Эрзянь Мастор/2012/10/"Чилисема" ды "Якстере тяштене" журналтнэнень 87 иеть

←Фёдор Алексеевич Видяев

Эрзянь Мастор, № 10 (378), 31 мая 2012 edited by Нуянь Видяз, Кшуманцянь Пиргуж "Чилисема" ды "Якстере тяштене" журналтнэнень 87 иеть

Ёгань Миньканень→

Статья на сайте газеты: № 378, 31.05.2012, "Чилисема" ды "Якстере тяштене" журналтнэнень 87 иеть

 

"Чилисема" ды "Якстере тяштене"
журналтнэнень 87 иеть

Панжиковонь 17-це чистэ Саран ошсо тешкставсь 87 иеде икеле «Чилисема» ды» Якстере тяштене» журналтнэнь чачома чист. Паронь, шумбрачинь арсицятнеде тенст ульнесть кода менельсэ тешттне. Паро валт ёвтась мик «Единая Россиянь» сыцяськак. Кортасть сеть, кить а содасызьгак кода ютавтови «Чилисема» валось рузонь кельс. «Чись» ульнесь эрзянь — кортасть, малав весе эрзятне,.. рузокс. Тень лемезэ — седе тов ардомс а ков.

Берянь, ве валгак арасель ёвтазь раксемга-лайшемга вишкине гонорартнеде сёрмадыцятненень «Чилисемас», «Сяткос» ды седе тов. Советэнь шкатнень коряс ней автортнэнень, ловт, мезеяк а пандыть. Ломантнень истя лепштизь, теизь истямо савтыцякс, истямо урекс, пелить ёвтамс вал эсест кискак. Кода-а кода 80 иеть — те покшчи, праздник, юбилей! Секскак эряволь кортамс паро, эрьгела ёжосо, кортамс изнявкстнэде, паро койтнеде. Те виде. Ансяк эрзянь келенть тевензэ истят берянть, а кортамс сындест — те сонзэ миемс, те покш пежеть покштянок икаеле. Янксян, пек янксян, мекс эзинь ёвта кевкстематнень: зяро иеть кадовсь эрямс эйкакшонь ды од ломанень журналонтень, мезе тенек эряви теемс, кода идемс. Монь койсэ, а калавтовиндеряй «ЕДРО»-нь системась, «Чилисемантень» кадови эрямс ниле-вете иеть. Паряк, седе товгак карми зярс-бути печатавомо, ансяк сон уш киненьгак эрявомо а карми, школатнес эрзянь келесь кадови седеяк чульть-чальть. Эйдень кужотнесэ, мерть уш, нейгак а ветяви.

 

*  *  *

Вал Инязоронтень:

Шумбратадо вечкевикс эрзят, ялгат!

Мон мелявтан ды арсян, кадык чись свал лиснезэ Эрзянь Масторсто ды улезэ Эрзянь Масторонть велькссэ, кецневтезэ маней, валдо, лембечисэнзэ. Кадык свал чипаесь валгонезэ якстерестэ. Сестэ омбоце чистэ карми лембе ды маней. А бути чинть копачасызь давол пельть, кадык муевить превей ломанть, кить пансесызь неть давол пельтнень. Симсынек чаркатнень неть ломантнень кис.