Тесэ ды тосо (2013)/Ламбамо нартемкс/8
| ←7-це глава | Ламбамо нартемкс (2013) by , edited by Ломшина Л. А. 8-це глава |
9-це глава→ |
| Нуянь Видяз. Тесэ ды тосо: сёрмасо роман, келей ёвтнема ды ёвтнемат. — Саранск, Красный Октябрь, 2013. — с. 295—319 |
[295]
— 8 —
Чипаесь, прок мезде-бути визделгадозь, апак капша кекшсь ванькс, якстерестэ артозь менельчиренть томбалев. Чись ютась, кода ютасть сядот, ламо тёжат лиятне, ютась тевсэ: кудоютконь, кардазонь, тингень, пирень... Ракшатне андомат-симдемат, пенгеть анокстама, вирев молема, [296] ваньксчи кирдема... Уштома, пидема, панема, штердема, кодама, викшнема... Пе арась тевтненень. Мартост кедте кедьс кундазь талномат, кецнемат, сюмордомат, янксемат, пеедькшнемат, мелявтомат... Арась пе сыненсткак. Ды весе тень лемезэ — эрямо. Сынтемест сон аволь уле.
Тевсэ эскелясь эрямонь лувось Юхмань, Кажань, Аржаень, Ураень, Пачаень, Кирдянонь. Чичавонь ды Эрьмезьвелень лия эрицятнень юртсо. Текекс мольсь сон Пиргужонь Элювань кудосояк. Эрьва ломанесь, кудось, буесь «сявордсь» сынст, тевтнень, эсензэ лувсо, эсензэкс. Эрьванть эсензэ обуцязо, дошузчизэ. Лиятнень коряс аламнеде лиякс мольсть тевтне Пичепесэ якстере кирьпецень, лазсо вельтязь кудосонтькак.
— Ну, Элюва-пиципалакскем, ловт, весе. Китне икеленек панжадот, — мерсь, теке чапизе, Виряз чокшнень ярсамодо мейле пенчень-ваканонь ёрвалдомсто, — ванды станцияв. Билетт рамамат.
— Вай, иля ледстнеяк теде! Яла тень а кемеви — кадса чачома ёнксом. Марян теде валт — жу-уйть мери седеем.
Аванть лангсо эрьва чинь паля, пильгесэнзэ понань кемть, лавтовонзо трокс нардамо паця. Ашти сон стядо поланзо вакссо ды апак капша нардтни шлязь ды лембе ведьсэ ёрвалдозь кедьгетнень.
— Ледстнек-иля, тенень, Элюва, улема. Чачома пизэстэть, мерть, мезеяк эзь кадово. Кудось ансяк. Сеяк уш аволь тонь, — ёвтызе Виряз аволь ламбамотнеде видечинть.
— Каня мон... минь истят уш сюпавтано? Ведькевенек арась, оень чавовтоманокак арась, — эзь пизякадо, кода сеедьстэ эрсесь, Элюва, вастынзе атянть валонзо апак тално. Яла мезе-бути лангс кемсь, бажась кодаяк ды идемс прянзо.
— Кевень кудо... Арсить теде? — кевкстизе Виряз вакссонзо лембе веднесэ болдордыцянть.
— А кемевияк. Те кода истя, саемс? Мон жо эйзэнзэ весе виень путынь. Чить-веть эзинь уцсе. Ливезь зяро валынь... Ды саемс?! Те кода истя? А кемеви, а кемеви, — пеняцясь, сонськак эзь сода кие лангс, Элюва. Зяроцеде уш марясынзе неть валтнэнь Виряз.
— Паро, паро, варштак, — прась мартонзо ве мельс азоравась лавтовстонзо нардамонть понгавтомсто. Пурнынзе кадовикс кедьгетнень шаваняс ды совавтынзе-путынзе каштомикельксэнь лавсяс.
Виряз юксинзе пильгензэ, кузсь каштлангс ды понгавтнинзе цюлканзо-пракстанзо трубанть ёжова чавозь жолганть ланга — коськест валскес. Носкозь валгсь ды кепе ютась икеле кудов. Мельганзо совась Элюва ялгакскезэяк.
Чись прядовсь.
Чись мадсь.
Од валскенть ушодызе ламо иень перть тонадовозь тевесь — чоподава скалонь потявтомо стямось. Сон сезизеяк аванть тантей удоманзо. Стиксэль... Арась, эрязкалемс а ков, кардазось, а кемевияк, ловт, чаво. Ниле-вете ревинеть ды саразт. Авольть улеяк Варма ды Тештине, авольть паркстнеяк сынь, кудотне-читне улевельть урозокс. Превскак эзь сакшно: ютыть ковт, ды нардевстэ, мелень путозь пурназь, урядсо кирдевиця те юрттонть ледстнемакс а кадови саразонь кекердемаяк.
Виряз атянь Инешкипазось эзизе покорда удомасо. Путсы прянзо прялксонтень — корны уш. Валдо, чопода, рангить-арась перьканзо, сонензэ ялатеке. Яла истя мери: «Сисем частнэ улест монь». Ансяк сонгак эрямонзо перть аволь аламо веть ютавтсь апак удо. Сонгак аволь кшнинь. Паксютычень сакшномадо мейле весь а стувтови зярдояк. Мерьказь удома таркась, пуворязь вельксэсь аштесть сестэ сельмензэ икеле вень перть. Эрьва кода сестэ снартнизе вырновтомс превстэнзэ неезенть, мезеяк эзь лисе. Майсевсь ашолгадомс. Истят тевть, истят веть вейсэ эрямост перть лиснесть а весть.
Течи стясь, кода свал. атякштнень валскень васень морост марто. «Сон теть а вадря куля рангстась, тон яла [298] корнат, карвопанго!» — тошказь мерсь эстензэ лангстонзо вельксэнть ахолдамсто. Элювань пувтамо эзь карма. Кадык удоманзо явавтсы. Салавине ютась удалце кудос, ёрвалдызе сакалов чаманзо, амарямга карсесь-оршнесь ды валгсь кардазс: валскень тевензэ, кадык аламолгадстькак, тееме. Сынст прядозь, кудос апак совсе, сыргась чокшне ёвтазь валонзо топавтомо — Ёколдань Дырнайнень варштамо.
...Келейстэ панжовсь кудо кенкшесь, ды кенкш тарчксонть трокс эрязасто эскельдясь Ураень Юртай. Пиргужнень сонзэ течи кияк эзизе терде, кияк эйсэнзэ эзь учо. Седеяк пек — ашолгадозь.
Элювань икеле аштесь аволь сэрей, аволь алкине, ниленьгемень иеде сыре, туторо рунго цёраломань. Лангсонзо кандтнезь-пандтнезь фуфайка. Прясонзо шапканть кепедезь пилензэ апак сюлма, тарныть, прок пинень. Сыцянть чемень тюс, теине, теке сеянь, сакалонзо умок апак нара. Ченькстэ симемадонть сельмекерензэ таргозезь, сэнь сельмензэ эль неявить. «Мазыйть улевельть...» — кивчкадсь «инженть» вастыцянзо превсэ.
«Вай, Юртай-какай, мезес пачкодить!» — мериксэль Элюва. Эзь мере. Мезень лезэсь? Зяроксть мернезь? Тевде а пели, превей. Кодамо тевень ветий цёра улевель, аволизеяк максо прянзо идемевсень пельде казезь кренчведентень. Ськамонзо велесэнть истямось. Мекс сон чопавтсь те отьмантень?
