Поладкстомо (2016)/Поладкстомо/8
[93]
VIII
Медьковонь васень чись совась велентень исень саевть одирьвакс: Якстерть мериця чама, маней, келей мизолкс марто. Менельсэнть, кона ёнов а варштат, а неят ашо пельиень човнеяк. Куш вейке кодамояк кадоволь сэнь паксятнес! Те - ушодкс. Чипаесь ансяк кенерсь [94] кирвазтеме каштомонзо. Ужо, юты час, омбоце, ды Видяймезень каршо пичетнень пшти пряст ушодыть эль редявиксстэ лыкамо. Чикуншка малава нурязевить вийс совиця вармадонть, ушодови нусманя, седеень лужакавтыця кувака морост. Мезде сон, панжови киненьгак?..
Видяень кой: сон кавксодо икеле а стякшны. Стямодо мейле лиси ушов ды васняяк топавтсы вирьга чийнемань таликанзо. Эрьвань эсензэ эрямо лувозо. Аламо чинь-чоп яжи карязонзо — вийть, калорият ютавты, — эряви келень лисемс берть-берть чийнемскак. Тень кис сталмонь ормадо а майсеви. Верьга-ланга килонь челькинеяк а неят лангстонзо. А мерят, тензэ ниленьгеменде ламо, а мерят. Од цёра!
Сась чийнемстэ, нарынзе васоньпеельсэ чуро сакалонзо, шлёборь-шлёборь шлясь-нардась, озась стувор экшс. Истямо стувор донть, кодамо анокстакшны Юлия Григорьевна, шожда эчкелгадомскак. Кияк лия, паряк, теевельгак кенкшка а кельгицякс. Кияк, ансяк аволь Видяй. Сонзэ, ёвтазденть верьга, улить невак куядо лия ванстыцянзо-як. Васенцесь — коймесь. Лездыть тензэ сянгось, ангорямкась, модакаесь, узересь, таратайкась... Вана сынь стястькак сёлтокс куялгадомантень.
Лиссь Видяй кузтемпес ды верде, прок ине венчень сэдне лангсто, варштась пандянь-пандянь явнозь «паксяст» лангс. «Зяро вийть путозь, зяро пуворькст кадновсть кедькоморозон...» — арсезевсь. Мелезэнзэ тусть теезь тевензэ, мельспародонть мик мизолкс артызе кургонзо, мезесь Видяень эрсесь чуросто. Вансь ды сонсь тей-тов онкстнесь превсэнзэ: мезестэ течи ушодомс?
«Каня тон, аля, стувтык, модамареть учить вальсема? Саик латалдо вечкевикс модакай ялгат ды топ-топ модарьумав».
Истя тейськак. Модамарденть аламоль, ялатеке барцаемс модакайсэнть савсь чикуншкас. Те кельсэ весемесь тееви лодорсо, кундат топавтомо тень эли тонань, човонеть човсесак: «Те ков истя мон ванынь?».
Прядома малава сась ваксозонзо авазо.
— Ванса, прядат! Унжась сельметь икелев эзь понгоне? Тедеде, маряви, седе аламо... Шказо ярсамонь. А молят? — [95] пшкадсь, кедьсэнзэ ахолдась цёранстэнь Юлия Григорьевна. Вановтсонзо ютась вальсезтнень ланга. «Теи — седей путы...» — шнызе эсь потмова, макссь питне теезентень.
— Арась, авай, — видемтизе рунгонзо, полавтызе оймензэ, варштась аванзо лангс Видяй, — прядса. Аламо кадовсь.
— Тон, тагояк мерян, кирдть мельсэть унжанть. Нолдасак — кармат верьга вайгельть пижнеме, — макссь превть авазо ды тусь стамбарнэ — пильгетне аволь ливчанятнестэ, допрок «нузялгадсть» — теке яннэванть кудов.
Видяй поладызе модамарень вальсеманзо.
Апак учо косто-бути васолдо-васолдо сась-совась превезэнзэ Катя марто меельце вастовомась. Кадовсь артовксокс: машинань панжадо вальмине, эйсэнзэ Катянь менель сэнь сельме чамазо, ашо черензэ...
