Тесэ ды тосо (2013)/22
| ←Комсьвейкееце сёрмась | Тесэ ды тосо (2013) by , edited by Ломшина Л. А. Комськавтовоце сёрмась |
Комськолмовоце сёрмась→ |
| Нуянь Видяз. Тесэ ды тосо: сёрмасо роман, келей ёвтнема ды ёвтнемат. — Саранск, Красный Октябрь, 2013. — с. 159—177 |
[159]
| * * * |
| Комськавтовоце сёрмась |
Менелень Масторов, зярдо-бути сэнь сельме, гайгиця вайгель Лемаень Виянанень
Вияна ялгинем, валдо ойминем!
Превс сеске а саеви, кода теть пшкадемс. Тесэнь пшкадема-арсема валонок содасак: «шумбрачи». Мельсэнь теке кирдевськак: арсемс теть шумбрачи. Кодаяк а кармавтови колганось стувтомо те валонть ойме марто кортамсто. Ёвтасак — а чарькодьсынк.Тынк Тосо лия келенк ды кортамонь лувонк: электрононь ды магнитэнь кеверькс вельде.
Вай, авакай! Натой, мерят, Менелень Масторсат! Паро, паро, дугинем-тештинем. Тесэ, телень-кизэнь Масторсо, тонсь содат, келейде келей сэнь паксятне, косат ней тон, лововить Пазонь ёнксокс. Тосо, келя, косо-бути эри Инешкипазось. Минек шкиницянок, Модалангс нолдыцянок. Марсить, кеман, ёроков, талант марто ломанденть кортыть: сон, келя, аволь модалангонь — менелень, Пазонь ломань.
Сюкпря теть те ёнкстонть, сэньстэ, зярдо апак копача пельсэ, неявиця Оймень Мастордонть, ёвтнемат кис. Марсемс марсинь эйстэнзэ, содамс истя домкасто эзинь сода. Комавтса икелеть прям. Ловныя сёрмат ды тешкстыя: весемеде паро — Тесэ, Масторлангсо: тундот-сёксть, вирень увт, лисьмапрянь шольнемат, тейтерень дильниця вайгельть, мизолдыця турват... Тесэ, дугинем, Тесэ. Секс тердевлимимгак Инешкипазось — аволь кияк, Сонсь! — шкадо икеле, аволия кунсоло, аволинь моле. Вай, мезть пивтемс текеде! Тынк Тосо — ало эли вере — мезеяк истямо, сеске сельмес каявиця, а неят, мезеяк а марят. Секскак те Масторонтень эрьва сыцясь, зярс санганзо чийни вересь, кирдезэ мельсэнзэ: Модалангсо эрямонть ютавтома апак сёвно, апак кенгеле, кежень апак сыремтне, эряма мазыйстэ, кецнезь, мелень витезь, прянь видьстэ [160] кирдезь. Виде, Эрямось — Тесэ, тундонь шкава пижестэ лексиця-морыця Масторсонть. Ансяк вана кода эскелямс верде максозь иетнень мерезенть коряс — моразь, сельмень апак летькемтне?
Кеминь ды, ловт, кеман нейгак вечкемань варматненень. Сонзэ, вечкеманть, ловить эрямосонть тёкшокс, валдонь валдосо сюпав эрямос ветицякс. Ансяк вана...
...Редякшныя сы шкань ним апак учо ды талай ютконь тарка. Явсь эйсэнек каль куракшкесэ копачазь, эль неявикс, кельме ведь лейне. Эрязкалесь, мезе лангскак эзь вано, ашо чуваронь киланга. Ков? Кевкстик азё.
Кизэнь пиций пси чи. Лейненть тона ёно тейтерьават кавшакавтнить-кочкить вейсхозонь капстань ума. Ахолить-барцаить модакайсэст ды мезде-бути марямга кортнить. «Велень кулят...» — ютась пряван. А редямс аватнень ютксто, а явомс эйстэст вейкень а кодаль. Кекшезельть, аволь кода лиятнень, — ансяк «авань» тарканзо. Ловт, тунь штаполь. Опаня пси... Вармань аразденть каль тарадтнэ сорк а теить. Кода а кайсемс? Киськезэ а содавиксэнть... чопода-тюжаль, теке тустосто ваднезель истямо тюсонь ваднемкайсэ. Нейгак сельмень икеле. Иетненень раужо-тюжа те артовксось эзь шляво. Неявсь, аволь чи-омбоце макснесь штапо рунгонзо палсемс чипаентень. Прясонзоль тейтеренть човоньс сюлмазь ашо паця. Теде седеяк чоподакс неявсь кутьмерезэ ды вельть явовсь ламодо сыре важодиця ялгадонзо. Мерят ахолясь модакайсэнзэ, кода лиятнеяк, Кениясто, Нигериясто эли Африкань кодамояк лия масторсто Негритянка!
Мейле мезе, чентязь киське? Каня аламо истят некшнить, цёра, комсьветее иень перть тесэ-тосо эрязь? Веенстнэ мерить, чипаень налтнэ, кайсиндерят, максыть шумбрачи, кой-кить — пачтить кажос. Мик карвоцькайсэ, раксо, тандавтнить! Кой-кона тейтерьаватне тюжалгавтыть рунгост цёрань мельс седе туемга. Ну ды кадык! Истя, аволь... Эрьвась, яла кортыть, эсензэкс превстэ лисни.
Тарантассон озадо аштезь, меельцеде ютавтыя злыдарь вановтом штапо тейтеренть ланга, ноцковтынь ведьметнень ды сыргинь лейненть чирева эль неявикс киванть седе [161] тов. Паксянь азоронть паксянь тевензэ, седеяк иень лембе шкатнестэ, кирьгава. Ансяк кенерть. Тесэ улема, тосо. Тень шкастонзо теевтема, тонань... «Кениянь» тейтересь нардавсь превстэнь сеске. Тусь, теке эзь сакшнояк.
...Ютась мелявксто пешксе тундось, мельганзо — сонзэ кондямо кизэсь, сась, эзь марявояк, ашосо ацызе моданть телесь. Сась, кувать эзь саво учомс, кузонь тарадтнэва цитниця налкшкень понгавтниця Од иеськак. Якшаматянь покшчи — истяяк тензэ мерить.
