Правосла́вный мл҃твосло́въ/Тропарѝ, кондакѝ, задосто́йники и҆ вєлича̑нїѧ дванадесѧ́тыхъ пра́здникѡвъ

А҆́ще бꙋ́кви непра́вилнѣ зрѧ́тсѧ, грѧдѝ сѣ́мо, да грамматоси́ры є҆́млеши.

←Тропарѝ и҆ кондакѝ всеѧ̀ седми́цы

Правосла́вный мл҃твосло́въ Тропарѝ, кондакѝ, задосто́йники и҆ вєлича̑нїѧ дванадесѧ́тыхъ пра́здникѡвъ

Мл҃твы ра̑зныѧ→

This page contains Church Slavonic text. Without proper font support, you may see question marks, boxes, or other symbols instead of letters and diacritics. Click here to download required fonts.

Тропарѝ, кондакѝ, задосто́йники

и҆ вєлича̑нїѧ дванадесѧ́тыхъ пра́здникѡвъ,
та́же пра́здника па́схи.

Ржⷭ҇тво̀ прест҃ы́ѧ влⷣчцы на́шеѧ бцⷣы, и҆ приснодв҃ы мр҃і́и:
мѣ́сѧца септе́мврїа въ и҃ де́нь.

Тропа́рь, гла́съ д҃:

Ржⷭ҇тво̀ твоѐ бцⷣе дв҃о, ра́дость возвѣстѝ все́й вселе́ннѣй: и҆з̾ тебє́ бо возсїѧ̀ сл҃нце пра́вды, хрⷭ҇то́съ бг҃ъ на́шъ, и҆ разрꙋши́въ клѧ́твꙋ, дадѐ бл҃гослове́нїе, и҆ ᲂу҆праздни́въ сме́рть, дарова̀ на́мъ живо́тъ вѣ́чный.

Конда́къ, гла́съ то́йже:

І҆ѡакі́мъ и҆ а҆́нна поноше́нїѧ безча́дства, и҆ а҆да́мъ и҆ є҆́ѵа ѿ тлѝ сме́ртныѧ свободи́стасѧ, пречⷭ҇таѧ, во ст҃ѣ́мъ ржⷭ҇твѣ̀ твое́мъ. То̀ пра́зднꙋютъ и҆ лю́дїе твоѝ, вины̀ прегрѣше́нїй и҆зба́вльшесѧ, внегда̀ зва́ти тѝ: непло́ды ражда́етъ бцⷣꙋ, и҆ пита́тельницꙋ жи́зни на́шеѧ.

Задосто́йникъ:

Припѣ́въ: Велича́й дꙋшѐ моѧ̀, пресла́вное ржⷭ҇тво̀ бж҃їѧ мт҃ре.

І҆рмо́съ: Чꙋ́жде ма́терємъ дѣ́вство, и҆ стра́нно дѣ́вамъ дѣторожде́нїе: на тебѣ̀ бцⷣе, ѻ҆боѧ̑ ᲂу҆стро́ишасѧ. Тѣ́мъ тѧ̀ всѧ̑ племена̀ земна̑ѧ, непреста́ннѡ велича́емъ.

Велича́нїе:

Велича́емъ тѧ̀, прест҃а́ѧ дв҃о, и҆ чти́мъ ст҃ы́хъ твои́хъ роди́телей, и҆ всесла́вное сла́вимъ ржⷭ҇тво̀ твоѐ.

Воздви́женїе чⷭ҇тна́гѡ и҆ животворѧ́щагѡ крⷭ҇та̀:
мѣ́сѧца септе́мврїа въ д҃і де́нь.

Тропа́рь, гла́съ а҃:

Сп҃сѝ, гдⷭ҇и, лю́ди твоѧ̑, и҆ бл҃гословѝ достоѧ́нїе твоѐ, побѣ̑ды правосла̑внымъ хрⷭ҇тїа́нѡмъ на сопроти̑вныѧ да́рꙋѧ, и҆ твоѐ сохранѧ́ѧ крⷭ҇то́мъ твои́мъ жи́тельство.