Кодат ансяк тюнихат а совсить превезэть! «Кода мон сестэ бажинь, зяро мель путынь ве кониксэ удсема шкастонок теевемс седе малавиксэкс ды эрявиксэкс вейкенек-вейкенек туртов! Арась, мезеяк паро тенек тень эйстэ эзь тееве. Мекс «тенек»? Монень — те седе виде. А мезть менчевемс. Катя, визькс ледстнемскак, текеде, куш вечкилимим превстэ лисемга, оргодекшнеськак... Аволь туекшнесь — оргодекшнесь. Кода мон сестэ кадовинь эриекс, течис превень а сатыть чарькодемс. Сядо верьгизт, марявсь, раздесть седеем. Эхе-хе-э-э, кадык ёколдозь, пингенть печтяма...» — умонь ды аволь умонь ютазденть арсезь, колорадонседенть апак стувтне, прядызе Видяй вальсеманзо.
Саизе вить кедезэнзэ модакаенть, шождасто лекстясь — прядовсь тевезэ, сыргась кудов. «Ушосонть аштемков. Кизэнь ушодовома шка. Кизэ, мекс тон истямо нурькинят? Теке панжиковонь маней экше ве. А марявияк, каить пря розтне-товсюротне, ютыть зярыя таргот, ды паксятне валовить сырнень тюссо, комбайнатне яволявтыть сёксенть малавгадомадо. А редясакак, килейтнень пиже черест тия-тува мазылгавтсызь ожо сэльнеть. Кувалгадыть-экшелгадыть ветне. Кизэ, кизэ, иля капша!»
Теке паро ушман, Видяй пачтясь аванстэнь:
— Саты теть, — пеедькшнезь, мельспаросо мерсь Юлия Григорьевна.
Чикуншкань ярсамо лувось-коесь прядовсь. Чиремемс оймсеме? Иля арсеяк. Тевесь, кодамо илязо уле, кадындерясак, — портянзат. А тейсак шкастонзо, мейле сави псилгалемс кавксть седе ламо. Секскак...
Видяй, кода валскеяк, лиссь кузтемпес ды ней уш апак кавтолдо валгсь кузтемаванть, ютась пирев. «Мхы! Пурькань пандясон — палома! Мадстема. Аволь умок, теке исяк, атят-сэрдят, авань марто кашкинек велькссэнзэ, эрь, таго тикше потсо. Эряви идемс пандянть «апак терде инжетнеде». Нолдасыть ланга, сы шка — таргат чеерень пулынеть...»
Кундась тевентень. Ноцори час, ушодовсь омбоце. Чипаесь пицезь пици. Потамс зярс а арси. «Кода аватне колхозонь шкатнестэ цидярдсть чинь-чоп комадо суронь кочкомсто?»
— Паряк, лездан? — апак учо сезизе кочкицянть арсемань сурензэ авань вайгель.
Видяй кепедизе прянзо, эрязасто видемтизе рунгонзо... икелензэ аштесь шабраст — ниленьгеменьшка иесэ, Видяень кондямо сэрей, чова рунго ава.
— Капшить вельть, шкадо икеле видить. Секс тикшесь набойгадсь. Неть чаво кортамот: келя, пурькатне видемат сеске, кодак солы ловось. Кенгелемат, — ушодсь авась, Видяень апак кевксте, тонавтомонзо.
«Каня весе аватне истят тонавтыцят?..» — сувнекс ютась кочкицянть прява мелесь.
— Теде, Лиля, содан. Ды аберяньстэ. Мерема, истямокс уш ломантнень начтымизь — капшицякс. Солы ловось — кецнят, седееть а кельги мештезэть: тевть лисить! Секс капшан. Ды аволь ансяк мон. Тонськак, ванан...
— Те истя, — прась мартонзо вемельс, чатьмонезевсь тюжала сельме Лиля.
[97] Ушосонть аштемковонь пси. Секскак Лиля оршазь чинть коряс — кекшезь ансяк визькс тарканзо. Прясонзо ашо, кувака конякске марто кепкине.
«Вельть уш коськана...» — варштась, эзь кирдеве, ды тешкстызе эськанзо Видяй.
Тонавты Лиля, кода-зярдо видемс-путомс, сонсь, пандячиресэ аштезь, котапрясонзо ёзы коське моданть.
