Тесэ ды тосо (2013)/Ламбамо нартемкс/9
| ←8-це глава | Ламбамо нартемкс (2013) by , edited by Ломшина Л. А. 9-це глава |
Ламбамо нартемкс (оглавления)→ |
| Нуянь Видяз. Тесэ ды тосо: сёрмасо роман, келей ёвтнема ды ёвтнемат. — Саранск, Красный Октябрь, 2013. — с. 319—338 |
[319]
— 9 —
Вень чопода сэтьменть колызе кузтемпень кенкшентень мезе вийсэ гамаемань зэрть.
Каятотсь пинень онгома.
Тарск сыргозсь Элюва ды ёртозь ёртовсь, прок арасельгак вакссонзо пирявксокс мирдезэ, таркастонзо. Сеске мельганзо стясь Виряз.
— Вай, авакай! Те мезе, кие?! — вайкстнезь чийсь вальмантень азоравась. — Чопода, мезеяк а неяви.
— Самай се, мезденть оргодиксэлинек, — талнозь мерсь Виряз нинзэ ваксс стямсто. — Седе курок ярмактнень пштидить.
— Панжан молян. Сеске а нолдасынь, — лисемстэ ёвтызе мелензэ Виряз.
— Паро, паро, — марявсь чоподасонть лавшо, прок сэредицянь, Элювань вайгелезэ.
Виряз эрязкалезь путсь шапка, тонгсь кемть, автордась каштланго чирестэ фуфайка, каизе лавтовонзо ланга ды шлыгорк лиссь кудыкелев. Чоподасонть кавто ёнга токшезь, састыне ютась ушонь кузтемпень кенкшентень.
— Кие тосо?
Кашт.
— Кие?..
— Минь! Панжт седе курок, — каятотсть тона ёндо цёраломанень зярыя вайгельть.
— Ды кить тынь? Паряк, кодаткак орт, — эзь капша панжомо, таргсесь, кода маштсь, шканть атясь.
— Минь теть невттяно орт, панжт, теть мерить! — шалнозевсть цёрань вайгельтне, кармасть брикстяеме, мокшнасо равтомо кенкшенть.
«Маряви, копордазь», — прась мельс Виряз атя.
— Каня стака ёвтамс, кить тынь ды косто?! — серьгедсь кенкшенть удало аштицясь, зярдо тона ёно лоткасть брикстяемадо.
— Вельсоветстэ минь, панжт! — каятотсь седе сэтьместэ каршо.
— Истя меремальгак. Кие тон? Кода фамилият?
— А-а-а, сон мик фамилият кевкстни! — верьгизэкс урнозевсть вень инжетне ды седеяк виевстэ ушодсть чавомо. Равтомадонть, секень вант, пры кенкшесь.
Виряз айгизе тулонть, мельганзо саизе трокс путневиця мандонть ды келес панжизе кенкшенть. Ваксканзо мельцек-мельцек уцор-ацор ютасть мекс-бути прясто пильгс раужосо оршазь, буринашка вете-кото цёрат. Икельцесь мештензэ икеле кирдсь кирвазтезь фонарь. Мельгаст совась «а нолдыцясткак».
Паникудосонть валдо. Элюва кенерсь вельмевтеме тол — [321] кирвазтизе стенас понгавтозь лампиненть. Теке кельмесэ чавозь сёксень баляга, авась нусманясто, коня алга вансь совицятнень, эсь велень истя содавикс цёратнень лангс. Се оно, ашназа, прок лияназ, нересь — Паргонь Микита, се — Чичавонь Миколь, се... «Мезе тейтядо, ожо нерь озязт, — ульнесь Элювань мелезэ меремс, — понксонь канд тнийть?! Кавалокс каявиде лангозон. Инявакс саван тенк, мезе тейтядо? Сыре аваломань лангс кедь кепедиде. А! Визькстэметь!» Эзь ёвта мезеяк. Вал эзь ёмавто. Мезекс? Мезень лезэсь? Авидечиденть, покордамодонть прязо увнось. Мезе тенст эряви, дюм веть азгондицятненень, мезень чумозо икелест прянь нолдазь аштицянть? Кинень берянь вал ёвтась? Лиякс ульнесь. Оно се, Чичавонсесь, аволь весть сакшнось энялдомо — максомс пандомга видьмекс сюро. Мейсэ чумозо Элювань, бути кудосост сисем эйкакшт ды весе тейтерть. Те, ловт, модавтомот. Сакшнось Миколь. Элюва чавонь кедть эзизе ильтне, лездась. Ней вана...
Совицятнеде вейкесь, Вачаень Кирин, велень прявт. Тензэ колоньгеменьшка. Седе ламо а улить. Сэрей. Лангсонзо сёксень пальто. Чамазо свал якстере. Мекс, а соды сонськак. Каня чачсь истямокс, каня мезде лиядо. Сон, ансяк совась, азоркс, тей-тов ванкшнозь, ютась икелев. Озась вальманть ёжос, ужос аравтозь стуворонть пес. Мезть лангсонзольть, шаштынзе омбоце пес. Потмо зепестэнзэ таргась сювозь карандаш, нилев мендязь конёв, каштордозь келемтизе ды кармась марямга ловномо:
— «Пиргужова Елена Антоновна родинась 23 марта 1870 года в селе Ремезёнки. Хозяйствасонзо имеет: дом кирьпецень, пятистенный, два... нет, одну конюшню, амбар, две лошади, две коровы, десять овец, семнадцать кур...» Лиятнень, мезеть улить, Элюва баба, ловсынек ней. Пройдите, азёдо Микита марто Миколь, ваннынк весе таркатнень. Чарькодиде? Вейкень пес!