Конда́къ, гла́съ д҃:

Вознесы́йсѧ на крⷭ҇тъ во́лею, тезоимени́томꙋ твоемꙋ̀ но́вомꙋ жи́тельствꙋ, щедрѡ́ты твоѧ̑ да́рꙋй хрⷭ҇тѐ бж҃е, возвеселѝ на́съ си́лою твое́ю, побѣ̑ды даѧ̀ на́мъ на сопоста́ты, посо́бїе и҆мꙋ́щымъ твоѐ ѻ҆рꙋ́жїе ми́ра, непобѣди́мꙋю побѣ́дꙋ.

Задосто́йникъ:

Припѣ́въ: Велича́й дꙋшѐ моѧ̀, пречⷭ҇тны́й крⷭ҇тъ гдⷭ҇нь.

І҆рмо́съ: Та́инъ є҆сѝ, бцⷣе, ра́й, невоздѣ́ланнѡ возрасти́вшїй хрⷭ҇та̀, и҆́мже крⷭ҇тное живоно́сное на землѝ насади́сѧ дре́во: тѣ́мъ ны́нѣ возноси́мꙋ, покланѧ́ющесѧ є҆мꙋ̀, тѧ̀ велича́емъ.

Велича́нїе:

Велича́емъ тѧ̀, живода́вче хрⷭ҇тѐ, и҆ чти́мъ крⷭ҇тъ тво́й ст҃ы́й, и҆́мже на́съ сп҃слъ є҆сѝ ѿ рабо́ты вра́жїѧ.

Вхо́дъ во хра́мъ
прест҃ы́ѧ влⷣчцы на́шеѧ бцⷣы, и҆ приснодв҃ы мр҃і́и:
мѣ́сѧца ное́мврїа въ к҃а де́нь.

Тропа́рь, гла́съ д҃:

Дне́сь бл҃говоле́нїѧ бж҃їѧ пред̾ѡбраже́нїе, и҆ человѣ́кѡвъ сп҃се́нїѧ проповѣ́данїе, въ хра́мѣ бж҃їи ꙗ҆́снѡ дв҃а ꙗ҆влѧ́етсѧ, и҆ хрⷭ҇та̀ всѣ̑мъ предвозвѣща́етъ. То́й и҆ мы̀ велегла́снѡ возопїи́мъ: ра́дꙋйсѧ, смотре́нїѧ зижди́телева и҆сполне́нїе.

Конда́къ, гла́съ то́йже:

Пречⷭ҇тый хра́мъ сп҃совъ, многоцѣ́нный черто́гъ и҆ дв҃а, сщ҃е́нное сокро́вище сла́вы бж҃їѧ, дне́сь вво́дитсѧ въ до́мъ гдⷭ҇нь, бл҃года́ть совводѧ́щи, ꙗ҆́же въ дс҃ѣ бжⷭ҇твенномъ, ю҆́же воспѣва́ютъ а҆́гг҃ли бж҃їи: сїѧ̀ є҆́сть селе́нїе нбⷭ҇ное.

Задосто́йникъ:

Припѣ́въ: А҆́гг҃ли вхожде́нїе пречⷭ҇тыѧ зрѧ́ще ᲂу҆диви́шасѧ, ка́кѡ дв҃а вни́де во ст҃а̑ѧ ст҃ы́хъ.

І҆рмо́съ: Ꙗ҆́кѡ ѡ҆дꙋшевле́нномꙋ бж҃їю кївѡ́тꙋ, да ника́коже ко́снетсѧ рꙋка̀ скве́рныхъ. Оу҆стнѣ́ же вѣ́рныхъ бцⷣѣ немо́лчнѡ, гла́съ а҆́гг҃ла воспѣва́юще, съ ра́достїю да вопїю́тъ: и҆́стиннѡ вы́шши всѣ́хъ є҆сѝ, дв҃о чⷭ҇таѧ.

Велича́нїе:

Велича́емъ тѧ̀, прест҃а́ѧ дв҃о, бг҃оизбра́ннаѧ ѻ҆трокови́це, и҆ чти́мъ є҆́же въ хра́мъ гдⷭ҇нь вхожде́нїе твоѐ.

Ржⷭ҇тво̀ гдⷭ҇а бг҃а и҆ сп҃са на́шегѡ і҆и҃са хрⷭ҇та̀:
мѣ́сѧца деке́мврїа въ к҃є де́нь.

