Тесэ ды тосо (2013)/21
| ←Комсеце сёрмась | Тесэ ды тосо (2013) by , edited by Ломшина Л. А. Комсьвейкееце сёрмась |
Комськавтовоце сёрмась→ |
| Нуянь Видяз. Тесэ ды тосо: сёрмасо роман, келей ёвтнема ды ёвтнемат. — Саранск, Красный Октябрь, 2013. — с. 154—158 |
[154]
| * * * |
| Комсьвейкееце сёрмась |
Масторлангов, Эрзянь Масторов, Учаень Валдайнень
Шумбрат-парт, валонь а топавтыця!
Сась, сась учовиксэсь. Кеминь, эрязь иедеть сёрмадат седе ламо, седе келейстэ. Секс истя учиньгак. Тон... «кото кикст». А пеняцян. Кадык ютыть ютазь иеть ланга пек киртязь, чарькодинь чапинень пес. Тонетькак, ванан, ялгинем, седеень витезь эзть эряво сынь, тонгак сезялтикшень-пижмань ведтенть копорить ды, маряви, копорят нейгак. «Кие чумось? Мекс, зяроцеде уш, кода тонгак, чиреман теке мелентень, зняро лайшемат-кувсемат ды лия берянь тевть Моданть лангсо?» Тонгак аволь весть ледстник те кевкстеманть сёрмасот. Мекс, алкукскак? А содан. Ды кевкстнемскак а мезть. Ялатеке кияк а ёвты.
Гайгиця покш куля. Кунсолок.
Сёрмадан теть верде. Ва-ва, иля аймельгадо! Омбоцеде мерян — верде. А чарькодят? Ёвтаса лиякс: исяк прядовсь ванкшномань-кевкстнемань шкам, ды Мода алдо кузтимизь пельтнень, менелень сэненть пачк верев. Ней пачкодсь? То-та! Содавлитькак, кадык валоськак а те, кода ливтинек! Некшнить, содазь, кодамояк варява эли вальмава чоподас совиця чинь нал. Валдосонзо неяви, кода састо-састо, цивтёрдозь, кузить-кепетить певтеме ламо челькинеть. Миньгак, ойметне, истя. Састо-састо, тей-тов апак нуря, апак чиремкшне, кувака-кувака арсемань арсезь, аволь ве чи, аволь кавтояк, кепедевинек васня моданть, мейле сэнь ёнкстнэнь пачк. Арась, арась, «модань» валсо те ливтямонть танстезэ, вечкевиксчизэ, мик мазычизэ а панжовить. Эрзянь кельсэ истят валт арасть. Арасть рузонсесэнтькак.
Колмо-ниле валт од таркадон. Менельсэнть, вере-вере, ули, содат, озононь келькш. Сон човинедеяк човине. Алганзо-ёжованзо сравтовозь Менелень Масторонок.
[155] А лововикс ламо ойметне эвтить самай тесэ. Эйстэст, тонсь чарькодят, — а ушодкс, а пе. Мириадат. Вечкеви тень башка-башка, куринкань-куринкань тесэнь эрямось. Ойметне пурнавить чачома таркаст коряс. Рашты кевкстемат, а? Тесэ, мертяно, Кузвелень, седе тов, ванат, — Пичепень, Аловелень... Кода Модалангсо: велень-велень, ошонь-ошонь, ёнксонь-ёнксонь... Косо илязо лисе оймесь, «модадо» мейле ламо иень ютазь сы чачома таркансетнень юткс. Оймень велетне аволь покшт. Парнешкат. Ансяк. Улить ошткак. Сеть седе покшт. Эрицяст, содави, певтеме ламо. Зяро? Наукась теде зярс чатьмони. Истят тесэнь кой-кодат лувтне. Вастовомс киньгак марто? Превс а саеви! Мон вана... кемть-иля, кенеринь вастовомо тетянь марто! Вельть ламо эйстэнек, эсенек веленсетнедеяк. Ламот лиссть допрок од ломанень мештестэ. Секскак неемс киньгак, вастовомс, омбоцеде мерян, — а шождыне.
