Татю (книга)/Кавонест братиники/1

From Wikisource
Jump to navigation Jump to search
Кавонест братиники  (1932)  by Раптанов, Тимофей Алексеевич, edited by Куторкин А.
1-це пелькс
Т. Раптанов. Татю. Повесть ды ёвтнемат. — Эрзямокшонь государственной издательствась, Саранск, 1933. — стр. 51—57
[ 51 ]
КАВОНЕСТ БРАТИНИКИ
 

I

Нурь-петерь, чи срунатне новольсть масторонтень. Менелесь коть маней, коть хрусталькс вандолды, яла теке аварьдезь ашти чамазо. Калень пиже лопатне юткова пистирцэ пистирди чивалдось прок алкуксонь сельведь.

Кальтне ало леесь такода сэтьстэ уды прок сэнь суликань полотна сравтовсь келеде келес.

Тошна — аварьдемать сы. Рунгот мик карми чулксетеме, седееськак скирязь скиряты. Прят бу петляс килкштявлик истямо апародонть. Преветькак маштыть.

Ало пе ендо — мельник Мишкань ведьгевенть ланга раужо пелькс появась ломань стена. Виде паронь стена. Келемемс а келеми, проулкась свистизе те пурнавксонть.

— Уряж, — ранкстась Тюма, — ванта, ванта те мезе? Уряж поп пазава марто юты.

Тюма налксесь кинть ланксо — пуль потсо. Сон пурнасы пуленть куцяс, кенере пакарьсэнзэ теи ямине ды венельди тозонь. Кода начки пулесь, тееви вакашке.

Чинь чоп, чинь чоп Тюма налксекшнэсь кинть лангсо пуленть потсо. А чама содави, а сельть содавить — прок гайнасо туволевкс. Ков эно моли? Ков, иля моле — яла пуль потс. „Теяк паро сельме икеле а ашти“ — кортнесь уряжось. Тюмань авась умок уш кулось. Уряждонть башка кие карми мельганзо якамо Кинень пек эряви те нолго туло эйкакшось. Коть тетясь [ 52 ]ули, лезэ эйстэнзэ а покш. Сон тунь сокор. Церанзо чаманть а содасы.

Тюма кирнавсь пуленть потсто, вакашканзо вачкинзе элезэнзэ, рудазов кеденть кепедизе конязонзо ды кеденть алга ваны раужо пеленть лангс.

Татю (Т. А. Раптанов, 1933) p54.jpg

Раужо пелесь, лиясто сыргиль икелев, лиясто лотки ве таркас се шканть стакасто лекси венельксэсь — мик алкукс кувси. Тюмань рунгова лиясто кельме ведь валови, лиясто жарс каяты такода радуви — учи поп пазава марто.

Уряжось ертызе руця панксонть, конань эйстэ арсесь стамо эстензэ панар ды тандадозь — эли радувазь ладсо ношкстась кудов.

Сон евардызе столенть, бабань парьстэнть таргизе столь ланга котстонь каямканть, путсь кши — каймака ды салдоркс.

— Совак, стакамор саинзат, совак коть евардык чама кедеть. — Уряжось хлопадизе нулков вишкине вальманть, сонсь кармась кияксонть теньсеме.

Аляка каштом чиресэ нурсесь рунгонзо ды месть мырнэсь курго потсо. Чи валдо бу! Ух, [ 53 ]Аляка атя ломанесь... стяко сэвизе пиже чекерь атянть. Тумо атясь ульнесь. Ней? Ней прок чев коськсь. Те весе сокор чись костизе.

— Мезе истя? — прок ответэнь апак учо пшкадсь Аляка.

— А содань мень народ юты ало пестэ. Больчом попось юты.

Намо чай. Престольной празник.

Аляка атя прок ливчакадьс. Сакалонзо пондакшкавтынзе. Сынь яла теке сэмекс казямот.

— Совак, пайстомо чи!

— Ужо.

— Ды кие карми учомат, дрянь эйкакш!

Тюма тень каршо мезеяк эзь пшкадть.

