Теләк (Л.Һаҡмар)

← Тамсы хәҡиҡәте

Теләк (Л.Һаҡмар) автор Лилиә Һаҡмар

Кәңәш биреүсегә →

.Нәшер ителгән: 2006 йыл. Сығанаҡ: Һаҡмар Л. Эстафета: Шиғырҙар, поэма. – Өфө: Китап, 2006. – 176 бит. (61-се бит) ISBN 5-295-03798-3

Теләк

Күргем килә кешеләрҙең
Нурға ҡойонғандарын –
Кескәй бәхет түбәһенең
Үрендә торған сағым!

Күргем килә кешеләрҙең
Йотолор ҡараштарын –
Хистәремдең шырлығында
Яңғыҙым аҙашҡаным.

Күргем килә кешеләрҙең
Һоҡланып бағыуҙарын –
Күҙҙәремде ҡамаштырыр
Еңеүҙән сағыу сағым!

Күргем килә кешеләрҙең
Бәхетемде күпһенмәүен –
Шатлыҡ, хәсрәт араһынан
Һеҙҙең менән үткән мәлем.

Һеҙҙең менән үткән юлым –
Ғүмеремдең хазинаһы!
Күргем килә шуға һеҙҙе
Бәхетлерәк итеп тағы.

Көләсерәк, ихласыраҡ,
Яҡыныраҡ иткем килә,
Мин бит сәскә, һыйынып үҫкән,
Йылы урман ипкенендә.

---

Иҫкәрмәләр

• Авторҙың башҡа әҫәрҙәре Author:Лилиә_Һаҡмар