь чирязонь цёрат.
Валске, тонавтнеме туемадо икеле, — ламбамо чай, ашо кши ды верек ой. Пеняцямс а мезе лангс. Чикуншкане — столовоев. Тосо памшатано ломанькс: ям — лиясто сывелень, — котлетат-мезть, чай эли компот. А саты, марят седеень нурьгатома, сайть седе ламо кши. Чокшне ярсатано кие-кода, кинь мезезэ ули. Мон седе сеедьстэ кансёройс модамарть рестакшнан. Тантейть! Итьмасак пачалгонть пелензэ — а редясакак. Лиясто пидсян ямнеяк. Савкшны, кадык чуросто, чаво пексэяк маднемс. Секскак, сёпомс а мезть, ловома эрьва трёшникенть.
Аштян яволявтоманть икеле ды яжан пря, кода улемс: «А молемс? Те кода истя? Арась-арась, истя а туи! А-а... Мезе ули, се ули! Кодаяк лисян асатыксэнь отьмастонть! — путынь пе кавтолдоматненень. — Кода а неемс Аркадий Ивановичень кургсто марязь тамашатнень?!»
...Залось — умарентень а козонь прамс.
Сценанть икелев лиссь сэрей, виде рунго, нурькинестэ наразь [252] раужо черь цёра. Иензэ, марявсь, эскельдясть ниленьгементнень трокс. Кундась тевезэнзэ. Ёвтни, кунсолан, гипноздонть, эрямосонть эрявиксчидензэ ды лезэдензэ, зыянтнэде, конат лиясто лиснить аванькс ойме ломантнень пельде. Вайгелезэ чевте, ванькс, соланя.
— Энялдан а кортамс, озамо таркатнесэ а чикордомс, кунсоломс, — прядызе ёвтнеманзо ды пшкадсь залонтень: — Ней вейсэндинк кеденк, ве кедень суртнэнь омбоце кедень сур юткс совавтозь, ды те «чирькенть» кепединк-аравтынк прякасмонк лангс.
Ламот сыцятнеде истя тейстькак. Топавтыя мерезенть монгак. Кармавтыцясь кундась, валонзо юткс ловома валонь совавтнезь, кортавтомо:
— Вейке, кавто — кеденк сюлмавить прок пикссэ, нардевстэ-нардевстэ. Колмо, ниле — сынь педязь педить вейкест-вейкест эйс. Вете, кото — тынь марятадо кедте кедьс лембе веренть чудеманзо. Сисем, кавксо — кеденк вейсэндявить прок рисьмень пелькст. Вейксэ, кемень...
Оймес совиця вайгелесь вадяшась пилеть.
— Варчинк, кинь кедензэ а явовить — ютадо тей, сцена лангс, — мерсь валаня кель цёрась комсес ловомадо мейле.
Ноцковтынь, снартыя явомс прякасмом лангс путозь «чирькенть». «Эге! А явовить! Кодамо-бути вий кирди сынст вейсэ. Ней мезе — лисема?» Стинь, лиятнень марто вейсэ сыргинь залонть кувалт ютамо лехаванть. Сценанть видьс аламнеде апак пачкоде, чик ютась пряван: «Варчика омбоцеде». Топавтыя арсезенть, ноцковтынь кедень весе вийсэ, ды — перьгедсть, нулакс новольсть рунгом кувалт. «У-уй!» — лиссь мештьстэнь. Мурдынь озамо тарказон. Сцена лангс, ванан, кузсть комсте ламо цёрат ды тейтерть. «Мелень велявтыцясь» озавтынзе анокстазь стултнэва. Зяро-бути валсо менстинзе «педявтозь» кедест.
Ушодсь мадстемест:
— Прянк ало чевте, лембе-лембе, тантейстэ качадыця тодовт. Ютазь вене тунь эзиде удо. Пек, пек сась удоманк. Сельмекеренк яла стакалгадыть ды стакалгадыть. Теке лембе ведьс, соватадо Удомань масторс. Удодо, удодо, удодо...
