Эрзянь Мастор/2004/09/Минек оянок Джак Рютер

From Wikisource
Jump to navigation Jump to search
Эрзянь Мастор, № 9 (184), 12 мая 2004 edited by Нуянь Видяз, Кшуманцянь Пиргуж
Минек оянок Джак Рютер by Нуянь Видяз
Статья на сайте газеты: № 184, 12.05.2004, Минек оянок Джак Рютер
 
Минек оянок Джак Рютер

«Эрзянь Масторонь» те иень 7 номерсэнть Эрюшень Вежай сёрмадсь: «Ялатеке. Эйстэнек седе паро ломантненень сюконязь, ули минек кемеманокак — минь сыргозтяно! Минь карматано улеме! Эрзянь раськесь карми эрямо!

Те кемеманть виевгавтыть Раськень Озксонь вельмевтемась, «Торамонь» ды лиятнень морост, «Эрзянь Мастор» газетась», минек «Масторава» эпосось, Эрьзянь Степан, «Сятко», «Чилисема»..."

Эрюшень Вежаень таркасо те валрисьменть поладовлия: "Ули минек Джак Рютерэнек. Сон, сонзэ тевензэ эрзянь келень Масторсонть андыть валскень чинтень кемеманть".

Те цёранть финнэнь-угрань мастортнэсэ содасызь ламот, содасызь финнтнэ (васняяк, келень содыйтне), комитне, удмуртнэ, маритне, эстэнь ломантне, мокшотне... Весемеде пек жо содасызь эрзятне. Джак парсте корты эрзякс, вечксы литературанть, вечксынзе минек моротнень... Ансяк содасызь, ды вечксызьгак, ёвтазденть башка, лиянь кискак: Джак Рютер — эрзянь содамо. Низэ сонзэ, Ерина Ольга, чачсь Отяж буень Ботуж велесэ. Ольга эрзява, Джаконь чачомазо Американь, вишка пингстэнзэ кортыль ансяк англань кельсэ. Пурнасть-тейсть вана эрзянь кудораське. Кортыть сынсь эрзякс, кортыть эйкакшосткак эрзякс. Васенцесь — Вильям Ёро Джаконьцёразо (2000 иень), омбоцесь — Хенри Иван Джаконьцёразо (2002 иень).

Джак Рютер чачсь 1961 иень эйзюрковонь 23 чистэ Американь Вейсэндявкс Штаттнэнь Вашингтон штатонь Кент ошкесэ. Сон Ситэл ошонть эйстэ 40 вайгельбень таркасо. Тетязо, Уильям, кувать важодсь инженерэкс «Боинг» содавикс модамасторонть келес фирмасонть, кулось 1999 иестэ, авазо, Мери, прядызе Вашингтононь университетэнть, тонавтсь школасо химия, математика. Кандтлесь зярс-бути почтаяк. Сынст эсест кудост ды ниле гектарт модаст. Кастсть–трясть кото эйкакшт: вете цёрат ды тейтерь Хелен..

Шкась прянзо тодов лангс а путни. Сыретне сыредить, одтнэ касыть ды сы шка срадыть эсест вийсэ-превсэ мукшнозь китнева. Истя лиссь Рютертненьгак. Хеленнэнь вечкема тевекс теевсь эйдень трицянь-кастыцянь тевесь. Лери васня ульнесь Гавайянь усиятнесэ, ней — Од Зеландиясо, сон ботаник. Пол — фермер. Орегон штатсо три реветь. Модазо 80 гектарт. Том — бизнесмен, Аляскасо калт кундси. Эрик — Германиясо АВШ посольствань консультант. Каня арсесть од шкастост Уильям ды Мери, сы шка ды сынст вейсэнь пизэсэст раштазь левкскетне тукшныть ливтязь истя васолга? Эрямо, сонзэ кинзэ-яннэнзэ сеске а муевить, коензэ а полавтовить.

Ну а Джак?

Джак умок уш, тагояк мердяно, пурнась пизэ Сарансо.

Тей сонзэ ветизе Вашингтон штатсо эрямсто келень вечкемась. Эрямонь те ёнксось невтизе прянзо эйкакшпингстэ саезь. Самай сон шкань ютазь невтизе кинть Эрзянь Масторов, конадо эйкакшось эзь марсеяк.

