Безбородов М. И. Сочиненият 1-це томсь (1939)/Тюреманкса

From Wikisource
(Redirected from Тюреманкса)
Jump to navigation Jump to search
Сочиненият 1-це томсь  (1939)  by Безбородов, Михаил Ильич
Тюреманкса
Михаил Безбородов. Сочиненият, Васенце томсь. Мордовскяй государственнай издательствась. Саранск, 1939.

[ 70 ]

ТЮРЕМАНКСА


Кядьсон сьорма...
Сьорматф: „Тяни топодсть...
Пандовсь кяжсна,
Конань кирнесть лангсот.
Ули стака,
Но аф сави сьопомс,
Миша, идьце
Арась кяжень панксокс.”
Сьормась равжкодсь
„Шавозь” — стака валста.
Эськса сялговсь
Седизе тя пинкста.
Кали нельгозь
Од эряфонь валдста,
Вракнень каршес
Тюремазень инкса?
Да, тя санкса,
Мес перазень песа
Лифнень — тарксень
Вракнень валда ведьти,
Вов и сусксть синь
Пяляс пинень пейса
Седи ваксстонь
Алешказень седити.
Ашезь када
Касомс оцю алякс,
Кона теень
Максоль оцю лезкс,
Но сонь лемонц
Равжа вийхне саласть,

[ 71 ]

Тяфта тисть синь
Эряфозьти сязькс.
Да, изеть ванов.
Пиштезь кадыть эряфть,
Кадыть сембонь
Мезе ульсь ужяль,
Шетка корхтать:
„Аляй, Алешть мяляфтк,
Кда кирдеть
Колган пар мяль”...
Кирдень, кирдень,
Седи ваксстонь цьорай,
Куломаце
Касфтозе тюремазень.
Сякокс кяжда
Вракнень каршес моран,
„Куломс тюремс”—
Валозень мон азонь.