Тропа́рь, гла́съ д҃:

Ржⷭ҇тво̀ твоѐ хрⷭ҇тѐ бж҃е на́шъ, возсїѧ̀ мі́рови свѣ́тъ ра́зꙋма: въ не́мъ бо ѕвѣзда́мъ слꙋжа́щїи, ѕвѣздо́ю ᲂу҆ча́хꙋсѧ, тебѣ̀ кла́нѧтисѧ сл҃нцꙋ пра́вды, и҆ тебѐ вѣ́дѣти съ высоты̀ восто́ка: гдⷭ҇и, сла́ва тебѣ̀.

Конда́къ, гла́съ г҃:

Дв҃а дне́сь пресꙋ́щественнаго ражда́етъ, и҆ землѧ̀ верте́пъ непристꙋ́пномꙋ прино́ситъ: а҆́гг҃ли съ па́стырьми славосло́вѧтъ, волсви́ же со ѕвѣздо́ю пꙋтеше́ствꙋютъ: на́съ бо ра́ди роди́сѧ ѻ҆троча̀ мла́до, превѣ́чный бг҃ъ.

Задосто́йникъ:

Припѣ́въ: Велича́й дꙋшѐ моѧ̀, чⷭ҇тнѣ́йшꙋю и҆ сла́внѣйшꙋю го́рнихъ во́инствъ, дв҃ꙋ пречⷭ҇тꙋю бцⷣꙋ.

І҆рмо́съ: Люби́ти ᲂу҆́бѡ на́мъ, ꙗ҆́кѡ безбѣ́дное стра́хомъ, ᲂу҆до́бѣе молча́нїе, любо́вїю же дв҃о, пѣ̑сни тка́ти спротѧже́ннѡ сложє́нныѧ, неꙋдо́бно є҆́сть: но и҆ мт҃и си́лꙋ, є҆ли́ко є҆́сть произволе́нїе, да́ждь.

Велича́нїе:

Велича́емъ тѧ̀, живода́вче хрⷭ҇тѐ, на́съ ра́ди ны́нѣ пло́тїю ро́ждшагосѧ ѿ безневѣ́стныѧ и҆ пречⷭ҇тыѧ дв҃ы мр҃і́и.

Бг҃оѧвле́нїе гдⷭ҇а бг҃а и҆ сп҃са на́шегѡ і҆и҃са хрⷭ҇та̀:
мѣ́сѧца і҆аннꙋа́рїа въ ѕ҃ де́нь.

Тропа́рь, гла́съ а҃:

Во і҆ѻрда́нѣ кр҃ща́ющꙋсѧ тебѣ̀ гдⷭ҇и, трⷪ҇ческое ꙗ҆ви́сѧ поклоне́нїе: роди́телевъ бо гла́съ свидѣ́тельствоваше тебѣ̀, возлю́бленнаго тѧ̀ сн҃а и҆менꙋ́ѧ: и҆ дх҃ъ въ ви́дѣ голꙋби́нѣ, и҆звѣ́ствоваше словесѐ ᲂу҆твержде́нїе. Ꙗ҆вле́йсѧ хрⷭ҇тѐ бж҃е, и҆ мі́ръ просвѣще́й, сла́ва тебѣ̀.

Конда́къ, гла́съ д҃:

Ꙗ҆ви́лсѧ є҆сѝ дне́сь вселе́ннѣй, и҆ свѣ́тъ тво́й гдⷭ҇и, зна́менасѧ на на́съ, въ ра́зꙋмѣ пою́щихъ тѧ̀: прише́лъ є҆сѝ, и҆ ꙗ҆ви́лсѧ є҆сѝ, свѣ́тъ непристꙋ́пный.

Задосто́йникъ:

Припѣ́въ: Велича́й дꙋшѐ моѧ̀, чⷭ҇тнѣ́йшꙋю го́рнихъ во́инствъ, дв҃ꙋ пречⷭ҇тꙋю бцⷣꙋ.