— Пароль, туевельгак пиземне, — сертизе теевикс каштонть Видяй. — Чокшне, — явинзе кедензэ, — куш сезевть, сави тень кой-мезтнень валномс...
— Моненьгак, — нолдызе кургстонзо валонзо ченгезь, тусто-тюжа, теке негрань, рунго Лиля, арсезевсь ды поладсь: — Видяй, мекс вестькак эзить сакшно тенек? Зяроце ие шабратано...
Каштмолема.
— Истяк... Тевтне кирдить, — нуднозь мерсь Видяй, — а нолдыть. А тонсь? — кончтась кевкстемстэ.
— Тевтне, бути эряви, лоткавтовить, — мусь мезе меремс тень каршо Лиля. «А тонсь?» кевкстеманть «нилизе».
— Сован кодаяк, варштан... — мерсь Видяй та-кода безардезь, мельтеме. — Мейле мезе?
— Мезе... Мезе теть эряви?! — раказевсь авась мельспародонть.
— Тон эряват! — текеньсэ пандызе, пейдезевсь Видяй, эськанзо арсезевсь: «Вельть коськанат, тейтерь, чевте таркине эйсэть а неяви... Эно муевлинь, улевельгак шумбра ветницям... Ней...».
— Ванан, шка мартон ёмавтнят, налкставинь, — шешкезевсь ве таркасо Лиля. — Туян, эсеньгак тевтне чадыть. Варштак, алкукскак, кодаяк. Те таргостонть авамгак кудосо а ули. Кадован ськамон. Калякатано...
Инжесь тусь.
Видяй поладызе тевензэ. Таргси пурькань недькстнэнь ютксто тикшинетнень. Кочки-кочки, видемтьсы сэрензэ, таго кочки...
Пандянть кувалмозо оно — вайгельпе! Кодат ансяк мельть а эцить тевтеме аштиця пряудементень. Ливтягай арсематне ков ансяк а пачтятадызь!
[98] Зяроцеде уш ледсь мелезэнзэ умок ловнозь «Видьмевтеме» ёвтнемась. «Артём эйсэнзэ сови ды кадови кавто лемс сёрмадозь кудозонзо. Кадови ськамонзо. Кода сон карми ютавтомо шканть? Кода мон? Пандя ютксо? Маряви монень, муи аваломань, витнесызь-одкстомтсызь кудонть ды поладсызь эрямост, вейкест-вейкест чарькодезь, мелень ванозь. Авантень Пазось мерсь чачтнемс ансяк ниленьгемень вете иес, цёраломань тензэ эряви невак ламо иеть. Секс самай поладсы Артём эрямонзо кецнезь-кенярдозь».
Ловнозденть ледстнезь, окойники прядовсь Видяень пурька пандязо. Шкань ютазь прядовсть чинь тевензэяк.
Шлясь-нардась, «урядызе» аванзо анокставт стуворонть ды ютась эсь нупалезэнзэ. Мадеме. Чоп яжась рунгонзо. Стувтсак телевизоронтькак. Теяк: ламо эйсэнзэ чаво кортамот, элякалемат. Секскак... Кайсесь, путынзе коникенть вакссо озамканть лангс оршамопелензэ, псиденть апак вельтя венемсь коникенть кувалт.
Та-кода лия мельтнень марто човор содавтызе Лиля шабрадост ледстнемась. «Вана! Мелезэньгак зярдояк эзь сакшно, ней на вана», — ювк ютась пряванзо. Некшнизе сонзэ, ды аволь весть-кавксть, седе икелеяк. Шабрат, кода эно... Тон эли сынь ават-тейтерть мезеяк кевкстить. Течинь кондямо «седейшкавань» кортнема, инжекс тердема ютксост лиссь васенцеде.
«И-их, Лиля-Лиля, каня стакаль чарькодемс, ков чиремтить? Арсят, допрок кевензасть удемсормсевксэнь? Амарицяськак марявлинзить, чарькодевлинзить, ков мендят... Ды эдь... Эх, мезеяк а теят! Улевлиньгак Артёмонь кондямокс, монсь ёнот ян таргавлинь. Ней... Арась, Лиля, мезе арась — арась... Ялатеке совамс тенк кодаяк сован, берянь а ули. Авась тон, умок редия, эсень кондямо — лишме: свал тевсэ, свал мезеяк ускат, чувнат-чупонят, кочкат, валнат...»
