Эрзянь Мастор/2009/22/"Лисьмапрясь" ливчакавты ёжо

←Вот они, орудия уничтожения этноса Эрзя!

Эрзянь Мастор, № 22 (318), 30 ноября 2009 edited by Нуянь Видяз, Кшуманцянь Пиргуж "Лисьмапрясь" ливчакавты ёжо by Нуянь Видяз

= Это сама Надежда =→

Статья на сайте газеты: № 318, 30.11.2009, "Лисьмапрясь" ливчакавты ёжо

 

"Лисьмапрясь" ливчакавты ёжо

Те иень сундерьковонь 21 чистэ Самара ошонь вейсэндявксось «Лисьмапря» Кировонь лемсэ культурань кудосо тешктстызе «Финнэнь-Угрань чинть». Иланть ушодомадо икеле муевсь шка кортнемс «Лисьмапрянь» ветямкуронь прявтонть Кузнецов Алексей Михайлович марто. Вана мезде ды мезть сон тень, Нуянь Видязнэнь, ёвтнесь.

Н.В. Зярдо, кодамо чистэ кармась чавомо Самара ошонь «Лисьмапрясь»? Кодамо лувсо ветявить сонзэ тевензэ.

А.М. Минек вейсэндявксось чачсь 2004 иень сундерьковсто. Тенек, лиси, вете иеть. Тевтнень вети-пани ветямкуро, правления. Эйсэнзэ сисем ломанть. Сынь, кода кортыть, превпаргонок.

Н.В. Эрьва вейсэндявксось пурнави кодамояк тевень, седе сеедьстэ покш тевень, теемга. Кодат тевть арси топавтомо «Лисмапрясь», кодат мельть кирдевить икелензэ?

А.М. Монь койсэ, мелесь минек, Россиянь келес сравтневезь эрзятнень, вейке: таргамс чеядавкстонть, ванстомс ды кастомс Эрзянь келенть. Седе покш мель а мезть вешнемс. Арась.

Н.В. Кода теемс те Ине тевенть арсетядо тынь, тынк вейсэндявксось? Кода кепедемс те аволь шождыне канстонть?

А.М. Ветямо, васняяк, ломантнень ютксо ёвтнемат: эрзянь келенть мазычидензэ, ёжодонзо семиятнесэ, садиктнесэ, школатнесэ, газетатнесэ-журналтнесэ ды ТВ эрямодонзо. Седе ламо ёвтнема эрзянь историянть.

Н.В. Кода те тееви ды карми теевеме?

А.М. Пурнакшнотано ламо, 500-600 ломанть, эрзят ды мокшот. Невтнетяно тенст покш концерт. Чарькодеви, васняяк Эрзянь кельсэ. Текень кис жо вейсэндявксось пурнась-панжсь хор. Лемезэ «Килейне». Васень концертэзэ путозель 2005 иень ожоковонь 1 чистэ Красноармейской райононь Шилан велесэ. Те ульнесь васень валонок. Васенцеде келейстэ нолдазь вайгеленек. Седе мейле, ожоковонь 15-це чистэ панжинек Самара ошонь 138 школасо таргочинь эрзянь класс. Седе ламо, ансяк вана, якить мокшонь эйкакшт, тонавтыцяст мокшава Панькина Татьяна.

Н.В. Те ушодкс. Кодат илат ютавтниде седе мейле?

А.М. Ветексть ютавтынек покшчи — «Од толонь чи». Текекс пурнакшность 500-600 эрзят ды мокшот. Течи вана Финнэнь-угрань чи. Концертэнек карми молеме малав весе эрзянь кельсэ. (истя ульнеськак)

Н.В. Те пек паро. Ёвтык, энялдан, кодат сюлмавксонк прявтошонок, Саранонть марто?

А.М. Самарасо парсте ютась спектаклясь «Латось сыргась» (Крыша поехала). Путыцязо Мордовиянь Эрзянь ды Мокшонь драмань театрась. Теде башка путозель тесэ, Самарасо, «Тюштя» спектаклясь. Морыцятнеде терднинек Спиркина Нинань, кавксть тенек сакшнось Атласова Аня, кавксть «Торама» ансамблясь. Покш лезэ тенек максы ояксчись Эрзянь келень идема Фондонть ды «Эрзянь Мастор» сонзэ газетанзо марто. Газетастонть сайдяно ламо материалт концертэнь програматнес. Чиде-чис кемексты ялгакчинь сэдесь «Чилисема» журналонть марто. Сюкпря неть нолдавкстнэнень.

Н.В. Ней весемеде «казямо» кевкстнемась. Финанстнэ. Содави, ярмактомо ней эскелькс а теят, а тынь оно кодат пандт велявтадо.

А.М. Мон истя меревлинь: косто мукшны неть самой чондатнень Эрзянь келень идема Фондось, тосто миньгак. Ярмаконь чинесэ качадыця тарканть лемезэ вейке: иля удо, иля вансто вийть. Лиясто мик шумбрачинтькак.

Н.В. Ды зяро, ёвтыка энялдан, «ульмиде» те «качадыця» таркастонть целковойть-трешникть?

А.М. Меельце ниле иетнень перть «ульминек», кода тон мерить, ды нолдынек тевс 300 тёжадо ламо целковойть. Монь содамга, эрзянь лия вейкеяк вейсэндявкс Россиясо зняро эзь ютавтово. Неть ярмактнень лангс невтезь эрзянь спектаклят, концерт, вастомат ды лия мероприятият.

Н.В. Те вадря. А чарькодеви лиясь: мекс сестэ, зняро эрявикс ды лезэнь кандый тевень теезь, Саранось а пек лови тынк, «Лисмапрянть» эрявиксэкс? Мекс «Лисьмапрянть» эзь маряво вайгелезэ Сарансо ютазь финнэнь-угрань ды мордвань съездтнесэ? Мекс Саранось эзь тееве тенк течинь чис важовсто вастниця ошокс?

А.М. Мордовиянтень, кода монень маряви, истятнэ, кодат минь, а эрявить. Республикань кирдийтненень а эрявить Сарансто тердезь артистнэнень гонораронь пандыцят. Вана истя. Сестэ, лиси, Мордовияськак аволь уш истя пек эряви тенек, а Лузгин Александр, Госкомнацонь прявтось, а Мосин Михаил, мордвань вейсэндявксонь прявтось.

Н.В. Сюкпря интервьюнть кис. Паряк, энялдома, мель кодамояк пельденк ули?

А.М. Ули. Энялдан Лузгин Александр Степановичень, Мордовиянь Госкомнацонь прявтонть, ды Тултаев Петр Николаевичень, Мордовиянь культурань министранть явомс мель, лездамс «Килейне» ансамблянь самонтень.

Н.В. Энялдоманк пачтьсынек. Седеяк, арсян, лезды, пшкадиндерятадо прявтнэнень тынсь ды конёв вельде. Кеман, меленк топавтсызь.

А.М. Сайсынек тень превс.

Н.В. Меельцекс, сюкпря «Лисьмапря» вейсэндявксонтень, «Лейне» хоронтень, весенень, кить морасть ды киштсть те пародояк-паро концертсэнть. А кавтолдтано, курок вастовдано одс, ней уш Сарансо.

Чольнезь чудема теть, «Лисьмапря».