Эрзянь Мастор/2007/16/Те ламбамо-ламбамо валось

←Фонд "Пургаз"

Эрзянь Мастор, № 16 (264), 31 августа 2007 edited by Нуянь Видяз, Кшуманцянь Пиргуж Те ламбамо-ламбамо валось by Нуянь Видяз

Сёксень балягат→

Статья на сайте газеты: № 264, 31.08.2007, Те ламбамо-ламбамо валось. Нуянь Видяз

 

Те ламбамо-ламбамо валось.

Нуянь Видяз

Эрян велесэ. Шказо кизэнь омбоце пелькс. Удсема таркам — кудыкелькс. Тесэ экше. Коштось чевте ды тантей. Матедеван куроксто. Удан домкасто. Седеяк сёксь ёнов. Ушосонть уш якшамо, велькссэнть ало, прянь копачазь лексемадо мейле, — лембе. А вечкеви норастот лисемась! Сеске сурнезеват.

Конёвтне-книгатне велькссэ сэзнэмадо мейле капшазь-каинь лангстон понань лембе оршамопелем ды чопавтынь, кода свал, кельме, зярс а эждевить рунгосом, ацавкстнэнь потс.

Ансяк таштынь лембине, ды уш сутямозевинь, «вельмевтимим» пинень онгома. Ужо-ужо те аволь содавикс «гав-гав»! Аволь «вов-вовгак». Таргсесь «ломанень сехте вадря ялгась» неть нурькинестэ ёвтавиця валтнэнь кувакасто да цийнезь. Марявсь эйсэст аволь тандавтомань кардамо, аволь пеняцямо ды энялдома. Лайшема... «Лиси, — арсезевинь, — пинетнеяк сельведть валныть».

Те мезе истя лиссь шабранок Ольгакаень Чентяензэ марто? Кодамо чичав сускизе? Мекс истя баягинекс жойнеманзо таркас ниреждезь нирежди?

Кусолан. Маряви, оймась. Монгак сельмень конинь. Минута, омбоце ды таго теке:

-И-и-у-у.., — ризкс ёжонь сыремтиця лужаня гайтесь пачкодсь лазтнэнь пачка .

Мезе тосо, кардазсонзо моли? Аволь идемевсть совасть ды кодаяк тенст а повави мокшнашка пондакш пинесь?

«Саты, саты, шказо пелеве малава. Валске чоподава стямо», — велявтынь вить бокам лангс, кирьмицявинь, копачия – а марямс – прям. Вай, авакай! Ней мезе теемс, кода эцемс удомазон?

-И-и-у-у.., — допрок штавтызе удомам.

Кортави: верьгизтнэ «урныть». Те валось верьгизтнэнень кона ёндояк ды кодаяк а педявтови. Урны, зярдо гайтесь сеедьстэ кайсети. Виде, урны пекем, урны... Кода лемдямс тельня, седе сеедьстэ эйзюрковсто, «свадьбань» шкасто марсевиця «морост», а содан.

Ужо-ужо, матедеван, маряви. Энгамсь.

-И-и, у-у-у... ютась пачкам, теке пеель шоркадсть рунгозом, -у-у-и-и...

Вень «концерт».

Окойники удомась изнизе пинень пеняцямонть човор энялдома марто. Ваинь амарямонь-анеемань отьмантень.

Валскень сазь ютынь, эзинь нузялдо, шабрантень, Ольгакайнень. Ютавты, кода ней ламот велетнева, сыречинзэ ськамонзо вишка кудынесэнзэ.

— Ольга патяй, мезе лиссь Чентяз марто?

— А мезе?

— Веньперть аволь онгсь—лайшесь!

— А-а.., чарькодинь...

— Мон аволь пек, — пшкадинь пирявкс кенкшке вакссо каршом аштицянтнь. — Удома тень эзь максо...

— Ды, теня, пикскес, кода мерить, «озавтыя». Однэ. Налксемс мелезэ. Саразтнэнь панси. Секс сюлмиияк. Оляс меневиль. Секс верьгизэнь вайгельсэ лайши. А вечкеви пиксэсь.

— Да-а, — куваксто таргия рузонь нурька валонть, — оляс, мерят, меневель.

Арсезевинь мекев самсто эсь эрямодом, уцяскадом.