Уш омбоце тарго, кода пелевеёнксонь аволь кизэнь экше варманть полавтызе чивалгома ёнксонсесь. Лембень, пиземень ускицясь. Ушосонть пси. Улиндеряй мелеть, ченгевтть, тюжалгавтт киськеть, киртак штапо [99] рунгот куш зяро. Каик панарот ды тейть пирень теветь. Тю-жалгадат — чикуншка ёно эрицякс тееват.
«Вирень программадонзо» мейле, кода сонсь лемдизе пичетнень алга валскень Чийнеманзо, сась Видяень мельс витнемс-петнемс сакалонзо. «Умок кедезэнь эзинь сайне васоньпеельтнень. Эрявить киртямс кува-кува». Совась кудос, сайсь васоньпеельть, ацась нардамо. Стясь чавачамонть каршо. «Умок уш таркань-таркань нарамальть. Ансяк вана... теде седеяк неявомо карми: вельть уш чертне чурот-човинеть, прок аволь цёраньгак».
Прядызе нарамонзо, шлясь-нардась ды лиссь ярсамо. Апак учо сась тензэ допрок од мель.
«Течи, аля, вельтямат помидоронь ды лия эмежень пандятнень. Кирдемс нетькс юткотнень кавшакавтнезь — те аберянь. Ванстови летькесь. Седеяк — зярдо арасть пиземеть, коське. Монь койсэ, весемеде вадря карми вельтямс нетькс юткотнень пичень празь салмукссо. Те — экстрамульча! Ве тикшинеяк прянзо а кепедьсы истямо латонть алдо. Летькеськак модасонть седе ванстови. Валномс ламо а сави. Истямо шуба ало сувокс теевеме а карми, верев а кепети. Эврика!»
«Теориянть» кундась топавтомо тевсэ. Ливтизе латалдо тетянзо Тюштянь пингень мотоцикланзо, путсь люлькантень-очконтень сянго, ангорькай, нолдызе моторонть, рашкондась озамкаенть лангс ды тусь вирев.
Ангорясь пельснаксадозь салмукстнэде, лопа марто човор, байтяк. Пурнась копонинень-копонине. Теде мейле кармась мотоочкосонзо усксеме анокстазенть вальмалов.
Рожодомсь тевентень, эль эзизе стувто ярсамо шканзояк. Бошан чама покшкавтниця чипаесь кенерсь кевереме тёкш тарказонзо. Те шкастонть эрси весемеде пси.
Видяй тейсь омбоце рейс.
Те шкастонть велявтсь ошсто Андрей Петрович, кона тов ардтнесь пенсиянзо мельга, кой-кодамо ярсамопелень ды лиянь-мезень рамамо. Эряви, рюкзакозо оно зярошка!
Неизе вальмаст икеле валдо-тюжа копонянть, вакссонзо котьмиця Видяень — кавтолдозевсь: «Э-э-э, те мезекс ускси эйсэст? Сонсь куш соды? Сон уш маряви... э-э-э, допрок...».
[100] Пачкодсь котьмицянть малас.
— Нетнень мезекс усксят? — пшкадсь, невтсь сурсонзо кавшаня марнэнть лангс Андрей Петрович, зярдо цёразо мадстизе мотоцикланзо ды теевсь пилень потомдыця општ.
— Те, тетяй, паро мульча! Пандятнень ланга кайсеса. Тикше а карми — те вейке, модань летькентькак ванстсы — омбоце. Пандятнень, конат чуросто озавтнезь, эйсэнзэ копачасынь. Вана истя, тетяй!
— Превс а совавтови! Те тон косто истямонть саик? Модакайсэ кавшакавтнесыть юткотнень — вана теть мульча. Э-э-э, мезе тея-а-ат...
— Те тон истя арсят! — мерсь Видяй каршо, «тон» валонть лангс лепштязь.
