Эрзянь ёвкст (М. Е. Евсевьев, 1928)/02

From Wikisource
Jump to navigation Jump to search
Эрзянь ёвкст  (1928) 
Эрзя ломанть, edited by Евсевьев, Макар Евсевьевич
Ёвкс 2
Эрзянь ёвкст (скаскат). Пурныньзе М. Е. Евсевьев. СССР-энь Наротнэнь Центральной Издательствась. Москов, 1928
[ 14 ]

ОХОТНИК.

Эрясь-айшь атят-бабат ве охотник. Ульнесьть сынст кавто цёрынест. Тусь охотниксь вирьга якамо. Якась, якась — сизесь, чавмокс мезеяк эзь мук. Озась пенька пряс оймсеме и матедевсь. Сыргойсь — икелензэ ашти нармунь. Кепедизе охотниксь ружиянзо и арци нармунсть ледьме. Нармуньсь ломанень кельсэ мери тензэ: „Илямак летьть, охотник, — кундазь кундамак!” Охотниксь кундызе нармуненьть и кандызе кудов. Нармуньсь кармась алыямо — чистэ сырнень ал алыи. Охотниксь кармась алтнэнь эснэ микшнеме и сюпалгаць.

Кепетець война. Охотникень саизь салдатокс. Алтнэнь эснэ кармась микшнеме низэ. Тонаць авастень якамо ве ломань. Сон ульнесь сёрмас содыця. Сон мери авастень: „Невтик монень се нармуньсть, кона алыи сырнень алт.” Авась невтизе. Нармуньсть тутмасо сёрмадозь: „Ки сэвсазо монь седеем, се тееви инязорокс, ки сэвсазо максом, се ули князекс.” [ 15 ]Алужось ловнызе те сёрмадовксонть и мери авастень: „Печксак нармунсть монень — карман тенть сакшномо, а печксак — а карман.” Охотникень нись печкизе нармунсть и путызе каштотс пийме, сонсь лиссь кудостонть та ков.

Цёрынензэ кавонест якильть школас тонавтлеме. Састь сынь школасто обидамо. Пекест васть, кудосонть ки-як арась. Варчтасть каштомостень — тосо нармунь пидезь. Сывельденть сынь эсть ярцак — пельсть авадост, — таргизь нармунсть поцто седейтнень-максотьнень и сэвизь. „Те”, мерить, „аванень аздави!” Покш цёрась сэвизе седейсть, а вишкинесь — максонть, и тусть таго школас.

Сась аванть алужозо. Авась таргизе каштотсо нармунсть и целом путызе алужонть икелев столанкс. Алужось васняяк варчинзе седейтьнень-максотьнень, — сынь арасть нармунсть потсо. Кежиявць — ярсамояк эзь карма. Саизе нармунсть и церепканек-мезнек мастор вакс вачкодизе. Авась кармась эснэнзэ кевстнеме, мейсь сон истя кежиявць: печкевтизе нармунсть, ней а ярцы эстэдензэ. Алужось мери: „Мон сэвиксэлень ансяк нармунсть седеензэ-максонзо, а сынь уш арасть нармунсть потсо, — та ки сэвиньзе сынст.” И кармась аванть эйсэ кевстьнеме — ки сэвинзе нармунсть седеензэ-максонзо. Авась мери: „Моньтемень сакшность цёрынетьне обидамо, сынь нать сэвизь.” Алужось мери: „Печкить кавонест цёрынетьнень и седеест-максост пидить. Ванды сан — сэвсынь”.

Омбоце чистэ авась цёрынетьнень школас эзинзэ нолда, пекстынзе кудыкеле цюланс и кучизе работникензэ печкемест, сонсь кадовсь кудос. Роботникстень жальть марявсть цёрынетне печкемс, сон саинзе сынст ды нолдынзе кудыкельке вальмава паксяв, тарказост печкась киска ды псака. Кода печкизе кисканть, кискась „ций” мерьсь. Авась прась масторов и мери: „Те, нать, покш цёранть печкизе.” [ 16 ]Аламос аштезь роботниксь печкизе псаканть. Псакась „мяв” мерсь. Авась таго прась и мери: „Те, нать, вишка цёранть печкизе.”