— Элюва патяй, идемак, кулан, кандт куш зярояк петнявкскеть. Прям, секень вант, лазови. Исяк ланга саевсь, — нильтянясто мизолдозь, энялдсь, менчевсь азораванть икеле совицясь, аноколь «петнявксонть» кис прамс кумажа лангс.
Элюва, сеедьстэ кев калгодо обуця, эзь кирдеве, совась каштомикелев ды куроксто лиссь тосто пешксе цяркине ды кши печтьке марто.
Юртай гылкадизе кандозенть, ожа песэ нардынзе сакало потсо турванзо ды весть-кавксть никстямодо мейле сусксь кши печтьстэнть. Витизе прянзо.
— Теня, Элюва патяй, сюконян. Вельмевтимик. Ней эрян. Мон, теня, аволь ансяк тень кувалма сынь. Кизэсь прядовсь. Зярояк ярмаккеть эрявольть...
[299] Элюва цяк эзь аймельгадо марязденть. Сельмензэ полгарьгадсть, сельмечирькензэ сёлминекс «кирнявтсть» верев.
— Те истя мезень кис?
— Ды, теня, кода мезень кис? Т...тундо, кизэ кедьсэнк важодинь.
— Тень кис, Юртай, — полавтовозь, седе чевте, валаня вайгельсэ мерсь Элюва, — андынь-симдинь эйсэть тундонь-кизэнь перть. Секскак...
— Те эдь, Э-элюва па...патяй, пек аламо, — прянзо нолдазь, теке тейсь кодамояк чумочи, яла пеняцясь Юртай.
— Тон арсят, ярсамопельтне мезеяк а аштить? Маняват. О-о-о... Питнейть сынь, — ускозь ускинзе меельце кавто валтнэнь азоравась.
— Мон, мон истя а арсян, а-ансяк, теня, куш, куш фу-файкине тень э-эряви ставтомс. Курок те...теле... — эзь пота, эсензэ содась валскень совицясь.
— Содат мезе, Юртай? — мизолкс марто пшкадсь Элюва. — Монь ули фуфайкам. Ташто, виде, кандтнемс ялатеке маштови. Теленть ютавтсак. Невтьса?
— Арась, а эряви. Мон, теня, кортынь Каштазонь Дрига марто. Сты тень. Од. Ансяк эряви тензэ пандомс.
— Арасть, Юртай, ярмакон, — мерсь Элюва марямга, эсь пачканзо арсезевсь: «Ялатеке симсынзе...».
— Ко... кода арасть? Скалот миить, маринь, сюрояк мииде, — эсензэ содась, вешсь ярмакт кирьгапарьс кайсемань вечкицясь.
«Вай, авакай, косто соды? Теинек тевтнень салава, ялатеке содыть. Те кода истя? — абунгадсь азоравась. — Педясь эйзэнь педягайтикшекс, а лутави».
— Эряви атянть марто кортамс, — мерсь Элюва, мезе васенцекс сась превзэнзэ. Эзь сода, кода ильтемс безарькс инженть. — Сак ванды, мезеяк тейтяно!
— Монень течи эрявить, Элюва патяй, — эзь арсеяк потамодо Юртай, нардевстэ аштесь эсь мелензэ кис. — Во кода эрявить!
— Ванды, ванды сак! — казякадсь ды пштилгадсь — эзь [300] кирдеве — Элювань вайгелезэ, истя бажась путомс вешицянть тарказонзо. — Седе виде — таргошкань ютазь. Меринь, саик ташто оршамопеленть, тон марикскак эзить тее.
— Ва...ванды сан.
— Сак, тагояк мерян, таргонь ютазь, — Элюва велявтсь удалъёндо ды ёлк совась моргав.
Юртай прянь нолдазь тохмадизе кенкшенть пилысэнзэ ды сэпей ёжонь кирдезь лиссь кудостонть. «Паро куш прянть витизе, зярскак эрян», — неть мельтнеде ёжозо седе вадрялгадсь, ды сон валгсь кузтемпестэнть прянь кепедезь.
Ансяк Элюва рожодомсь каштомикеле котьмамо, марявсь совиця. «Те таго кинь канды эвсесь? Атясь? Арась. Эно кие таго?»
Чико-орк мерсь кенкшесь, кува ансяк лиссь Юртай, ды каятотсь баягинекс гайгиця авань вайгель:
— Шумбратадо! Кудосонть кияк ули? А?
— Ули, ули. Ютак, — кедензэ нулынесэ нардтнезь, лиссь каштомикельде Элюва. — Ютак, Олдуш. Та-алай кедьсэнек араселить.
— Эзимик тердтне. Секс талай. Зяро? Кеменьшка чить ули, маряви, — валонзо ёвтазь, сыцясь эскельдясь икелев ды озась эземпес.
«Теке эчкелгадсь, чей аволь пешксесэ? — редизе Элюва, Олдаень чамас варштазь. — Монськак а содан, мезть ремедян. Кодат пекиямкат сонзэ иетнесэ?! Куялгадсь аламнеде — те виде. Лия ёндо эзь полавтово. Кодамо ульнесь — а сэрей а келей, — истямокс кадовсь».
— Мезть якат-пакат, Олдай ялгинем? — кевкстизе Элюва. Келемтизе нулыненть, сорновтызе лахань велькссэ ды понгавтызе голландканть ёжова таргазь карьксэнтень.
— Ды кода меремс... — кавтолдозевсь якицясь.
— Мерть, кода мерят.
— Сыргинь лавкав. Видезэнк пачкодинь, арсезевинь: варштамс эряви, зяро уш араселинь. Кода, мерян, эрсить Пиргужтне?
— Сюк-сюк валот кис. Пишттяно, кода неят. Ней мезе...
[301] Паксянь тевтне ваявтовсть, кастозесь путнезь-кайсезь таркава-эземга. Мелявкстнэ ней чарыть кав-кудо перька. Ве таркасо пивттяно, — голландкас аламнеде нежедезь, ёвтнесь неень шкань мелявкстонзо азоравась. Содазь, сёпизе, вал эзь ёвта вейкеде: кардазост Пиргужтнень, мерть, чаво. — Кода тонсь эрят?
— Кода свал, Элюва патяй, ськамон яла, ськамочи, — нусманясто пейдезь пеняцясь эрямонзо лангс Олдай. Варштась Элювань сельмес ды поладынзе валонзо: — Монень, Элюва патяй, видькстан, зярояк ярмаккеть эрявольть. Лавкас, келя, паро материя усксть.
«Вай, авакай! — эль эзь пра Элювань кургосто, «ярмаккеть» валонть марязь. — Верепаз, те мезе истя? Вейкесь сась — эрь ярмаккеть, омбоцесь...»
— Паро материя, мерят, усксть? Пароль моненьгак варштамс. Кой-мезе моненьгак стама. Ансяк вана ярмактне эзть нарваво. Зярс арасть.
— Ну мезе, арасть — арасть. Истяяк эрси. Мон лавкав сыргакшнынь, — мельтеме мерсь Олдай таркастонзо стямсто, — ялатеке молян.
