Эрзянь Мастор/2004/18/Ирина Станкинань изнявксозо
| ←Одумайтесь, мордвинизаторы! Свидетельствуют и обвиняют документы | Эрзянь Мастор, № 18 (193), 24 сентября 2004 edited by Нуянь Видяз, Кшуманцянь Пиргуж Ирина Станкинань изнявксозо |
ЮАР-сто медаль марто→ |
| Статья на сайте газеты: № 193, 24.09.2004, СПОРТ СПОРТ СПОРТ |
| Спорт Спорт Спорт |
| Ирина Станкинань изнявксозо |
Грециясо Олимпиададонть мейле сеске Московсо ютасть Россиянь кубоконть кисэ шожда атлетикань покш пелькстамот. Мордовиянь спортсментнэ таго добовасть медальть. Ирина Станкина 20 вайгельбень дистанциясо сась васенцекс. Эряви меремс, Мордовиянь спортивной якамонь школань спортсментнэ те чемпионатсонть невтсть пек паро результат ды техника. Истя 10 вайгельбень дистанциясо юниортнэнь ютксо 7 васенце таркатнень саизь Мордовиянь якицятне. Игорь Ерохин саизе сырнень медаленть. Сиянсесь сатотсь Рузаевкань якицянтень Геннадий Канаевнень. Дубенкань ДЮСШ-нь воспитанникесь Валерий Борчин саизе бронзанть.
Тейтертнень ютксояк сехте васенцеть ульнесть минексетне. Вете вайгельбень дистанциясо васенцекс сась Саранонь 1 № ДЮСШ-нь якицясь Эльмира Алимбекова. Атюрьевасто Елена Шумкина сась колмоцекс. 10 вайгельбетнень пек парсте ютынзе тейтертнень ютксо Ирина Ежова. Сон ансяк аламодо кадовкшнось Санкт-Петербургсто Светлана Васильевадо. Кода илязо уле, Ирина саизе сиянть. 1987-1988 иетнестэ чачозетнень ютксо Мордовиянь спортсментнэстэ сехте паро результат невтсь Семен Канайкин. Истят тевтне кортыть ансяк вейкеде, Мордовиянь спортивной якамонь школась пурны вийть ды минек содавикс спортсментнэнень кассы паро поладовкс.
|
RU: Данная работа создана сотрудниками газеты Эрзянь Мастор и распространяется по лицензии Creative Commons Attribution 4.0 International. См. пояснение внизу заглавной страницы газеты.
EN: This work is licensed under the Creative Commons Attribution 4.0 International License as a work by Erzyan Mastor journal employee(s). See the disclaimer on the bottom of the front page of the journal. |