А содан, Вияна, кинень кода, монень шкась — келемтезь суронь пачк капшазь чудиця коське чувар. Юты ютковаст — а кенерят варштамо. Теке исяк сельметь микшнинь тей-тов менчевиця лейненть тона чиресэ аватнень ды ютксост пельсштапо тейтеренть лангс ванозь, ды вана ютась уш пельиеде ламо. Шканть сёлмонзо арасть, а вана ливти нармунде эрязасто.
Учовсь весемеде эрьвела, седеень ков-бути капшавтыця, валдос кемевтиця покшчись. Азоравась эйсэнзэ — одирьвакс мазылгавтозь кузонь чувтынесь. Од иенть, сонзэ ашо сакало атянзо пельде свал учат мезе-бути паро, мельстуиця, кемат, мезеяк полавтови эрямосот, седе пек пешкеди кенярксонь таштамо куйметь, седе шождасто кармат лексеме! Од ие...
Вейсхозонь тевень ветицятне-прявттнэ, васняяк бухгалтериянь аватне, пурнасть покшчинь чокшне. Кода эно лиякс! Аволь покш залсонть педсек-педсек аравтозь зярыя стольть-стуворт. Пря шныть лангсост, цивтёрдыть сиянь цёканя прясост чопода-пиже бутылкатне — «Советское шампанское». Кинь превс сестэ сакшнось — сы шка ды «советскоесь» ули нардазь-стувтозь? Мельсэяк арасель. Зярыя таркава ожолгалить шаванятнева мазыйстэ путнезь апельсинт. Сынь, ожосто мизолдыцятне, микшневсть ансяк... Московсо. Тедеяк мельть эзть сакшно: ютыть иеть ды ожо чама оскатне кармить микшневеме эрьва ужосо. Рамак зяро мелеть! Мезе ульнесь — ульнесь, мекев а велявтсак. Ожотнеде башкаяк ламо мезе лия муят пей алов путомс. Мезе-мезе, аватне маштыть покшчинь стуворонь таргамо. Колт тень кувалма, кода а шнамс!
[162] Берянесь вейкель: пурнавозь комсешка ломантнестэ монь шкань — ансяк исяк прядокшныя институтонть — кияк арасель. Ськамолинь. Ансяк кенеринек ойсеме, куродымим мель: те балось аволь монь. Нусмакадынь. Вастомс иень весемеде мазый, моросо, кеняркс ёжосо гайгиця покшчинть тесэ? Эсень коряс седе сыре неть аватнень-цёратнень ютксо? Те ков маштови? Пряван ювк ютась институтсо Од иень чокшнеденек ледстнемась! Чанстте кувтолдыця сельметь, мизолдыця турват, морыця-кецниця од шка... Мезе ансяк аштесь эсензэ перька чарыця, электричествань толсо кивчкаиця кузось! Малав ие ютакшнось, кода прядынек тонавтнеманок ды срадынек масторонть келес, а минек куронь цёратнень ды тейтертнень вайгелест яла содавтнилизь. Теке весе те исяк ульнесь. Арась, зярдояк се ламарекс панжолдыця шканть а велявтсак!
«Аштека! — токимим, кивчк вельмесь превсэнь валось. — Мекс а тердемс Негритянкань? Улиндеряй, содазь, кудосо...» Апак кавтолдо, киненьгак мезеяк апак мере, вырк стинь, курокке каия лавтовон ланга пальтом ды кинь апак кочксе, кумажава лов потмова ношкстынь тейтеренть тердеме. Эрясть а васоло. Негритянка кудосоль. Сон апак сэзнэ оршнесь-тейсь, ды кавонек, кавто од ломанть, мурдынек тов, косто оргодекшнинь, косо, содан, ловимизь ёмазекс.
Кудопотмось шалнось кортамотнеде. Турватне ламонь келейгалесть мизолкстнэде. Сельметне цивтёрдсть. Покшчинь кеняркс ёжот, кода эно лиякс! Кенерсть, а стакаль чарькодемс, аламонь-аламонь «нолштамо» псилгавтыцядонтькак. Кельтне лавшомгадсть. Вастымизь, эль кенеринек совамо, шалнозь. Кой-кить цяпазевсть. Лиякс а кодаль: муевсь «ёмаськесь», сась, ды а ськамонзо — од тейтерь марто! Озавтымизь стувор экшс.
Аламос аштезь радиостонть каятотсь куранттнэнь чавомась. Стинек, глянкадинек винадо пешксе бокалонок ды чамдынек од иенть кис. Улезэ сон ютаздентькак вадря, кандозо кенярксто цитниця вановтт, пеедькшнемат, мельспарот, тевсэ ды эрямосо изнявкст...
[163] Баянистэнть учомс эзь саво. Озась лия таркас, путызе кумажанзо лангс баянонзо, каинзе лавтовонзо ланга каркстнэнь ды тетькинзе мехтнень. Ламот калдор-калдор лиснесть стуворонть экшстэ. «Амуронь ведьвелявкст» Вальсэсь тердсь нарамонь кирьксэс. Комавтыя прям ды венстия кедем човине, теке нудей, чопода-тюжа сельме Негритянканень.
Тейтеренть рунгонзо тапардызе сиренень тюс, нурька ожа, кумажадо алга платия. Човине турванзо токазельть Якстерть мериця ваднемкасо. Аволь дюм раужо черензэ судрязельть удалов, сюлмазельть якстере лентасо. Вить пилензэ велькссэ нерезэнзэ чочазель якстере розань панжовиця тешкске.
«А сон... мазый!» — чопик содавтымим мелесь, теке неинь тейтеренть васенцеде. Теке эзь ютаяк пельиеде ламо кизэнь тол пси се чиденть мейле, зярдо вановтом васенцеде вастовкшнось сонзэ пельсштапо рунгонзо марто. Теяк: уш зярыя ковт важодтяно вейсэ, тейтяно ве тев — бажатано сюпалгавтомс, теемс седе раштыцякс минек вейсхозонь паксятнень. Истя талай шкань ютазь одс панжия эстень Негритянкань.
