Эрзянь Мастор/2006/02/Улевельтькак Иерэнь кондят

From Wikisource
Jump to navigation Jump to search
 
Улевельтькак Иерэнь кондят. Ёвтнема.
Нуянь Видяз

Сыргинек Петровка вирев. Пенгс. Букасо. Сон латошка, сюронзо, конянзо келезэ — метра малава. Тюжала пона. Эсь прянзо, варштат лангозонзо, лови весемеде превеекс, кидеяк а пелицякс, виевекс.

Чипаесь анеявиксcтэ састо кевери аловпандт. Чокшнес, а мезть варштнемскак сырнень чаманть лангс, велявттано. Аштемковонь чинзэ аволь рудазов, тошначинь явшиця сундерьковонь — кувакат, ламо-мезе валдосто валдос кенерят тееме, ансяк иля нузялдо.

Буканок челькев кияванть эскели букакс — апак капша, чатьмонезь. А эрязкавтанака. Моли ды паро. Митя лелям, патянь мирдезэ, эзналянок, ды мон, крадазсонть ёнсто озадо аштезь, калякатано кудонь, велень ды колхозонь тевтнеде. Митя содамонок кувать урендясь-служась Васол Чилисема ёно. Ламо несь, ламо марясь, кирдсь, кода кармавтсть, илязо каяво Японось СССР—ть, морясто-моряс масторонть лангс. Сась васоло ёнкстнэстэ, урьвакстсь ды уш иешка эри минек, эсензэ велесэ. Секс сеедьстэ ледстни, арси, ёвтни ней тень тосонь эрямодонзо. Кунсолан. Нерьгстнян келем монгак, кевкстнян, мезе тень а чарькодеви.

Кизэнть мазый, вийс совамо шказо. Кинть кувалт куронь-куро якстердить, мизолдозь ваныть лангозонок чавкань прят, ожолдыть, теке пизёлонь умарнеть, пижма тикшенть панжовксонзо, типель-типель ливтнить велькскаст, пря трить, ашо сёлмине нимилявт. Мекс а ливтнемс? Менелесь сэтьме, а лексияк, ванькс. А неят чамастонзо кадовикс пель панкскеяк. Кекшнесть, бешоконь, та-кува важдамонь а содыйтне. Оймсить. Вийть пурныть.

Вадяшить-палсить пилем вакссом аштицянть соланя-валаня валонзо. Ломанесь сон од. Кортакшов. Вайгелезэ ванькс, верьга «ливтниця». Вечкевить кортамонь лувозо, ёвтнеманзо Чилисема ёнксонь таркатнеде, тосонь койтнеде-илатнеде.

«Ардтано». Кадовсть удалов колмо-ниле вайгельпетне— эзть редявгак. Совинек вирьс. Тесэ, чувттнэнь пиже латост ало, седе чопода, летьке ды, мезе весемеде вечкеви, экше. Муинек «верде» саезь конёвтнесэ тешкстазь керямо тарканть ды шкань апак таргсе кундынек тевезэнек.

Сявордынек зярыя пекшеть. Цёк-цёк петнинек, пильсинек крандазонь кувалмосо ды кандтнинек ки чирес. Кепсинек чочкотнень крандазс. Пурнавсь эйбаро улав. Митя лелям онкстызе вановтсонзо покшолманзо ды пшкадсь монень:

— Ну кода? Саевить? — гайгезевсь аламнеде цийниця вайгелезэ.

— Кортамскак а мезть, — апак кавтолдо ёвтыя мелем.

Букась, видеяк, шождынестэ, виень апак путо сыргавтызе улавонть. «Мезе те сонензэ...» — меринь эськан.

Вирьстэ лисезь кись тусь аламнеде аловпандт. Сюракшонок апак лоткавтне, ливчанясто, теке псакат, кузинек вачказь чочктнень лангс. Буканок уски прок трактор. Ансяк а... урны.

Одтано. Ёжонок налксезь налкси. А маряви «вирень» сиземаськак. Эзинек редяяк, кортазевинек моротнеде: армиянь, олячинь, тундонь, сёксень, вечкемань...

