Священная история Ветхого завета (мокшень)/О/25

From Wikisource
Jump to navigation Jump to search
Священная история Ветхого завета на Мокшанском наречии Мордовского языка  (1900)  by Евсевьев, Макар Евсевьевич
25-це главась.
Священная история Ветхого завета на Мокшанском наречии Мордовского языка. Издание Православного Миссионерского Общества. — Казань, типо-литография Императорского университета, 1900. — с. 30—31

25. Моисейть шачемац.

Иосифть куломда меле Еврейхне Египетса пяк раштасть. Египетса арась Фараонкс иля, кона афолезень сода Иосифть тевонзон. Тя Фараонсь пельсь, кода-бы Еврейхне пяк раштамда меле афольхть ара лангозост оцюкс. Сяс сон ёралексолезе лоткафтомс Еврейхнень пяк раштамаснон. Сон кармась синь кошярямост стака тевень тиеме, а одс шачи цёратнень мярьгсь ёрямда Нилти дъ шавондомдост. Тя пингть фкя Еврейть шачсь цёрац. Васенда тядяц колма кофт кяшендезе сонь эсь кудсонза, сяда меле ашель кода кяшендемс; сяс тядяц тись нюрямня, смалиндазе нюрямнять, путозе эзонза цёранять дъ нолдазе нюрямнять Нилти, берякть ваксс, а стиренцти — Мариамти мярьгсь кяшемда дъ ваномда мезь ули цёранять мархта. Ся пингть Фараонть стирец лиссь эшелеме Нилти; сон кулезе цёранять аварьдеманц, дъ мярьгсь таргамдонза сонь. Цёранясь тусь Фараонть стиренц мяльс; сон сявозе эстиенза касфтомс. Эста Мариамсь лиссь, мольсь Фараонть стиренц вакс дъ мярьгсь, аф эряви-ли теть идень тряй? Фараонть стирец мярьгсь: эряви, къда содат, арт терть. Мариамсь тердезе эсь тядянц; Фараонть стирец максозе теенза цёранять трямс. Тядяц трязе цёранять колма кизот дъ вятезе сонь Фараонть стиренцти. Фараонть стирец путсь теенза лем Моисей, мокшекс — ведьста сявф. Моисейсь эрясь Фараонть пяле нильгемонь кизот дъ тонафтфоль сембе Египетскяй книгатненди.