«А сон... мазый!» Мекс ёндолнэкс кивчкадиця те мелесь эзь сакшно седе икеле, а содан. Прок кекшнесь эйстэнь. Куш содавикст ульнинек оно зяро! Паряк, сиренень тюс платиясь мазычинзэ лангс ливтизе? Паряк, черьсэнзэ якстере розань тешкскесь эли салава мизолдыця, Якстерть мериця турванзо вельмевтизь? Содык азё!
«Амуронь ведьвелявкстнэнь» полавтызь «Дунаенсетне». Мельгаст — од шкастонок вельть содавикс «Маньчжуриянь сопкатнень ютксо» нусманядояк нусманя, секень вант, сельведеть туить, Вальсэсь. Кие-бути аватнестэ яволявтсь «авань танец». Монень кедензэ венстизе Негритянка, ды, мелодиянть кунсолозь, лиятнень ютксо чаразевинек Од иень кузнэнть перька. Тейтересь маштсь танцовамо, ветсемс, чарамс мартонзо шождаль. «Эскельксэзэ» мелезэнь тусь. «Усксемс» эзь саво. Чокшнесь поладовсь: пеедькшнезь, морсезь, киштнезь, налксезь... Минь Негритянка марто прядовоманзо эзинек учо.
[164] Кувать, мекев-васов яказь, онкстнинек ловсо вельтязь удыця велень куронть куншкава ютыця кинть кувалмонзо. Кой-кона вальматне, талаень шканзо лангс апак вано, валдосто вансть каршост шушмотнень лангс...
Якинек, эзь маряво якшамоськак, омбоце чокшнестэнть, колмоцестэнть... Кортамотненень, марявсь, пе а ули. Ловнозь книгатнеде, моротнеде, ванозь од фильматнеде, вечкемадо... Вастневинек ков, омбоце... Прядовсть вастневеманок Негритянкамезень кудосо «сэпей» валонть сееремасо.
Истя перьгединь, явовинь олячисэ од цёрань эрямодонть. Совинь ава марто вейсэ эрямонь кудос. Ушодовсь мелявксто-кенярксто пешксе, а содавикс од эрямо.
Мезе минек вейсэндимизь, кодамо вий? Вечкема? Эли кодаяк лиякс лемдевиця сюлмавкс? А содан. Содан лиядо: вечкемань истямо ёжо, зярдо пертьпельксэсь, весемесь, мезе перькат, неяви седе келеекс-покшокс ды кецнезь кончтнить теть чопода менельстэнть тештетне, зярдо молемань таркас ливтят, зярдо малавиксэть сакшны онстот, истямо вечкема монь ёндо арасель. Сонзэ? А содан. Сонсензэ кевкстема. Вечкеманок эскелясь сэтьместэ, чудсь апак капша, аволь тундонь шалныця, сэдень салсиця леекс.
Се венть, конань ансяк чиявтозь тейтертне невак аволь пек умок казнесть поласт туртов, Негритянка тень эзизе казекшне. Ды те — саинь никс аволь тейтерь — эзь кемекста вейсэнь эрямонок, кадсь седеезэнь а ютыця аржо. Мельсэть, Вияна: ве сёрмасон кевкстнинь тонь, эряви-арась ванстомс тейтерьксчинть мирденень лисемазот. Берякавты-арась те полатнень ютксо ояксчинть ды мелень ваноманть? Монь койсэ, парос а вети. Тонгак истя мерекшнить эсь эрямодот ёвтнемасот.
Иень трокс чачсь тейтерненек, мельганзо, кавксо иень ютазь, кецневтимизь омбоце, таго чольдерькай тейтерне. Паро мельсэ, зярос сатотсть оймень-рунгонь виень ды превень, тринь-кастынь, кепединь пильге лангс, мель путынь тонавтомс, ливтемс арсиця, ламонь содыця ломанькс. Эйкакшт — те менель мелявкст ды зняронь туро кеняркст, [165] те — уцяска. Сон, уцясь-уцяскась, пек шождасто томбавиця, вант ды вант мельганзо. А истя — псистэ эли эзэльть кельместэ — ёвтазь вал, чирь вановт, ды срады вечкемат лей чирева таштавиця валскень сувокс. Ушодовить, ды аволь чуросто, куломас майсевематне. Секскак превть ды превть эрявить — ванстомс сонзэ ды вейсэ эрямонь кенярксчитнень.
Сёвноматне-ацирьгалематне, инзамотне совасть кудозонок аламонь-аламонь, васня прянь апак невтне, кекшнезь. Ютась шка, ютасть иеть, ды раужо сельме се тейтересь, кона колдовакшнымим Од иень каршо чокшнестэнть, ушодсь вешнеме алсто сардот: аволь истя валонть ёвтыя, аволь сень рамия, аволь сень теия, эзинь оза, мекс эзинь стя, мекс эрзянь келенть кис аштян... Аламнеде лиякс ёвтазь, «ингелькс» валсо: пиземе кувать арась — чуман, кодаяк а лотки — таго мон сонзэ а лоткавтан, чуман... Тувталтомо ушодомс сёвномо-ацирьгалеме, марявсь тень, — профессиязо. Омбоцеде уш «кото кикстнэде» ёвтнян, нолдык кулдоркай келем чумонзо.
Сан, зярдояк а стувтса, важодемстэ, пачкодян кузтемпес — мелем дух арась совамс кудос. Содан: цяк кенерян кенкшенть панжомо, пиле ланга ципадьсамизь ирнэзь ёвтазь сёвномань валт.
Каявомс кавалокс, кода сон, рангицянть лангс, а максомс тензэ пря, саемс верькс — обуцям, содан, аволь истятнэде. «Эйкакшт, эйкакшт вакссонок!» — яла кармавтынь эсь прям чатьмонеме. Сёвномс, кежть невтнемс эйкакшот икеле — каня ули седе нулгодькс тев? Мезекс сыненст вейкенек-вейкенек лопавтнематне? Секс бажинь потамс, аволь верьгеде сёвнома.
Калгодо, таркас путыця валонь таркас пачколинь сельведьс. Истя, истя... Содылинь: тетяст-аваст ютксо истят «мелень ваноматне» пакшатнень туртов паро а кандыть. Секс истят шкатнестэ лиснесть, эзть кирдеве сельведень. Мазавань (урьвакстомадо мейле зярыя шкань ютазь истя карминь мереме эсень рузавантень) кургсто псинзэ пачк лисиця покордамонь валтнэ сюворясть седеем. Аноколинь [166] эйкакштнень пингстэ эрямонь киртиця сеть идем сценатнеде раздемс черень.