— А-а, тон истя вирьалксонть, э-э-э, весе ангорясак! Мезекс?! — эсь ёнксонть кирдсь Андрей атя, ахолдась кедьсэнзэ, тусь пондонь сталмосо рюкзаконзо марто кудов. — «Те сон истя мезе? Истя тейнить ансяк велякадозтне. О-хо-хо...»
Видяй поладызе тевензэ. Тетянзо «лотксемадо» мейле якась вирев «мульча» мельга зярыяксть. Меельцеде сазь, сянгосо чамдызе очконть, путынзе эйзэнзэ кедьёнкстнэнь ды совавтызе мотоцикланть тарказонзо. Каршо ливтсь ве чаросо таратайка. Ней эрявсь анокстазь «сюпавчинть» усксемс пирев, сравтнемс пандятнень ланга. «Лепштямс» тикшетнень, ванстомс летькенть.
Кедтнень-пильгетнень эсест тевест, прянть — эсензэ. Прясь — арси-кармавты, кедтне-пильгетне — теить.
Аволь весть Видяень содавтнизь Лилядо мельтне, сонзэ истяяк-истяяк полавтневиця «кизэнь» оршамопельдензэ, пеедыапнемадонзо: «Лиля... Мейле мезе? Теке васенцеде неия. Сон уш зяроце ие аванзо марто шабра тенек. Мезе тень эйстэ? Теке саразт поксарить пиресэст. Те мезе... Улкоть чинь-чоп штадо меште мик котьмась, якась-пакась пиреваст. Улян мон, арасян... Дух визьксэзэ арась! Потензэ невтни...».
Юты зярыя шка, уски весть-кавксть пичень салмукстнэде, таго те коськана Лилясь сови превезэнзэ. «Алкукскак, зяроце ие вейсэ ботатано, эвттяно моданть лангсо, теке коткудавт, кедьсэст вестькак араселинь. Мейсэ лекси [101] те Лилясь? Кодамо раськень? Кодат мельть-арсемат пивтевить прясонзо? Визькс, натой а содан, мезе прядсь, кодамо профессиязо. Потетнеяк... Сонсь човине, потензэ...»
Тейсь-топавтсь цёрась арсезенть — усксесь «вирь-ацавксонть» вальмалдо пирев — чинзэ валгомс. Юткось вальмалдо пандятнес оно зярошка! Тов — тей, тов — тей... Сизесь, кортавксонть коряс, пинекс. Тень кис Видяй мельспаросоль: аволь тев — пандо сявордсь...
Совась кудос уш сундерьгадозь. Ярсась ды, кода свал, озась «сэнь сельменть» икелев. Пек а кеми тензэ, секс ояксчисэ а эри мартонзо. Сиземань а содыця кортыцясь ёвтнесь масторсонть меельце шкастонть лисезденть. Кунсоломо педе-пес эзь карма. «Тунь а мезе ваномс. Теке: тесэ палсть, тосо ваясть, прасть, тень печкизь, тонань кундызь... Сеедьстэ марсевить салыцянь фамилият: те ицкавтсь масторзепестэ миллиард, омбоцесь — вете, колмоцесь... Теке мерят масторсонть мезеяк вадря а тееви, теке важодицяткак уш эзть кадово...» Видяй марязденть тюнгольдезевсь, вырк стясь таркастонзо, ютась мадеме.
Матедевсь сеске, чопонь сиземась вакска эзть юта. Эзь саво ёнксонзояк полавтнемс, ансяк путовсь прязо тодовонтень, ваясь удомань отьмантень.
Сыргозсь, панжинзе сельмензэ куроксто ашолгадомадо мейле. «Кенерян чийнеме, ковгак «виресь» а туи, а оргоди, аштян зярскак», — путсь Видяй мель, кадовсь аламошкас таркасонть кунст мадезь аштеме.
Кивчк састь превезэнзэ «Видьмевтементь» «эрицянзо» — Артём ды Света. Ды зяроцеде уш! Теевсть тензэ ялгакс. Вана таго варштасть. «Света, Света... Артём... Мезе тенк эзь сатно?! А кевкстьсыть... Истямокс уш Пазось теимизь. Яла тенек мезеяк ды а саты, свал мезе-бути эряви, вий путтано автордамс седе ламо, покш, тантей... Автордамсто киньгак... сускомс...»