І҆рмо́съ: Недоꙋмѣ́етъ всѧ́къ ꙗ҆зы́къ бл҃гохвали́ти по достоѧ́нїю, и҆зꙋмѣва́етъ же ᲂу҆́мъ и҆ премі́рный пѣ́ти тѧ̀, бцⷣе: ѻ҆ба́че бл҃га́ѧ сꙋ́щи, вѣ́рꙋ прїимѝ, и҆́бо любо́вь вѣ́си бжⷭ҇твеннꙋю на́шꙋ: ты́ бо хрⷭ҇тїа́нъ є҆сѝ предста́тельница, тѧ̀ велича́емъ.

Велича́нїе:

Велича́емъ тѧ̀, живода́вче хрⷭ҇тѐ, на́съ ра́ди ны́нѣ пло́тїю крⷭ҇ти́вшагосѧ ѿ і҆ѡа́нна въ вода́хъ і҆ѻрда́нскихъ.

Срѣ́тенїе гдⷭ҇а бг҃а и҆ сп҃са на́шегѡ і҆и҃са хрⷭ҇та̀:
мѣ́сѧца феврꙋа́рїа во в҃ де́нь.

Тропа́рь, гла́съ а҃:

Ра́дꙋйсѧ бл҃года́тнаѧ бцⷣе дв҃о, и҆з̾ тебє́ бо возсїѧ̀ сл҃нце пра́вды хрⷭ҇то́съ бг҃ъ на́шъ, просвѣща́ѧй сꙋ́щыѧ во тьмѣ̀: весели́сѧ и҆ ты̀ ста́рче првⷣный, прїе́мый во ѡ҆б̾ѧ́тїѧ свободи́телѧ дꙋ́шъ на́шихъ, да́рꙋющаго на́мъ воскрⷭ҇нїе.

Конда́къ, гла́съ то́йже:

Оу҆тро́бꙋ дв҃и́чꙋ ѡ҆ст҃и́вый ржⷭ҇тво́мъ твои́мъ, и҆ рꙋ́цѣ сѷмеѡ́нѣ бл҃гослови́вый, ꙗ҆́коже подоба́ше, предвари́въ, и҆ ны́нѣ сп҃слъ є҆сѝ на́съ, хрⷭ҇тѐ бж҃е: но ᲂу҆мирѝ во бране́хъ жи́тельство, и҆ ᲂу҆крѣпѝ лю́ди, и҆́хже возлюби́лъ є҆сѝ, є҆ди́не чл҃вѣколю́бче.

Задосто́йникъ:

Припѣ́въ: Бцⷣе дв҃о, ᲂу҆пова́нїе хрⷭ҇тїа́нѡмъ, покры́й, соблюдѝ и҆ сп҃сѝ на тѧ̀ ᲂу҆пова́ющихъ.

І҆рмо́съ: Въ зако́нѣ сѣ́ни и҆ писа́нїй ѡ҆́бразъ ви́димъ, вѣ́рнїи: всѧ́къ мꙋ́жескїй по́лъ, ложесна̀ разверза́ѧ, ст҃ъ бг҃ꙋ. Тѣ́мъ перворожде́нное сло́во ѻ҆ц҃а̀ безнача́льна, сн҃а первородѧ́щасѧ мт҃рїю неискꙋсомꙋ́жнѡ, велича́емъ.

Велича́нїе:

Велича́емъ тѧ̀, живода́вче хрⷭ҇тѐ, и҆ чти́мъ пречⷭ҇тꙋю мт҃рь твою̀, є҆́юже по зако́нꙋ ны́нѣ прине́слсѧ є҆сѝ въ хра́мъ гдⷭ҇нь.

Бл҃говѣ́щенїе прест҃ы́ѧ влⷣчцы на́шеѧ бцⷣы,
и҆ приснодв҃ы мр҃і́и:
мѣ́сѧца ма́рта въ к҃є де́нь.

Тропа́рь, гла́съ д҃:

Дне́сь сп҃се́нїѧ на́шегѡ глави́зна, и҆ є҆́же ѿ вѣ́ка та́инства ꙗ҆вле́нїе: сн҃ъ бж҃їй, сн҃ъ дв҃ы быва́етъ, и҆ гаврїи́лъ бл҃года́ть бл҃говѣствꙋ́етъ. Тѣ́мже и҆ мы̀ съ ни́мъ бцⷣѣ возопїи́мъ: ра́дꙋйсѧ бл҃года́тнаѧ, гдⷭ҇ь съ тобо́ю.

