Эрзянь Мастор/2007/16/Сёксень балягат

←Те ламбамо-ламбамо валось

Эрзянь Мастор, № 16 (264), 31 августа 2007 редактор Нуянь Видяз, Кшуманцянь Пиргуж Сёксень балягат сёрмадызе Нуянь Видяз

"Этно-кудо" приглашает→

Статья на сайте газеты: № 264, 31.08.2007, Сёксень балягат. Нуянь Видяз

 

Сёксень балягат.

Нуянь Видяз

Сёксень кульбаба балягась лемдязельгак сёксенцекс. Ды те виде. Сонзэ сырнекс цитниця панжовкскензэ ушодыть тия-тува типельдеме ансяк медьковонь прядомга. Седе мейле, таштамковонь самс, вастоват ожо вановтонзо марто эрьва косо. Ожо тюсось-чипаенть тюс. Ялатеке сонзэ вельть мазыекс, седеень кецневтицякс а ловить. Сон, келя, корты нинь-мирдень полавтнемадо, манчемадо.

Сёксесь тейни васень эскелькст. Теке эйкакшонь. Нурькинеть, акемевикст, а капшицят. Ялатеке те уш а кизэ. Ветне экшеть, пракшныть кельмть, начтнить моданть пиземеть. Панжакай балягине, кода эрси панжиковсто, чуросто неят. Весе, — содавтанзат мель, — сыця якшамотнеде кекшнесть.

Вастоват весть истямо потмура, истямо сюмора шкасто трешникень покшолмасо тикшень гвоздикине марто ды кирвази мештьсэть сонзэ кондямо ванькс якстере толнэ, эждтянзат кизэнь псисэ.

Сёксень балягат.

Аламо эйстэст... Чуросто конась ды кие панжсынзе сельмензэ... Секс истя вечкевить.

Аволь умок, кизэнь маней чистэ, вастовинь ве содавиксэм марто. Тензэ кодкемень малава. Прязо почодозь сиянь почтсо. Аволь кувать кортнинек литературань меельце кулятнеде. Ёвтнесь, сонсь кирдсь кедьпесэнзэ ниле-вете иесэ, тундонь баляга ёнов молиця ниле-вете иесэ тейтерне. Содынь, казизе тензэ омбоце низэ.

Ве поэт, талай уш, истя тень мерекшнэь: «Пазось эрьвань ванстозо омбоксть урьвакстомадо». Те, монень маряви, эседензэ, эсь уцясканзо лангс пеняцязь. Кеман, ламот, сёксень чахрань-балягань нолдтницятнеде, истя а арсить.