Вана ашо черь тейтересь нолдызе прянзо, улозо нежедевсь мештезэнзэ. Вакссонзо вельветэнь курткасо мазый чачо цёрась лекшкадсь шабранзо лавтовс. Мик корнозевсь, кургозояк автевсь. Сцена лангс лисицятнестэ вейкесь, раужо сельме цёрась, [253] вансь мадстицянть лангс ды низелгавтнесь пеензэ, мерят, эзь маряяк, мезде моли кортамось. Гипнотизёрось сеске ильтизе сонзэ мекев залс. Лиятненень «лембе тодовось» лездась — матедевсть лаш вень удомасо.
— Тынь ней аволь студентт, — седе тов поладызе тевензэ ведунось. — Тынь — пиже пакшат. Тенк ансяк кото-сисем иеть. Самай мазый шканк. Ушосонть кизэнь маней чи. Тынь налксетядо. Налкшкеяк эрьва кодат!
Гипнотизёронть лездыцязо, алкине, чова рунго, якстере черь авинесь, ливтсь элесэнзэ эрьва кодат налкшкеть ды быр каинзе кияксс. Э-э! Мезе тесэ ушодовсь!
Комсь иесэ тейтертне сельме икеле велявтсть эрязасто чийниця, эвтиця, цильниця-кольниця тейтернекс. А кемевияк! Вайгелесткак мик аламнеде полавтовсть! Веенст мадстить, мештезэст лепштязь, потякай тякаст, лиятне кирнявтнить люкштяевиця карьксэнть трокс, чийнить, налксить сасынесэ. «Цёрынетнеяк» а кадновить эйстэст, «ардтнить машинасо» — ведьме вельде ур-р-р, ур-р-р усксить мельгаст тракторт-мезть.
Вай, ды те мезе?! Кижапкин Ваня каявсь эседензэ алкине, седе лавшо Москвин Саша лангс — бажи нельгемс пистолетэнзэ. Эль а недявить. Истя, Саша, истя, пря иля максо!
Пейдемс, ракамс лангсост, маряви, авадря. Кодат пейдемат! Сонзэ таркас содавтни эйсэнь пелемань ёжо: мезень парось, теиндерятадызь ды кадовиндерят истямокс?!
Ванан сельмень тетькезь. Вай, те кода истя? Каня валсо полавтови, тееви истямокс ломанесь? Вантака, вантака, мезе теить, алкуксонь эйкакшкеть! Видельть, лисни, сисемеце классо тонавтыцянок — Пошань Аркаень — валонзо! Кодамо вий валсонть!
Тамашань теицясь аволь пек марямга ёвтась зярыя валт, ды «эйкакшонзо» велявтсть покшокс — студентэкс. Ойсевтинзе сценанть келес аравтнезь стултнэва.
Лип мерема шкань юткине — ды таго:
— Икеленк мазый, аволь сэрей, лагоря умарь чувто. Тарадсонзо-эйсэнзэ ламо-ламо кенерезь умарть. Варштадо, кодат якстереть! Ламбамот-ризанят! Потьмежат-потьмежат! Тантейть, келеть нильсак! Ярсат — ярсавлить! Мекс а ярсамс? Мекс, алкукскак? Чувтось икеленк, сезнеде зяро меленк. Пештиде пекенк. А сатындеряй киньгак сэрезэ, тёкадеде. Виздемс а мезде. Сезят — зепезэть. Сезят — зепезэть. Сезнеде!
[254] И-и-и, — мезе ушодовсь!
Кунсолыцятне ювк-ювк стякшность, теке кияк тохмадинзе таркастост, пурнавсть «чувтонть» перька ды адя кирнявтнеме, теке саразт, умарень сезнеме. Кайсетить вайгельть, вайкстнемат. Эрьвась бажи сеземс сехте покшонть, сехте якстеренть.
Вай, ды се, некак, Рая! Сон, сон, Павлова! Аволь шождатнеде, тёкии вана, а кемевияк, весемеде верев, венстни кедензэ тей-тов. Вана теть Рая, вана теть пеедькшневтиця Рая... Дошуз! Нилеце умарь уш ангорды. Дока, дока тейтересь! Аволь ансяк тонавтнемасо!