— Тон иля майсеве, зыянось аволь покш. Совак таргошкань ютазь, паряк, мезеяк тейтяно. Ужока, тонь арась мелеть варштамс монь оршамопелень парьс? Одирьвакс оршатан. Кеман, кочкатано мезеяк тонь лангс. Кадык аламнеде мондень эчкат-сэреят, мезеяк ды кочкатано. Одирьвакс оршатан. Адя, — кортавтсь Элюва эсензэ коряс од, сэрей меште аванть, кортась — цёковокс цёкордсь.
— Арась. Сан кодаяк, варштан. Монень, Элюва патяй, ярмакт эрявить. Материясь уш кадык, кодаяк. Лия зыян лиссь: телензэ лангс каштом трубам каладсь. Ковгак а молят, вачкавтома. Качамо сови, — пеняцясь ве авась омбоцентень.
— Кинь арсят сиведемс?
— Черькаень Кечаень.
— Шныть эйсэнзэ.
— Содан.
— Вана мезе, кевкстик, зяро кирьпецть эрявить. Монь [302] зяро-бути улить. Паряк, сатыть. Мерян атянтень, усксынзе, — мерсь ды ледсь мелезэнзэ: «Зярдо?». — Кечайнень, содазь, зярояк пандома, — меельце валтнэнь Элюва ёвтынзе тошказь, эль марямга.
— Ярмаком монь трёшникак арась, бути стякодо... Сован седе мейле Черькайнень, кевкстьса, — ёвтызе мелензэ Олдай кенкш пелев ютамсто.
— Паро, паро, совак вете-кото чинь ютазь, вансынек, — ильтизе юртонь прявтось апак терде инженть ды кундась кадозь тевензэ тееме.
Ансяк ильтизе Мазыень — истя ламот велесэнть «сёвныть» Олдаень, — шлыгорк одс панжовсь кенкшесь.
«Истя весе лембенек ёмси», — ютась Элювань прява.
Совась, велявтсь Ёколдань пельде атязо.
— Кодат кулят кандыть, кода эрить-аштить Ёколдат?
— Эрить, кода минь, — учить. Мезе учить — сынськак а содыть. Сыре Дырнай салава тень видькстась — кой-мезть кекшнесь. Мезть неть «кой-мезтне», содавить: чакшт-вакант ды сянгот-ангорят. Ведькевденть кортамскак а мезть. Ков кекшсак? Кие рамасы? Миемскак а макссызь. Келя, чинек-венек ванстыть эйсэнзэ...
— Кинь?
— Кинь, кинь! Аволь уш Дырнаень.
— Ведькевенть?
— Я! Тон пес велякадыть. Лован эйсэть превеекс, тон тонсь а содат мезть кевкстнят, — кепедевсь Вирязонь вайгелезэ. — Содазь, ведькевенть!
— Вантака, ведькевентькак кармить саемензэ! Дырнай пинге карязт яжась сонзэ путомга, ней на, максык кинень-бути. Те кода истя? Стявтськак эйсэнзэ аволь ськамонзо. Вай, Чипаз-Верепаз, мекс зняро авидечи эрямосонть?! Мекс неят ды мезеяк а теят? — пеняцясь, машнететсь, энялдсь менелень вийтненень лездамодо Элюва. — Лишмест ковгак пштидизь?
— Арась, — мезде-бути арсезевезь мерсь Виряз.
— Скалост? — поводевсь кевкстеманть мельга кевкстема.
— Те мезе, удыть? — ютась Элювань пачк кежень сувне.
— Арась. Дырнаень бринданзо новольсть. «Ялатекень орма» стардызе. Мезе, келя, ули, се ули.
— Цёранзо кодат ёжост? — мель путсь содамс седе ламо Элюва.
— Тетяст кондят. Сон жо сынст алкуксонь ушмодей: кода мери, истя ули. Монень, марявсь, Дырнай натой копордазель.
— Мезе моли, мезе моли! — чирькавтызе прянзо Элюва.
— Аволь моли, чии, — кепединзе Виряз чопода сёлмине кондят сельмечирькензэ ды нерьгстазь нерьгстызе валонть кунсолыцянзо пряудемс. — Мон эно станцияв ардтнян. Варштан, тосо кодат тевтне.
— Ужо, ужо... Каня монь пельде саик — кенеремс эрьва ков! Сускт аламнеде. Курок чикуншка. Ужо каян, — эвтезевсь азоравась.
...Часошкань ютазь лембестэ оршнезь Пиргужонь содамост ульнесь лазнэсэ чавнозь-стазь, чопода-якстерестэ артозь вокзалонть вакссо сэрей топольтнень ало. Козкстнезь стясь таркастонзо, панст ведьмеде сюлмизе лишмензэ човолонтень, нолдызе трокс пикскенть ды каясь ракшанть икелев тикше. «Я, таго аволь истя эскельдинь! Эряволь ялго самс, лишменть тесэ илизь габорда, — мекс-бути совась а паро мелявкс седеезэнзэ. — Мон эно а кувать, вальмаськак каршо».
Аволь покшке учома залнэсь бизнэсь вайгельтнеде. Ламонень озамо таркаткак эзть сато. Шалттонть ды таргамонь сэнь качамодонть, марявсь, залнэсь эль сезеви эли кепети пельтнень малас. Кортасть эрзякс ды рузкс. Рузтнэ мекс-бути сеедьстэ ледстнесть «богост» ды «матест», педявтнесть эйзэст лия «мазый» валткак. «Мекс, мезень кис истя вечксызь неть валтнэнь рузтнэ?» — арсезевсь Виряз.
Стясь атясь кассас меельцекс аштицянть мельга. Учось, майсевсь, псилгалесь, лишмедензэ ялатеке эзь стувтне. Зярдо кадовкшность икелензэ учицятнеде вете-кото, редизе: [304] крандазонзо перька, тей-тов салавине ванкшнозь, велить та-кодат алюхат. Прянь-полдань синдезь ношкстась ушов. Кенерсь. Вейкесь эйстэст уш кундакшнось панст ведьментень. Неизе азоронть.
— Ох, а это не наша коняга! Ошиблись, простите, простите... — лабордозь, нолажа ёзнэкс тусь лия ёнов.
— Кеденк какарьгадост, аломанень понат! — превс путынзе «ошибайцятнень» ды сеске арсезевсь: «Мезе теемс? Кадомс — ицкавтсызь. Туемс чавонь кедть? Аволь монь койсэ. Ужо, ужо, шержей!».
Седе парсте ды нардевстэ сюлмизе панст ведьменть човолонтень, юксизе аеленть ды эйсэнзэ вейке икельце чаронть сюлмизе крандазонь алга жолгантень. Теде мейле луньк-луньк чиезь совась вокзалс.
— Алашам чуть не украли, — стакасто лексезь ёвтызе Виряз мелявксонзо.
— Стоял, стоял он тут!
— Нолдынк атянть! — каятотсь цёрань каргоць вайгель кассанть икеле эвтицятнень ютксто.
Пелькстнезь-музгордезь, Виряз атя эцевсь кассань панжадо вальманть икелев.
— Монень Московов! — рангстась варянтень.
— Нет, нет на сегодня! — серьгедсь билетэнь микшницясь. — Приходите завтра.
— Завтра как, будут? — эзь капша туеме вальманть икельде билет мельга аштицясь.
— Отправим, приходите только раныне, — неть валтнэнь марязь, уцорсо лиссь ломантнень ютксто ды ношкстась топольтнень алов. Тештине порнесь, сэльгинень-сэльгинень кочксезь, тикшензэ. Мезе сонензэ? Салыцят, пижницят, билетт... ялатеке.
