Эрзянь Мастор/2012/10/Ёгань Миньканень

From Wikisource
Jump to navigation Jump to search
Эрзянь Мастор, № 10 (378), 31 мая 2012 edited by Нуянь Видяз, Кшуманцянь Пиргуж
Ёгань Миньканень by Нуянь Видяз
Статья на сайте газеты: № 378, 31.05.2012, Ёгань Миньканень
 
Ёгань Миньканень

Сюкпря, Минька!

 

*  *  *  *

Байтяк эрязь иетнень перть, кадык аволь кодат ней, — кудодо-машинадо мельтькак эзть сакшно — казнекшнесть тень эрьва мезть. Савкшнось марсемс аволь аламо лембесэ лексиця, ёжонь вадрялгавтыця валт. А вана истят — иномаркатне ваксозосткак а путовить — эзинь марсе, кедьсэм эзинь кирдтне, сельмсэнь эзинь нейне. Сынст лемест «Родная земля». Казик сонзэ тон, Минька-Миша! Истят валон аволь сёлмов, аволь шнамо валт, аволь комплимент малавиксэм, седеяк, авань туртов. Сынь седейстэ лисиця, ванькстэяк ванькс мельть. Омбоцеде теть мерян: тонь кондят тень эзь савкшно марсемс зярдояк. Дёмин Василий профессорось аволь аламо мельть ёвтась сёрмадовкстом, кельдем, шкинемань тевдем. Сэвтнесь эйсэст аволь аламо. Ансяк те весе а се, мезе кецневти, мезе терди менелев. Тон, Минька, редик сень, мезесь, аволь пек копачазьгак, лиятненень эзь неяво, кедь-коморс эзь саеве. «Землянть» сёрмадомга эрявсь сюпав, сюпав валсо, гайтьсэ ды чартьчисэ рузонь кель. Сон тонь — уле. Маряви ды неяви: ламо ловныть. Ды ловныть рузонь кельсэ. Вечксак, те тевенть нейгак. Ловномсто, кеман, вайсят арво ёжос. Монень превс а саеви, кода эрявлия эрямом книгавтомо. Апак вечке сонзэ а мезть сакшномс, монь койсэ, эрьва мезде, аволь ансяк валдодо, пешксе Моданть лангс.

Маряви, аволь аламо псилгалить сёрмадомсто текстэнть лангсо. Видестэ теить. Таштамс содамочитнень, кирдемс сынст удемсэнть — те вейке, нолдамс оляв, сравтнемс, теке видеме, конев ланга — те лията. Пек берянь, истя валтызь питнензэ сёрмадомань тевенть. Берянь — седе а ков. Превс тердиця, валдос ветиця валонть кис тунь а пандыть. Теде масторось, эйсэнзэ эрицятне пароc а пачкодить.

Тонь кондятне максыть миненек вийть, куш аламнеде ды шождалгавтыть эрямонок. Течи, 2012.05.22-це чистэ, сакшнось тенек Чаткин Александр Семёнович, сон Дубинькань, сакшнось мик ...Калининградсто! Пурны, терди, вешни эрзятнень Россиянь келес. Теи тевенть седейшкава, а налкси кода мундирэнь кандтницятне нациятнень пельде. Пазось ванозо,илязо лисе кодаяк лиякс.

Сюконян мелень ваномат ды эрьва мейсэ лездамот кис.

Паронь арсезь лелят Видяз
Саран ош, 2012.05.22


RU: Данная работа создана сотрудниками газеты Эрзянь Мастор и распространяется по лицензии Creative Commons Attribution 4.0 International. См. пояснение внизу заглавной страницы газеты.
EN: This work is licensed under the Creative Commons Attribution 4.0 International License as a work by Erzyan Mastor journal employee(s). See the disclaimer on the bottom of the front page of the journal.