Правосла́вный мл҃твосло́въ/Чи́нъ лїті́и ѡ҆ ᲂу҆со́пшихъ, а҆́ще нѣ́сть сщ҃е́нника
| ←Мл҃твы ра̑зныѧ | Правосла́вный мл҃твосло́въ Чи́нъ лїті́и ѡ҆ ᲂу҆со́пшихъ, а҆́ще нѣ́сть сщ҃е́нника |
Чи́нъ лїті́и ѡ҆ ᲂу҆со́пшихъ, мїрски́мъ чи́номъ, до ѿда́нїѧ пра́здника па́схи→ |
| This page contains Church Slavonic text. Without proper font support, you may see question marks, boxes, or other symbols instead of letters and diacritics. Click here to download required fonts. |
Нача́ло ѻ҆бы́чное. Трист҃о́е, и҆ по Ѻ҆́ч҃е на́шъ: Гдⷭ҇и поми́лꙋй, вⷤі. Сла́ва, и҆ ны́нѣ: Прїиди́те, поклони́мсѧ: Ѱало́мъ ч҃: Живы́й въ по́мощи вы́шнѧгѡ: Сла́ва, и҆ ны́нѣ: А҆ллилꙋ́їа, гⷤ. И҆ тропарѝ сїѧ̑, глаⷭ҇ д҃:
Со дх҃и првⷣныхъ сконча́вшихсѧ дш҃ꙋ раба̀ твоегѡ̀ (дш҃ꙋ рабы̀ твоеѧ̀, дш҃ы̀ рабꙋ̑ твою̑, дш҃ѧ̀ ра̑бъ твои́хъ), сп҃се, ᲂу҆поко́й, сохранѧ́ѧ и҆̀ (сохранѧ́ѧ ю҆̀, сохранѧ́ѧ ѧ҆̀, сохранѧ́ѧ и҆̀хъ) во бл҃же́ннѣй жи́зни, ꙗ҆́же ᲂу҆ тебѐ чл҃колю́бче.
Въ поко́ищи твое́мъ гдⷭ҇и, и҆дѣ́же всѝ ст҃і́и твоѝ ᲂу҆покоева́ютсѧ, ᲂу҆поко́й и҆ дш҃ꙋ раба̀ твоегѡ̀ (дш҃ꙋ рабы̀ твоеѧ̀, дш҃ы̀ рабꙋ̑ твою̑, дш҃ѧ̀ ра̑бъ твои́хъ), ꙗ҆́кѡ є҆ди́нъ є҆сѝ чл҃вѣколю́бецъ.
Сла́ва: Ты̀ є҆сѝ бг҃ъ соше́дый во а҆́дъ, и҆ ᲂу҆́зы ѡ҆кова́нныхъ раⷥрѣши́вый: са́мъ и҆ дш҃ꙋ раба̀ твоегѡ̀ (дш҃ꙋ рабы̀ твоеѧ̀, дш҃ы̀ рабꙋ̑ твою̑, дш҃ѧ̀ ра̑бъ твои́хъ) ᲂу҆поко́й.
И҆ ны́нѣ: Є҆ди́на чⷭ҇таѧ и҆ непоро́чнаѧ дв҃о, бг҃а без̾ сѣ́мене ро́ждшаѧ, молѝ спасти́сѧ дш҃а́мъ и҆́хъ.
Поко́й, сп҃се на́шъ, съ првⷣными раба̀ твоегѡ̀ (рабꙋ̀ твою̀, раба̑ твоѧ̑, рабы̀ твоѧ̑), и сего̀ (сїю̀, сїѧ̑) вселѝ во дво́ры твоѧ̑, ꙗ҆́коже є҆́сть пи́сано, презира́ѧ, ꙗ҆́кѡ бл҃гъ, прегрѣшє́нїѧ є҆гѡ̀ (є҆ѧ̀, є҆ю̀, и҆́хъ), вѡ́лнаѧ и невѡ́лнаѧ, и҆ всѧ̑ ꙗ҆́же въ вѣ́денїи, и҆ не въ вѣ́денїи, чл҃колю́бче.
Со ст҃ы́ми ᲂу҆поко́й хрⷭ҇тѐ, дꙋ́шы ра̑бъ твои́хъ, и҆дѣ́же нѣ́сть болѣ́знь, ни печа́ль, ни воⷥдыха́нїе, но жи́знь беⷥконе́чнаѧ.
І҆́косъ: Са́мъ є҆ди́нъ є҆сѝ беⷥсме́ртный, сотвори́вый и҆ созда́вый человѣ́ка, земні́и ᲂу҆́бѡ ѿ землѝ созда́хомсѧ, и҆ въ зе́млю тꙋ́южде по́йдемъ, ꙗ҆́коже повелѣ́лъ є҆сѝ созда́вый мѧ̀ и҆ рекі́й мѝ: ꙗ҆́кѡ землѧ̀ є҆сѝ и҆ въ зе́млю ѿи́деши, а҆́може всѝ человѣ́цы по́йдемъ, наⷣгро́бное рыда́нїе творѧ́ще пѣ́снь: а҆ллилꙋ́їа.
Та́же, Досто́йнѡ є҆́сть: Сла́ва, и ны́нѣ: Гдⷭ҇и поми́лꙋй, гⷤ. блгⷭ҇вѝ. Мл҃твами ст҃ы́хъ ѻ҆тє́цъ:
Во бл҃же́нномъ ᲂу҆спе́нїи вѣ́чный поко́й пода́ждь гдⷭ҇и ᲂу҆́спшемꙋ рабꙋ̀ твоемꙋ̀ (ᲂу҆́спшей рабѣ̀ твое́й, ᲂу҆́спшима рабо́ма твои́ма, ᲂу҆́спшымъ рабѡ́мъ твои̑мъ), и҆́мⷬ҇къ, и҆ сотворѝ и҆̀мъ вѣ́чнꙋю па́мѧть.
Всѝ: Вѣ́чнаѧ па́мѧть, гⷤ.
Дꙋша̀ є҆гѡ̀ (дꙋша̀ єѧ̀, дꙋ́шы є҆ю̀, дꙋшѧ̀ и҆́хъ) во бл҃ги́хъ водвори́тсѧ (водвори́тѣсѧ, водворѧ́тсѧ), и҆ па́мѧть є҆гѡ̀ (єѧ̀, є҆ю̀, и҆́хъ) въ ро́дъ и҆ ро́дъ.