«Кода, ялгинем, идемевсень понатне одс эзть злыдарде перькат? Вант ды вант мельгаст. Тон, Тештине, превеят, прят иля максо эрьванень. Вант. Истя неень шкане, ялгинем, эрявияк, — «оянзо» марто каляказь, Виряз юксизе чаронть, кильдизе лишменть ды кадовозь тикшетнень пурнамодо мейле озась тарказонзо. — Превс путан, яла [305] тонавтан эйсэть, Тештине, ансяк тонеть... весемесь ялатеке, содат вейкеде — ярсамс ды ускомс. А талномат, а ризнэмат-кецнемат...»
— Те мекс знярс? Учан, учан... — ризкс вайгельсэ кевкстизе Элюва атянзо, зярдо тона совась кудос. — Кодамояк зыян эзь лисе?
— Оймак, оймак. Берянь мезеяк эзь лисе, — оймавтызе учицянзо станцияв ардтницясь. Теке басом юксинзе шуба повонзо, кайсесь, понгавтынзе шубанзо ды шапканзо тулос. Озась пильгензэ юксеме.
— Ярсамо кармат? — каятотсь пидема-панема таркасто Элювань вайгелезэ.
— Шказо эзь са, — мерсь Виряз поланстэнь.
— Ёвтнек эно. Саить билетт? — кевкстизе тона мирдензэ ваксозонзо озамсто.
— Арась. Лишмем цяк эзизь уевте, — мерсь атясь ды педе-пес ёвтнизе, кода вокзалонть каршо таркастонть эль эзизь сала Тештинень, ёвтнесь, сонсь аксялга-кува путнесь-сравтнесь карензэ-пракстанзо. — Венстть, энялдан, лембе кемть!
— Вай, авакай! Ды те кода истя — лишменть салыксэлизь? — абунгадсь каштлангсто кемень максыцясь. — Вантакая! Мерить, мезеяк эзь лисе.
— А-а, стяконь тев. Ансяк снартнесть. Эзть кенере. Шкастонзо рединь. — Виряз тонгинзе кемтнень — лембеть! — ды мельспаросо мекев-васов ютась кудованть.
— Секс истя седеем ченгсь. А манясак сонзэ. «Мезе-бути лиси, мезе-бути лиси», — тарность кельпрясон валтнэ. Эрь вана! Теке ведьс ванынь, — ёвтызе, мезде арсесь, чамдызе потмонзо юртавась.
— Седееть Эзинзить маня. Билеттнэнь марто мезеяк эзь лисе. Ванды, мерсть, кармить улеме. Мерсть самс седе шкадо икеле. Секскак, дугинем, удат эсь кудосот меельцеде. Меельце ве... — ризкс ёжонь марязь, прянзо нулновтнезь ёвтынзе Виряз прядома валтнэнь.
— Вай, авакай! Истя иля корта, атя. Иля разде седеем, энялдан. Сон истякак... Мезенекак педе-пес апак пурна. Кода [306] истя — тапор-тупор? Килангось... Оно кодамо кувалмозо! Вай, вай, — талакадсь Элюва. Куш туемадонть кортазель а весть, ялатеке эзь сода мезес кундамс.
Совасть нить-полат икеле кудос.
— Шканть иля таргсе, кунсоломак. Эрьва чись — казне, вандынть а менстема, — ёвтызе мелензэ Виряз, ансяк кенерсь мельганзо кенкшенть сёлгомо. — Кие содасы, зярдо ушодсызь нулгодькс тевест? Паряк, течи жо, те вестэнть? Кинь эйстэ ушодыть? Ёртыть седейстэть кавтолдоматнень. Ванды, ансяк ванды, валске чоподава. Куш те вестэнть, Инешкипаз, аволимизь сокарда.
— Мезеяк чис-кавтос а калады! — пилензэ вакска, марявсь, нолдынзе Вирязонь валонзо Элюва.
— Арсят мезть кортат?! Билетткак ванды алтасть.
— Билетт эрсить. Сыргатано вандыде мейле. Весе. Иля кортавто эйсэнь. Ванды пурнасынек курмонок-кармонок ды вандыде мейле валскестэнть чоподава — килангов, — эзь арсеяк полавтомс мелензэ Элюва.
— Арсят мезе теят? Содат, мезес те велявты?! Курмот-кармот... Содат, мезть пурнамкатне?
— Содан: зяро кандовить.
— Эно мезть шканть таргсят? Каня вензэ перть а пурнавить? Кувалмозо оно кодамо, аволь тундонь-кизэнь.
— Иля моткоде. Меринь, валскеде мейле, истя улияк. Весе. Мерезь, — путсь пе кортамонтень Элюва. Саизе ушодозь варьганзо, озась вальманть каршо ды кундась кодамо.
Виряз педсеме эзь карма. Мартонзо пелькстамось — вармань каршо сельгенема. Эсь Вишкайнянзо содасы. Аволь аламо вейсэ эрязь. Содасы иера обуцянзо. Содась, мейсэ прядови цюлкань кодамозо.
Весь ютась сэтьместэ.
Сэтьместэ, бути а ловомс атякштнень ламо вайгельсэ морамонть-сеереманть. Сынь теке лувсонть поладызь сыця чинтькак.
Элюва чоп якась кардазга, пирева, пачколесь тингелангов, панжтнинзе утомтнень. Якась, сонсь эзь сода мекс. Яла [307] марявсь тензэ, ёмавтсь мезе-бути. Мезе — эзь сода сонськак. Пельсь мик совамс кардонтень, косо свал марявсь — ды истя вечкевсь — поремань кашторкс, косо шкань-шкань кувакасто таргсесть ойме скалост, козонь валске чоподава ламо иень перть совсесь потявтомост, ламо иеть потявтомань ушодомсто ведрань жойтесь кецневтсь пилензэ. Ней сон чаво. Киненьгак «нёкш-нёкш» а мерят, киненьгак потявтомадо икеле салтозь кши кочом а венстят. Панжсак кенкшенть — а куш а каш. «Эрямо-эрямо! Мекс тон истя, сэредьксэнь апак маря, киньгак апак кевкстне, тапат эсеть вийсэ теезь лувот? Мекс зняро ризкст-мелявкст сравтнят моданть ланга? Мекс?!» — рангсь Элювань седеезэ.
Аванть лангсо якстере-тюжа тюсонь кувака шуба. Течи менельксэсь седе потась, ялатеке те оршамопельсэнть а псилгадат. Прясонзо понань шаль. Пракстанзо ашот, прок покшчистэ. Яки, теке чопача, сулей. Истя кудонзо-чинзэ юткова-перька яказь-паказь ютась икельганзо пакшонь-пакш весе эрямозо.
...Иензэ ниле эли вете. Шабрань эсензэ шкань тейтернетнень марто панжсть «лавкине». Кудост ёжова аравтозь тумонь эчке чочкось — лавсяст. Лангсонзо «тантей ведь» (атямарьстэ теезь), сёвоньстэ панезь «кши», «ламбаськем» — раужо, пиже ламарть. Ярмаккест — теине-кувака каль лопат, седе покшт, вишкинеть... «Лавкинест» рамицявтомо а эрси. Вейке сови, омбоце...
У-у-уф... Кода те умок ульнесь!