Менелень Масторонок ламо мезень кувалма моли Модаалкс ёнов. Тесэяк весе вейкеттяно. Лексемань кошт тенек а эряви. Модаапотмонь коряс ойметне тесэ зярыяксть седе вишкинеть, киртявозь. Пенчешкат. Ансяк. Кой-конатне аламнеде седе покшт. Сельмеде, кургодо, пиледе — кортамскак а мезть. Минь тесэ — валдо-сэнь тюс сулейть. Кодат сельметь... Кадык эрий ломанень кондямо рунгонок арась, вейкенек-вейкенек содатано ды апак корта чарькодтяно. Кортатано кельтеме-валтомо, чатьмонезь. Те тонеть, пря или яжа, а чулгови. Тесэ минек, Менелень Масторсо, аволь кода тынк пеле, лавгамот а эрсить, валтнэнь таркас кортатано а неявикс тешкссэ-мельсэ. Эрьвась эйстэст полавты кувака валрисьме. Мертяно, «кечказ» тешкскесэнть ёвтави истямо мель: «Вечкилитинь, дугай, вечкилитинь, ней ютксонок дюм чопода ве». Тесэ свал-свал кашт. А марят мезеяк! Куш кашторкске каятоволь. Натой Моданть велькссэ пурьгинень зэрттнеяк а пачколить!
Тынк пельде кулятне сакшныть тенек шкань апак ёмавтне. Пачтявить, а мезть човонь ёзамс, аволь ансяк сёрма вельде. Кода-бути сынсь сыть. Кода, кодамо киява, кодамо «сортонь» кошткеверькс вельде, кодамо уськень пачк — [156] а содан. Пазонь тевть, косто миненек содамс! Пачкодить эрьва ёндо, шкань ютковтомо. Секскак эрьва оймесь Менелень Масторсо соды, мезе моли Модалангсо малавиксэнзэ ютксо, эсензэ велесэ, ошсо. Кулянь чадыведьстэнть монень весемеде вечкевикст тонь сёрматне. Сынь тень — эрьмеде пешксе кавт-утомт.
Кода-мезе, ёвтазденть башка, тесэ? Сёпомо а карман, видькстан: Модаалксонь Масторонь коряс од «кудосон» экше. Панжиков шкань менелькс, мон истя меревлинь. Кизэнь самодо, ялгинем, иля арсеяк. Сон тесэ а эрси. Мон вечкилия ды нейгак вечкса иень те пельксэнть. А стувтнеса теке марто валмеревксэнть: вадря тосо, косо минь арастяно. Модаало лембель, тень кис чоподаль, раужос пачколиця сувстонть эзинек лисне. Тесэ чись полавтнесы венть. Валдо — чопода, валдо — чопода... Ну, кода тынк тосо. Тень лангс апак вано, свал, читькак, экше. Варчик савтомс тенек! Арсят, майсетяно экшеденть? Аноктано полавтомс чоподанть лангс валдонть? Маняват. Тунь арась. Минь, свал кирдть мельсэть, аволь ломанть — ломанень ойметь. Секскак... Тесэнь эрямось, алценть коряс, седе тукшны мелезэнь. Алкукс, Валдай... Содат мейсэ? Модамасторось — эйсэнзэ Эрзянь Масторось, неень эрямо кудот, — тестэ неяви седе вадрясто, свал «сельмень» икеле! Кадык васолдояк васоло, неяви сон тестэ чипаенть покшолмасо. Ванан, ванан лангозонзо... Малав свал тапардазь ашо пельсэ. Те берянь. Пельтнень срадомсто Модась неяви сэншть мериця оскакс. Тосо зярдо-бути умоктояк умок эринь, вечкинь ваномо тонь сельмс, кунсолынь пиренек пева чудиця лейненть морынензэ... Умок, пек умок те ульнесь!
Тесэ, таго ледстяса, певтеме кашт. Чуродояк чуросто, тень ёвтнизь, ялатеке сон колсеви. Та-косто верде-верде, тестэ покшсто неявиця тештетнень ёндо, кайсетить нармунень чоледема ёнов молиця гайтть. Марсить, кода тундонь лембе, сэтьме чистэ морсить сынь тынк Масторонь вирьсэ? Пилеть потомить вайгельдест! Тесэ дух лиякс. Модалангонь валсо-гайтьсэ морамонь лувост-вайгелест а ёвтневить. Те шкась, келя (монсь эзия марсе), Менелень ойметнень туртов покшчи ёнов молиця. А морыть, а киштить, кода [157] тынь Модалангсо. Теде тесэ кортамскак а мезть. Сень кис марить тештетнень ёндо пачколиця гайттнеде а ёвтавикс кеняркс. Покшчись эрси сядо иес весть. Секскак учить эйсэнзэ а ёвтавияк кода. Арась, Валдай, тынк книгатнесэ тесэнь тевтнеде овсе мезеяк а ёвтневи. Вешнемеяк иля педсе.
Саты теде. Маряви, цякскадыть «Менельдень». Пачкодят тей — тунь а кавтолдан, — тонсь несыть тесэнь мазычитнень, койтнень, ойметнень чамаст-рунгост, варчасак, сы шкат, тесэ улеманть растензэ.