Кемсисемге иень цёрынекс сась Суомив. Кундась тонавтнеме суоминь, шведэнь ды немецень кельтнень. Эрясь Ярвенпяэ (Эрьке пе — Ред.) ошкесэ, суоминь кудораськень кедьсэ. Теяк лездась келень содамонтень. Курсанть прядомадо мейле мурдась чачома масторозонзо ды кармась тонавтнеме Абурн ошонь колледжсэ. Англань кельденть башка максовсь тесэ социалогиясь, антропологиясь, бухгалтериясь ды лия предметтнэ.

Колледжсэ тонавтнемстэ свал кирдсь мель: поладомс ды прядомс ушодозенть — финнэнь ды угрань кельтень содамост. Бакалавракс улемс, понгомс мейле университетс—а шождыне. Эрявсть пурнамс 180 баллт. Джак сынст пурнынзе! Пурнынзе ды 1982 иестэ кармась Хельсинкень университетэнь гуманитариянь факультетэнь студентэкс. Панжовсть икелензэ келей-келей паксят: содамс апокш раськетнень культураст, ёвтамс эсь мелеть лингвистикань наукасонть.

1988 ие. Рютер соки-сокари Хейкки Паасоненэнь, финнэнь Ине содыдеенть (учёноенть), томтнесэ. Сынст эйсэ эрзянь, ды вейке томсонть мокшонь, ёвкст, морот, койть, содамоёвкст, ёжот... Сёрмадозь неть сисем томтне колмо кельсэ: эрзянь, немецень, рузонь. Истя од ломанесь теевсь содавиксэкс ды кутмордавсь эрзянь келенть марто. Шкань ютазь суоминь те Ине содыдеенть эрзянь ды мокшонь кортавксонь эчкедеяк эчке валксонзо совавтсынзе компьютерс. (4 томт 2700 ламо лопат)

Васенцеде Эрзянь Масторс од кельсодыесь пачкодсь 1992 иестэ. Кизна. Сон, Марья Сало ды Арья Алквист састь Мордовиянь университетэнь филфакс. Тесэ седейшкава вастызь Цыганкин Дмитрий ды Мосин Михаил профессортнэ. Вастызь ды шкань апак таргсе кучизь Ветькень Масторов — Чувашияв, диалектологиянь экспедицияв. Састь сынь Первомаень буень Атрать эрзянь велес. Тесэ сон васенцеде маризе седе келейстэ эрзянь келенть гайгиця мазычинзэ ды танстензэ-растензэ.

Ютасть иеть. Джак те вастовоманть ледстни прок седеень токновтыця он. Васенцесь свал кадови анардтневиця тешкскекс седейсэ ды превсэ. Седе мейле ульнесь Дубинька, Кочкуронь, Ордань, Чаунзань, Отяжень, Ицялонь, Ташто Шайговань, Игнатонь ды лия буетнесэ, ульнесь Самарасо, Бугуруслансо, Ижевскойсэ, Сыктывкарсо...

Джак Рютер ламоксть якась Игнат буень Ташто Кшуманцяв «Велень Озкс», 1999 иестэ сакшнось студентэнзэ марто Чукалов, тесэ ютавтозель Раськень Озкс. Озкстнэнь ды Хейкки Паасоненэнь книганзо вельде чопавтсь васол чирень цёрась эрзянь кезэрень шкань койтнес, кармась седе домкасто содамо сынст философияст, мелест ды мазычист.

"Модамасторонь раськетненень эряви эрямс ояксчисэ, лездамс ды кемемс вейке-вейкенень. Моданок ванстома, сон сизесь тюрематнеде, верев пелькстамотнеде.., — эрьва вастомасто ламо ломань марто ёвтни эсь мельдензэ-мелявкссто, — эрьва келесь — те ламо тёжат иень перть таштазь, мейсэяк а полавтовиця, питнейдеяк питней сюпавчи...»