...Сёксень валскесь манеель. Чинь налтнэ, сырнень рисьмекс жойнезь, чудсть вальмаванть. Элювань удомазо явась. Велявтсь кунст, венстизе рунгинензэ ды панжинзе сельмензэ. Пряпесэнзэ аштесь тетязо. Венстезь кедьсэнзэ — умарь. Покш-покш, якстере-якстере! «Эрь, кирдть!» — мерсь тензэ...
Васов кадовсь маней мизолкссо эждезь се валскесь! Пинге ютавты, истямо мазый якстере умарь сельмензэ икелев эзь понгоне.
Весемеде ламо ледстнемат лиядсть Элювань превс эрямонь юрттонть. Вановтонзо икелев сакшнось ташто, [308] тетянзо вийсэ путозь чачома кудозо. Икельде колмо вальмат, бокава — кавто, вельтязь чуказь пултсо, конякшсонзо керязь «седей». Кудо кенкшесь ды ортатне саезь латыне алов... Тесэ, те кудосонть, эризе эйкакшпингензэ, капшавтыця од шканзо, арсесь икелепелень эрямокидензэ...
Ледстнемань нармунесь кивчк совавтызе кирьпецень эсензэ кудос.
«Чипаз-Верепаз, мейсэяк а онкставить эйзэнзэ путозь виень, ливезем, превень. А вайгельпесэ, а фунтсо, а батмансо, а пондосо. Зяро апак удо веть ютавтозельть, зяро майсемат-стомамот ульнесть! Мезть кортамс, визьксэнь ёмавтнемаскак пачколинь. Каня сестэ Паксютыч лездаволь кирьпецьсэ, аволинь ютавтнеяк мартонзо кутморямонь-налксемань веть? Сындест башка, эрявсь ускомс кевть, вирь, муемс вачкицят, чапицят-лаксицят. Оно зяро иетнеде латкос нолажтсть, мезть ансяк арасельть...»
Кода ёжонзо илязо маря, кансттонть Элюва эзь стувтне. Мезе леди мелезэнзэ, кандсы, каясы икеле кудонь киякс куншкас. Ве таркасо весе улест. Мезе саят эсь лангсот кандозь? Путома ансяк сень, мезе кандови ды эряви васняяк. Чугунт, чакшт, пачалгот... Кармить эрявомо? Содазь, кармить, ансяк а сайсыть, варчить саемс. Оршамопельть: шубат, чапант, тулупт, руцят, покайть, пулагайть... Кода сынтемест? Кода эрявольть саемс. А сайсыть. Нетнеяк понгить кинень-бути.
«Вай, авакай-тирякай, мекс а шкастонзо чачтымик, мекс покш мельсэ кастымик, седеяк пек ванстымик?» — ознозевсь Элюва, пазава ужонтень варштнезь.
Вить ёно стенас понгавтозь портретстэнть ваны тейтерензэ ды киякс куншкас вачказь «товаронть» лангс Элювань тетязо. Вановтсонзо кевкстема: «Мезе тейтядо, ломанть? Мекс нарьгатадо вейкенк-вейкенк лангсо?». «Мон а содан, тетяй», — мерсь эськанзо тейтерезэ, теке басом менстизе портретэнть, таргизе кундостонть, тапардызе ды каизе анокстазтнень юткс. «Мезе таго? Документэнь таркасост, ярмаконгак... Мезе, мезе невак кадовсь?»
Виряз атянь мелявксонзо Элювань коряс седе аламо.
[309] Кескавс а нерьгставить аволь ансяк Варма ды Тештине, а тонгат тозонь чирькеяк. А каясыть лавтовот трокс сокатнень-изамотнень. А понгавтсыть мельгат, чарькодеви, штердемань-кодамонь кедьёнкстнэньгак: томбамотнень, чалгамотнень, лиямотнень, велямотнень, кодамотнень... Ков сынст?
Каясь «кардазонь прявтось» лишметненень Пинеме, макссь симемс. Варштась, сонськак эзь сода мекс, скалонь кардос. «Ней мезе?» — арсезевсь тосто лисемстэ. Вадяшинзе сурсемень таркас вете сурсонзо сакалонзо, карксызе седе парсте карксонзо ды сайсь ёнкс ушов. «Ёколонь содавтомат, паряк, мезеяк од ёвтыть. Дошузт, марсевсь, цёранзо».
«Вай, лишменть марто мезе теемс? — пицизе молемстэ мелесь. — Сайтяно билетт, озатано поездс, кие сонзэ мекев Эрьмезьвелев ветясы? Нолдамс, сонсь кинть мусы? Мхы! Дух стувтыя, Элюва кода-бути ледстнесь: келя, тосо, Симилейсэ, эри сыре патянзо цёразо. Вана теть ильтицяяк. Пря яжан, макшов кандо! Те паро. А кие тов, станцияв, усксамизь? Кода кие — монсь. Ужока, ужо, а ялго а седе ён ули? Редявомояк истя а карматано. Виде-виде, ансяк вана арсезеват покш-стака канст марто вайгельпетнеде ды чаракадат, а содат мезе теемскак».
Молемстэ мельтнень тапарязь, Виряз эзизе редяяк, кода пачкодсь Ёколс ды эль эзь пупордя кузтемпест вакссо лапужа кшнистэ теезь рудазов пильгень коцькерямкантень.
Ёколоньгак кудост икельть-удалт. Путозь ульцянть кувалт. Мерить истятнэнень «пятистеннойть». Мекс? Косо ветеце стенась? Кияк некшнизе? Паряк, куншкасось? Кудонть кавтов явицясь? Эрямо пизэст Ёколонь чапозь эчке пичестэ, вельтязь лазсо. Латось иетнеде чополгадсь, таркань-таркань пижелды эзганзо касыця нупонденть. Вальманзо икеле — рацяня, эчке ниле кальть. Кие карми кекшнеме алост кизэнь пси чипайденть? Кие сови азорокс те кудонтень? Содась теде ансяк шкась. Содась ды зярс чатьмонсь.
Дырнай, кона сизьгеменде ламо иензэ перть эзь сода тевтеме аштема, озадоль эземпесэ ды вансь вальмава сиземань апак сода поксариця саразтнэнь лангс. Шукшпрясь эзь кельмевтеве, [310] ульнесь мезе муемскак. Секс тонат изазь изасть. «Атякшось, атякшось мезе теи! — тешкстызе эськанзо атясь. — Ломантне, седеяк цёратне, улевельтькак истят мелень ваныцят: мезе а муи — саразтнэнень, мезе а муи — саразтнэнень. Тунь, вант, а ярсы. Мезде эри? Ломантне вана...»
— Шумбрат, Дырнай леляй! — сезинзе арсеманзо совицянь вайгель.
— Шумбрат, шумбрат, Эрьмезьвелень содамо! Ютак малав. Ульть инжекс. Озак. Мезть якат-пакат, карть калавтат? Кодат кулят сравтнят?
Виряз озась азоронть ваксс.
— Кодаткак арасть. Мекевланг, арсян тынк ёндо мезеяк марямс. Тынь ламоненк, якатадо эрьва кува.
— Мезеяк од, Виряз ялаксом, а маряви, мезеяк а неяви. Теке лепиясть тандавтницятне. Несыть, мезе теить? — невтсь атясь какаря, тарвазокс мендявозь сурсонзо ушов, поксариця саразтнэнь лангс. — Тень кис самай минек велькскаяк вадовкс чарыть: тертямонок бажить, илястано сокаря.
