Эрзянь ёвкст (М. Е. Евсевьев, 1928)/03

From Wikisource
Jump to: navigation, search
Эрзянь ёвкст  (1928) 
Эрзя ломанть, edited by Евсевьев, Макар Евсевьевич
Ёвкс 3
Эрзянь ёвкст (скаскат). Пурныньзе М. Е. Евсевьев. СССР-энь Наротнэнь Центральной Издательствась. Москов, 1928
[ 18 ]

КЕЗЭРЕНЬ ПОБАСКИНЕ.

Эрясть-айшть атят бабат кавонест. Ульнесть сынст ве тейтерест ды ве цёраст. Атясь ды бабась сыретельть; тейтерьсь мирьденень максмошкаль; цёрась салдаткс туймешкаль. Ульнесь сынст видезь ве пельума сюрост.

Сась нуйме ланго. Атясь мери: „Мон нуйме а молян, — сыреян, тельня кулан, сюрот тень эрявмо а кармить”. Бабась-как мери: „Мон-гак а молян, — мон-гак сыреян — тельня кулан”. Тейтерьсь мери: „Мон-гак а молян нуйме, тельня туян мирьденень”. Цёрась мери: „Мон-гак а молян, — мон тельня салдатокс туян”. Конаст-как эзь мольть нуйме — кадовсь сюрост лов алов.

Сась теле, — атясь эзь куло, бабась-как эзь куло. Тейтерьсь мирьденень эзь тук, цёрась-как салдатокс эзь тук. Весе кадовсть кудос. Ярцамс тенст а мезде, сюрост апак нуйть лов алов кадовсь. Аштесть-аштесть вачо, сайсть койметь, тарваст ды тусть паксяв нуйме. Нардасть, нардасть ловсть эснэ — кельместь весе тоско.