Конда́къ, гла́съ и҃:

Взбра́нной воево́дѣ побѣди́тєльнаѧ, ꙗ҆́кѡ и҆зба́вльшесѧ ѿ ѕлы́хъ, бл҃года́рствєннаѧ восписꙋ́емъ тѝ рабѝ твоѝ, бцⷣе: но ꙗ҆́кѡ и҆мꙋ́щаѧ держа́вꙋ непобѣди́мꙋю, ѿ всѧ́кихъ на́съ бѣ́дъ свободѝ, да зове́мъ тѝ: ра́дꙋйсѧ, невѣ́сто неневѣ́стнаѧ.

Задосто́йникъ:

Припѣ́въ: Бл҃говѣствꙋ́й, землѐ, ра́дость ве́лїю, хвали́те нб҃са̀ бж҃їю сла́вꙋ.

І҆рмо́съ: Ꙗ҆́кѡ ѡ҆дꙋшевле́нномꙋ бж҃їю кївѡ́тꙋ, да ника́коже ко́снетсѧ рꙋка̀ скве́рныхъ. Оу҆стнѣ́ же вѣ́рныхъ бцⷣѣ немо́лчнѡ, гла́съ а҆́гг҃ла воспѣва́юще, съ ра́достїю да вопїю́тъ: ра́дꙋйсѧ, бл҃года́тнаѧ, гдⷭ҇ь съ тобо́ю.

Велича́нїе:

А҆рха́гг҃льскїй гла́съ вопїе́мъ тѝ, чⷭ҇таѧ: ра́дꙋйсѧ бл҃года́тнаѧ, гдⷭ҇ь съ тобо́ю.

Вхо́дъ гдⷭ҇ень въ і҆ерⷭ҇ли́мъ:
въ недѣ́лю ва́їй.

Тропа́рь, гла́съ а҃:

Ѻ҆́бщее воскрⷭ҇нїе пре́жде твоеѧ̀ стрⷭ҇ти ᲂу҆вѣрѧ́ѧ, и҆з̾ ме́ртвыхъ воздви́глъ є҆сѝ ла́зарѧ хрⷭ҇тѐ бж҃е. Тѣ́мже и҆ мы̀ ꙗ҆́кѡ ѻ҆́троцы побѣ́ды зна́мєнїѧ носѧ́ще, тебѣ̀ побѣди́телю сме́рти вопїе́мъ: ѡ҆са́нна въ вы́шнихъ, бл҃гослове́нъ грѧды́й во и҆́мѧ гдⷭ҇не.

И҆ дрꙋгі́й, гла́съ д҃:

Спогре́бшесѧ тебѣ̀ креще́нїемъ хрⷭ҇тѐ бж҃е на́шъ, безсме́ртныѧ жи́зни сподо́бихомсѧ воскрⷭ҇нїемъ твои́мъ, и҆ воспѣва́юще зове́мъ: ѡ҆са́нна въ вы́шнихъ, бл҃гослове́нъ грѧды́й во и҆́мѧ гдⷭ҇не.

Конда́къ, гла́съ ѕ҃:

На прⷭ҇то́лѣ на нб҃сѝ, на жребѧ́ти на землѝ носи́мый хрⷭ҇тѐ бж҃е, а҆́гг҃лѡвъ хвале́нїе, и҆ дѣте́й воспѣва́нїе прїѧ́лъ є҆сѝ зовꙋ́щихъ тѝ: бл҃гослове́нъ є҆сѝ грѧды́й а҆да́ма воззва́ти.

Задосто́йникъ:

І҆рмо́съ: Бг҃ъ гдⷭ҇ь, и҆ ꙗ҆ви́сѧ на́мъ, соста́вите пра́здникъ, и҆ веселѧ́щесѧ прїиди́те, возвели́чимъ хрⷭ҇та̀, съ ва́їами и҆ вѣ́твьми, пѣ́сньми зовꙋ́ще: бл҃гослове́нъ грѧды́й во и҆́мѧ гдⷭ҇а сп҃са на́шегѡ.