...Номерэнть полавтсь номер.
«Удомань» сехте пек вечкицясь — минек курсонь аволь сэрей, эчкине, кирьксаня келей чама тейтересь, Тоня, матедевсь васенцекс. Эзь карма учомо «мадстицянть» ламос ловоманзо. Натой корнозевсь.
Кавтолдомань апак сода Тоня топавтсь эрьва кармавтоманть.
Эретникесь саизе тейтеренть кедте ды ютавтызе сценанть икеле чирес.
— Кода леметь?
— Тося... Тоня, — удомань пачка панжинзе турванзо ды, эль марямга, ёвтызе лемензэ.
— Иля пеле, Тоня, — ушодсь валаня валсо чаракавтомо «сценань азорось», — тонь кундаты келеть, чувтомить кедеть-пильгеть, рунгот. Иля пеле.
Ванан, кунсолан. Пелян, монськак илязан аймельгадо.
Гипнотизёрось макссь тешкс лездыцянзо туртов. Тона путсь сценанть седе икеле таркас кавто стулт. Юткось вейкенть эйстэ омбоцентень малав Тонянь сэрьшка.
«Азорось» саизе икелензэ аштиця, теке кандо, чувтомозь тейтеренть ды кепедизе мештензэ видьс. Кунст кирдезь, човонь видьга путызе Тонянь прянзо ве стулонть кутьмерьс, пильгензэ, полдаське видьга, — омбоценть. Удомань вечкицянть рунгозо истя каназкадсь, эзь мендяво натой лангозонзо нежедемстэяк.
Тюнихань тевть! Те кода истя?! Вантака, допрок кевензась! Допрок! «Каня эрси истя? Кадовиндеряй истямокс, чувтопекс, свал? — тандавтнесть эйсэнь мельтне. — Эх, Тоня, Тоня! Те, лисни, эрьва валонтень кемицят, вельть манчевицят... Стака, стака теть карми эрямосонть...»
[255] Курок стултнэнь лангсто «кандонть» стявтызе сценанть куншкас. Салава ёвтазь зярыя валт — ды «подопытноенть» кедензэ-пильгензэ лыказевсть, сыргозсь. Турванзо токинзе эль редявикс мизолкс. Сельмсэнзэ вельместь кенярксонь сяткинеть.
— Кортазеват, тейтерь, сеансонть прядовомадо мейле, гардеробов оршнемстэ, — мерсь колдунось ды озавтызе Тонянь лия удыкайтнень юткс.
Сеансось прядовсь. Калдоргадсть озамо таркатне.
А капшан. Учан вакскан Тонянь ютамонзо. Видезэнь пачкодемстэнзэ стинь ды сыргинь мельганзо. Валгинь оршнеме. Монсь ванынь тейтеренть мельга, бажинь а кадовомс. «Кельтемесь» штюп-кап зепканзо-кува — номернэзэ арась. Мезе теемс — а соды. Талакадсь. Секень вант, сельведензэ туить. Тей варшты, тов — вал а ёвтави.
— Иля, иля тално, — пшкадинь тензэ, — иля капша, одс ванныть зепеть.
Те шкане юткозонок вадовкс ливтясь Нина Неклюдова ялгазо — эрясть ве нупальсэ. Седе курок венстизе оршневтицянтень Тонянь номернэнзэ. «Эждезесь» ансяк чочинзе повонзо, був лайшезевсь.
— Нина-а-а! — пижакадсь, марявсь тень, кеняркстонть.
...Тешкстазель: гипнотизёронтень ПСХИ-сэ максомс вейке сеанс. Кодат вейкеть! Институтонь прявтонок Григорий Владимирович Гуляев весе виензэ путынзе — невтевтизе велень цёратненень-тейтертненень дюниянть омбоцеде. Ды тагояк залонтень чаво таркат эзть кадовкшно.
* * *
Умок, од шкастон неезь тамашась вельмевтни прясон тандавтниця арсемат. Лисни, истя, текекс а стака синдемс аволь вейке, аволь кемень, аволь сядо ломанень мельть — ламо миллиононь. Теемс тень неень телевидениянть, радионть ды лиятнень-мезтнень вельде а стака. Каня 1953-це иень эйзюрковсто Сталинэнь кис леекс чудиця сельведтне, конатнень неекшнынь Бакусо эрямстон, а кемекставкст тенень.
Ведьгеменце иетнестэ Пензав сазь гипнотизёрось ёвтакшнось: гипноз вельде кардавить таргицятне, таргавить кренч ведьс ваицятне, лецявить кой-кона орматнеяк. Кеман. Ансяк вана школань кемень классон прядомс «алкаш» валонть эзия марсеяк.
[256] Практика велень хозяйствань институтонь Учхозсо.
1957-це ие умарьков. Неень ловныцянтень, кеман, мельс туить се шкань оршамопельтне
Орданьбуесэ истямо вейкеяк арасель. Дубинькасояк. Ней вана... Васов, вельть васов эскельдясь ломанесь содамочисэнзэ! Сень лангс апак вано, зяро ды кода а псилгалить ламонь содыйтне, тонавтозетне, ведунтнэ ды лиятне, ченьксэнь вечкицятнень ламочист кодаяк а вишкалгавтови, кодаяк истятнэ а кершавить, кургост кодаяк а потомдавить.
Аламо муницятнеде?
Тевесь аволь сынст эйсэ. Ламонь кувалма, паницясь чинев очконтень кельтнень човорямосо куловтомась.
... А содан мекс, а нардтневиця тешкскекс удем сормсевксэзэнь кадовсь сценанть пелев кедень кепедезь молемам. Сеске эзия чарькодекшне — те молемась корты кордон-обуцядон. «Кодамо тон мендявицят! Чапакс!» — сялдыть лиясто эйсэнь ялган. Вадря те? Берянь? Кода меремс... Арсян, шкинемань талантсо казезь ломантнестэ ламот истят. Содан лиядояк: «мендявома» черькстэнть башка эри эйсэнь мейсэяк а мендявиця, а мадстевиця, а солавтовиця ёжо — Чачома мастором покш вечкема.
Кшекуравай Мааронть панжомазо озномасо. Лукоянонь буе, Килей веле. 1998 ие
Апак Совавто Раськетнень Вейсэндявксонть важодема шкасто. Нуянь Видяз ды г-н Хенрике Тиаго Нзита, президент РЬЕС/РАС (Кабинда, Африка). Эстония, Тарту, 1997-це иень медьговонь 15-20 читть
«Иванонь пандо чамат». Тесэ маштозельть 11 тёжат, васняяк эрзят. Эрзямас. 1998-це иень медьковонь 23-це чи
Тесэ пултазель Ине эрзясь Василень Несмеян. Обран ош ёнксось Васол Константин буень Сарлей веле. Тесэ 1743-1745 иетнестэ мольсь тюремась православиянть каршо. 1998-це иень медьковонь 24-це чи
Неть пекшетнень ало Христосонь вийсэ совавтомадо икеле эрзятне ознокшность Инешкипазонтень. Эрзянь Мастор, Маркужо веле. 1998-це иень медьковонь 21-22 чи
Тюрьмань вальмава ванозь. Истя вастынек Алексей патриархонть. Саран ош, 2000-це иень умарьковонь 4-це чи
Вастома Ине отькеренть (героенть) Девятаев Михаил Петрович марто Эрзянь келень идема Фондонь нупальсэ. Саран ош, 2000 ие
Книгань-газетань микшнемат фестивалень ютавтома шкасто. Керш ёндо витев: Дригань Толай, Нуянь Видяз, Кшуманцянь Пиргуж. Самара ёнкс, Исаклавеле. 2001-це иень аштемковонь 30-це чи
«Сияжар» телередакциянть идемга митинг. Саран ош, 2003-це нень таштамковонь 18-це чи
Эрзянь келень чи. Микрофононть икеле Джак Рюйтер. Саран ош. 2003-це иень чадыковонь 16 чи
Сёрмадеень промкс. Керш ёндо витев: Нуянь Видяз, Голенков Миколь, Пшутонь Миколь. Журавлев Числав. Брыжпнэнь Андю, Брыжпнэнь Миша. Саран ош. 2005-це пе
Инешкипазонтень пшкадемань сценась. Раськень озкс. Мордовиянь Покш Игнатбуень Чукалвеле. 1999 ие
Раськень Озкс. Атянь эзем. Керш ёндо витев: 1) Шарононь Сандра, 2) Брыжинский В.С., 3) асодавикс, 4) Кузнецов А.С. (Саратов), 5) Нуянь Видяз, 6) Пронкеев К.В. (Пенза), 7) Кшуманцянь Пиргуж,
8) Малов А.А. (Москва), 9) Эрюш Вежай (Мурманск ёнкс), 10) Девяткин В.В.,
11) Аношонь Тумай (Лукоян ош), 12) Абросимов М.А., 13) Коянкин В.Ф., 14) Казаков П.Е.,
15) Гайнинькань Пичай (Красноярский край).
Покш Игнат буе, Чукал веле (Мордовия). 2007-це ие
Книгань чачома чи. Лиссь «Янгамо» книгам. Лездась «Сяткось». Керш ёндо витев: Тарасова Марина, Разгуляева Татю, Рябова Люда, Кантеева Марина. Саран ош. 2006-це иень аштемков
«Эрзянь Мастор» газетань редакциясо. Керш ёндо витев: Гайнинькань Пичай, Кшуманцянь Пиргуж, Нуянь Видяз, Шарононь Сандра. Саран ош. 2007-це иень панжиков
Я.П. Григошинэнь 120-це чачома чистэнзэ. Пенза ёнксонь Шемешеень буень Армиёва веле. Керш ёндо витев: Гайнинькань Пичай, Нуянь Видяз, Мацьказень Лёфай, Кшуманцянь Пиргуж,
Кие-бути сынст ёнксонь
Эрзянь келень чистэ вастовома Эрьзянь Степан марто. Саран ош. 2009-це нень чадыковонь 16-це чи
Нуянь Видязнэнь — 75. «Где цветет чистодуш?» книганзо яволяв-томаза. Чокшненть Дубинькань буень культурань Кудосо ветясь Г.Н. Святкина ды Н.В. Еремина (эрзякс оршнезетне). Буень библиотекартнень марто. Дубинька веле. 2009-це иень 28-це чи
Колмо-ниле валт эседень... Чачома чистэм Дубинькань Культурань кудосо. 2009-це иень эйзюрковонь 28-це чи
Ледстнемакс вейсэнь мелявкстонок ды ялгаксчпденек. Керш ёндо витев: озадо Гайнинькань Пичай ды Кшуманцянь Пиргуж. Удалост Калаганонь Керяз ды Нуянь Видяз. Саран ош, 2007-це ие, медьков
Нурька вастовома Риитта Уосукайнен, Суоминь Парламентэнь Прявтонть марто. Финнэнь-Угрань раськеютконь 3-це Конгресс. Хельсинки, 2000-це иень ацамков
Колмо ялгат, колмо оят: Шарононь Сандра, Кшуманцянь Пиргуж, Нуянь Видяз. Саран ош, 2000-це ие. медьков
Шнамолопань максома П.А. Мишкиннэнь. Эрзянь культурань Музеень арсемкуронь ломанентень (вить ёно). Лукоян ош, Эрзянь культурань Музей. 2007-це иень сундерьковонь 21 чи
Аношонь Тумай, Эрзянь культурань Музеень прявт. Мартонзо вейсэ васень эскельксстэнть саезь. Лукоян ош, 2006 ие
Раськень Озкс. Ояксчинь кирькс. Чукалвеле, 2004 ие
Апак прядо мором... Лена, Женя, Оля. Саран ош, 1996-це иень таштамковонь 1-це чи
Надяй патянть путовт кудонок. Те юртсонть, тетянь путовт кудосо васенцеде ёвтыя «авай» валонть. Орданьбуе, 2003-це ие, медьков
меельце госэкзаменэнть