Эрзянь Мастор/2012/01/Пшкадема эрзятненень

←Чачома Чи марто!

Эрзянь Мастор, № 1 (369), 18 января 2012 edited by Нуянь Видяз, Кшуманцянь Пиргуж ПШКАДЕМА эрзятненень by Кшуманцянь Пиргуж

Н. И. Меркушкину, Главе Республики Мордовия→

Статья на сайте газеты: № 369, 18.01.2012, ПШКАДЕМА эрзятненень

 

ПШКАДЕМА эрзятненень

Вечкевикс эрзят! Кенярксто пешксе Од ие тенк! Арсян Пазонь чансть: эрямс шумбрасто-парсте, эрямс эрзянь превсэ, эрзянь мельсэ ды важодемс, васняяк, эрзянь тевсэ.

Кадык кирьвазстезь штатолось улезэ Тюштянь Торамонтень кинь невтицякс. 2012 иестэ весе эрзятненень прамс вейке превс, вейке мельс, вейке вийс: мелень путозь ванстомс эрзянь койтнень-кирдатнень, морокс гайгиця чачома келенек.

Эрьва эрзясь арсезевезэ, максозо эстензэ питне, ёвтазо мезе сон тейсь ютазь иестэнть, мезе арси тееме те иестэнть — а стувтомс покштянок-бабанок, ванстомс эрзянь пароксчинть, а прамс визьксчамас.

Вана кодамо кажос пачтимизь Россиянь империясь. Меельце ловомась невтизе: 8 иес эрзятне аламолгадсть 12 %, 35 %, теде башка, тиринь келекс сёрмадстызь рузонсенть. 1939 иестэ эрзятнеде ды мокшотнеде ульнесть ламоксть ламо таджиктнеде. Ней сынст эйстэ, минек коряс, сисемксть ламо. Ламот эрзятне теевсть рузокс. Сынь мелявтыть рузонь кельденть, сельгсть эсест келест лангс, теевсть манкуртокс.

Кеман, те иестэнть ламот юткстонок велявтыть эрзякс, полавтсызь эрямонь обуцяст, теевить Пургазонь мельга молицякс, эрзя лементь верьга кандыцякс. Содадо! «Мордвин» лем ало кекшеви эрзя раськесь. Те покштояк покш кажо.

Содадо! Кезэрень эрзятне (9 раськетнестэ) тейсть ловома, эпос, морасть кавксо вайгельсэ. Модамасторонть лангсо ансяк вейке, грузинэнь цёрань морокурось моры сисем вайгельсэ.

Оят! Илядо уле истямокс, конанень «ялатеке». Ялотекесь — ятто ятт, зыяндо зыян!

Те иестэнть арсетяно ютавтомс Инекужо (Конгресс). Арсетяно стявтомс корсо удыцятнень. Эрзят! Ёвтынк меленк Инекужодонть! Зярдо ды косо ютавтомс, кодат кевкстемат тосо кортавтомс?

Содадо, Россиясь эрзятнеде а мелявты, сон рашты-ламолгавты ансяк рузтнэнь, мелявты рузонь кельденть. Грызлов, икелень Думань прявтось мерсь: «Россия — это русское государство». А Путин и Медведев чатьмонсть. Лиси , сыньгак истя арсить.

Эрзятнеде ламот лиссть Россиянь генералокс, адмиралокс, Советской Союзонь героекс, ансяк вейкеяк арась — эрзянь. Карман озномо, касост Эрзянь геройть ды маралят.

Сась шка арсемс, кода ютавтомс 2013 иестэ ине тевенть — Раськень Озксонть. Те покштояк покш шаштома эрзянь ёжонь кепедемантень, весе эрзянь сюлмавомонь тевентень. А максомс сонзэ янгамс-кольстямс прявтэнень-«мордватнень», кода эзизь максокшно парсте ютавтомс 2004 ды 2007 иетнестэ. Саемс ютавтоманть эсенек лангс.

Эрзят! Минек ули «Эрзянь Мастор» газетанок, косо ёвтневи эрзятнень эрязь пингедест, неень ды валскень шкадост. Пшкадян, эрзят, тыненк. Кадык эрьва лисиця номерэзэ ютазо эрьвань седеензэ пачка. Сермадстодо, ловнодо! Теньсэ тынь карматадо аштеме раськенек кис.

Пингеде пингес эрязо Эрзянь раськесь. Паз, чангодть!

Кшуманцянь Пиргуж, тынк вечкиця инязорось