Кинень мерезель, фонарест марто, теке кельтеме чопачат, лиссть ушов.
— Паряк, ёвтасынк, мезе моли? Мекс тей сыде, мезе тенк эряви? — эзь кирдеве, венстизе келензэ Виряз атя, теизе прянзо а содыцякс. — Кить тынь?
— Пестэ пес.
— Ашолгадозь, те, лисни, колмо-ниле часонь ютазь, сы подвода. Ульть, Элюва патяй, анок. Мереви саемс мартот мезе лангсот ды, теде башка, зяро-мезе теть кандови. Истя вана. Чарькодевсь?
Тень марязь, Элювань польдерьсэ тусть сельведензэ, авась ильсезевсь. А кежть, а янксемат потсонзо арасельть... Керязь керясь эйсэнзэ а мезень кис покордамось, кельтеме ракшакс улемась.
— Мейсь ан...ан...сяк мон, ськамон? — лайшемань пачк, пупорькшнезь пшкадсь Элюва Кириннэнь. — Те кода — ськамон?
— Эно кинь марто? — полгарьгавтынзе сельмензэ велень «комиссарось», педявтызе вановтонзо Элювас.
— Кода кинь? Мирдень... — невтсь каршонзо прянь нолдазь стядо аштиця шержей пря Виряз лангс.
— Ха! Ды тынь, Элюва патяй, а церьковасо, а вельсоветсэ апак венча, секскак... — келемтинзе кедензэ якстере чама Кирин ды таго ёлк варштась аванть сельмес.
— Мейле мезе, апак венча, эрятано уш кавксоце ие, — пшкадсь Элюва, сельмензэ нардтнезь, эсь прянзо идемга.
— Те а ловови, кие зяро иеть... Спискасонть ансяк тон. Виряз атя минек конёвтнень коряс ловови батракокс. Сынь, содак, кажовонь спискасот, башка, пансемест кияк а карми. Мекевланг, сынст лангс кемеманок. Чарькодить?
— Охо-хо-хо-о, — эзь кирдеве, граж вайгельсэ лайшезевсь Элюва ды, кедькоморосонзо сельмензэ вельтязь, юрк совась икеле кудос, комадо прась коникезэнзэ. Ильсемадонть рунгозо сорнось, прок ургатень орма чавсь эйсэнзэ. — Охо-хо-хо-хо, — оймень кериця ризкстэнть охордсь авась чопода кудосонть. Киньгак эзь маря, эзь нее. — Охо-хо-хо, охо-хо-хо...
[323] Совась «батракозо». Озась коникенть чирес. Путызе кедензэ лажицянть лавтовонзо лангс, вадяшизе.
— Оймак, Элюва. Саты, саты, паро. Сельведьсэ мезеяк а теят. Сыненст кияк а кеми. Кияк, дугинем, кияк. Лоткак. Эрямось тень эйсэ а прядови. Лоткак, кунсоломак...
Вачаень Кирин, «раскулачниктнень» покшост, прок мукорь аштесь удалце кудонь стуворонть песэ. Учось кардазсто мурдыця мучкицятнень. Мезе мольсь перьканзо, марикскак эзь тее. Сельведтне седеензэ эзизь чевтемте. Аштесь стувор экшсэ, ваннось конёвонзо, шкань-шкань ёзась вить кедьсэнзэ валанясто наразь улонзо. Лайшить-арась — те сонзэ эзь сэредсте. Вере покш прявттнэнь пельде кармавтоманть топавтома. Мезе те илязо аште.
— Весе те юты, неть чопода читнень, сы шка, полавтсызь маней, валдо чить, — поладынзе валонзо, ладсесь Виряз майсевицянть.
Арась. Элюва эзь кунсоло, эзь маря. Марявсь тензэ, эйсэнзэ эрийстэ нолдыть кельме, чопода калмос. Ведьгемень иеть, ловт, пинге максозь кудонтень, ули-паротненень. Зяро сельведть, ливезь валозь, ней весе тень саить, саить апак кевкстне. Визьксэнь апак сода. Кадык сайсызь. Пештявить, паряк. Ансяк кадовлизь эрямо чачома велезэнзэ. Куш тень теевлизь. Кодаяк пингензэ ютавтовлизе. Куломантень прянзо аволизе максо. Паломась, кортыть, салыцядо а паро. Стенаткак а кады. Нулгодькс, сюдомань тевесь, конань теить неень азортнэ, паломадояк зыянов: а кады эрямо таркаяк. Эряк тосо, косо мерить, тейть сень, мезе мерить, ульть пикс вельде ветневиця вазокс. Те кода истя?
— Марят-арась? Энгамт, мекс теке эйкакш ильсят, натой сорнат, саты, саты, — яла оймавтсь, яла важдась, яла лелювась малавиксэнзэ Виряз.
Аламонь-аламонь пачкодсть валонзо. Авардицясь оймась.
Виряз лиссь удалце пелев.
Те шкастонть кардазсто совасть «ят» ломанень пизэнь сокарицятне. Паргонь Микита саизе прястонзо шапканзо, стясь «начальникензэ» икелев ды кундась валонь кирдеме:
— Сюрось кодамо? — каясь трокс вал, сезизе ловоманть якстере чама Кирин.
— Вете кескавт товсюро, ниле — Пинеме, колмо — розь, — прядызе ёвтнеманзо мучкицясь Паргонь Микита.
— Мезе, ансяк кемгавтово кескавт пивсыде? Косот асатыкстнэ? — ютавтызе вановтонзо, кевкстизе Вирязонь пансицянь прявтось.
