Эрзянь Мастор/2012/12/Книгань Чачома Чи

From Wikisource
Jump to navigation Jump to search
 
Книгань Чачома Чи

Авторось Тимофей Тимин книгасонзо ёвтни колмо генералтнэде–Ивантнеде, сынст эрямо кидест, армиясо теезь тевдест. Ютксост васенцесь — эрзясь Кутяков Иван Семёнович. Сон Василий Иванович Чапаевень маштовомадо мейле ульнесь 25-це дивизиянть прявтокс. Воёвась ламонь таркава. Ульнесь казезь зярыя орденсэ. Колоньгеменце иетнестэ, кода ламонь, Иван Семёнович Кутяковонь «войнанзо» прядовсть — ледезель кода раськень ят, антисоветчик. Чинек-венек кемнилее ковонь перть кевкстнематнеде мейле, 1938-це иень медьковонь 28-це чистэ саизь оймензэ.

Омбоце повестьсэнть — «Господин фельдмаршал, вы пленены» — ёвтневи Иван Андреевич Ласкиндэ, Белебей ошсто (Башкортостан) эрзядонть. Те генералось Сталинград ошонть кис тюремадо мейле ульнесь полонс саицякс немецень фельдмаршалонть Паулюсонь. Теде мейле И. В. Сталин кармавтызе вейсэ Петров генералонть марто, изнямс «Голубой линиянть», саемс Севастополенть ды панемс немецтнень Кавказсто.

Колмоце повестесь «Генерал свобода» генерал-полковниктенть Иван Васильевич Болдиндэ. Сон чачсь рузонь Высокое велинесэ, кона ней Мордовиянь Кадошкинань буесэ, 1892-це иень умарьковонь 15-це чистэ. Калмазь Киевсэ. Ульнесь Модамасторонь Васенце, Гражданской, Модамасторонь Омбоце войнатнесэ, ламо тюрематнесэ.

Книганть нолдызе Московонь «Эрзянь вайгель» вейсэндявксось, конань прявтозо Е. Е. Ледяйкин. Редакциянь арсемкужось: Е. Е. Ледяйкин, Г. И. Ермушкин, М. Р. Биушкина, М. Ф. Ерошкин, Р. Е. Степанова, С. С. Живаев. Печатазь Саранонь «Красный Октябрь» типографиясо, тиражозо 300 экземплярт.


RU: Данная работа создана сотрудниками газеты Эрзянь Мастор и распространяется по лицензии Creative Commons Attribution 4.0 International. См. пояснение внизу заглавной страницы газеты.
EN: This work is licensed under the Creative Commons Attribution 4.0 International License as a work by Erzyan Mastor journal employee(s). See the disclaimer on the bottom of the front page of the journal.