Зярдо тейтеренек уш покшольть, седеень наксавтыця коволтнэ верьгелесть ков седе сеедьстэ. Вечкемастонок, тонсь чарькодят, эзь кадовкшно чаво таркаяк. Ансяк кежть. Икелень Негритянкам прячерьсэнзэ якстере розась пужсь допрок. Мик раужкадсь.
Ней, сыречисэнь, чарькодия ды янксян, мекс эзинь моле каршо, эзия невтне цёрань кором, цёрань нардевчим, эзинь кородо тейтернень берянденть. Каршо молемань таркас кирдинь потамонь лув, якинь ошонь куротнева ды вешнинь максовикс эрямо тарка — ансяк туемс, туемс эсень квартирасто, совамс куш кодамояк берякшке, кошонь кондямо ужинес. Ванкшнынь автобусонь-троллейбусонь лотксема таркатнева яволявтоматнень, тия-тува педявтнезь конёв панкстнэнь, эзинь стувтне газетатненьгак.
Ледить ней мелезэнь сеть азгондематне, лия пизэнь сеть вешнематне, ды куродсамам визькс. Кодамо лавшочи! Кодамо асатыкс обуцясон! Аволь эцемс, саемс верькс, улемс кармавтыцякс, азорокс, мон, Вияна, потынь, бажинь туемс стакачитнеде, пря максынь. Те каня цёракс?! Визькс!
Истя сёвномасто сёвномас мольсь тюжа рунго «вечкемам» марто (ков молят, сави пирямс валонть кечказнэсэ) эрямонок. Аволь весть сакшнось тень инжекс мелесь: каня истямо эрямонь кис сакшны ломанесь моданть лангс? Каня монь кондямо эрямось — эрямо? Истямо мельскак пракшнынь: секс ламот, аволь аламо иеть вейсэ эрязь, эрямонть сэпей-лажаня танстензэ варчамодо мейле эсест олясо тукшныть Тов. Мезекс, видеяк, майсемадо, сельведте — эрси, тюремадояк — пешксе эрямось?
Читне, ковтне, иетне эзть вано лангозонок, кода пишттяно. Содасть эсест — чийсть. Теке марто пежетекс карми, мериндерян: эрямом васень эскельксстэ саезь течис — келейдеяк келей раужо пакся, валдочинь панкскеяк лангстонзо а муят. Те, содазь, малавгак а истя. Берянесь вадрявтомо а эрси. Мик а эряви. Секскак варштат лиятнень лангс... «Э-э-э, — лиси турват ютксто, — ды мон ёвкссо ёвтневикс [167] райсэ эрян!» Валгонесть, валгонесть эрямонь паксязон, прок ловонь соламо шкасто ашо локсейть, валдодо пешксе читне! Секень вант, раужотнеде аволь седе аламо. Эйкакштнень кастомаст, тагояк ледстяса, тонавтомаст ды тонавтнемаст, мартост налксематне-котьмамотне — те, койсэнь, кенярксонь пандонть тёкшозо. Мельгат эрицят начтыть! Эрямот тень эйсэ поладык. Те каня а чансть?
Колоньгеменде ламо иеть, эсенсетнеде башка, тонавтынь улемс паксянь азорокс од ломанть, зняронь туро иеть максынь вешнемань тевентень, наукантень. А Есенин Сергей, Блок Александр, Астафьев Виктор ды ламо-ламо лиятнень марто ояксчисэ эрямось? Эсеть превсэ-кедьсэ сёрмадозь книгатне?.. Те каня аволь оймеёжонь инечи? Одолинь, теинь аволь аламо мельстуиця, лезэнь кандыця тевть. Валдомтсть эрязь иетнень аволь ансяк ковось, аволь ансяк кизэнь маней валскень чинь стямось — эйдень баягинекс гайгиця вайгелест.
Нолдык, Вияна, чумом — таго нолажтынь-шаштынь ды кодаяк а лисеван вечкемадо вечкевикс темастон. Содан: пакшадо ледстнематне кандыть теть Сэредькс. Ансяк, кода кортыть, моростонть валонть а ёртсак. Сёрмадан истя, кода ульнесь ды кода арсян. Мезде ансяк кортынь — те вечкеманть лия чачозо. Валдо-валдо! Лия ёндо... сёвномат-эрдекстамот. Теяк вечкема? Мертяно, аволь. Эно мейсэ, кодамо пенгесэ уштови вейсэнь эрямонь каштомось? Ламонь кургосто марсинь: ве таркасо, ве велькс ало удсемась, келя, улияк вечкемакс. Паряк, те аволь педе-пес виде, ялатеке монгак ламонь кувалма истя арсян. Вечкемась — те пицька. Кирвазтьсак. Вадря. Мейсэ уштомо кармат? Пенгеть анокстыть? Ацазь таркась... Сонзэ мон лован вейсэнь эрямосонть тумонь пенгекс. Лиякс кудось, кода иляст шна самай те вечкеманть, а эждеви.
Варштатано лия ёндо. А маштовикс, аволь шумбра цёратне — жальть марявить, — кодат мазыйть, тевень вечкицят ды сэтьме обуцят иляст уле, мекс-бути аватненень а эрявить. Каня истятнэ а вечкить? Вечкить. Сынсткак улить вечкевикс тейтерест, аваст... А вана эрямо мартост [168] тынь, «лавшотне», мекс-бути а правттадо... Ну, ней арсек! Содан истят зярыя. Цёратне превейть, дошузт, сырнень кедть, эрить вана... ськамост. Секскак а эряви пеедькшнемс «карксамодо алга» вечкеманть лангсо. Сон, сон, васняяк, малавгавтсь ды малавгавтни цёратнень-аватнень. Теде ковгак а туят.
