Эрзянь Мастор/2012/12/Седейризкс явдано...

From Wikisource
Jump to navigation Jump to search
 
Седейризкс явдано...

2012-це иень аштемковонь 14-це чистэ 76 иесэ кулось РФ-нь культурань важодицясь, Сёрмадеень сюлмавксонь ветямкуронь секретаресь, седе мейле — прявтось, МР-нь Раськень поэтэсь Калинкин Иван Алексеевич.

Калинкин И. А. чачсь 1935-це иень аштемковонь 23-це чистэ Ульяновск ёнксонь Инзань буень эрзянь Чей велесэ. Войнань стака иетнестэ аванзо марто кадызь чачома велест ды 1944-це иестэнть сась эрямо Мордовской АССР-нь Покш Игнатова буев.

Спасское велень школань прядомадо мейле урендясь Советэнь Армиясо. Прядызе Орданьбуень культпросветучилищанть.

Эйзюрковонь 1959-це иестэ Иван Алексеевичень тердизь Покш Игнат буень «Знамя труда» газетав. Горькоень партиянь школанть прядомадо мейле, 1970-це иестэнть, Калинкин И. А. Покш Игнат буень «Восход» газетань редактор.

1972-це иестэнть Калинкин И. А. сась Саранов «Эрзянь правда» газетань отделэнь прявтокс, куроксто «Сятко» журналонь секретарекс.

1976-це иестэнть саезь СССР-нь Сёрмадеень сюлмавксонь ломань. 1977-1984-це иетнестэ — «Сятко» журналонь редактор.

1984-це иестэ саезь 2000-це иес МР-нь Сёрмадеень сюлмавсконь ветямкуронь прявт.

Калинкин И. А. сермадсь 19 книгат — стихть ды поэмат, «Ава ды лей» стихсэ роман. Васенце книгазо — «Зорянь мизолкст» — нолдазь Сарансо 1969-це иестэнть. «Маней пиземе», «Сырнень сюлмо», «Лёмзеркс чире», «Пиже толбандят», «Кизэнь менель», «Надежда» стихень ды поэмань книгатне нолдазь Сарансо.

Рузонь кельсэ стихотворениянзо печатавсть «Литературная газета», «Литературная Россия», «Наш современник», «Дружба народов», «Нева», «Волга», «Огонек» газетатнесэ ды журналтнесэ.

Куншка ёнксонь издательствасо нолдазельть «Черемуховый берег», «Зеленые костры» книгатне. Сон сермадсь «Дорогами испытаний» очеркень книга Советской Союзонь Геройтнеде, Покш Игнатова енкссо чачозтнеде ды «Васолонь килангсо» («В дальней дороге») повесть.

Сехте редявиксэкс кармась «Ава ды лей» стихсэ романось, кона 1988-це иестэнть рузонь кельс ютавтозь романось нолдазель Московсо.

«Пиче вирь», «Цветы дружбы», «Песни с берегов Суры и Мокши» стихень ды поэмань пусмотнень кисэ поэтэнтень максозь Мордовинь госказнень лауреатонь лем.

Сон кочказель Мордовской АССР-нь Верховной Советэнь депутатокс (1985), казезь «Знак Почета» орденсэ.

Тусь эрямостонть вадря, чевте ойме ломань, вейсэнь тевтнень кис аштиця, тусь Тоначив Эрзя. Иван Алексеевич Калинкиндэ валдо ледстнематне свалшкас кадовить минек седейс.

Аношонь Тумай, Кшуманцянь Пиргуж, Калаганонь Керяз, Кузоватонь Оля, Ледяйкин Евгений, Нуянь Видяз, Мацьказонь Лёфай, Тимофей Тимин, Шарононь Сандра, Эрюшонь Вежай.


RU: Данная работа создана сотрудниками газеты Эрзянь Мастор и распространяется по лицензии Creative Commons Attribution 4.0 International. См. пояснение внизу заглавной страницы газеты.
EN: This work is licensed under the Creative Commons Attribution 4.0 International License as a work by Erzyan Mastor journal employee(s). See the disclaimer on the bottom of the front page of the journal.