— «Батраконтень» ламо содамс а эряви. Мезе содан, ёвтаса: реветнень сэвинек, саразтнэнь сэвинек, тувонок, содат, арасельть.
— Косот скалтнэ?
— Казинек.
— Кинень? — талномадонть карандашсонзо тянкаезь, кежень сазь пшкадсь Кирин.
— Кинень меленек, сетненень казинек. Тонеть кодамо тев?
— Содат мезе, атя, иля менчеве, лиякс мартот карман калякамо, — лыказевсь таркасонзо, чирьстэ варштась Виряз лангс велень азорось.
— Тон, ванан, цёра, тандавтницятнень эйстэ. Содат, мон — «батрак», секскак... — апак пеле, каштанчинь кирдезь, «озавтызе» Виряз атя набойгалицянтъ. — Монень сизьгементнень малава, тонь кондят тандавтницят понгонесть тень зярыя.
Кирин, лиякс «Вачаев ялгась», видеяк, аламнеде чевтемсь.
— Элюва патяй, сака тей! — рангстась сон верьга вайгельть тона кудо ёнов.
Чикорк панжовсь кенкшесь. Совась Элюва. Ютась ды озась стуворонть омбоце пес, мирдензэ ваксс-ёжос.
— Элюва патяй, скалот косот?
Кирин сускизе келензэ. Ушодсь лиядо:
— Тагояк мерян: курок сы усксиця. Ульть анок, сайть мартот мезе кандови. Велестэнть усктадызь Симилеев, станцияв. Ков тосто, а содан. Подводанть самс кудонтень кадовить' кавто ванстыцят, вана неть милиция ялгатне.
Те шкас чатьмонезь, палманькс аштиця кавто «раскулачниктне» ды прявтост калдор-кулдор лиссть. Тевест теизь. Тусть оймсеме. Ванстыцятне прок мукорть аштесть озадо кенкшенть вакссо эземсэнть. Вейкесь эйстэст седе сыре, эчке, кутьмерезэ чапакс очконь келесэ, ялгазо — ловтаня чама од цёрыне. Лангсост милициянь раужо кувака шинельть. Кудосонть лембе. Кайсеме а арсить. А мерить прявттнэ. Чатьмонсть. Неявсь, сась удомаст. Нувсесть.
Нить-полат совасть икеле кудос.
— Мезе ней карматано тееме? — пшкадсь Элюва сонськак а соды кинень ды ютамсто ботадизе пильгесэнзэ, прок се чумоль, анокстазь кескавонть.
— Тон свал ветицякс ульнить, меельце валось свал кадновсь мельгат. Тонсь ёвтык, — мельтеме, чавозь вайгельсэ мерсь Виряз нинстэнь.
— Ульнинь... — чарькодизе Элюва, кинь пирес ёртнесь кевнеть эриялгазо.
— Те виде, ней... — укстась Виряз.
— Арсек, тейть мезеяк! — паряк, вейсэ эрязь иетнень перть васенцеде Элюва кевкстнесь превть, энялдсь.
— Ужо, — салава, турванзо каршо кедькоморонзо путозь, тошкстась Виряз, — варчама оргодемс.
— Вай, Инешкипаз! Лездак, таргамизь те кажостонть, — кецнемадонть эль марямга ознозевсь Элюва.
— Эрьга, седе курокке анокстасынек саемапеленек...
Зярс пурнасть-сэрнясть, Виряз ёвтнизе, мезе эрявсь теемс.
Шка ламо эзь эряво. Састыне, шалттомо путнизь кансттнэнь ве таркас. Кадовсь ансяк саемс.
[326] Виряз совась паникудос. Кенкшенть мельганзо допрок эзизе пекста.
— Полай, мездеяк андсамак-арась?! — серьгедсь, тердизе нинзэ Виряз.
Элюва — прок тескель.
— Тон, атя, аволь сырнеме кармить? Зярдояк истямо шкава ярсамо эзить ойсе, — машнетезь мерсь Вирязнэнь совицясь.
— Стувтык, чокшне кши паморькскеяк эзинь кайсе кургозон? Пекем потятотсь, — текекс кежиявтнезь мерсь атясь стувор экшс эцемстэ.
Элюва мезе мусь, мезезэ аноколь — весементь путызе «вачодо кулыцянть» икелев.
— Тонсь сускат мездеяк? — пшкадсь нинстэнь.
— Арась. Ярсамскак мелем арась. Прям, секень вант, лазови. Кодат ярсамот...
— Вант, вант... Ней мезе, ськамон карман чевелямо? Маряви, цёратненьгак пекест вачсть. Истя?
— Вай, авакай! — сэрьганзо рукштядинзе кедензэ азоравась ды тердинзе, стуворонть пелев кедьсэнзэ ахолязь, кургонь автницятнень ярсамо. — Дух стувтыя. Озадо, цёрат, озадо. Илядо визде. Тей, тей вана ютадо! Ямоськак вана, сюк Пазонтень, допрок эзь кельме.
Ванстыцятне покшкавтнеме эзть карма. Озасть, валгак эзть чулго.
— Вадряль, Вирязнизэ, ченькскеяк петнявкскень-петнявкс каямс, — варштась Элювань сельмес, кончтась атязо.
— Ченькске, мерят?
— Эли а марят... Муят? — аволь сеске, арсезь, таго пшкадсь Виряз.
Элюва, теке нарвицька ципаканзо марто, чарась-велясь стувор экшсэ аштицятнень перька: кинень пенч венсти, кечине, кинь нулынесэ нардасы икельксэнзэ.
— Костояк уш муян, эрявиндеряй, — мерсь ды, кадынзе тевензэяк, ювк лиссь кудыкелев. Аламос аштезь совавтсь кавто бутылкат лавкань ашо вина. Путынзе стуворонть лангс.