Кулянь кевкстницясь варштась суликанть тона пелев, ков невтсь кичкере, таргамодонть ожо сурсонзо сыре Дырнай.
— Кода теть меремс... Аволь весе истя эрьмест таштакшныть. Лиятне... — ёвтыксэлизе мелензэ Виряз.
— Салазь-колазь, — поладынзе валонзо валаня коня Дырнай, — кой-кить манчезь, кинь-бути ливезь вельде. Истятнэде, мерема, аламо. Саик минек веленть...
— Те виде.
— Истямо куля пачкодсь, — поладызе кортамонзо Дырнай, — исяк Вачаень Киринэнь, велень комиссаронок, тердтнизь тов, районов. Мекс — соды сонсь. Лия мезеяк а содан. Истямо куляяк яки велеванть: неть читнестэ та-кодамо колхоз арсить пурнамо. Мезе те истямось — Пазоськак, пелян, а соды.
— Велень тевтнеде, содави, ламо. Ансяк седеем мари: текеде, колхозс совавтомадо ды пансематнеде, тосо, районсонть, кортасть. Талай сёксь, тевтне теевсть, мезе кадови? — арсезевсь ды ёвтынзе валонзо Виряз.
— Кода а истя. Поптне пазаваст марто — кендялт. Мейсэяк а пештявить, — мерсь Виряз. — Кедест кувакат, коморост келейть... Вельть шкадонзо икеле телесь варштась. Лов арась — якшамось сыре телень.
— Эрси истяяк, монь ледстнемга... — Дырнай стясь, каштом варинестэ таргизе махоркань кескавнензэ, сезсь ташто газетасто конёв панкске ды сювордась цигарка. Курок кудонть пештизе махоркань палома чине ды сэнь качамо. Азоратясь таго каизе вановтонзо инженть лангс. — Мертяно, Элювань чочасызь. А пештявикс сельмензэ кис. Меремс, тетязояк истямоль. Сон, эриця ялгат, лавшосто аштицянть вакска эзь ютне... Сонзэ, мертяно, кшувавтсызь. Тонь вана, ёвтыка, мезень кис, а?
Виряз чатьмонсь. Нуваргадсь. Кепедизе вановтонзо потолокс, теке сась превзэнзэ та-кодамо мель, мейле варштась вакссонзо валонь учицянть чамас.
— Видькстан, а содан кода улемскак. Превстэнь а лисни аволь ансяк се, мезе учотано. Седеяк майсевти лиясь... Чарькодить? Эземень аволь песэ — пинесэ аштемась. Беньк — ды улят киякссо. Превень велить.
— Виде. Теветь наволат, — кокша прянзо нулновтнезь ды кургостонзо качамо кувтань нолдазь, мерсь кудонь азорось. — Вант, атя, вант.
— Сырган аламонь-аламонь. Таркасо аштезь, зепеть, кортыть, а пешкедить, — Виряз кепедизе рунгонзо эземстэнть. — Мезе ули, се ули, а мезть пря чавомс, лезэ тень эйстэ а муят. Сырган...
— Кирдеметь а карман. Куш лембине кучоволь Верепазось. Якшамо вельть. Сыре ловажатне яла тов, сёвонень маронть пряс, тердить... Варштак, паряк, цёратне мезеяк од кандыть.
Дырнай, аволь сэрей, теине лавтов коськана ломань, чош-чош пильгензэ ускозь, ютась сакшныцянть мельга.
Ушов лисемстэ якшамось тапардызе прясто пильгс, гуекс совась потмозонзо. «Сёксь, алкукскак, якшамось оно кода сускони. Сёксь пуло, мезть лиятат учнемс», — ледсь мелезэнзэ якшамонть лангс Дырнаень пеняцямозо. Кепедизе шуба сивензэ, кавто пиледе ноцковтызе раужо ревелевксэнь кедьстэ стазь шапканзо, седе парсте «озавтызе» прязонзо. Келейгавтынзе эскельксэнзэ. Лембе таркасто лисемадо мейлень сурневтемась потась.
«Дырнай атя седеймарязь, мик нуваргадозь ёвтынзе валонзо: «Теветь нолажат...» «Умок теде содан, Дырнай леляй, умок, ансяк вана пе тень кодаяк а путови... — ушодсть Вирязонь прясо велямо, прок леень чарамо таркасо ведь, арсематне. Ледстнесь Эрьмезьвелесэ эрязь иетнеде, козонь понгсь. — Мекс истя, мекс истя кодаяк чапо а чапови?»
Виде, Виряз а весть, кежень сазь, кодамояк покордамодо, кой-зярдо мик поланзо марто ве мельсэ эрямо шкастояк, путнесь эсь пачканзо тешкс: «Весе. Пе. Седе тов эрямс те ломаненть марто виень арасть. Сонзэ эсензэ обуця, монь — эсень. Сон — давол, мон — сэтьме вармине. Сыргси-кепсеви те даволось седе сеедьстэ собой, тувталтомо. Сан мельс: «Весе. Ванды туян».
Мади пазямомань толось, юты, а редявияк, «вандысь», ды, вант, ацирьгалемадонть якстердиця седтнень ланга таго таргави ашназа тюс седельма. Таго ушодови вейкень-вейкень марязь-неезь, мелень ванозь, эрьведькстэ пешксе эрямо. Прок арасельтькак оймень наксавтыця валтнэ, превскак эзь совсе «ванды туян» мелесь. Кодамо сон, шкась, превей, кодамо чарьксей эрьва тевсэ! Ормат терди, пичкавты, лайшевти, пейдевти... Весементь таркаванзо аравтнесы.
Вирязнэнь кодаяк эзь чарькодеве: косто саевсь виесь, кона педязь педявтызе сонзэ те «коткудавнентень» ды кирди эйсэнзэ оймсемань апак сода? Икеле, сеске вастовомадост мейле иетнестэ, зярдо седе одольть, вересь седе псиль, се виенть вешнемс эзь савкшно. Ней эно кодамо паро, кодамо тансть кирди эйсэнзэ? Кие? Мезе? Паряк, обуцянь [313] лавшочизэ? Эсь асатыкстэнзэ — лоподемс-лепштявомс, прок сёвонь, — атясь соды. Мейсэ лиясо тувталось, превс а саеви. Чиить читне, эскелить ковтне, пешкедить иетне, сон яла «туи».
Седеень карыця неть мельтне срадсть апак учо ды апак кармавто. Удемень сормсевкстнэнь пештизь зярыя иень перть эрямстост весть экшелямо якамодост валдо ледстнемат. Ульнесть Вирязонь эрямосо валдо, седеень эждиця, сырнекс кувтолдыця, валдосо гайгиця чить. Ульнесть. Ды аволь аламо. Ансяк се чись...
* * *
...Свал ков-бути эрязкалиця келей-домка леенть вить чирева сэрей пандотне, теке косояк Кавказсо, вельтязь тусто сыре вирьсэ, керш ёнганзо сравтовсь келей лайме. Эзганзо тия-тува пижелдыть, прок ансяк каязь тикшень штеметь, калень, ламарень, индерень, эрьбань куракшт. Леенть седе малава сынь пурнавить вейс, ды сави молемс пачкаст эль неявиця, тей-тов менчевиця янганть, теке чопода вирьга. Те таркантень апак пачкоде, куракштнень алга-юткова сравтовозь, кецневти мазычисэнзэ лугась.