Мекс цёрань ды авань вейсэнь эрямонтень минек эзть тонавто ды а тонавтыть школатне-мезтне? Мекс арась истямо предмет? Текень содыть школатне-университеттнэ, радиотне-телетне — вечкема! Прок ансяк сон совавты ладямо одтнэнь кудос. Сондензэ башка теке мезеяк а эряви. Те малавгак а истя. Кеман, тонавтовольтькак, кода пурнамс пизэ, семия-пувоз, — аламолгадовольть полатнень-нитнень ютксо явоматне, аламолгадовольть пайстомо уроз эйкакштне, ванськадоволь, седе мазыекс теевель эрямось. Истямо покш, эрявикс тев — ды ваныть лангозонзо суронь пачк. Мекс, алкукскак?
Вечкиль васень ним Мазава инжень пурнамо. Весемеде пек — эйсюрковонь 30-це чистэ. Сон — чачома чинек. Келемтезь столесь-стуворось эль а лондадыль ярсамо-симемапельтнеде. Экшсэнзэ эсь буень ломанть, ялгат, шабрат. Ютксонок... эйкакшт. Те тень эзь вечкевкшне. Эсь прям маринь кезгемезекс. Ялатеке ютавтневсть-ютнесть сеть чокшнетне мазыйстэ, морсезь, турватнестэ эзть валгоне, налксесть мизолкстнэ. Мазаваяк маштсь инжетнень марто шканть ютавтомо. Шнаса тень кувалма умондеяк умонь Негритянкам. Палыця ведентень эзь озно, чинензэяк эзь кирде. Эзь вечке симагайтнень!
Э-эх, ава-ава! Мекс тонь певтеме сялгонемат, кежеть, чирьстэ, коня алга варштавксот ды сиземань а содыця инзамот эзть рестедеве теть латкос?! Паро ломанелить, ды лиссь вана мезе. Эрямаль ды эрямаль тенек, эрямаль вейсэ, мелень ванозь, вейкень-вейкень чарькодезь. Арась... истя эзь лисе.
Вечкема... Ломаненть эрямосо весемеде мазый, тундокс увныця-морыця ёжо. Седе сеедьстэ сон эрси истямокс сестэ, зярдо вечкицятнень седейсэ эри поэзия, зярдо [169] сынь парсте содасызь литературанть, историянть, философиянть, зярдо кортыть чачома кельсэст ды домкасто содасызь сонзэ. А эряви стувтнемс тедеяк: истятнэнень эрямс, печтямс Чипазонть пельде максозенть, эрси, а шождыне.
Монень, Вияна, Пазось кой-мезе ёвтазенть эйстэ казекшнесь. Секскак вечкемам — тонь, мейле Мазавань — свал мазылгавтнизь сынь, литературань-искусствань содамочитне. Седеезэнь эзь кельгекшне кенярксось, эрясь эйсэнь шождыне, прок коштлекстявкс, ёжо, зярдо Негритянка марто вастневемстэнек вейсэнь содавиксэнек кедьсэ васенцеде марякшнынек пластинкасто Жорж Бизень операзонзо увертюранть ды интермеццонть, апак лексе кунсолокшнынек Александровичень хрусталекс ваньксстэ-мазыйстэ жойниця теноронзо. Морась, зярдояк а стувтса, оймень эждиця, ков-бути васов-васов, кенярксто пешксе ёнкстнэнь пелев тердиця «Моя Паола» неаполитанонь моронть:
Где ж ты, моя Паола,
Я изнываю в тоске...
Сырнень валт, сиякс гайгиця морыцянть вайгелезэ, моданть томбалев кадовозь вечкевикс ёжот...
Умок, вай, умок ульнесь ды кадовсь удалов седеень эждиця, музыкадо пешксе ялгань кедьсэ се чокшнесь, Негритянка, Бизе ды Александрович марто се вастовомась! А велявтсыть. А велявтовить. А эрявить велявтомскак, ялатеке икелень кондямо сияждыцякс, седеень талновтыцякс, толнэнь вельмевтицякс сынь уш а улить. Весемесь максови эрямосонть ансяк весть. Ансяк...
Истямо мельгак ули: вечкемс певтеме, вечкемс калмос валгомазот, содамс ансяк ве авань эли цёрань палыця рунго. Те — ёвкс. Те, лиякс, видьстэ ёвтазь, — чаво валт. Бути сон ули эрямосонть, самай те «куломазонокось», вастневи пектеяк пек чуросто. Сырнень паморькстэяк чуросто. Зяро эзинь яка менеленть алга, зяроксть эзинь вастневе чилисеманть марто, истямо ломаньс эзинь эртеве. Тень [170] кис а лововикс явомат, эйкакшонь кадномат, манчемат, салава «кершев» якамот...
Монь «певтемем» лиссь — кода весень. Кудонь «рудазтнэде», эрдекстамотнеде, кежде пешксе кошттонть чалгавинь лия ёнов ветиця килангс. Пурьгинекс зэрниця ве сёвномадо мейле ведьмень эзть кирдеве, нолдынь. Пурнынь-сэрнинь курмон-кармон ды туинь се авантень, конань содылия.
Шканзо коряс ушосонть лембель. Валскестэнть пракшнось, эль вельтизе моданть, васень ловне. Седейсэнь раздесть эрьва кодат пачат. Каня сорновтови пряудемстэнть нусманячиде пешксе се чись. Теке басом кеминь: тазямотне кадовить чопода ледстнемакс, учи эйсэнь мизолксто пешксе кенярксонь мастор.
Од вечкема?
Кода меремс... Авольть улеяк эрямо таркань вешнематне, мезде сёрмадынь седе икеле, седеяк — тенст пачтиця тувталтнэ, эсень кудоюртсто, косо эринь аволь вейке кемень иеть, косо кассть эйкакшон, лисемадо мель зярдояк аволимим содавто.
Вечкса-арась од вастань?
А содан. Мелезэнь тукшнось, те истя. Васняяк мунякшнымизь менель сэнь сельмензэ ды гайгиця вайгелезэ. «Тонеть те вайгеленть марто пароль театрасо важодемс!» — аволь весть мернинь тензэ. Сон мондень сисем-кавксо иеде од, сэрьс эседень аламнеде алкине, пондонь-пондонь куянь таштавкст, кода ней ламот, а кандтни. А уш дошузчись эйсэнзэ! Тевтеме минута а ашти. Кунды кодамояк тевс — стувтсы ярсамонзояк. Чары, нурькинестэ ёвтазь, кода пондакш пуло пачинесь чарыця чаронть потсо.