Икелест сургучсо потомдазь бутылкатне лембеденть ливезькадсть, пиже тюсост теевсь куштазакс.
Азорось пештинзе стопкатнень.
— Кинень васенцесь? — кевкстизе каршонзо аштиця седе сыре милициянть. — Васенцесь, яла мерить, седе тантей. Седейгак, келя, седе вити. Ну, кинень?
— Как хозяин, так и гость, — ледстизе шинелень кандтницясь, эчке турва ды тюжа пей, келей кутьмере цёрась.
«Мезе теят, сави кепедемс», — арсезевсь явшицясь. Пельсь, илязо лавшомо, ды симизе стопканть пелензэ. Пештизе омбоцеде. Кандызе «как хозяин» валтнэнь ёвтыцянтень. Тона мамштызе малав весе. Мельганзо весть-кавксть копордась однэськак.
Элюва вансь мельгаст, текень содась, яла каванясь:
— Ярсадо, инжеть, ярсадо! Чись кувакаль, пекетне, содазь, каравсть. Ярсадо, цёрат, ярсадо! Илядо визде. Ярсадо мезе Пазось макссь. Вана товсюронь кши, медне, вана верек алт, пештинк пекенк, илядо визде.
Тевесь а пек мольсь. Каваницясь нуртнесь стопкатнева — симицятне симеме эзть правто. Седе сыре милициясь васенцеденть мейле стопканть ансяк токавтнизе якстере эчке турвазонзо. Одось седе лавшомсь. «Ёжов келей лавтовось, тень пулонзо алга ведь а валат...» — тешкстызе эськанзо винань кандтницясь.
— Ну мезе, цёрат, стятано? Пежеть, монь койсэ, а ули чиремемскак. Куш часошкас сельметнень конямс. Кись учови кувака. Истя кортан, цёрат? — Виряз сайсь мель прядомс каванямонь налксеманть ды васенцекс стясь таркастонзо. — Бути сы удоманк, илядо визде, тыньгак кукшкадодо, каштлангось чаво.
Ванстыцятне чатьмонсть, мерят ведь кургозост сайсть.
Виряз ютась икеле кудос.
Элюва урядамо эзь карма. Кадызе тарказонзо панжадо [328] бутылкантькак. Палыведтенть алятнень чамаст аламодо якстерьгадсть. Одось яла снартнесь ушодомс кортамо. Стуворонть экшстэ лисеме эзь бажа. Ков сыненст капшамс? Кенерить лужалеме кенкшенть вакссояк.
— Тынь эно кадоводо. Мон сизинь. Мадян аламос. Прялксокс, эрявиндеряй, саинк вана те ташто шубанть, — сурсо невтсь Элюва тулос понгавтозь оршамонть лангс ды совиксэль тона пелев, арсезевсь ды мерсь: — Илинк стувто, энялдан мадстемс толонть, лампась гувкаиця, илязо лисе палома.
Валонзо ёвтазь, панжизе икельце кудос кенкшенть.
Часошкань ютазь Виряз стамбарнэ, теке сулей, шаштсь кенкшенть ваксс, саизе прястонзо ды путызе кияксос шапканзо, аравтызе прянзо лазтнэнь ёжос, кунсолозевсь. Мезеяк эзь маряво, кавто ёнкстнэнь юткова варяванть неявсь валдо. «Стувтызь, маряви...»
Састо-састо панжизе кенкшенть ды ютась кечказос понгавтозь ведрантень — «симеме». Ве сельмесэ неезденть токизе а паро ёжо: милициясь аравтызе эземненть кудонь кенкшенть каршо. Аштесь эйсэнзэ кунст мадезь. Прянзо алоль Элювань ташто шубинезэ. Маризе «симеме» совицянть, гылдорк варштась лангозонзо. «Пе, те пинеденть а оргодят. Пеензэ-сельмензэ верьгиздэ пштить. Паро, тей совамсто лавтовон лангсто шубам каякшныя, сеске педяволь эйзэнь...» — талнозевсь Виряз.
— Берянть тевтне. Чарькодсь шинелень кандтницясь. Ванстыця кискакс ашти. Эзь маняво кши печтьсэ. Мезе, мезе теемс?! — ёвтась, эзизе кецневте нинзэ, мекев икеле кудос совамодо мейле «симеме» якицясь.
— Вальмава а лисевтяно? — апак учо сась Элювань мельс. — Тейть, тейть мезеяк!
— Э-э, — арсезевсь, чаравтызе тей-тов прянзо Виряз атя, — теленсетне путнезь, эрявить узере ды мушкор. Узере... Ужо, ужо, косо сон монь? А-а... теске, аксяло.
«Паряк, алкукскак снартомс?» — арсезевсь Виряз коник алдо узерензэ таргамсто. Мольсь икельце вальмантень, мендинзе эскетнень ды кедьёнкстомо, сурсо аламонь-[329]аламонь тей-тов пурдтнезь, таргинзе сынст. «Паро, эзинек кенере эцнемс ды педявтнемс конёвсо». Узере неренть нерьгстызе кундонть ды пельцанть ютксо лазкскентень, лепштясь, ды пельцась шаштсь кудопотмо ёнов. Эзь учне атясь, истя шождасто лиси тевезэ.
Свалшкань ушо ёнкс вальмась кавтов панжтневиця. Шпингалеттнэ айгевсть верев-алов виень апак путо. Вальмась панжовсь. Совась экше кошт.
— Весе, Элюва, — кенярдозь тошкстась Виряз.
Шкадо икеле кецнесь атясь.