Велича́нїе:

Велича́емъ тѧ̀, живода́вче хрⷭ҇тѐ, ѡ҆са́нна въ вы́шнихъ, и҆ мы̀ тебѣ̀ вопїе́мъ: бл҃гослове́нъ грѧды́й во и҆́мѧ гдⷭ҇не.

Свѣ́тлое хрⷭ҇то́во воскрⷭ҇нїе. Па́сха.

Тропа́рь, гла́съ є҃:

Хрⷭ҇то́съ воскр҃се и҆з̾ ме́ртвыхъ, сме́ртїю сме́рть попра́въ, и҆ сꙋ́щымъ во гробѣ́хъ живо́тъ дарова́въ.

Конда́къ, гла́съ и҃:

А҆́ще и҆ во гро́бъ снизше́лъ є҆сѝ, безсме́ртне, но а҆́довꙋ разрꙋши́лъ є҆сѝ си́лꙋ, и҆ воскрⷭ҇лъ є҆сѝ ꙗ҆́кѡ побѣди́тель хрⷭ҇тѐ бж҃е, жена́мъ мѷроно́сицамъ вѣща́вый: ра́дꙋйтесѧ! и҆ твои̑мъ а҆пⷭ҇лѡмъ ми́ръ да́рꙋѧй, па́дшымъ подаѧ́й воскрⷭ҇нїе.

Задосто́йникъ:

Припѣ́въ: А҆́гг҃лъ вопїѧ́ше бл҃года́тнѣй: чⷭ҇таѧ дв҃о ра́дꙋйсѧ, и҆ па́ки рекꙋ̀, ра́дꙋйсѧ: тво́й сн҃ъ воскр҃се тридне́венъ ѿ гро́ба, и҆ мє́ртвыѧ воздви́гнꙋвый: лю́дїе весели́тесѧ.

І҆рмо́съ: Свѣти́сѧ, свѣти́сѧ, но́вый і҆ерⷭ҇ли́ме: сла́ва бо гдⷭ҇нѧ на тебѣ̀ возсїѧ̀. Ликꙋ́й ны́нѣ, и҆ весели́сѧ сїѡ́не. Ты́ же чⷭ҇таѧ красꙋ́йсѧ бцⷣе, ѡ҆ воста́нїи ржⷭ҇тва̀ твоегѡ̀.

Велича́нїе въ недѣ́лю а҆нтїпа́схи:

Велича́емъ тѧ̀, живода́вче хрⷭ҇тѐ, на́съ ра́ди во а҆́дъ сше́дшаго, и҆ съ собо́ю всѧ̑ воскр҃си́вшаго.

Вознесе́нїе гдⷭ҇а бг҃а и҆ сп҃са на́шегѡ і҆и҃са хрⷭ҇та̀:
въ четверто́къ ѕ҃^ѧ седми́цы по па́сцѣ.

Тропа́рь, гла́съ д҃:

Возне́слсѧ є҆сѝ во сла́вѣ хрⷭ҇тѐ бж҃е на́шъ, ра́дость сотвори́вый ᲂу҆ченикѡ́мъ ѡ҆бѣтова́нїемъ ст҃а́гѡ дх҃а, и҆звѣщє́ннымъ и҆̀мъ бы́вшымъ бл҃гослове́нїемъ, ꙗ҆́кѡ ты̀ є҆сѝ сн҃ъ бж҃їй, и҆зба́витель мі́ра.

Конда́къ, гла́съ ѕ҃:

Е҆́же ѡ҆ на́съ и҆спо́лнивъ смотре́нїе, и҆ ꙗ҆̀же на землѝ соедини́въ нбⷭ҇нымъ, возне́слсѧ є҆сѝ во сла́вѣ хрⷭ҇тѐ бж҃е на́шъ, ника́коже ѿлꙋча́ѧсѧ, но пребыва́ѧ неѿстꙋ́пный, и҆ вопїѧ̀ лю́бѧщымъ тѧ̀: а҆́зъ є҆́смь съ ва́ми, и҆ никто́же на вы̀.

Задосто́йникъ:

Припѣ́въ: Велича́й дꙋшѐ моѧ̀, возне́сшагосѧ ѿ землѝ на нб҃о, хрⷭ҇та̀ жизнода́вца.

