Священная история Ветхого завета (мокшень)/О/45
45. Соломон.
Давидть куломда меле оцязоркс арась сонь цёрац Соломон. Сон оцязоркс арамстонза кандсь Шкайти тёжянь жертват. Шкайсь тихтедсь теенза онцтонза дъ мярьгсь: анак кядьстон мезь теть эряви. Соломонсь мярьгсь: Шкабаваз, Тон путомайть монь оцязоркс, макст теень ёжа народть судендамс. Ся анамась тусь Шкайть мяльс; Сон мярьгсь Соломонти: тон анать Монь кядьстон аф козякадома, аф кувака эряф, а анать ёжа народть судендамс, сяс Мон максан теть ёжа дъ козякадома; тонь лацот оцязор фкявок ашель, афи ули. А къда кармат кулхцонкшнемон, кувалгафтса тонь эряфцень.
Васенда Соломонть пряёжец няевсь вага кодама тевса. Теенза састь судендама кафта ават; фкять кядьса идель; омбоцесь мярьгсь Соломонти: оцязор, минь тя авать марта эрятама фкя кудса; мон шачфтонь цёра, колма шида меле сонга шачфтсь цёра; ётай веть удом-бачк сон шавозе цёранц; веть сон съргозсь дъ полафтозе монь идезень: кулыть путозе теень, а моннеть сявозе эстиенза. Эста омбоце авась мярьгсь: монь цёразе живсь, а тонь кулофсь; Соломонсь мярьгсь: кандода палаш, керость живь идть пачк дъ максость фкя пяленц фкяти, а омбоце пяленц омбоцети. Живь идть виде тядяц мярьгсь: оцязор, катк макссазь идть тя авати, а омбоце авась мярьгсь: керость, катк аф ули аф теень, аф теенза. Эста Соломонсь мярьгсь: максость идть ся авати, кона аф мярьги керомдонза — сон идть тядяц.
Кода ломатне кулезь, кода Соломонсь судендазе ся аватнень тевснон, сембе кармасть сонь эздонза пелема.
Соломон тись Иерусалимса пяк цебярь церькав; ся церькавть эса тисть сисем кизот пяле мархта; сон тифоль Моисеень скиниянц коряс, аньцек сяда оцюста дъ цебярьста. Церькавть аделамда меле, сон пърдазень Израильскяй атятнень дъ мархтост кандозе Ковчег Заветть од церькавти. Кодак Ковчегть путозь, церькавсь валдомсь, народсь прась комада дъ озондсь Шкайти.
Соломонсь эрясь цебярьста, аньцек сиредем-бяли сувась грехс. Сонь ламоль иля масторонь ърьвянза. Сон тиендсь ся аванзон шкайснонди церькафт. Сиредем-бяли сонцке кармась якама ся куттненди ърьвянза мархта озонкшнема. Соломонть куломда меле оцязоркс арась сонь оцю цёрац Ровоамсь. Ровоамть пингста Еврейскяй царствась явсь кафтова.