— Армиясо монь сехте вечкевикс мором ульнесь «Легендарнаясь». Эхи, морсинек сонзэ! Кода зэрневтьсынек, кода зэрневтьсынек, марявить вайгеленек Китаень чиренть тона ёнояк! — ледстнемадонть кенярдозь ды капшазь ёвтни тень Митя лелям ды поладомга апак учо верьга вайгель серьгедизе «вечкевиксэнзэ».

Над тобою шумят, как знамёна,
Годы наших великих побед.
Солнцем славных побед озарённый —
Весь твой путь в наших песнях пропет.
Несокрушимая и легендарная,
В боях познавшая радость побед.
Тебе любимая, родная армия,
Шлёт наша родина песню-привет,
Шлёт наша родина песню-привет!

Вайгелезэ морыцянть човине — васенце, сон гайгиця, ливтнезь ливтни мадеме сыргиця паксятнень, кинть чирева тия-тува вастневиця кальтнень велькска. Мезекскак а маряви моронь «лаксицянтень» саемс весемеде версе нотанть. Мороютконть серьгедемстэ нолдтнян мартонзо од атякшонь вайгелем монгак. Улавонок тёкшкесэ озадо аштезь моратано жойсэ. Кунсолодо товзюронь-розень паксят, кунсолодо чиреванок нувсиця балягат, кунсолодо Петровкань рузонь тейтерть. Меленек паро, тевенек а аштить, буканок уски а парксния.

Наш паровоз вперёд летит,
В коммуне остановка... —

морась седеем.

Кода-бути пачкодинек — ледсь мелезэнек умонь-умонь, илязо уле «Волочаевские дни» фильмастонть морось «По долинам и по взгорьям». Стройсэ яксицятнень мельс, Митя лелянь валонзо коряс, пек эзь тукшно, оймеёжо эзь кепсе. Нусманячинь сув, келя, ланганзо каязь. Кадык! «Лаксинек» мелень витезь сонзэяк.

И на Тихом океане
Свой закончили поход...

Кунсолость «концертэнек» аволь ансяк кавто ёнганок сравтовозь келей паксятне ды балягатне-тикшетне, кунсолось покш васоньпеелькс стявтозь пилесэнзэ Иер буканокак.

«Иер... Мекс истя лемдизь? Мезде корты те валось?» — апак учо моронть прядозь содавтымим, валгсь превзэнь кевкстемась. Иер ды Иер... Минек велесэ те валось а марсеви. Пошань Аркайгак, уш оно кодамо «книгань пориця»,оно кодамо содакай, сонзэ пельдеяк эзь марсеве. Мезде сон, алкукскак? Кие истя тешкстызе? Паряк, колхозонь прявтось? Сон тень кувалма кол, сон лишмень ды букань попось.

Аловпандт кинь юткось прядовсь. Прядовсь «фестиваленекак». Уцор-уцор валгинек «сценастонок». Эно кода? Яла седе шождыне карми Иернэнь.

Ютынек улавонть вакссо ялго молезь Ашо лейненть трокс каязь чувтонь сэдненть, мельганзо кадовсь удалов Петровка веленть пезэяк. Ушодовсь вандора пандочамась. Видьстэ мерезь, кодамо пандо — верев молиця кинь ютко. Ансяк. Мольтяно вейкенек-вейкенек туртов чуросто валонь кайсезь, улавонть вакссо. Пиксэнь видьметне Митя лелянь кедьсэ, сон ветицясь, сон «покшось».

Ютавсь аламонь-аламонь «кузиця кинть» пелезэ.

 

*  *  *  *  *  *  *  *  *  *  *  *  *  *  *  *

Поладксозо моли


RU: Данная работа создана сотрудниками газеты Эрзянь Мастор и распространяется по лицензии Creative Commons Attribution 4.0 International. См. пояснение внизу заглавной страницы газеты.
EN: This work is licensed under the Creative Commons Attribution 4.0 International License as a work by Erzyan Mastor journal employee(s). See the disclaimer on the bottom of the front page of the journal.