Эрзянь ёвкст (М. Е. Евсевьев, 1928)/31

From Wikisource
Jump to navigation Jump to search
Эрзянь ёвкст  (1928) 
Эрзя ломанть, edited by Евсевьев, Макар Евсевьевич
Ёвкс 31
Эрзянь ёвкст (скаскат). Пурныньзе М. Е. Евсевьев. СССР-энь Наротнэнь Центральной Издательствась. Москов, 1928
[ 97 ]

ДУРАЦЬКЕ ИНЯЗОРОНЬ ТЕЙТЕРЬ ЭСТЕНЗЭ НИКС САЙСЬ.

Эрясть-айшть атят бабат кавонест. Ульнесть сынст колмо цёраст. Кавтотьне превейть, колмоцесь — дурак. Кулость атятьне-бабатьне. Цёратьне калмизь. Пря-пезэст стявсть салонь столба. Молить вачамонзо — столбась нолцезь. Молить — нолцезь. Покш братось [ 98 ]мери: „Дайте караулясынек, ки нолци столбасоньть.” И кармасть караулямо.

Васень вестэнть мольсь караулямо покш братось. Чокшнэстэнть караулясь, валське ёнов матедевсь. Сась сивой айгор. Нолцизе столбанть ды тусь. Сась братсь кудав. Кевстизь: „Я, неить мезеяк?”

— Арась, эзинь нейть!

Омбоце вестэнть тусь омбоце братсь. Чокшнэстэнть караулясь, зоря ланкс матедевсь. Сась карей айгор, нолцизе столбанть ды тусь. Сась братсь кудов. Кевстизь: „Я, неить мезеяк?” — „Арась — эзинь нейть!”

Колмоце вестэнть тусь вишка братсь. Чокшнэстэнть маць, а зоря ланкс стясь. Сась сивой айгор и кармась столбанть нолцеме. Дураксь кундызе айгорсть.

Айгорсь мери: „Таргак черть гривастон ды нолдамак. Знярдо эряван, мерть ансяк: „Сивка-бурка, вечной каурка, стань предо мной, как лист пред травой”, — мон сан тенть. Дураксь таргась гривастонзо черть и нолдызе.”

Мольсь кудов. Кевснить эснэнзэ: „Я, дурак, неить мезеяк? — Арась, эзинь!”

Марясть братнэ, инязоро тейтерензэ эснэ максы. Сыргасть сыньгак инязоронь тейтерень сайме. Вейкесь озась ласте сея ланкс, омбоцесь баран ланкс и тусть. Дураконь эзизь сайть.

Туймедест мейле дураксь лись кардайс и серьгець: „Сивка-бурка, вечный каурка, стань предо мной, как лист пред травой!” Арць икелензэ сивой айгор и мери: „Совак керч пилеван, листь витть пилеван.”

Дураксь совась керч пилеванзо, лись витть пилеванзо — и теевсь бояркс. Озась сиканть ланкс и тусь сонгак инязоронь тейтерень сайме.

Ки ланксо ваны — братонзо кавонест рудайс пезнасть сеяст, бараност марто, а лисевить. Дураксь керясь, керясь эснэст локшосо, тулкадинзе ки ланкстонть ве ёнов и тусь ардозь.

[ 99 ]Инязоронь тейтерьсь ашти озадо вере кудосо. Ваны вальмава. Вальмантень кемгавтово венецьть мастордо. Инязорось мери: „Ки ласте кирнавтови вальманть сэрьс и таргасазо тейтерень сурсто сырнень сурксонть, сенень максса никс тейтерем.”

Зняро боярт снартлесть кирнавтомо, кияк пелевицкак эзь кирнавтовт. Арць меельсь пелев дурак. Кирнавць сивкасонзо, — кавто венецень сэрь эзь кирнявтовт. Тусь ардозь мекев кудов. Совась сивканзо витть пилева, лись керч пилева и теевсь мекев дуракокс. Куйсь кашланкс, учи братнэнь эйсэ.

Састь братнэ, мерить: „Эх мезес понгонинек: тов мольместэ пезнакшнынек кавонек рудайс, а лисевдянок ды пандя; пасиба та кодамо бояр сасымизь ды таргимизь, а то те шкамс тоск улевленек.”

Дураксь мери: „Те мон таргидизь тынк”.

Братнэ мерить: „Паньдя, дурак!”

Омбоце чистэ братнэ таго тусть. Дураконь таго эзизь сайть мартост.

Дурак таго лись кардайс и сергець: „Сивка-бурка, вечный каурка, стань предо мной, как лист пред травой!” Арць айгорсь. Дурак совась керч пилеванзо, лись витть пилеванзо, теевсь бояркс. Озась айгорсть ланкс и таго тусь инязоронь тейтерень саеме.

Ки ланксо таго пезнасть кавонест братонзо. Таго дураксь керясь, керясь эснэст, тулкадинзе ве ёнов и тусь вакскаст.

Арць инязоронь кудонть вакс. Кирнавць сивказо вальмантень. Ве шочконь сэрь ансяк эзь кирнавтовт. Тусь таго кудов. Колмоце чистэ таго весе промсть инязоронь тейтерень саеме. Ваныть весе вальмастень, — киненьгак инязоронь тейтерьсть сурсто сурксось а таргави. Арць дурак, кирнавць сивкасонзо. Таргизе инязоронь тейтерсть сурсто сурксонть, и ардозь кудов. Весе нароць сеери: „Ки те, ки те? Кирьдеде эснэнзэ!” А дураконь секе неевтезэ ульнесь.

[ 100 ]Тейсь инязорось свадьба. Терьдизе весе народонзо свадьбас. Промсть весе, ансяк дурак эзь мольть. Инязоронь тейтерьсь кантли вина, — вешни эсь женихензэ эснэ. Весемень сурост ваныньзе, — киньгак сурсо арась сурксозо.

Омбоце чистэ инязорось кармавць, штобу весе молест свадьбас — ки-як илязо кадовт кудос.

Братнэ саизь дураконьгак свадьбас. Дурак тапаризе суркс марто сурсть нулынесэ, озась кенкш уголс и ашти. Канць инязоронь тейтерьсь сонензэ-як вина. Дураксь саизе винанть и кармась симме. Инязоронь тейтерсь неизе нуласо тапарязь сурсть и мери: „Нука невтика сурот — мейсь сон тапарязь.”

Дураксь калавтызе нуланть — сурсонзо инязоронь тейтерьсть сурксозо. Инязоронь тейтерьсь палызе дураксть; кундызе кетьте и ветизе тетянзо икелев. Тетясь баславинзе и кармасть весе симме-ярцамо — свадьбань налксеме. Мон-гак тосо ульнинь, симинь-ярсынь; ансяк кургозон мезеяк эзь понк.