Роботниксь калминзе кискатьнень-псакатьнень, а сэдеест-максост максыньзе авастень. Авась пидинзе сынст алужонстэнь.

Сась алужось. Авась таргинзе кискань-псакань седейтьнень-максотнень и путыньзе икелензэ. Алужось сускизе кискань седейсть и мери: „Те покш цёранть седейсь, чинезэ-як кискань.” Мейле сускизе псакань седейсть и мери: „Те вана вишка цёранть седейсь, — чинезэяк псакань.” Севинзе алужось кискань-псакань седейтьнень и тусь кудов.

А цёрынетьне листь паксяс и тусть чиезь ков сельмест неить, ков пилест марить. Чийсть, чийсть — пачкотьсть ки рашкс. Покш цёрась мери вишкинестень: „Ну, брат, давай ней явданок. Мон туян ве киванть, тон азё омбоцеванть. Инечинь чистэ, ки эстэденек жив ули, лисезэ те ки-рашкостень васодьме.” Простясть кавонест и явсть: вейке тусь ве кияванть, омбоце — омбоцеванть.

Покш цёрась мольсь, мольсь — пачкоць ошос и совась берякшке кудос ве бабиненень удомо. Се ошнэнть пурныть самой инязоро. Весемень пурнызь промксос, явшесть кедьгаст свечат и учить: кинь свечазо сонсь курвази, се ули инязоро.

Бабинесь мери цёрынестень: „Азё тонгак инязоронь пурнамо, а курвази-ли свечат. Вальмалга весемень терьцть.” Цёрась кулцонизе бабиненть — сон-гак лиссь промксос. Максть сонензэ-як свеча. Кодак саизе свечанть кедезэнзэ — курвайсь свечазо. И путызь сонзэ инязорокс.

Вишка сёрась мольсь, мольсь — пачкоць велес, сивець сюпав ломанень роботникекс и кармась кецэнзэ эрямо.

Сась инечи. Сынь кавонест листь се ки-рашкостень, косто явсть. Васоць вейс и кармасть [ 17 ]вейкест-вейкест туртов ёвтлеме, конаст кода эри. Лецть мелезэст тетяст-аваст и сыргасть сынст варчамо.

Чопулгадозь пачкоцть сынь эсь велезэст. Стукацть тетяст вальмалов и мерить: „Нолдатадо удомо?”

Тетясь ансяк сась службасто. Сон мери тенст: „совадо!” Цёратьне совасть. Тетясь эзиньзе сода сынст и мери: „А содатадо-ли, цёрынеть, кодамо-як бобаскине, вельть пек тошна саимем, а юты-ли тошнам.” Вишка цёрынесь мери: „Мон а содан. Лелям а соды-ли кодамо-як?”

Покш цёрась мери: „Мон содан ве бобаскине, аздан мелезэнк туи а туи?”

Тетясь мери: „Ёвтлик, паряк тошнам юты.”

Цёрась кармась ёвтнеме:

„Эрясть-айшть атят бабат кавонест. Ульнесть сынст кавто цёрынест. Атясь ульнесь охотник.”

Авась чаркоць — не сынст цёратнье и мери: „Я, саты ёвтлемс: монь мелем мольсь бобаскедеть.”

А тетясь мери: „Ёвтлек, ёвтлек, цёрынем: монень мазы маряви бобаскеть.”

Цёрынесь таго кармась ёвтлеме и ёвтлизе педе-пев эсь эрямост. Кода весе ёвтлезь прядовсть, цёратьне ёвтызь пряст тетяст-аваст туртов. Тетясь сайсь узере и кериксэльсе аванть прянзо. Цёратне нельгизь кецтэнзэ узеренть — эзизь макст аваст чавмокс. Авась сюкунясь тетясть пилькс и тетясь простизе.

Омбоце чистэ покш цёрась саинзе тетятнень-аватнень и вишка брацть эстэнзэ эрямо.

Вишка брацть путызе князекс эсь масторозонзо и течемень чис эрить тосо: покш цёрась инязорокс, вишкинесь князекс. Ульсь истя, кода сёрмадозель нармунсть тутмасо: покш цёрась сэвизе седеензэ — теевсь инязорокс. Вишка браць сэвизе максонзо — теевсь князекс.