Иля арсе, Вияна, — шнан. Инжекскак а совси превезэнь те мелесь. Сёрмадан истя, кода ули.
Кодат ломанть, видеяк, ансяк а вастат эрямонь паксятнева яказь! Паронь арсицят, кежейть, ламонь содыцят, чаулат, сэрейть, алкинеть... Сайса Нуянь, омбоце нинь. Шкань-шкань совси прязон: мекс авазо чачтызе [171] тейтернеке? Мельсэнзэ теке: лаксемс, пилямс, инзэдемс, лазномс, кандомс, чупонемс... Истят тевтнень анок велявтнемс чоподасто чоподас. Цёраткак истят аволь сеедьстэ вастневить! Кирдевезэ кедьсэнзэ койме, узере, деряба, пелюма, мушкор, инкс... Сень кис зярдояк а саи книга, а озы ловномо. Нетянзат, ловнат, — ацирьгады, чишка а корты. Сави ловномапеленть путомс сельме икельде седе васов.
Весе ломантне явовить кавтов. Веенстнэнь седе дошуз прянь вить ёнксост — Художникть, поэтт, сёрмадейть, композиторт, морыцят, литераторт, историкть... — гуманитарийть. Эрзякс ютавтозь — ломанень вечкицят. Омбонстнэнь седе ёроков пряудемень керш ёнксост. Те — математика, инженерт, химикть, наукатнесэ видечинь вешницят, заводсо-косо кедьсэ важодицят... Улить, ды аволь аламо, истят, конатнень беряньстэ-вадрясто важодить прянь кавонест ёнкстнэ.
Нуянень Пазось макссь ансяк вейке — мезеяк ды теемс кедьсэ. Тесэ сон — ас. Кой-зярдо топавты истят тевть, конатнень токшемскак авольть эряво. Кодат минь, алкукскак, аволь вейкеть, кодат ансяк арасть ютксонок! Корозояк сонзэ цёрань. Ды аволь эрьвань. Ёвтамс мезеяк каршо, теемс лиякс, кода арсят, — иля снартнеяк. Ансяк мезе мери! «Кшнинь леди» — яла мерян тензэ пеедькшнезь. Лиясто, умок редия, бажи арсемскак монь таркас. Монь пряс анок кельгстямс эсь пряудемензэ, монь лавтов лангс анок озавтомс эсь прянзо. Тейть, кортак, мольть, озак, стяк, ярсак... ансяк сонзэкс. Арсек — ансяк кода сон арси!
«Стака?» — марян кевкстниця вайгелеть.
«Аволь шождыне», — мерян каршо.
Теке басом а эряви стувтнемс: шождачись — калавты, стакачись — тонавты.
Тынк, аватнень, яла ловить лавшокс, мерить тенк «лавшо пелькс». Ней арсек, мезе лиси, понгиндеряй те «лавшонтень» аволь пек нардев цёра. Кайсевемс тей-тов а сави: виензэ-чеченанзо невтьсынзе верьга-ланга. Стувтсы «лавшо» валонтькак! Аватнестэ, мерема, Нуя аволь ськамонзо. Ламот [172] эйстэнк правтыть цопадемс ведьметнень ды кирдемс седе нардевстэ, улемс ветицякс, улемс кармавтыцякс. Ламот анокт амзордамс весементь, мезе перькаст.
«Тевтеме минута а ашти...» Маряви, седе паро питне истямо обуцянтень а путови. Истя? Ужо, Вияна, иля капша, те аволь весе! Ломанесь, мертяно, соды ансяк-ансяк вейке тев. Каня берянь? Вадря. Ансяк аволь свал ды эрьва мейсэ. Мекс? Ёвтаса. Мезе карми тееме, зярдо прядови «вейкенькаесь»? Тунда, кизна, сёксня велесэ, содазь, — тевть. Мезес кунды Нуянь кондямось ошов самодо мейле, тельня? Лужалеме дивансо, шкань апак сода полгарьгавтнемс сельметь телевизоронть — «чаулань ящикенть» — икеле? Неемс, марямс эрямонть, перькат пертьпельксэнть ламодояк ламо мазычинзэ саразонь сельмешка варинева ванозь — те эсензэкс орма. Седей марян истят ломантненень. Жальть марявить.
Нуя истятнэстэ улияк. Кувака телетнестэ ошонь кудось, тевтеме аштезь, маряви тензэ тюрьмакс. Сон велень ломань. Чинек-венек анок ботамс кудоютксо, кардазсо, пиресэ. Секс «чикордозь» максни тень шка комавтомс прям конёвон вельксэс. Сёрмадомань-ловномань тевтнень лови нузяксчинь тёкшокс. «Тон Обломов, Илькадо а кадоват»! — яла мери тень кува пеедькшнезь, кува кежень сазь.
Монь мелем истямо: эрьвась парсте, потмаксос содазо вечкевикс тевензэ, теке марто маштозо тееме лия тевтькак, ванозо эрямонть лангс седе келейстэ, неезэ неезенть, марязо марязенть. Улезэ арсицякс.
Ломанень ошмось покштояк покш, келейдеяк келей. Зяро эрицянзо Мода планетанть — сеске а лововить. Веенст мерить — сисем миллиардт, лиятне — седе ламо. Содазь, пря яжамс а эряви: Тоначинь коряс те ламоксть-ламоксть аламо. Коморо. Паряк, кавто. Ялатеке кодат ансяк Модалангонь эрицятнень ютксо арасть!
Вастневить варма мельга ярмаконь ёртницяткак. А кемат, Вияна? Улить, улить истяткак! Вастневить, конат, мекевланг, анокт целковоенть кис пряст миемс. Эли кирьгазост пикс каямс. Улить, улить истяткак. Те — цирей орма.
[173] Содылинь вейке истямо. Ды «токазь» те ормасонть аволь аламот, «сэредицясь» теи куш кодамо эскелькс, куш мезе, ансяк эчкелгавтомс зепензэ. Оймень ваньксчи сынст пельде иля учо. Истямо чартьчи, вал сынст кортавкссо арась... Косо ярмакт, косо ломаненть седеензэ сювордызе целковоесь, тосо, Вияна, малавиксэнзэ туртов седеень мариця, лембень явиця иля вешне, а муят.