А ней...
Ней — те меельце сёрмам тонеть, Вечкемам, тонеть, сэнела оскинекс неявиця Масторлангонь ломань. Меельце. Марят? Модаало сёрмалемань тевтнень икельга кодаткак пирявкст тень эзть путневе. Тынк тосо тенст мерить цензура? Истя? Кучнек кинень ды зяро мелеть! Кияк мезеяк а мери, кияк а кардатанзат. Менелень Масторсо, седейпельксэм, койтне-кирдатне аламнеде лият. Мереви кучнемс ансяк вейке сёрма-ёвтамо вейке ломаннень кемень иес весть. Вейке. Мезе теянгак. Кемень иень ютазь Модалангонь эрицякс уш а улят. Секс тонеть сёрмам меельце. Тонгак тень кучат меельцеде. Вечкевсть тень сынь, тонь сёрматне, вечкевсь кунсоломс вайгелеть, марямс кулят Чачома Масторстон. Сюконян, кода меревлинь Эрий Масторсо, пульзян кисэст икелеть. Ламольть содавиксэнь-малавиксэнь — сазорнэм, колмо сыре патян... — пшкалинь сёрмасон, Валдай, ансяк тонеть. Содынь: тон, ансяк тон топавтсак мелем — кучат каршо вал. Истя лисськак. Эзинь маняво. Мельсэть, кода абунгавтокшнынзить васень, аволь костояк, Тоначистэ, якстере, кедьс педиця сёрмам? Талай те ульнесь. Шкась, читне-ветне, тынк валсо-мельсэ, ютыть — а неявить. Зяроксть седе мейле пачколесть тень тонсетне? Эзинь лово. Мезекс? Содан вейкеде: сынь кандсть кеняркс, эрявтымизь, кадык умок кулозян, кенярксонь масторсо. Якинь пижесэ ацазь мода ланга, ульнинь чачома велесэнь, малавиксэнь ютксо. Тонь ды Паксютонь Марюш марто. Сюк-сюк, Валдай!
[158] Мон уш ней а сёрмадан, иля учо. Кучт тень тон. Паряк, кеменьшка иень ютазь — марявсть истят кулят — а кармить теде кардамо. Ансяк сестэ уш тонсь, а кавтолдан, улят Модаалксонь эриця. Весе. Кадови вейке меремс: Менельсэ вастовомазонок. Бути вастовтано... Тонетькак аламо кадовсь, Валдай. Тонгак курок чопавтат Тоначис. Пелят? А мезде пелемс. Эрьвась Тосо ули. Тов, мейле — тей, Менелев, китне свал панжадот. Тов понгат, понгат-арась тей, Менелень Масторов, — а содан. Ледстяса, тей сайнить аволь весень, ансяк ламо майсевицятнень. Сёрмат коряс, пшти кевсэ ацазь эрямонь китнева тонгак эскелить аволь аламо. Секскак, кеман, тонетькак тей, верев, кись нолдави-венстеви.
Те мезе, мекс валгак эзить ёвта эйкакшпингеденек?! Тосо знярольть «кевтнеде» — а онкставить. Лия ёндо, Валдай, парсте теить. Ледстнемскак а эряви. Ледстнемс, зяро лопань, олгонь, марчонь кши сэвинек? Зяро кепе-штапо чийнинек? Таргсемс умонь иетнестэ вачодо — эль эзинек кулсе — аштематнень? Превейстэ теить — эйзэст эзить пачколе. Шнатан. А мезть седей ангорямс.
Менелень Масторов пачкодемадот... Иля кавтолдо, иля тално, понгат-арась. Койсэнь, омбоцеде мерян, понгат. Печтясак Модаалксонь шкат, макссак «экзаменэть», ды аволь аламо иень ютазь, теке ашо гулькань чевте толгине, ойметь састыне-састыне кузи тей.
Истят талновтыця мельтькак сакшныть: седе малавиксстэ, кода вастневинек од шкастонок ды ней конёв лопатнень лангсо, а вастовтано. Зярдояк. Тесэ, Менельсэ, мезе? Мезе нетяно вейкенек-вейкенек эйстэ? Пижела-сэнь тонь сельметь, турват, сёлмокс кавто ёнов сравтовозь сельме-чирькеть, конатнень бажинь неемс свал, ней уш а несынь. Тонгак мезеяк а неят: а мизолксом, а ёлганя рунгом. Ашо толгине ёнов молиця кавто ойметь. Весе. Лия мезеяк а редятано. Мезе ули, се ули. Мезеяк а полавтат.
Сыця сёрмат учозь, тонь Вияна.
Менелень Мастор.