Кизэсь лембель, шкастонзо — панжиковсто ды аштемковонь ушодксстонть — ульнесть пиземеть. Секскак тикшесь сэрей ды тусто — ёзнэ пачканзо а ютави. Эрьва нетькскесь, эрьва балягинесь, лопинесь бажи невтемс ды шнамс мейсэяк эсь прянзо. Якстерди курынень-куро чавкань прясь; тия-тува невтни палый тештинензэ дёготьтикшесь; сэняжды, мерят прась пель пакшке, чеерень кснавось. Кодат ансяк тюст а вастневить! Ванат вановлить. Кунсолозеват — пилеть пешкедить мекшень бизнэмадонть!
Кизэ...
А кемевияк, сы шка ды те таркасонть азорокс теевить телень эсензэкс мазый ашо каштмолемась эли ордакш кандыловтне.
Элюва эзь кирдеве. Молемань перть зярыяксть лотксесь, празь пракшнось, прок вачо реве, мастумарень вешнеме.
[314] Вана таго полавтызе молема ёнксонзо, таго ванны, козонь кеденть венстемс. Комась. Каштордозь явны-вадяши тикшенть, сезни ды кайси кургозонзо якстере «пештинеть». Тантейть! Кстыень-нормалень тарка. Дошуз аватне «таргсить» неть лёмонь лугатнестэ ведрань-ведра. Тедедень кизэденть кортамскак а мезть, кочкак зяро мелеть, кочкак зярс а нильтякадат. Нинзэ лангс ванозь, Вирязгак кургонзо ламбавтомга комсесь, сокарясь тантейстэ качадыця тикшенть потмова. Эртевсь «сюпав» кужинес. Кочкась-кочкась ландязь, озась. Венстизе кедензэ седе васов, савсь мадемс пекекиське лангс...
Аватне эрьва косо ават, эрьва тевсэ седе ёроковт. Эйстэст ламонень ве шкасто теевить кемень тевть. Тесэяк... Элюва кенерсь аволь ансяк кургос кайсеме — коморозонзояк кочкась.
— Эрь, монь седе тантейть, седе ламбамот, — невтизе сон умарде пешксе коморонзо яннэнтень лисемстэ. Венстизе кедензэ атянстэнь. Мельспародонть турвасонзо налксесь мизолкс.
Виряз сайсь сурпрясонзо зяро-бути.
— Вай, тонь алкукс седе ламбамот! — пеедькшнезь шнызе янганть икелензэ эрязасто эскелиця нинзэ.
Окойники тикшенть потсто эль неявиця, тей-тов менчевиця яннэсь ветинзе мастумарень вечкицятнень эрьва ёндо рацяня куракшсо ды чувтосо пирязь сэнь сельме эрькенть чирес.
Чись рестазь рестась. Келейстэ-келейстэ сравтовсь сэняжасо гайгиця потмакстомо менелесь. А куш а каш. Чуросто колсесь каштмолеманть кодамо-бути нармунень вайгель. Кецневтсь тастань цяк марявикс цийнема. Шкань-шкань лездась тенст лопатнень вельде вармань вечкевикс экше зэхельне. Ш-ш-ш... — тошкасть те шкастонть веденть ёжова касыця казямо лопа чейтне. Веленть эйстэ тей юткось эйпаро, секскак а марят а атякшонь морамо, а пинень онгома, ломанень вайгельде кортамскак а мезть.
Элюва апак капша, икелев ванозь, валгсь эрькенть вандора, валдо-ожо чуваров чиреванзо веденть малас ды прок [315] чувтомсь: вансь чопода-сэнь ванькс ведьсэнть сэперькань кесаккенть тей-тов укшноманзо мельга. «Кие кармавты сынст истя вейкетьстэ тей-тов кайсевеме? Кие тонавты тенень? Вант, мезе теить...» — ютась ваныцянть превга. Кепедизе вановтонзо: икельганзо сравтовсь суликакс цитниця келей-кувака эрькесь. Ледсь мелезэнзэ умонь-умонь эйкакшпингезэ. Сисем-кемень иесэ тейтернекс сакшныль тей зярыя иеде седе покшке ялгинензэ марто калс, ульмамо. Умок, пек умок те ульнесь, васов кадовсть пиже зорява сеть стякшноматне, чинь-чоп веденть чиресэ аштематне, валскень экшеденть сурневтематне. Васов оргодсть, а сасасыть. Весемеде васоло тештедентькак васов.
Ведентень ветиця, чипаенть вановтто пси чуваронь яннэсь кавто ёндо копачазель лопав тарадсо. Авась мурдась ведьтурвастонть, кузсь седе сэрей таркинентень ды ютась псиденть нувсиця рацяня тумонть алов.
— Мезе, атя, экшендтяно? — пеедькшнезь, мельспародонть цёкордозь пшкадсь карксонзо ды сивензэ юксемстэ Элюва. Апак визде, ливчанясто каизе пряванзо лияназонь коцтсто стазь ашо палянзо. Комась ды путынзе лугине лангс оршамопелензэ. Кадовсь штапо... мейсэ чачтызе авазо.
— Мезе ванат? Каня эзимик некшне? — прок цельця тейтерь, кольнезь-пеедькшнезь мерсь атянстэнь каршонзо стямсто. — На, вант!
Виряз эзь правто валгак, теке кургозо потомдавсь. Вансь. Виде, некшнизе нинзэ эрьва кода ды эрьва косо, ансяк истямо таркасо, истямо мазычи ютксо, истямо маней, кенярксто пешксе чистэ несь сонзэ васенцеде. Ваксозонзо, марявсь сестэ тензэ, кодамояк лия ава а путови. Ко-да-мо-як... Иетнеде таштавсть оно зяро, рунгозо яла, теке тейтерень: аволь покшке, ёлганя, пешксе пукшо. Варштат — мерят, икелеть эрий налкшке.
Элюва кепе-штапо, берть-берть чиезь, валгсь пси чуварсо вельтязь ютнема таркаванть веденть малас. Зярс-бути аштесь стядо. «Кельме-аволь?» — кивчкадсь превсэнзэ. Окойники изнизе пелеманзо. Ландясь ды нолдызе вить [316] кедензэ ведентень. Кечинекс теезь коморосонзо амольдясь ведь ды начтызе мештензэ. «У-у-у... кодамо экшине!» Ялатеке вельть кельмекс эзь маряво. Икельганзо укшность вишка калнэтне. «А пельтядо, а? — арсезевсь, лангозост ванозь.
— Паро эрямонк, уйтядо ков ды кода меленк!» Видемтизе рунгонзо ды, кедензэ аволь пек келемтезь, экшентень апак тонадо, сурневксэнь марязь, састо-састо совась ведентень — васня кумажава, мейле аламонь-аламонь седе верьга.
— Вай, вый, кодамо кельме! — серьгедсь цирнезь, куш пилеть потомдыть, сонсь варштась удалов, эйстэнзэ а васоло палманькс аштиця поланзо лангс. — Мезе учат? Кайсек ды булдырк тей! Монь ваксс. Иля пеле, а сусктан!
Серьгедсь Элюва ды эсь прянь кармавтозь чопавтсь кирьгава, тусь уезь. Ботыця пильгензэ алдо кувтань-кувтань верьгелесть чинь валдодонть сиякс цитниця сяткинеть. Перьканзо кирьксэнь-кирькс сравтневсть цитниця ведь-сормсевкст.