Вана истя, Менельсэ эриця, эрян-аштян: зярыя чить таргостонть, тундосто сёксес, Нуя марто велесэ, зярыя — ошсо. Кудыненек вирь чиресэ. Коштось ванькс, чинезэ пичеоень, лексеви шождасто. Ансяк вана сеськетне... Куш кудостояк малав кизэнь перть иля лисне! Мезде-бути арсиця пшти пря пичетне ванстыть пелевеёнксонть кельме вармадонзо. Вечкан кунсоломо певтеме нусманячиде пешксе морост! Тундосто сёксес котьман Нуя марто пиресэ, яксян ойсевтезь-видезь эмежтнень ды умарь чувтотнень мельга. Кочкомат, чупонемат, валномат... Тонсь содат... Пиземеде мейле чинь-колмонь ютазь — пангос. Истямокс ловтано лейкс ды модапанготнень. Ансяк. Лиятне... Кой-зярдо пачколетяно лей чирев экшелямо. Чокшнеланга... кенярксонь тевть! Поксарян букватнесэ, сёрмадан-ловнан пелевес. Веледе башка, колмо-ниле чис сакшнан ошов. Идян эрзянь келенть, теян нолдавикс газетанок. Сонзэ вельде эрян минек Масторонть марто, сюлмавозян превей-арсиця ламо ломань марто. Марян ды ризнан: вельть уш чуросто ды цяк марявиксстэ чави Чачома Масторонок седеезэ. Неть покш тевтнень теезь, пурнан книга. Исяк прядыя — пуло педявтынь — ёвтнемам. Сон — книгастонть пелькс. Ней вана, чокшнеланга, тонеть сёрма, сазорнэм, «кодан-стан».
...Абунгадынь, Вияна! Арсят-арсят, кодат ансяк мельть а совить лавтов лангсо кандтневиця осказот... Меельце шкастонть... теинь академикень «панжовкс»! Ва-ва, иля пейде! А кемат? Пелян, прявттнэ иляст венсте тень кодамояк лауреатонь лем!
А стака, сынь мельс, невтемс башка саезь ломанень обуцясо эрямонь покштояк покш, домка лув, мертяно, течинь ламо падежсэ шнавиця капитализманть. Сынь, [174] кой-кить ломантнестэ, — сонзэ, капитализманть, копиянзо. Истятнэ «сизема» валонть а содасызь, ускить тевень улавонть келест лисемс, прамозост, кармавтыть текень тееме эсест лезэс сиведезь важотненьгак. Превстэст а лиснить микшнемань-рамсемань тевтне. Ёнамост-целест — ярмакт, ярмакт ды невак ярмакт! Мезень кис, косто, мезень питнесэ, кода таштамс — те сынст а талновты... Ансяк улест, ансяк ламолгадост. Визькс, оймень ваньксчи, кецнема, мелень ванома, валонь кирдема... — неть чартьчитне сынст седейсэ а кирдевить, сынь аволь сынст.
Истя вана, Вияна сяткинем, умонь ялгинем! Эрьва кода икеле шкатнестэ сялдозь «изманть» марто шожда теевемс содавиксэкс аволь книгань ловнозь — сонзэ кондямо ломань марто вастневезь. А мезть библиотекава-кува якамс. Кармат седе эрьва ёндо содамо истямо ломаненть коронзо, мелявксонзо-бажамонзо ды мерят: вана, вана сон, пшти пей, а пештявиця очко пеке капитализмась! Содавикс аватнень эйстэ истят содан зярыя. Вейкесь эйстэст...
Кода арсят, кодамояк чеменев медальне а сялгить мештезэнь истямо «панжовксонть» кис?
Омбоцеде мерян, тевень теемасо Нуя мельга кополсо ардозь а кенерят. Кедензэ пачк чизэнзэ кемень тевть нолды. Вейкень прядсы, омбоцес, колмоцес кунды. Лиясто зярыя тевть ве шкане топавты. Кода а шнамс, кода а ёвтамс паро валт истямонтень? Ансяк а эряви стувтнемс тедеяк: лишмесь седеяк ламо теи, ансяк лишмесь, а эряви стувтнемс, кадови лишмекс. Уски, уски... Сон а соды: кинень уски, ков, мезекс, мезень кис...
Вана, Вияна-вечкемам, аволь келейстэ сёрмадозь картиныне, седе виде, маряви, меремс — этюд, Нуя од нинь марто эсь эрямокидень.
Вана мезень пачк савсь тень эскелямс аволь аламо вайгельпетнень. Содан, тон оймень костиця истямо апарос, мезде ёвтнинь, эзить понгоне, понгонить лияс, лия толт-якшамот печтить.
«Ад, ад!!!» — тесэ, Эрицянь Масторсо, сеерить-раздить кирьгапарест, теке сезьгант, икелень пекстазтне, [175] ушмантнэ — симагай бачкатне. Сынь чинек-венек тандавтнить варяв пря кунсолыцяст адсо-мейсэ. Кодамо ад, косо? Менельсэ, модаало? Сон тесэ, эсенек ютксо, минсь сонзэ тейтяно. Седеень раздиця истят ризкстнэде мейле а мезть вешнемс сонзэ, теке максазейть, модапотмова. Тон уш, Вияна, ульнить те адсонть. Саты. Моненьгак понгонесь аволь аламо. Минь уш тонь марто ульнинек майсемань те латкосонть. Кадык а лавгить, а яжить ловажавтомо келест нулгодькс ойме «святойтне». Кадык сынь варчасызь, зяро-мезе ютась минек прява. Ды апак кавтолдо ютыть, сы шкаст, вечкевикс адозост.
Икелень кортамодонок.
Понган-арась Менелень Масторов? А содан. Шкась невтьсы. Вастовтано? Тедеяк мезеяк а мерян. Паряк, Тоначинь Кула Пазось ёвтасы. Кадови монень вейке: учомс. Цюр, таго текеде, Тоначинь учомадо! Сы сон, сядоцеде уш мерян, апак учо, сы. Тонгак а весть ледстнить: капшамс а мезть. Сайть — мельсэнь, ве сёрмасот тонавтыть монь — пародонть, зяро саеви, Масторстонть, косо эрси тундо, кочкодыкенть моронзо марто кизэ, козонь сакшны нусманя, сырнеденть кувтолдыця сёксь. Кунсолок музыкакс марявиця эрзянь келенть гайгеманзо, пурьгинень зэрггнень, норовжорчтнень чольдердемаст... Те истя моронзо моры сонсь Пертьпельксэсь...