Вальманть мекев пекстамсто кенерепакарьсэнзэ токавсь узересь ды зэрнезь прась эземстэ.
Удало кудосо марявсь кашторкс, каятотсь удомань пачк мотордома, вайгель. Келес панжовсь кенкшесь.
— Что здесь происходит?! — рангстась седе сыре ванстыцясь. — А ну по местам!
Вановтозо кивчкаесь валгстозь вальмастонть атянть лангс.
Совась одоськак.
— Мезеяк а моли, — нуварасто, сизезь мерсь Виряз, шаштсь ды озась коник чирес.
— Мезеяк, мезеяк... — машнетезь эскельдясь ванстыцянь прявтось вальманть малас, зэртьсэ пекстынзе циндертнень; лездыцязо путызе тарказонзо валгстозь вальманть. — Илядо арсеяк, монь кияк эзь орголе!
Лиссть удало кудов.
Азортнэ кадовсть кавонест. Тевест каладсь.
— Мезес а кундат, парос а прат. Ков ваныть? Зяроксть теть мернинь: мезе саят, путык тарказонзо! Ней на вана, оргодинек... — кода свал, ушодсь музгордеме, атянть истякак каладозь ёжонзо човсеме Элюва. Озась ваксозонзо.
Виряз чатьмонсь. А мезть пелькстнемс, истякояк потсонзо идемевсть киштсть. Мезе лиссь — лиссь, мекев а витьсак.
Каштмолема.
Пупорькшнезь, валтнэнь башка-башка ёвтазь, колызе сонзэ Виряз:
— А содан мезе меремскак. Седеем човорятокшны неть арсематнеде. Арсемскак вием арась, — потмура ёжонь марязь ёвтызе мелензэ Элюва.
— Ули-арась виеть, кодамо илязо уле ёжот, прама тенек ве мельс. Эно кода?
— Видьстэ меремс, а мезть пря яжамс. Молиндерят, нолдындерятадызь, — адя. Теке марто... — кавтолдозевсь Элюва.
— Мезе «теке марто»? Прядык ушодозенть.
— Иля покордаво ансяк. Тонь иетнеде арсян — сизьгемень мерть. Ков мартост?.. — видькстась, панжизе мелензэ Элюва. Валонзо ёвтазь, нежедизе лавтовонзо мирдензэ лавтовс.
— Те истя. Тон одат, кеман, велявтоват чачома масторозот. Мон вана... Бути тов, Сибирев-ков, пачкодян... пачкодян куломо. Мекев уш Сайнелев, чачома велезэнь, а велявтан, Валдонянь ды Лиянань зярдояк а несынь. Кадовомс Эрьмезьвелес? Кинень тонтеметь?
— Истяяк арсян: ве прям седе шожда ули трямс, — калавтсь арсема кирензэ Элюва. — Теке марто — Инешкипаз, марямак, — зяро иеть вейсэ эрязь! Кадык ульнесть ютксонок аладямот, покш сёвномаскак а весть пачколинек. Мезть а эрсить эрямосонть! Ды ней весе тень, эрязенть, — шукшпряв?!
Виряз прянь нолдазь кунсолось нинзэ.
— Карминдеряйть кардамо? Кода улемс? — лия ёндо варштась сон те меленть лангс, аламнеде талакавтызе аванть кевкстемасонзо.
— Тевесь, атя, тонсь содат, аволь кардамосонть, — кирдсь эсь мелензэ Элюва. — Ну, мертяно, нолдатадызь мартон, «батрак». Мейле мезе? Сыргат тов куломо? Тонсеть валтнэ. Иля покордаво.
Виряз чиремсь. Прянзо путызе вакссонзо тодовонть лангс. Марявсь, стомавсь чинь-чоп котьмамонть ды майсевеманть эйстэ.
— Содазь, а макссызь... Ансяк монгак теть а лездыця. Несак, киян мон ней...
— Тон салмукст саить? — лиядо арсезевсь Виряз атя тодовстонть прянзо кепедемстэ, вановтозо прась киякс куншкасо ве таркас пурназь саемапельтнес.
— Саинь, — мельде-валдо, нузялдозь мерсь Элюва.
— Суреть?
— Тонсь а содат мезть кевкстнят, — эзь кирдеве, машнетезевсь авась. — Содат, мон аволь цябайтнеде.
— Сынь васняяк эрявить, — ледстизе Виряз.
— Тонтеметь а содан...
— Ярмакот таркасост?
— Таркасост, таркасост! Сядоцеде кевкстят.
— Монень зярояк а максат?
— Вантакая! Тон, атя, аволь велязевить? Монь ве панарсо ильтить та-ков идемевсень пуло алов, тон — ярмакт... Теске, чей, кадоват — а ёмат, — пизякадсь Элюва, мик атянзо ваксстояк стясь; ютась ды мадсь кунст апак аца, штавтозь тарказонзо.
Виряз атя эзь ёвта валгак. Одс чиремсь коникезэнзэ. Кепединзе карсезь пильгензэяк. Весе, ваньксчинть, урядонть ней уш кирдемс а мезекс. Мик Элюваненьгак ялатеке. Икеле тень кис истя понговоль!.. Карциганокс яла каявиль мезентькак а тарказонзо путомсто.
«Пароль часошка удомс», — сась превезэнзэ. Истя эзь лисе. Удомазо эзь са, прок тандадсь ды козонь-бути кекшсь. Элювань ярмактнеде покордамонь валонзо, сы шкадонть арсематне карасть Вирязонь удемензэ.
«А эрявить ярмакот! Кудонь рамамодо ледстнемскак а мезть. Ды мезекс сон? Карть пильгезэнь кодан, шубамгак ули, саты куломазон. Понксон-панаронгак зярскак сатыть.