І҆рмо́съ: Тѧ̀ па́че ᲂу҆ма̀ и҆ словесѐ мт҃рь бж҃їю, въ лѣ́то безлѣ́тнаго неизрече́ннѡ ро́ждшꙋю, вѣ́рнїи є҆диномꙋ́дреннѡ велича́емъ.

Велича́нїе:

Велича́емъ тѧ̀, живода́вче хрⷭ҇тѐ, и҆ почита́емъ є҆́же на нб҃са̀ съ пречⷭ҇тою твое́ю пло́тїю, бж҃е́ственное вознесе́нїе.

Пѧтдесѧ́тница. Де́нь ст҃ы́ѧ трⷪ҇цы:
въ недѣ́лю и҃^ю по па́сцѣ.

Тропа́рь, гла́съ и҃:

Бл҃гослове́нъ є҆сѝ хрⷭ҇тѐ бж҃е на́шъ, и҆́же премꙋ́дры ловцы̀ ꙗ҆вле́й, низпосла́въ и҆̀мъ дх҃а ст҃а́го, и҆ тѣ́ми ᲂу҆ловле́й вселе́ннꙋю, человѣколю́бче сла́ва тебѣ̀.

Конда́къ, гла́съ то́йже:

Е҆гда̀ снизше́дъ ѧ҆зы́ки слїѧ̀, раздѣлѧ́ше ꙗ҆зы́ки вы́шнїй: є҆гда́ же ѻ҆́гненныѧ ѧ҆зы́ки раздаѧ́ше, въ соедине́нїе всѧ̑ призва̀: и҆ согла́снѡ сла́вимъ всест҃а́го дх҃а.

Задосто́йникъ:

Припѣ́въ: А҆пⷭ҇ли соше́ствїе ᲂу҆тѣ́шителѧ зрѧ́ще ᲂу҆диви́шасѧ, ка́кѡ въ ви́дѣ ѻ҆́гненныхъ ѧ҆зы̑къ ꙗ҆ви́сѧ дх҃ъ ст҃ы́й. ꙳^[1]

І҆рмо́съ: Ра́дꙋйсѧ цр҃и́це, матеродѣ́вственнаѧ сла́во: всѧ́ка бо ᲂу҆добоѡбраща́тельнаѧ бл҃гоглаго́ливаѧ ᲂу҆ста̀ вѣті́йствовати не мо́гꙋтъ, тебѐ пѣ́ти досто́йнѡ: низꙋмѣва́етъ же ᲂу҆́мъ всѧ́къ твоѐ рождество̀ разꙋмѣ́ти. Тѣ́мже тѧ̀ согла́снѡ сла́вимъ.

Велича́нїе:

Велича́емъ тѧ̀, живода́вче хрⷭ҇тѐ, и҆ чти́мъ всест҃а́го дх҃а твоего̀, є҆го́же ѿ ѻ҆ц҃а̀ посла́лъ є҆сѝ бж҃е́ствєннымъ ᲂу҆ч҃нкѡмъ твои̑мъ.

Преѡбраже́нїе гдⷭ҇а бг҃а и҆ сп҃са на́шегѡ і҆и҃са хрⷭ҇та̀:
мѣ́сѧца а҆́ѵгꙋста въ ѕ҃ де́нь.

Тропа́рь, гла́съ з҃:

Преѡбрази́лсѧ є҆сѝ на горѣ̀ хрⷭ҇тѐ бж҃е, показа́вый ᲂу҆ч҃нкѡ́мъ твои̑мъ сла́вꙋ твою̀, ꙗ҆́коже можа́хꙋ: да возсїѧ́етъ и҆ на́мъ грѣ̑шнымъ свѣ́тъ тво́й присносꙋ́щный, мл҃твами бцⷣы, свѣтода́вче сла́ва тебѣ̀.