Секскак Тов туемань кодаткак учомат арасть а превсэнь, а седейсэнь. Шкам а сатны — тевть. Кадовсь тень аламо, сындест — улав. Капшавтомат. Туема шкам, содан, карми умарьковонть прядовомадо мейле читнестэ, конатнеде мерить авань сёксь. Вечкилик сонзэ тон, вечкса монгак. Мейсэ-бути сон ледстни куломадо. Теке мерят васоло-васоло, эль маряви, ильсезь лайши ава. Ламонь кургсто марсинь: Тоначив туемадо икеле ломаненть ёжозо вадрялгали. Истя-аволь — а содан. Авань сёксесь — кизэнть Тов ваямодонзо икеле меельце лембе лекстявксозо. Кулы кизэсь, кулы, меельцеде таргасы оймензэ ломанеськак. Тонь Пазось саинзить эсь Масторозонзо те шкастонть, таштамковонь 10-це чистэ. Туян тонь пелев, Тов, мекс-бути маряви тень, те шкастонть эли аламнеде седе икеле монгак.
[176] Течисэнть эрямонть мазы- ды стакачинзэ, кувсеманзо-майсеманзо ды мизолксонзо онкстневить шкасо. Ильтемань неть читнестэ куломась вастови чачоманть марто. Ожолгадыть, аламонь-аламонь, чаразь-велязь, мельтеме прыть лопатне. Мереват, сеерить, тердить поладомс эрямонть, тошкить мезде-бути лов алов видезь сюротне. Чачомась ушоды кинть, кона, шкань ютазь, прядови ломаненть оймензэ лисемстэ, ды сон, оймесь, поладсы эрямонзо васня Модаалксонь, мейле Менелень Масторсо. Неть Мастортнэсэ, оймень самодо башка, зярдояк, мезеяк а тееви, а полавтови. Эйсэст шка арась. Шка арась — арась эрямояк. Секскак чилисемакс, Пазонь пельде КАЗНЕКС кадовить тонь марто ютавтозь умонь-умонь од шкань коввалдов, лиясто чопода, ансяк свал оймень эждиця чокшнетнеде-ветнеде, Эрямодонть ледстнематне.
Мельсэнь, мейсэяк а нардтневи, кизэнь ве вестэнть Пичепе юткова киванть якамонок. Сон сестэ, эзинек редяяк, ливтимизь веленть томбалев. Лангсотоль, течис ванстовсь превсэнь, ашо, сэнь балягинесэ пургсезь, нурька ожа платия. Перькат сюлмазель теке тюсонь каркске. Валдо череть кодазельть кавто пулос ды нолдазельть мештеть ланга. Саразонь эскелькссэ, састо-састо молинек, кедте кедьс кундазь, аволь келей паксянь киванть. Кавто ёнганзо учось нуицят кенериця пинемесь. Кайксэть берянель. Мелеть, марявсь, кортамс мартон арасель. Седе ламо чатьмонить.
Апак учо лоткить. Арыть каршон чамадо чамас ды лангозон ванозь мерить:
— Паламак.
Варштынь сельмезэть ды эсь пачкан кевкститинь: «Те мезе мартот лиссь?». Сестэ вана...
Каршо мезеяк эзинь мере. Стинь икелеть. Каинь кедень лавтовот ланга, лепштитинь мештезэнь ды састо, ёжомарязь, прок ульнить суликань ды пелинь, порксават, палытинь чамаумарьс.
Тон саить кедень лавтовстот, вийсэ явимик эйстэть ды чатьмонезь, монь апак учо, прянь нолдазь поладык [177] кинть. Мезеяк эзинь чарькоде. Мезе лиссь? Мекс сеске истя нуваргадыть? Мекс ордадыть?
Зярыя эскелькст, ды ульнинь вакссот. Абунгавтымик валсот:
— Мекс аволь турвас?
Сеске мезеяк эзинь мере. Арсезевинь. Мейле ёвтынь теть неть колмо валтнэнь:
— Иля капшавто тундонть, — мельцек-мельцек путынь таркаваст.
Ёвтазесь мелезэть эзь туекшне. Мезть кортамс, зярдо моры седеесь ды лаки вересь, мезеяк а марят. А янксян, дугинем, мекс сестэ эзинь педявто турван тонь турватнес. Тейневельтькак монькс седе ламот, эрямось, тунь а кавтолдан, улевель седе ванькс ды ашо. Ней вана... Истят бутрат-тортат... А! А кемевияк: тон талай шкань чопода се вестэнть ульнить ашо платиясо тейтерь, ней — пенчень покшолмасо сэняжа сувне.
Моли 2003-це иесь. Течи якшамковонь 26-це чи. Тонь Пазось саинзить ведьгемень иесэ. Ульнесь 1985-це иесь. Ойметь лиссь таштамковонь 10-це чистэ. Чачома чистэть. Чинь ютазь нолдызь кельме рунгот чопода латконтень. Эйстэть ледстнемакс кадовкшнось васоло ошонь калмазырьсэ модань марнэ. Зярс-бути лангсонзо кирдевсть чиденть румозь кавто-колмо каштазтнэ. Мезе течис кадовсь эйстэст — а содан. Паряк, крёстоськак уш эзь ванстово. Оно зяро ютасть иетнеде! Кемгавксово иень трокс, лисни, Модапотсто саидизь Менелень Масторов. Ламо-аламо те? Лиятнень зяро кирдить?
Эрзянь кельсэ «прощай» валонть кондямо арась. Ули лия — «вастомазонок», седе эрзякс — «валскес» эли «вандыс». Эйсэст покш-келей зэме: вастневест, иляст явново ломантне. Вастневест Тоначисэяк.
Вастомазонок, Вечкемам! Вастомазонок куломадот мейле ламодояк ламо иень ютазь Менелень Масторсо.
Эрзянь Мастор. Тонь Учаень Валдай. 2003-це иень якшамковонь 26-це чи.