Виряз вансь укшныця нинзэ, ведьчамасонть оймсиця ашо пельненть ды эрькенть тона ёнга куракшсто-чувтосто пиже пирявксонть лангс. Вансь, ды кирдсь эйсэнзэ ве таркасо мелесь: «Кодамо перьканок мазычи! Паздонть башка, истямось киненьгак а тееви. Мекс тензэ питне а путтано, мекс аволь свал редятано сонзэ? Мекс тенек а экшелямс те мазычисэнть эрьва чистэ?..».
Укшныцясь — прязо сюлмазель ашо пацясо — тейсь, «пинекс» шлёбор-шлябор уезь, эйпаро кирькс ды велявтсь совсема-лиснема мазя таркантень. Паряк, весе эрькенть потмаксозо вельтязь валдо-ожо човине, прок почт, чуварсо. Секс ведеськак истямо ванькс, кода иля бота — а бутралгады. Кирьга видьга эйсэнзэ аштезь неявить пильге сурот.
— Фу! — сиземадонть стакасто лексезь, укстась экшелицясь, ансяк токасть пильгензэ потмаксонтень. Мельспародонть серьгедсь верьга вайгельть: — Кодамо паро! Ведеськак лембе. Теке ловсо. Те ансяк совамсто марявсь кельмекс. Я, ды тон мезе учат? Мезть нувсят? Адя вейсэ укшнотано!
Элюва лиссь ведьстэнть кумажа видьга.
[317] Аванть ашо киське рунгованзо кирдевиця-кевериця ведьбайгетне чинь валдодонть неявсть цивтёркай сырнень тештинекс. Кизэнь налксиця чись, икелензэ прясто пильгс штапо, сэрей поте авась, сэньстэ артозь ведесь, эйзэнзэ мерят симеме комазь каль куракштне — весе те марявсь Вирязнэнь онокс, менеленть пельде казнекс. Вансь, теке мунизь, — сырк эзь тее.
— Матедевинь... Кие лангозот истя вановоль, конявлиньгак каракшон. Седеем пештинь перьканок мазычисэнть. Тонь эйсэ. Марявсь тень, сонсь Ведьавась ашти каршон, невтни мазычинзэ, терди эйсэнь. Терди... Монь а лутавить модастонть пильгень.
— А-а, сестэ эно кадык, вант... Ансяк иля сокоргадо! — ливтясть Элювань а неявикс валонзо веденть чирестэ.
— Арась, арась! А сокоргадан! Ансяк пелян, илязат кадово Ведьавакс, — эзь кирдеве, пеедькшнезь-згилязь серьгедсь каршо Виряз.
— Саты лавгамс! — пандынзе Элюва марязь валтнэнь валсо ды лоцьк озась ведентень кирьгава.
Виряз юксинзе сивень повтнень ды капшазь каизе ашо, сивева ды ожа пева раужосто-якстерестэ викшнезь, пазень сурень панаронзо...
* * *
...Ледсь Вирязонь мельс се чись ды пештизе мештензэ вечкевикс, кенярксонь кандый лембе ёжосо. Сеске потасть эрьва чинь мелявкстнэ, майсематне, оймень костиця арсематне меельце шкань эрямодонзо. Рунгозо шождалгадсь, теке каясь сявдиксстэнзэ кеменьшка иеть, лиякс тензэ неявсть ульцянть кувалт стявтнезь кудотне, утомтне, кальтне.
Совась кудос. Редизе урядонь аразенть. Кияксонть куншкас ёртозь ташто карть, тенсть, вакан, стуворонть лангсо кавто ведрань содов чугун, сядоксть пандтнезь понань кемть ды варьгат. «Зярдо истя ульнесь?!» — макссь питне неезентень Виряз. Ютась икеле кудов. Тесэяк теке: апак аца таркат, ужос айгезь стувор, кудо куншкасо [318] пурназь-сэрнязь зярыя канстт. Вакссост, нурька эземнес озазь, мезть-бути ладси-путни азоравась.
— Кандтни эйсэть тонськак а содат кува, — вастызе атянзо. — Каня а содат — пурнамс эряви?
— Пурнасынек, иля мелявто, — эрьведезь мерсь Виряз. Эскельдясь «палаксонзо» пелев ды дёлязь кутмордызе удалдо. — Шканок саты.
— Тонеть свал «саты», свал а ков капшамс, — эсензэ содась, ботнось авась. — Кодамо укска пупинзить — цёковокс цёкордат? Мезе мартот теевсь?
— Мезеяк эзь тееве. Ёколонь витизь мелем. Атясь ськамонзоль. Пек а мелявтыть. Мезе, келя, ули — се ули.
— Те а истя... Лисни, Ёколтнэ нолдызь ведьмест, — эзь пра Элюва ве мельс ёвтазенть марто.
— Истя-аволь, ней мезе — лисьмас кирнявтома?
— Тонсь а содат мезть пенгедят, — музгордезевсь Элюва.
— Саты теть сувтнемс нулатнесэ. Мельсэть, кода якинек инжекс Ледяйнень? Сыре патять тейтерензэ туртов?
— Мейле мезе?..
— Мельсэть морамонок? Кода уш тосо, ледстика...
Вай, исень саевть одирьвась,
Вай, улконь максовт тейтересь Поланзо марто а яки,
Вастанзо марто а корты...
Истя? Эрьга варчика вайгелеть. Тон верьга сайть, вайгелеть гулькинекс ливтнезэ, мон — алга. Эрь, эрь варчасынек.
— Вай, авакай! Мезе истя теевсь мартот? Аволь таркастост сыргасть?.. Кирдть эрь, морыця!
Виряз сювордызе пешксе кескав кургонть, Элюва ливчанясто сюлмизе карькссэ.
— Дух эзинь азаргадо! Содат мезе ледсь мелезэнь? Экшелямо якамо чинек... Эзик стувто? Вант! Монень зярдояк а стувтови. Кодамолить тон... Кодамоль чись!
[319] Вельмесь сон удемсэнь ды казсь тень паро ёжо. Мик, марявсь, аламнеде одкстомтымим. Во кода! Кодамоль чись! Кодамолить тон...
— Саты келеть човсемс. Вачкика кенкшенть ваксс ули-паронок, — макссь Элюва тев ды стясь эземстэнть. — Весе, атя! Куш нейке, вензэ лангс сыргак. Ванды чоподава — станцияв. Азё вешнемизь!
— Цёрать адресэнзэ саик? — зяроцеде уш кевкстсь Виряз, пельсь, илинзе стувто кодаяк низэ весемеде эрявикстнэнь.
— Саия, саия! Сядоцеде уш мерян.
— Ярмактнень козонь путыть?
— Алга карксозон стынь юдмине. Эйзэнзэ путыньгак. А муевить. Бути ансяк кайсевтьсамизь.
— Виде. Вант, весе виенек ярмактнесэ. Паряк, зярояк монень максат?
— Арась. Монь «зепесэ» седе ванстовить.
— Вант. Тонь тевесь.
— Адя мадтяно, — кургонь автезь, вал пелькстнэнь нильнезь-нильнезь мерсь Элюва ды оршнезь чиремсь апак аца тарказонзо.
Мадсь, валгак эзь ёвта, атязояк. Нинзэ ваксс.
Мадсть шкадо икеле, чопотемадонзо мейле сеске.