Список № 9. Шәйехзада Бабич

From Wikisource
Jump to navigation Jump to search

Список № 9 (шиғыр)
автор Шәйехзада Бабич
Сығанаҡ: Бабич Шәйехзада. Беҙ үҙебеҙ - башҡорттар: шиғырҙар, поэмалар, фельетондар, мәҡәләләр, хаттар, көндәлектәр. - Өфө: Китап, 1994. - 640 бит.


Список № 9


Ошо көндә бер күпер алдында һеҙ -
                            ҡылдан нәҙек,
Ҡурҡыныс, бик ҡурҡыныс, аһ,
                        китһәгеҙ юлдан яҙып.

Ул күпер аҫты тамуҡтыр,
                   аръяғында - фирдәүес,
Кисһәгеҙ, ух... ниндәй ҡыҙыҡ,
                   уңдан аҙыҡ, һулдан аҙыҡ.

Һеҙ кисерһеҙ ул күперҙән
                   шатланып, рәхәтләнеп,
Тик фәҡәт башҡорт өсөн
                   булған пыраҡҡа атланып.

Башҡалар биргән һарыҡ-ҡуйҙарға
                   һеҙ атланһағыҙ,
Ант итәм, йығылып төшөрһөҙ
                   аҫҡы ҡатҡа ҡапланып.

Нәрҫә ул һеҙҙе тамуҡтан
                   ҡотҡара торған пыраҡ?
Ул пыраҡтыр туғыҙынсы
                 номерлы спискаң - сыраҡ.

Шул номерға бир тауыш,
                 алмаҡсы булһаң тупраҡ,
Юҡһа тауышың ситкә китһә,
                  йәмле ерҙәр әлфираҡ!

Китһә ерҙәр, бел шуны:
                   мәсет китер, мәктәп китер,
Йәмле башҡорт ерҙәрен
                   сирмеш, урыҫ ҡаплап китер.

Ер һиңә, тик ер: донъяң да - ер,
                      ғиҡабың да - ер,
Ерҙән айырылһаң, һине һәр кем
                      иҙеп, тапап китер.

Эй, туған башҡорт,
                     әгәр булмаһаң бәдбәхет,
Ерҙе һаҡла, ер ҡосаҡла,
                      ер һиңә алтын тәхет!

Беҙ туғыҙ ҡат әйтәбеҙ:
                    алдалаусылар байтаҡ булыр,
"Дин" тиеп, "милләт" тиеп
                     майлаусылар ҙа тап булыр.

Тыңлама, алданма, башҡорт,
                     бир тауыш туғыҙынсыға!
Шул ваҡыт йөҙ аҡ булыр һәм
                     изге күңелең шат булыр!