[332] Ярмакось — кежень парго. Эрьвась соды. Ансяк сынтемест кандомс эрямонь канстонть а шождыне. Целковойгак эзь максо, а! Ва теть малавикс, ва теть ни. А стяко келем а велявтови те лемсэнть пшкалемс тензэ. Пазось неи ды видестэ теи — явовты эйсэнек. Умок уш эряволь. Яла виень эзть сатно сеземс тертенть. Зяроксть снартния — эзь лисе. Кодаяк, кодаяк... Маряви, сонсь Верепазось кундась лездамо. А стяко кортави: берянесь вадрявтомо а яки. Мезть ансяк эзть лисне ютксонок. Ламот истя кортыть: келя, беряньстэ теить — пансить сюпавтнень, сюдыть пансицятнень, верьс пачколить. Кода меремс... Кува-кува истя эрявияк. Неть самай «кулактне», кода лемдизь сюпавтнень, аволь весе ангелт, аволь ревелевкскетькак. Кой-кить истя таштызь кудост-чист — визькс ёвтамс: салазь-колазь, манчезь... Вана Элюваяк... Мезеяк а мерят — лишме. Уски чинь-вень апак сода. Виде, виде. Ансяк вана модань онкстницявтомонть, Паксютычтеме... истямо икелькс тензэ аволь саеве. Монь марто вант мезе теи. Те ков маштови? Юртай, Олдай карязт эрьва ие яжасть тензэ... Мезе тенст пандсь? Секскак кой-конатне кадык а лажныть. Элюва... кода илязо уле, ютазь мартонзо оно зяро, ды ней — кавто ёнов. А кемевияк. Эрьванть эйсэ идемевсь. Эрьванть. Секскак лопавтнемс сонзэ а мезть. Ков ней ногодон каямс, кона ёнов? Вана мезде тень арсема...»
Виряз стясь. Ютась кисэст «мелявтыцяст» ёнов.
Мезеяк эзь полавтово. Икелекс палсь стенас понгавтозь лампась. Прок празь палмань, мадезь аштесь кенкш тарчксонть кувалт аравтозь эземсэнть ванстыцятнеде седе сыресь. Удось мариця удомасо. Виряз ваксканзо ютамсто токизе лавтовс.
— Чо ты? — тарск тейсь ды кургонь автезь кевкстизе сыргозтицянзо ванстыцянь покшось, эчке турва цёрась. Сон озась ды кармась ёзамо — удоманть седе курок панемга — сельмензэ.
— Ды мон мезеяк... Чияк кортыть эрзякс, ней — рузкс.
— Да, русский я.
— А-а... Слушай, русский брат, давай договоримся. [333] Чего нас тут караулить, всю ночь маешься? Помоги нам выйти. А? В долгу не останемся, — салава, кияк илязо маря, пшкадсь Виряз.
— Чо-о?! — тетькинзе сельмензэ ды абунгадозь варштась ванстыцясь икелензэ аштиця а покш, теине лавтов, шержей пря атянть лангс. «Тон мезе, чаулакс монь ловат?» — сёрмадозель милициянть сельмесэ.
Виряз мельде-валдо ахолдась кедьсэнзэ ды эсь пачканзо мезде-бути мотордозь ютась мекев икеле кудов.
— Мезть тосо? — кевкстсь Элюва.
— Аштить. Ванстыть. Алтнинь тенст венстемс.
— Мейле мезе?
— Мезеяк арась. Иля пшкалеяк.
— Аволь эряво келеть венстнемс. Мерить, ярмакост ламо, — седеень марязь мерсь Элюва. Авантень марявсь кудосонть экше, велькс песэнть кумажадо верьга вельтинзе карсезь пильгензэ.
— Арсинь, марясамам, понги кечказонтень. Стяко, — ве мельс прась атясь нинзэ марто. Вайгельсэнзэ марявсь янксема.
Виряз ютась стуворонть велькссэ потолокс понгавтозь лампанть алов, венстизе кедензэ, кепедизе пузыренть ды омбоце кедьсэнзэ мадстизе штатолкс типельдиця толнэнть. Сеске кармасть редявомо од чинть васень эскельксэнзэ — вальматнева варштась якстерть-сэнь ашолгадомась.
Каятотсь, маризе толонь мадстицясь, кельмевтезь киванть крандазонь ардомань дорнома. Сон яла виевгадсь.
Юм-бо-олк мерсь Элювань седеезэ марязденть.
«Гуесь сыргозсь», — тешкстызе эсь пачканзо Виряз. Эзь маняво. Калдордомась лоткась кудост каршо.
Каятотсть цёрань вайгельть ды кельме киякстнэва дубор-дубор совицянь эскелькст. Тоцк панжовсь удало кудос совамо кенкшесь. Састь чокшненсетне.
— Косот?! — рангстась ванстыця милициятненень Вачаень Кирин, велень «инязорось».
Милициясь эзь мере валгак, ахолдась кедьсэнзэ икеле кудос кенкшенть пелев.
Элюва пурназь-сэрнязь аштесь озадо стувор песэ. Пильгесэнзэ понань кемть. Тонговтынзе полазо. Келя, ламо якамо а кармат, зярс ускомонк кармить, пильгеть улест лембесэ, иля вано — лов арась. Кияк авантень эзь максне уликс иедензэ ламо. Чачозо свал неявсь седе одокс. Неть меельце читнень-тарготнень перть коняванзо, сельмензэ чирева сормсевкстнэ теевсть седе домкакс, редявиксэкс, вановтсонзо менель сэнштесь олась, уло алксозо новольсь. Кода а полавттадызь истят майсематне?..