Конда́къ, гла́съ то́йже:

На горѣ̀ преѡбрази́лсѧ є҆сѝ, и҆ ꙗ҆́коже вмѣща́хꙋ ᲂу҆ч҃нцы̀ твоѝ, сла́вꙋ твою̀ хрⷭ҇тѐ бж҃е ви́дѣша: да є҆гда́ тѧ ᲂу҆́зрѧтъ распина́ема, страда́нїе ᲂу҆́бѡ ᲂу҆разꙋмѣ́ютъ во́льное, мі́рови же проповѣ́дѧтъ: ꙗ҆́кѡ ты̀ є҆сѝ вои́стиннꙋ ѻ҆́ч҃ее сїѧ́нїе.

Задосто́йникъ:

Припѣ́въ: Велича́й дꙋшѐ моѧ̀, на ѳавѡ́рѣ преѡбрази́вшагосѧ гдⷭ҇а.

І҆рмо́съ: Ржⷭ҇тво̀ твоѐ нетлѣ́нно ꙗ҆ви́сѧ: бг҃ъ и҆з̾ бокꙋ̀ твоє́ю про́йде, ꙗ҆́кѡ плотоно́сецъ ꙗ҆ви́сѧ на землѝ, и҆ съ человѣ́ки поживѐ. Тѧ̀ бцⷣе, тѣ́мъ всѝ велича́емъ.

Велича́нїе:

Велича́емъ тѧ̀, живода́вче хрⷭ҇тѐ, и҆ почита́емъ пречⷭ҇тыѧ пло́ти твоеѧ̀ пресла́вное преѡбраже́нїе.

Оу҆спе́нїе прест҃ы́ѧ влⷣчцы на́шеѧ бцⷣы,
и҆ приснодв҃ы мр҃і́и:
мѣ́сѧца а҆́ѵгꙋста въ є҃і де́нь.

Тропа́рь, гла́съ а҃:

Въ ржⷭ҇твѣ̀ двⷭ҇тво сохрани́ла є҆сѝ, во ᲂу҆спе́нїи мі́ра не ѡ҆ста́вила є҆сѝ бцⷣе, преста́виласѧ є҆сѝ къ животꙋ̀, мт҃и сꙋ́щи живота̀: и҆ мл҃твами твои́ми и҆збавлѧ́еши ѿ сме́рти дꙋ́шы на́шѧ.

Конда́къ, гла́съ в҃:

Въ мл҃твахъ неꙋсыпа́ющꙋю бцⷣꙋ, и҆ въ предста́тельствахъ непрело́жное ᲂу҆пова́нїе, гро́бъ и҆ ᲂу҆мерщвле́нїе не ᲂу҆держа́ста: ꙗ҆́коже бо живота̀ мт҃рь, къ животꙋ̀ преста́ви, во ᲂу҆тро́бꙋ всели́выйсѧ приснодв҃ственнꙋю.

Задосто́йникъ:

Припѣ́въ: А҆́гг҃ли ᲂу҆спе́нїе пречⷭ҇тыѧ ви́дѣвше ᲂу҆диви́шасѧ, ка́кѡ дв҃а восхо́дитъ ѿ землѝ на нб҃о.

І҆рмо́съ: Побѣжда́ютсѧ є҆стества̀ ᲂу҆ста́вы въ тебѣ̀, дв҃о чⷭ҇таѧ: дѣ́вствꙋетъ бо ржⷭ҇тво̀, и҆ живо́тъ пред̾ѡбрꙋча́етъ сме́рть. По ржⷭ҇твѣ̀ дв҃а, и҆ по сме́рти жива̀, сп҃са́еши при́снѡ, бцⷣе, наслѣ́дїе твоѐ.

Велича́нїе:

Велича́емъ тѧ̀, пренепоро́чнаѧ мт҃и хрⷭ҇та̀ бг҃а на́шегѡ, и҆ всесла́вное сла́вимъ ᲂу҆спе́нїе твоѐ.

---

1. ꙳ Вѣ́домѡ бꙋ́ди, ꙗ҆́кѡ се́й припѣ́въ въ цвѣтно́й трїѡ́ди не ѡ҆брѣта́етсѧ, нижѐ вътѵ́пїцѣ, пи́санъ же є҆́сть въ цвѣтно́й трїѡ́ди но́тнагѡ пѣ́нїѧ сѷнода́льнагѡ и҆зда́нїѧ.

This is a translation and has a separate copyright status from the original text. The license for the translation applies to this edition only.
Original:
Translation: