Эрзянь ёвкст (М. Е. Евсевьев, 1928)/36
| ←Ёвкс 35 | Эрзянь ёвкст (1928) , edited by Евсевьев, Макар Евсевьевич Ёвкс 36 |
Ёвкс 37→ |
| Эрзянь ёвкст (скаскат). Пурныньзе М. Е. Евсевьев. СССР-энь Наротнэнь Центральной Издательствась. Москов, 1928 |
ОЗЯЗ МАРТО ЧЕЕРЬ.
Озяз марто чеерь мусьть вейсэ ве товзюронь зёрна и кармасть пелькстамо, — кинень сонзэ саемс. Озяс мери: „Мон васьня неия, — мон сайса.” — Чеерь мери: [ 111 ]мон икеле неия — мон сайса.” Пелькстасть, пелькстасть — эзь явовт тенст зёрнась, тусть кавонест инязорост туртов: озяс — орёлнэнь, а чеерь — лев зверьнень.
Кармасть пелькстамо инязоротьне — кинень максомс зёрнанть. Пелькстасть, пелькстасть, лев зверень кежензэ састь орёл ланкс; саизе ды лапасонзо вачкодизе орёлонь витть сёвно ланга. Орёлонь сёвнозо новольсь: ливтямо — а ливтяви. Куйсь кой-как чувто пряс и ашти.
Юты чувтонть алга охотник. Неизе орёлонь, стявтызе ружиянзо и арци ледьмензэ. Орёл мери тензэ: „Илямак летть, од цёра; кундазь кундамак, — мон а ливтяван!”
Охотниксь сонзэ эссе кемть — лець вельксканзо. Орёлсь тандаць, но эзь ливтявт. Охотниксь омбоцеде и колмоцеде истя лець. Орёлсь эзь ливтяк. Теде мейле охотниксь куйсь чувто прястень, валтызе орёлсть и саизе кудов.
Ки ланга ютамсто орёлсь мери тензэ: „Андумак колмо иеть — макст тень чистэ ве гала, кода мон виеман — панца тенть питнест!”
Охотниксь ульнесь сюпав, сон кармась эснэнзэ андомо: чистэ макслесь тензэ вейте-вейте живой гала.
Колмо иень топодезь орёлсь мери: „Озак лангозон, адя мон вачаса вием.” Охотниксь озась лангозонзо и тусть ливтямо.
Ливтясь, ливтясь — мусь орёлсь сыре тумо и мери охотникстень: „Тон валк ланкстон масторов, мон верев кузян и вачкудиван те тумость пряс, — яжавиньдеряй тумось чевень-чев — саты вием, а яжавиньдеряй — а саты оштё.”
Охотниксь кадовсь масторов, орёлсь куйсь менель ёжос и тосто кевкс вачкодевсь тумонть пряс. Тумонть эйстэ сивсь ансяк ве тарад. Орёлсь мери: „Аламо оштё вием, андумак оштё колмо иеть, — макст тень чистэ баранонь-баран.”
[ 112 ]Озавтызе охотниксть лангозонзо и тусть мекев кудов. Охотниксь кармась эснэнзэ андомо барандо: чистэ тензэ ве баран максы.
Колмо иень топодезь орёлсь таго мери тензэ: „Адя, озак лангозон — вачаса — ламо а ламо вием!” Охотниксь озась. Орёлсь ливтясь маронзо вирьс, мусть таго тумо и мери орёлсь: „Тон кадовт теске, мон кузян верев и вачкудиван те тумость ланкс — вачаса вием.”
Охотниксь кадовсь алов, орёлсь куйсь таго менель ёжос и кевкс вачкодевсь тумонть лангкс. Тумонть яжавсь ансяк прязо, сонсь целасто кадовсь. Орёлсь мери охотникстень: „Аламо оштё вием, адя оштё колмо иеть андумак: чистэ макст тень сисемь иесэ бука. Мон панца тонть андумат!”
Охотниксь таго кармась эснэнзэ андомо. Чистэ тензэ максы сисемь иесэ бука.
Колмо иень ютазь, орёлсь мери охотникстень: „Адя, озак лангозон, вачасынек вием, — ней маряви таго икелень кондямо сон!”
Охотниксь озась лангозонзо и таго тусть вирев. Мусть тумо. Охотниксь кадовсь алов, орёлсь опеть куйсь менельс и кевкс вачкодевсь тумонть ланкс. Тумось чевень-чевень яжавсь. Орёлсь мери: „Ну, адя озак лангозон, мон панца ней тонть андумат!” Охотниксь озась и тусть.
Ливтясть, ливтясть — орёлсь мери: „Вачтак керч лавтомон велькска, мезе тенть неяви!” Охотниксь вачтась и мери: „Неяви ве сурцеме вирь и ве пенчь ведь.” Орёлсь кода ёрцазо охотниксть вецтень. Охотниксь карькс тапардамга ваясь вецтень. Валксь орёлсь ваксозонзо и кевксни: „Тандадыть?” Охотниксь эзь пшкадевтькак тензэ, кода тандаць. Орёлсь омбоцеде пшкаць тензэ. Сестэ ансяк охотниксть кельзэ паншсь и мери: „Пек тандадынь!” Орёлсь мери тензэ: „Монгак истя тандадокшнынь, кода тон ледить монь ланкс! [ 113 ]Ну, адя озак таго лангозон!” Охотниксь озась и тусть таго ливтямо.
Ливтясть, ливтясть, орёлсь мери охотникстень: „Вачтак ней вить лавтомон велькска, мезе тенть неяви?” Охотниксь вачтась и мери: „Неяви гребушкашка вирь и сувтемешка ведь”. Орёлсь таго ёртызе ланкстонзо охотниксть вецтень. Охотниксь карксамова ваясь вецтень. Орёлсь валксь ваксозонзо и кевстни эснэнзэ: „Тандадыть?” Охотниксть тандаць — кельзэ-як мик педясь. Весть кевстизе орёлсь — охотниксь чатмени, кавсть кевстизе — чатьмени. Кода кевстизе колмоцеде — сон пшкаць: „Вана кода тандадынь — ёжомгак мик машлесь”. Орёлсь мери: „Мон-гак истя тандалинь, кода тон омбоцеде ледить лангозон. Адя, озак лангозон, таго туйдянок ливтямо!” Охотниксь мери: „Адя виимак лучи кудов, питьнетяк а эряви, — тон монь таго каясамак!” Орёлсь мери: „Тон монь ланкс колмо раст ледить, колмо раст монь седеем сезик. Тон-гак ней колмо раст эряволеть каямс. Ну моли ино простятан, колмоцеде а каятан, — озак лангозон, вицтэ кудов туйдянок!” Охотниксь озась и тусть таго ливтямо.
Ливтясть, ливтясть, орёлсь мери: „Вачтак керч ловтомон велькска — мезе тенть неяви?” Охотниксь вачтась и мери: „Неяви, рузава моли церкував озномо, кото нянькат эснэнзэ кандыть.”
Орёлсь мери: „Се монь покш патям. Азё, мерть тензэ: улиньдеряй мелеть ялаксот марто васодьмекс, пандык сонзэ андума питьнензэ. сон карми тенть ярмаконь максмо — иля сайть, мерьть: туик тетять баславкасть — васотьтядо ялаксот марто!” Валксть масторов. Охотниксь мольсь патянть вакс и мери: „Улиньдеряй мелеть ялаксот марто васодьмекс — пандык сонзэ андума питьнензэ!”
Патясь мери: „Максан тенть кемгавтово улав пижень ярмак!”
[ 114 ]Охотниксь мери: „А эрявить монень ярмакот, максык тетять баславканть!”
Патясь мери: „Ялаксонть монень а неймекс и тетянь баславканть а максомс!”
Охотниксь велявць и ёвтлизе орёлстень, кода мерсь патязо. Орёлсь озавтызе охотниксть лангозонзо и таго тусть ливтямо.
Ливтясть, ливтясть — орёлсь мери: „Вачтак удалов, мезе тенть неяви?”
Охотниксь вачтась и мери: „Неяви, патять кудонзо-чинзэ таркасто лиси тусто качамо!” — „Се патянь ули-парозо палы!”
Тусть таго ливтямо. Ливтясть, ливтясть, орёлсь мери охотникстень: „Вачтак вить лавтомон велькска, мезе тенть неяви?”
Охотниксь вачтась и мери: „Неяви, руз-ава моли церькував озномо. Кемгавтово нянькат кандыть эйсэнзэ!”
Орёлсь мери: „Се монь омботькс патям. Азё кевстик, панцазо а панцазо тонть андума питьнеть.”
Охотниксь тусь и мери орёлсь патянстэнь: „Улиньдеряй мелеть ялаксот марто васодьмекс, пандык андума питьнензэ. Мон сонзэ вейксэ иеть андыя!”
Патясь мери: „Панца, панца! Максан тенть кемгавтово улав сиянь ярмак!”
Охотниксь мери: „Монень а эрявить ярмак, максык тень тетять баславка сундуккенть.”
Патясь мери: „Тетянь баславкасть а максса и ялаксом марто а васодян!”
Охотниксь велявць и тусь орёлсть вакс. Орёлсь озавтызе лангозонзо и тусть таго ливтямо.
Ливтясть, ливтясть — орёлсь мери: „Вачтак удалов, мезе неяви тенть?”
Охотниксь вачтась и мери: „Неяви, патять кардазонзо таркасто лиси раужо качамо!”
Орёлсь мери: „Те монь омботькс патянть ули-парозо палы. Сон эссе макст тенть тетянь баславканть, и курвайсь весе ули-парозо!”
[ 115 ]Ливтясть, ливтясть — таго орёлсь мери охотникстень: „Вачтак прян велькска, мезе тенть неяви?”
Охотниксь вачтась и мери: „Неяви тень, — юты руз ава церькував, комсь ниле нянька кандыть эснэнзэ!”
— „Се монь вишка патям, — азё кевстик, панцазо а панцазо андума питьнеть.”
Охотниксь мольсь патянть вакс и мери тензэ: „Улиньдеряй мелеть ялаксот марто васодьмекс, пандык андума питьнензэ: мон сонзэ вейксэ иеть андыя: колмо иеть — галадо, колмо иеть — барандо и колмо иеть сисемь иесэ букадо.”
Патясь мери: „Панца, панца! максан тенть комсь ниле улав сырнень ярмак!”
Охотниксь мери: „А эрявить монень ярмак, максык тетять баславка сундуксть.”
Патясь мери: „Нать ялаксонть марто васодемс и тетянь баславка сундуккесть максомс.”
Охотниксь велявць и тусь орёлсть вакс, и ёвтнизе месть мерсь вишка патязо.
Орёлсь мери: „Ну, адя ней панца андума питьнеть.”
Састь патястень. Патясь симдинзе, андынзе и максызе охотникстень тетянзо баславка сундуккесть. Орёлсь мери тензэ: „Ну, ней пандовсь андума питьнеть, азё кудов, тосо учить эснэть, ансяк ванок, — кудов пачкодьмезэть иляк панчт сундуксть!”
Охотниксь саизе горобииненть и тусь кудов.
Ютась ве, ютасть кавто чить, ютась цела месець и арци эсь пачканзо: „Мейсь мон кандан те горобииненть эснэ, можоть мезе-як арась поцонзо. Давай вачаса — ули, арась мезеяк поцонзо”. Саизе ды панжизе. Горобиинесь пешксе унжадо. Листь не унжатьне поцтонзо, теевсть весе айгоркс и срацть паксянь келес, паксяськак весе пешкець. Охотниксь тев берть чии, тов берть чии — а понги тензэ ве айгоргак.
[ 116 ]Чийнесь, чийнесь — сизесь. Озась сильдей пряс и давай аварьдеме. Мольсь ваксозонзо атине и мери: „Мейсь аварьдят, охотник?”
— Кода ай-аварьдян, — мери охотниксь, — панжия горобиинем и оргоцть поцтонзо весе айгорон, ней тень а пурнавить.
— Мезе максат, моньсь пурнасынь?
— Максан тенть, мезе вешат, ансяк пурныть.
— Алтык тень, мезьде аздат кудосо!
Охотниксь мери: „Улезэ тенть, мезьде аздан кудосо, ансяк пурны айгорон!”
Атинесь вешкстась и весе айгортнэ промсть перьканзо, теевсть мекев унжакс и совасть горобииненьтень. Атясь пекстызе горобиянть и максызе охотникстень. Охотниксь саизе горобииненть и тусь кудов.
Ансяк орта ланкс пачкоць, чийсь каршозонзо колмо иесэ цёразо и поводевсь кирьгазонзо.
Тетясь мери тензэ: „Эх, цёрам! эрьгедьмась эрьгедить эзэзэнь ды монь марто эриця а улят, — мон тонть ве атянень алтытень.”
Цёрась мери: „Алтымек, алтымек, — мон а пелян.”
Эрить-аштыть колмонест. Мезе мелест — сундуксть эйстэ лиси тенст. Кардазост пешксе айгордо, паксяст пешксе букадо.
Цёрась уш покшто кайсь. Сон мери тетянстэнь: „Тетяй, баславамак, мон туян атястень.” Тетясь баславизе, простясь мартонзо и цёрась тусь.
Ютась, ютась, пачкоць эрьке чирес и кекшсь нудей пулос оймсеме. Ансяк кекшевсь, ваны ливтить колмо яксярк. Либор, валксть эрьке чирестень и теевсть мазы тейтерькс. Кайсизь панарост и кармасть экшелеме. Цёрась лись нудей поцто, саинзе вишка тейтерьсть панаронзо ды мекев кекшсь мартост.
Тейтерьтьне экшелевсть и листь вецтэнть. Пензэ ёвтлесызь истяжо, кода ёвтнесь скаскасо „Охотник” № 2, стр. 14.[1]
- ↑ (ru) Примечание редактора Викитеки: Скорее всего, на самом деле имелась в виду сказка "Ведь-ава" № 1, стр. 3, которая повторяет описываемый здесь сюжет.