— Адя, Элюва патяй, сынек мельгат! — апак шумбракстне, шапкань апак кая, сеериця човине вайгельсэ мерсь совицясь.
Элюва сырк эзь тее. Польдерьсэ тусть сельведензэ.
— Ськамон? Атявтомон?
— Ськамот. Кевкстнинь покштнень, мерсть — ансяк ськамот, — валонзо кемекстамга цёрась нулновтызе прянзо ды келемтинзе мештензэ икельга кедензэ. — Апак сёрмадстозтядо, тувталось теке.
— Ськамон, — стямсто нусманясто, ормадо майсевиця ломанень лавшо вайгельсэ ёвтызе валонть авась ды стамбарнэ ютась кенкшенть ваксс. Тесэть оршамопелензэ. Апак капша, олянзо каршо сюлмась лембе паця, руцянзо ланга оршась кувака, карксамга сормсевезь, чопода-якстерестэ артозь ревень кедень шуба. Кувака киланго. Мезть а эрсить. Секс оршась телекс.
Стясь «мазый» ужосо понгавтозь пазаватнень каршо. Чекась. «Инешкипаз-Верепаз, энялдан, илямак кадо, илямак стувто, лездак паронь паросо, шумбрачинь шумбрачисэ. Чангодть изнямс стакачитнень, ваньксстэ, виень вийсэ лисемс кажостонть». Варштась стенасо таркантень, косоль тетянзо фотынезэ. «Нолдык, тетяй, чумом, мейсэ теть берянь теинь, берянь вал ёвтынь. Несак, кодамо кажо лиссь тейтереть марто. Ох, тетякай-тирякай, нолдык чумочим а истя прянь ветямонть, тесэ-тосо а истя кортамонть кисэ. Нолдыть пежетень, нолдыть, нолдыть», — турвасонзо [335] чевелязь, эстензэ марямга меельцеде кортась сехте малавиксэнзэ марто. Велявтови-арась зярдояк чачома кудонь латонзо алов? Теде эзь сода ды эзь арсеяк. Теде эзь сода кияк. Пазось эзь максо содамс валскеденть. Авантень ульнесь ялатеке, мезе мольсь перьканзо. Прядынзе энялдомань валонзо ды апак капша лиссь чачома кудостонзо.
Икеле мольсь сэрьс вишка Элюва, мельганзо — пандошка вете цёрат-ванстыцят, меельцекс — курмонзо-кармонзо марто Виряз полазо. «Мезес пачкодить, — ютась превганзо пельсчопода кудыкельганть молемстэ, — пелить кавто аршинэнь сэрьсэ уш аволь од аваломанде, пелить — оргоди. Лисни, покш вий те авинесэнть! Зярдо, кодамо пингестэ те масторсонть, сави меремс, эзть сэве виевтнень ды превейтнень?» Истямо ёжо токизе Элюваньгак. Сон маризе эсь прянзо лавшо понкс неть цёратнень коряс седе виевекс, а пелицякс, азоравакс, кодамокс ульнесь свал. Вете цёрат эйстэнзэ пельсть!
Менелесь ванькс, пижела-сэнь. Эзганзо, мезде-бути ризнэзь, састо-састо айги чимадема ёнов ковось, олякстомты тарканть менелень покшонтень, лембень-валдонь явшицянтень. Парочинь сравтницясь учомо эзь карма: зярс пурнасть-сэрнясть, лембе ожосо артызе мода вельксэнть. Якшамонь коряс ушосонть теле, ковонь коряс, ловонь аразьсэнзэ — сёксь. Эзь маняво Элюва — оршнесь лембестэ.
Виряз каизе лавтовонзо лангсто крандазонтень покш тапарксонть, капшазь совась мекев кудос, ливтизе омбоце канстонть, путызе васенценть ваксс. Колмоцеде совамсто саинзе эсензэ ули-паронзо, кескавс эцезь панаронзо-понксонзо, пенчензэ-ваканонзо. Мезе, теде башка, шикадят? Телень оршамопелензэ лангсонзот, понань кемензэ путынзе, карень зярыя керьметькак путсь. Лаксемань-инзэдемань кедьёнкскетненьгак эзинзе стувто саемс. Маштовить, кода цёраломаннень сынтемест?
Нежедизе таштазь «сюпавчинзэ» марто кескавонть кузтемпес.
Якшамонть ды валскень шканть лангс апак вано, Пиргужонь вальмалов пурнавсть Шорянь Олдай, Ураень [336] Юртай, Кузаень Вияна, Керязонь Валдоня. Ютксост Куляз атяяк. Косто марясть? Кие ёвтась? «Активисттнэ» тейсть тевест кекшнезь. Ялатеке салмуксось эзь кекшеве... Веле. Пилензэ келейть. Эрьва кашторксонть кундасызь. Аватне, Элюва лангс ванозь, носксть судосост, цёратнень сельмесэ неявсь мелявкс, састь прок кулозень ливтема таркас. Сынст эйстэяк кой-кить шкань-шкань кепсесть кедест сельмезэст — нардтнесть сельведть.
Элюва вансь пурнавозтнень лангс ды маризе, кода седеензэ седеяк пек лепштизе-сювордызе ризксэсь. Сон аштесь крандазонть вакссо. Варьгасо кедьсэнзэ секе тев нардтнесь сельведев чаманзо. Седеесь аволь кшнинь. Лангозонзо ванозь эзь кирдеве атязояк, сювордызе седеензэ кодамо-бути потмо вий, лексеманзо кундызе кирьгапарьс кеверезь ал. «Эх, Элюва, Элюва, чивалдынем, ламбамо нартемкскем...» Шаштсь малазонзо, варьгавтомо кедензэ путызе вить лавтовонзо лангс ды важовнестэ лепштизе сыречинь вечкеманзо эсензэ ёжос. Витизе лембе пацянзо, шуба сивензэ. Яла тензэ эзь кемеве: истя малацек аштить меельцеде.
