Татю (книга)/Кавонест братиники/2

From Wikisource
Jump to navigation Jump to search
Кавонест братиники  (1932)  by Раптанов, Тимофей Алексеевич, edited by Куторкин А.
2-це пелькс
Т. Раптанов. Татю. Повесть ды ёвтнемат. — Эрзямокшонь государственной издательствась, Саранск, 1933. — стр. 57—62
[ 57 ]

II

Венельксэсь чопуда. Менелесь эчке кошмасо ацаясь. Чинь срунатне а токить масторонтень. Ансяк шкань шкань прок содов суликань пачк чись невсы чаманзо. Сон сестэ неяви вишкине прок, пижень трешник. Вановтозо ожо.

Менельстэнть прок сееде ситань пачк пры пиземесь. Нупонь лангозот пры. Толкан леенть велькссэ кальтне ожо чамаст сюконявтызь теймаскадозь леентень.

Шкась слякоть: течи пиземе, валске кивекс масторонть кельмевсы. Каурькс, прок салмукс лангс чалгат.

Тюма кирекс кирьмецявсь, чии школасто кудов. Варманть каршо молемстэ сельведензэ прок кснавт чамаванзо кеверить. Каршозонзо Бусран кудотне ежва чии — гурьдякадозь. Тюма варштась лангозонзо, буто верев аксоркссо аксорязь Бусран. Сон чийсь, кришкатнестэ чудикирькс ладсо кольгсь пиземе ведесь. Чии, сонсь а соды козонь прясь каямс, а соды козонь рунгось копачамс. Прок талакадозь киска нерьксневи кардастнэва — вешни чопуда тарка.

[ 58 ]Аламо шкань ютазь Коляша прок боцька кеверсь пандалов (ведьчирев). Тандадозь куязо прок студень сорны. Лавканть велькссэ вывескась уш арасель. Чеменев жестенть, косо ульнесь понгавтозь вывескась, шли пиземе ведесь.

Тюма ансяк ютызе покш сэденть. Сухой проволкасто кижнэзь лиссь Пальтянь Андрей ды Дема.

— Совак кудов, шайтян левкс! — пижакадсь Андрей. Тюма арась ве бокав. Мельгаст чийсть эщо ломать. Сынст ванновтсо налксевсь мень бути вешнема. Тюманень охота содамс месть чийнить. Веенстнэ кекшнить омбонстэ прянь ванстозь месть бути вешнить.

Аламо шкань ютазь велесь пешкедсь салдатто. Ансяк мерить ней якстере армеецт. Чагаевень кавто этажсо кудо прянтень палка вельде пезнавсть якстере флаг.

— Большевики! Советэнь власть! Машт буржуйтнень! — Ульцясь кувсесь. Якстереармеецнэ ветить Борцук Верань. Тюма смелшкадсь, чийсь каршозост.

— Товарищи! — пижакадсь,

Вейке якстереармеецэсь пейдезевсь.

— Вчем дело?

— Дайте рас ударю. Он моя рук поломал, я работником бул яво...

Тюма кемготово иесэ эщо рускс кортамояк паро ладсо амашты. Сон стакасто кепедизе винтовканть, арьси нолдамо куроконть.

— Не надо — прясонзо чаравсь якстереармеецэсь. Сынь ансяк сыргасть Губжга каршозост чии Татянкань Хролань Илькань церась — Ванька. Сонць прок козна. Винтовкась кочкарязонзо токши.

— Товарищ красноармеец, — кижнэзь пшкадсь Ванька, — девять человек поймали.

Вот видите эту — тохмадизе Верань:

— Я видел Коляша отсюда спрятался.

— Где, какой Коляша, — кармась кевкснеме якстереармеецэсь.

— Вот мерян Айда мон покажу, — Тюма карьсэ шлепи рудазов киванть. Якстереармеецнэ чиить мельганзо.

[ 59 ]Кода совасть Коляшанень, тосо кудось ульнесь почаксазь прок левксэв туво гайнанзо сокаризе. Коляшанизэ ды кемгавксово иесэ тейтерест аварсть.

— Где сам?!

— Неделя как уш нет дома...

— Маньчат, ватракш сельме. — Тюма пулядизе чамас ложасонть. Авась кирьмицявсь.

— Товарищ, ей богу, правдый сегодня видал.

Лиссть кудостонь.

Якстереармеецнэ, кода панжизь лавканть тосо ульнесть ансяк штепкат.

Чагаевень ули паронть кандыть прок мекшть. Якстереармеецнэ совасть нешке пирентень, кинень кода паро саить медь. Мекшнэ аварьдезь вайгельсэ бизакадсть якшамо вармасонть кельме пизементь ало.

Кудонтень кадовсь ансяк пожарс апалыця горобиясь.