Сон стамбарнэ нолдызе элензэ, элестэнть вакашкетне новольсть ды порксавсть пильгалонзо! Прок эзь фатяяк, яла ваны.

Раужо пелесь келес саизе покш ульцянть морясо сэрей волнакс нежеди икелев. Сулейсэнзэ эль копачасы Тюмань.

Тюма а поты, кедензэ алга яла ваны сыця народонть ланкс.

Кода кармасть пачкодеме малав ды кода лоткить сестэ Тюмань седейстэ прок мезеяк сезеви: нотск, нотск моли седеезэ. Лиясто маряви прок песок марто мешок шлепадеви масторов.

Теде мейле таго сыргить. Таго прок раужо пель неждить икелев. Истя уш теснасто молить, секень вант ульцянть кавтов келемтсызь.

— Машт антихристнэнь!!!

Каятоць а паро вайгель. Тюмань мик соракадсь сывелезэ, пелезь шашсь кудо бокас, штобу илязо понго пильгалов.

Икеле мольсть кавто салдатт. Лангсост серой шинельть, конясост какардат, чапкаст серойть — кругост нолтневицят. Сабляст вандолсть чинть каршо. Сабляс тонть чи валдось кивтелк валдомсь Тюмань чамас. Тюма потазевсь. Се шканть Бусран лоземдызе човонькс томба верь потсо ломаненть, кона мольсь ютксост. [ 54 ]Верев ломанесь прась кинть лангс, пулесь потомдызе киргапарензэ. Мейле цетмарсо вачкодизь омбоценть. Омбоцесь сэредезь сельме вановтсо варштась удалов, се шканть кирьпиць песэ вачкодизь, теяк прась тона ваксс.

Теде мейле чавсть кинень кода паро, кие мейсэ понгсь, сень эйсэ машсь не кавто ломатнень. Сынь прок кевень пандт валяясть пуленть потсо, сынь прок сталень кавто комкат эсть макст пря каладомс не мокшнатнень вачкодематне алдо.

— Стать!..

Вейке салдатось кучкордызе празенть. Празесь сельгинзе куркстонзо верь пенькснень ды нардевтеме стясь пильге лангс. Омбоцесь чирькась прок меньгак жив поколь.

— Подавить прок кендялт! — Афрыч Костя лиссь юткстост. Сонзэ прязо ульнесь судрязь — касумозо виде кикс, ансяк ней котлявсть черензэ. Чамазо якстере, сакалонзо келейстэ сравтовсь мештеванзо, понкс пильгензэ кемтне ланга чавить, мештсэнзэ крест. Кедензэ кенерепакарь видьс илиштязь, сынсь вертсэ пурксевсть. Бусран нулав пинжаксо, котстонь сэньс нававт понкссо сизезь аксори вакссонзо.

Истя мольсть веле ютков. Истя ульцянть кувалт молемстэ кольгевсть верест не кавто братиники ломатне. Вейкесь седе алкине, кудряв, эчне, ламоксть снартнесь панжомс кургонзо. Эсть макт шка. Кода сон ушодыль вал, сестэ вачкодилизь курго ланга, туильть кургстонзо верть, потомиль кирга парезэ. Те ульнесь Филя. Омбоцесь седе сэрей, истяможо куратной, эчке, лавтовонзо келейть. Сон марясы, што моцезэ кармась маштомо, эрямозо эрявсь. Понгсь верев сельм вановтонтень ведь чиресэ вишка кудынест. Кардайсэст касыця марчось буто юхаи те кельме варма коштонть, коната токась ней.

Сон таргизе оймензэ, кургстонзо истяжо ертызе верев сельгенть ды кенярдозь кармась кортамо:

— Ялга! Товарищи! Минь кавонек братиники кулотан. Минек эйсэ маштыть эсинек ялгат, беднякт [ 55 ]среднякт. Маштовтыть эйсэнэк вана не паразитнэ! Вана! Тынь тынсь содасынк кие Афрыч Костя. Тынь тынсь содасынк кие Егор Иванычесь! Тынь ломатне чоподатадо. Неть салдатнэ лездыть буржуень властентень, неть меньшевикт. Минь кулотано, но не ломатне шлявить минек верьсэнть, шлявить мастор лангстонть допрок. Инязорось сяворсь престолстонзо, сяворить нетькак. Тынь думинк, ялгат. Минь виенэк тынк марто путынек кинень? Вана не паразитнэнень. Минек маштыть секс, што минь таргатано сынст коморо потсто беднотанть!..