Неень эрзятне алтазенть топавтнить чуросто. Паряк, секс пачкодинекак домка латконть чирес. Сыргинек Ривезень Иняень (Ревизов Николаень), поэтэнть ды фотохудожникенть, лемензэ кундамо. Топодсть 40 чить эйстэнек туемдензэ мейле. Дильнезевсь телефонось: «Цёрат, нолдынк чумом, а молеван, эйкакшонь ваномо нись кадымим». Ёвтызе, илядо учо. Свал истя. Эрьва тевсэ. Шканть питнензэ лови, эсензэнть ды лиятнень. Ламот валонь кирдема коенть мезекскак а путыть. Молемаль мартонок вейке эрзянь аванень. Учинек–учинек — эзь са. Мекс тензэ а ёвтамоль телефон вельде?

Джаконь вечкевикс тарказо, косо илязо уле, библиотекань, интернетэнь, компьютерэнь залтнэ. Тесэ сон «оймси». Виде карми, ёртындерясынек кавычкатнень. Вейке вельть превеесь а стяко мерекшнэсь: "Весемеде паро, шумбрачинь максыця оймсемась — седеень витиця, кенярксонь кандыця тевесь". Видеть валтнэ. Сонзэ теемстэ, алкукскак, шкась ливтязь-ливти, а кады тарка сиземантеньгак, пансезь панси орматнень-тарвотнень.

Книгатнень велькссэ чинек-венек аштемась, мартост ояксчинь кирдемась пештсть кельсодыенть канстонзо. Секс ловияк Джак эсензэ омбоце кудокс библиотеканть. Варштынь тевпаргозонзо ды талакадынь: ансяк ловомс, зяро-мезе тейсь-сёрмадсь, эль саты чи. Тевензэ (рузокс «трудонзо») сёрмадозь эрзянь, эстэнь, суоминь, саамонь, шведэнь, коминь, англань, венгрань, немецень, рузонь... кельтнесэ. Кеменде ламо кельсэ! Печатазь сынь Суомисэ, Ижевсэ, Сыктывкарсо, Сарансо, Тартусо, Прагасо, Тартусо. Седе ламо статьят эрзянь келень грамматикадонть. Вейкесь эйстэст «Ульнесь паро, пароль, паро ульнесь» лисекшнесь. «Сятко» журналсо 2001 иестэ.

Лейпцигсэ тейсь 15,953 лопат литературань ламо авторонь текст. Тесэ жо теизе коминь-англань-суоминь валксонть (17 тёжа малава валт). Компьютерсэ кочкизе, витнизе ды 2002 иестэ нолдынзе Абрамов Кузьмань «Валонь ёвтнема валкссонзо».

Содави, мон а ледстнян статьятнеде, конатнень чарькодсызь ансяк кельсодыйтне, конатнесэ онкстневить кельтнень грамматикань ёнксост. Джак Рютер ламо эрзятнеде парсте содасынзе эрзянь чиявтомань-урьвакстомань, покшчинь ды лия-лия койтнень. Нейсак цёранть концертсэ, фестивальсэ, покшчисэ... Содасынзе аволь ансяк эрзянь ёвтавкстнэнь-глаголтнэнь вейсэ правтовкстнэнь — падежтнэнь марто, содасы гайтте, тюсто, эрьва кода качадыця эрямонть, сонзэ икелень ды неень коензэ. Ансяк истямокс улемаяк тонавтыцянтень, одломань марто важодицянтень, улемс келейстэ ды домкасто ваныцякс, ламонь марицякс. Неень «вузтнэстэ» ламо, пек ламо, сави ёвтамс ризксэнь кирдезь, одломанть лисить беряньстэ неицякс-марицякс. Тувталось теньсэ. Арасть Джаконь кондямо тонавтыцяст.

Нуянь Видяз

Лездась сёрмадомантень Арапов А., очеркезэ "Эрзянь моро морак, Джек!", "Сятко", № 9, 1999 г.


RU: Данная работа создана сотрудниками газеты Эрзянь Мастор и распространяется по лицензии Creative Commons Attribution 4.0 International. См. пояснение внизу заглавной страницы газеты.
EN: This work is licensed under the Creative Commons Attribution 4.0 International License as a work by Erzyan Mastor journal employee(s). See the disclaimer on the bottom of the front page of the journal.