— Часиязо кулось меля, монсь бу лазовлия верень потий сеськенть! — моткодезь валгсь верьср этажстонть Оляй баба, конань цератне те революциянть кисэ путызь пряст. Тюма варштась лангозонзо, кавонест братиники“, пшкадсь эсь пачканзо. Сон ськамонзо тусь ало пев. Прясонзо якстереармеецэнь шлем, сельмензэ лангс новоли. Лангсонзо салдатской сезнезь шиняль боксонзо мельганзо ускси шашка — сонсь карьсэ, ды сэньс нававт котстонь понкссо.

Сон пачкодсь ташто калмазырьтне видьс. Афрычынка икельде чии Коляша ды Каргин Лютя витьстэ эйзэнзэ. Тюма таймаскадсь, прок мерят эй поколькс кельмесь.

— Товарищ, красноармеец стреляй.

Галятянь кардайстэ лиссь Кромой Кузьмань Аляксей. Тюма эзь чарькодть. Аляксей таргизе револьверэнзэ кавксть ледсь. Коляша Лютя марто ношкстасть вирев.

— Эх тюря, маштовлидизь ведь. Мон думинь красноармеец. Мейсь слюнат нолдыть? Адя.

Аляксей Тюма марто тусть Борцук Верань кудос. Кудонть икеле ульнесть аравтозь кодгемень улавт. Вальмаванть, каськасто чамдасть кекшнезь сюронть.

[ 60 ]Чизэ чопотедсь. Тунь мезеяк а неят. Тюма прась пекензэ лангс, Коляшань кустем пес — лекси. Марясы кашторды.

— Панжодо. — Састо кенкш крайганть пшкадсь Коляша.

Чикорк мольсть кенкш петатне.

Тюма стясь ды ношктась промкс кудов.

Вальматне ульнесть пекстнезь, ласксканть цивтерды тол. Сон чийсь кустем пентень.

— Кто здесь!

— Я Тюма.

— Что за Тюма?

— Товарищ Тюма.

Якстереармеецэсь кирвастсь зепсэ кантлимка фонарь.

— А свои. К кому ты?

— Начальнику.

— Комиссару?

— Да.

— Иди.

Тюма пелезь совась кудонтень.

Ульнесь заседания. Комиссарось кежейстэ варштась лангозонзо.

— Это кто?

— Это наш, он числится в штабе, местный, — пшкадсь Аляксей.

— Вот большевик, — пейдезь пшкадсь Дема.

— Вот этот Коляша домой пришел, — кармась кортамо Тюма.

— Вот тот, коната, кавонест братиники чавсь.

— А, тот торговец буржуй, который убил наших комунистов.

— Взять!..

Макссь команда комиссарось. Аляксей таргизе наганонзо, мартонзо тусть кавто якстереармеецт.

— Монгак молян, — мельгаст рангстась Тюма.

— Адя.

Тюма ношкстась мельгаст.

— Паншт! — ранкстась Аляксей.

— Кие тосо? — пшкадсь тейтересь.

— Пантш, теть мерить!

[ 61 ]Коляша таргизе револьверэнзэ, кекшсь кенкш удалов. Кода тейтересь панжизе кудыкелькс кенкшенть, неть колмонест сяворсть кудонтень.

— Х х лоп! Хлоп!

Ледсь Коляша. Алексей венемсь кияксонтень, пилестэнзэ тусь верь.

Коляша ношкстась ушов, но Тюма аштесь стройсэ. Кодак чийсь видезэнзэ сон апак корта ледизе.

Коляша кунст ертовсь кудыкелев. Тюма пезнавтызэ пекезэнзэ штыкенть ды чиезь ношкстась.

— Аляксеень маштызе, — евтнесь, кода уш пачкодсь промкс кудонтень.

— Коляша оргодсь? — кевкстизе Дема.

— Арась. Мон... Маштыя сонзэ.

— Убил?

— Да убил он того. Но и нашего тот убил, — кармась кортамо Дема. Андрей ды комиссарось нолдызь пряст.

— Ну, ладно ребята! Теперь село в большевистских руках. Создали волость. Председателем останется [ 62 ]Дуняшин. Держите крепко власть. Берегитесь банды. У вас много меньшевиков. Ваш враг Чугунов Федор. Опасайтесь его. Он говорун. Он темную массу поведет туда, куда ему хочется. И так, ребята, боритесь!

Комисарось свисизе Андреень кеденть, мейле максызе Деманень. Демань сельмсэ налксесь обида. Сон арьсесь евтамс горянзо, што пек жаль Аляксей.

— Но ты, боец, поедешь с нами, — пшкадсь комисарось, зярдо веньстизе кедензэ Тюманень. Тюма кепедизе шлемонзо ды пейдезь пшкадсь:

— Поеду.

— Едем!

Листь кудостонть. Якстереармеецнэ пурнавкшнность уш куцяс.

Тюманень ветясть алаша.

— Вот он будет моим собеседником.

Едем, товарищи!

Тюма вачкодизе алашанть, комиссаронть марто рядс ношкстась икелев, мельгаст тусть остаткатне.

Валдомсь валскень зорясь, ды куманць якстересэ кирвайсь чи лисема пельксэсь.