Татю (Т. А. Раптанов, 1933) p57.jpg

— Молчать!!!

Хлоп! — кутьмерьс зэрькадизь серьдешкасо. Митя прок керязь чувто сяворсь. Бусран сайсь каштом подонь чавома молотка ды Митя лангс озась ласте, кармась тапамо прянть.

Егор Иванч — старшинакс ульнесь, кепець покш кев ды нолдызе Филянь карязонзо лангс.

— Тынь лепиятадо минек верьсэ... Теке марто Филя нилизе валонзо. Венемсь алянть рунгозо.

[ 56 ]— Кие а содасынзе Оляинь цератнень? Весе содасынек! Разбойникть, ворт! От мезень кисэ маштанок.

Татар Яков венельдясь кулы ломаненть кургс.

Народось яла промсь, ульцясь стакасто лексесь. Чись авардевть вановтсонзо валнось моданть.

— Орготь! Сторонись!

Миша паместеме ардьс алашасонть. Каламышкасонть пельс кулозь велявтнесь Песэ Кандрань вишка церась.

— А, матьта! Эзить пачкоть ялго! Кольневтят эсь прят, больчовик... — Хрола Миша марто таргизь крандайстэнть вейке—пильгте, омбоце прядо ды арьсесть нучк каямонзо пшти узерь лангс.

— Ох-х х!.

Стакасто таргизе церась оймензэ ды новольсь кедьстэст.

— Товарищи! —

Дема валгак больше эзь кенерь пшкадеме. Солдатось саблянть нерькстызе жив поколенть кургс.

— Товарищи! Нука мезе вантадо! Истя весе машнесамизь. Ванат миек кисэ кавонест братиники емасть ды вана колмоце. Уш мик колмоце! Мезенть кисэ? Самай сень кисэ, што минь мольдян буржуйтнень каршо, тейдяно равноправия. Минек арась меленэк воевамо. Минь нельгсынек бояртнэнь кедьстэ моданть, макссынек крестьятнэнень!

Капшазь кортась Игнатиень Дема. Сон прядызе валонзо ды чопавсь народонть юткс.

Алякань Иван, кода кирсь серьдешканть Филянь пря велькссэ, истяк кадовсь кепедезь.

Пси ветезэ кармась кельмеме, кармась само тензэ паметь. Сон стамбарнэ нолдызе серьдешканть ды седеень сэредезь варштась верь покольтне лангс ды лиссь кулыйтне ютксто.

Тюма, кода арась кудо бокантень истяк чувтомсь. Кодаяк таркастонзо асыргавтови рунгозо, прок мерят педясь.

Сонзэ икеле, кинть лангсо, пуленть потсто, косо сон ансяк тейнесь вакашкеть, сестэ неявить тензэ [ 57 ]прок велявтнить жив ломать. Прок пулесь вельтинзе сынст. Но зверень ломатне сокарить пуленть, кучкорить не кавто жив покольтнень.

Тюма укстась, кувакасто таргизе оймензэ. Ансяк сыргиксэль, мольсь Иван лелязо.

— Кулость кавонест братиники...

— Мейсь чавинк?

— А содан... Ломать кармавтымизь... Буто сынь больчовикть, антихрист, ворт, розбойникть. Митясь месть буто кулотан келя тынк кисэ.

— Минек кисэ?

— Да, келя тынк кисэ, од эрямонть кисэ. Инязоронтькак, келя, сынь ертызь Дема кадовсь. Пек вешнесть эйсэнзэ. Монь вакска ютась, мон эзия евта. Ну здоровт, нейгак некак эсть куло.

— Калмизь?

— Да. Ды яла теке живть. Иван евардынзе кедензэ.