— Оймак, оймак... — салава тошкась нинстэнь.
Элюва тень таркас нолдызе прянзо атянзо мештес, лекшкадсь ды сорнозевсь ильсемадонть, вайгельтеме лайшемадонть. «Мезень кис, мезень кис? — певерсть кургостонзо пеняцямонь салов валтнэ. — Мезень чумом, мезень чумом?..»
— Тон тень сёрмине кучт, ков усктадызь, — нусманя арсематнень кардамга мерсь Виряз, кодамо илязо уле — мирдезэ.
— Сёрмине кучт... Кинень? Косо кармат эрямо, нить кедьсэ? Эли косо лиясо? Сёрмадыцяськак мон... Стувтык, а маштан?
— Пшкадть киненьгак, сёрмас содыцянень. Колмо-ниле валт уш тешкстыть. Монсь? А содан, монськак а содан, кона ёнов сырган. Оно мезе тейть: кучт кодаяк кулине шабратненень. Сан — сайса. Кортынек? Куляз атянень. Истя? Адрескеть пачкодезэ.
[337] Элюва саизе прянзо Виряз атянь мештестэ, варштась сельмезэнзэ ды мерсь:
— Сёрмадт неть читнестэ, седе курок, сёрмадт цёрань туртов. Адресэнзэ содасак. Содамо карми. Теик те тевенть. Теик, энялдан.
— Тень кис иля мелявто. Сёрмадан, — оймавтызе Виряз атя.
— Кеман. Манчемат мельгат арасельть. Тень кувалма майсемат эзинь сода.
«Кулаконь» пансицятне, лишменть вакссо аламос аштезь, совасть ды зярыя шкас «ёмасть» кудонтень. Окойники, мезде-бути эсь ютковаст кортазь, лиссть. Вейкесь эйстэст педявтсь кузтемпень ды кардазонь келей кенкштнес конёвнеть. Мезекс, мезе эйсэст сёрмадозель, Элюва марто Вирязнэнь ялатекель.
— Ну весе, сыргатано, кузть крандазс, — каятотсь Вачаень Киринэнь, пансицянь покшонть, кармавтыця казямо вайгелезэ.
Виряз атя меельцеде кутмордызе Элювань, палызе турвас, сельведтнеде салов сельмес, чамаумарьс ды эрязасто, рестедезь ладсо явизе эсензэ эйстэ. Петькеленть пес чалгазь, увол-авол кузсь «кулачкась» крандазонтень ды озась канстонзо ваксс. Мартонзо озасть кавто ильтицят-милицият.
— Ванстт эсь прят, Элюва, пря пек иля чаво, мезентень улемс — улема. Кемть парос! Паз, чангодть Элюванень! — ильтемань валт ёвтась Виряз аволь свал сэпей вечкеманзо туртов.
Лишмесь сыргась.
Элюва велявтызе сельведтнеде якстере чаманзо, варштась меельцеде чачома кудонзо, мирдензэ, ильтиця шабранзо, малавиксэнзэ лангс ды зярыяксть ахолдась кедьсэнзэ.
Виряз, прок кадозь паксяс стявтозь палмань, аштесь таркасонзо, сырк эзь тее, ансяк текекс ахолдась нинзэ каршо кедьсэнзэ ды вансь, вансь сельмензэ икельде аламонь-аламонь туиця-ёмиця крандазонть, эйсэнзэ чопода-якстере [338] тюс шубасо ломаненть мельга. Тусь эйстэнзэ лиясто кенярдозь, шкань-шкань ризнэзь, кавтолдозь, сёвнозь эрязь эрямозо. Крандазось, покш мелень путозь, паряк, кодаяк велявтовольгак, эрямонть велявтомс — иля снартнеяк.
«Яла арсинь, стака шкатнестэ яла бажинь туемс, перьгедемс те кудостонть. Ансяк вана... кинь мезе учи, кияк а соды. Паряк, туемань таркас теске печтявлияяк пингем. Теске. Тевсэ палыця, свал музгордиця те нимилявнесь сельменьгак пекставлинзе. Ансяк эрямонть эсензэ чудильманзо, эсензэ кинзэ-янонзо...» — вансь Виряз ды лиесть прясонзо, вейкень-вейкень полавтнезь, нусманя мельтне.
Крандазось теевсь крандазкекс, велявтсь веленть трокс ютыця кинтень ды кекшсь сельмензэ икельде олгосо вельтязь латотнень экшс.
«Весе. Прядовсь. Ловт, кавксо иетненень аволь Элюва, аволь монсь — путсть пе ломанть...» — яла эзь сыргаво атясь, прок пильгензэ педясть кельме модантень, яла вансь тона пелев, козонь ёмась чопода-якстере тюсось, ков саизь нинзэ марто эрязь иензэ.
Сурсо нардынзе сельведензэ, кепедизе кузтемпес нежедезь кескавонзо, каизе кавто ведьме вельде лавтовонзо трокс ды сыргась Пичепень кудотнень икельга таргавозь яннэванть.
Ков?
Ков, чачома веледеть башка?
Тов, косо калмазь тетят-ават, косо удыть покштят-иняват. Тов, косо васенцеде варчик коштонть танстензэ, кува чийнесь эйкакшпингеть ды элякалесь од шкат, косо трить-кастыть эйкакшот. Косо...