Ве меленть полавтызе лия. Састь превезэнзэ Лилянь сэря тюжа сельмензэ. «Моликсэлинь, тевень прядозь, эзинь молеве. Ванды варштан... Мекс ванды? Вандысь уш сась. Ошов, каня, а туи? Ванса, а ванды — чинь [102] ютазь сован. Ков, мезекс капшамс? Палома а неяви. Содавтсынь, кортнетяно теде-тонадо... Лезэсь мезень? Кодамо лезэ пичкавтозь айгоронь пельде? Лезэ, лезэ... Каня эрямось ансяк сонзэ эйстэ ашти? Каня сондензэ башка Моданть лангсо мезеяк арась? Кортнемс теде-тонадо, пси чайнеде-кофеде копорямс... Мезень берянесь? Тетям, авам... Сынь трицян-кастыцян, сехте малавиксэнь. Чистэ чис, иестэ иес мартост пиксян. Лиянь вайгельть, лия, од валт а марсян. Секс эрьвачинь «текесь» нильтякавтни шкань-шкань. Эрямонь паргосонть улезэ эрьва-эрьва мезе. Ютан, ютан...»
Неть арсематнень арсезь, путынзе штапо пильгензэ экше кияксос, озась. Варштась стенас понгавтозь яксинь-кайтнень лангс. «Мезе, «спортсмен», икелев? Чийнемань яннэсь, тондеть башка, учи киньгак? Икелев!» Тонгинзе коникензэ вакссо аштиця тапанзо ды капшазь лиссь ушов — вирьга чийнемань программанзо топавтомо...
Певтеме келей менелесь валдо, маней. Аволь пси. Чивалгома ёндо пувиця валске мартонь кольнягай варминеськак экшелгавты коштонть. Кода кортыть, аволь пси, аволь якшамо. Самай вадря.
Видяень «чаво» чинзэ а эрсить. Бути прыяк истямось, пек чуросто. Течи пештизе чинть кавто тевсэ. Чикуншкадо икеле «ойна» ветясь зыянтикшетнень марто. Пиземетне тедеде сеедьстэ пачколесть те пелев, лембезэяк пертьпелькссэнть байтяколь, секс аэрявикс тикшетне кассть, теке кияк видинзе, якась мельгаст, — сельмень неезь. Пирепрявтось сайсь мель васняяк ванськавтомс пандяюткотнень. Варсоесь модакайсэнзэ виень апак вансто. Меельцекс ютась чурькатнень юткова. Савсь кедьсэяк ноцорямс-таргсемс. Истямо уряд тейсь помидоронь путовкстнэсэяк.
Эзь марявояк, кода валдонь-лембень сравтницясь кепедевсь весемеде сэрей тарказонзо, эждизе менельалксонть. Самай сонзэ кезэрень шкатнестэ саезь эрзятне ловсть эрямонь максыцякс, пазокс — Чипаз.
Шкань ютазь Видяй кундась лия тевс — ушодсь пенгень лазномо. Тетязо косто-бути раминзе. Пильсезь. Седе [103] ламотне эйстэст килеень. Начкот, морговт. Паро, кардазъ-юртсост кирдевсь паро колынькай — колун. Сонтемензэ стака улевель поркснемс цюркатнень.
Лазновсть байтяк. Ютась Видяй латалов, ливтизе очко марто ве чаросо таратайканзо. Усксинзе лазнозь пенгетнень латалов, вачкинзе костёрс.
Сась тетязо. Велявтсь ошсто. Якась, кода свал, пенсиянзо мельга ды кой-мезень рамамо.
— Теня, минь тонь марто кортынек кундамс те тевентень ванды, тон... — валтнэнь таргсезь мерсь Видяйнень.
— Кода мерсь превеесь, иля кадно вандыс течи теевицянть, — лазнома мукоренть вакссо аштезь, мерсь тетянзо каршо Видяй. Мештезэ кепсевсь стакасто лексемадонть.
— Паро. «Превейденть» мейле... Молян, э-э-э, эно оршнян ды... — валонзо апак прядо эскельдясь кудов.
Тетят-цёрат пукштяесть колунсост-узересэст, прок пушкасо, чинзэ валгомс. Ливезесь лангаст чудезь чудсь.
«Фу, превтеме, тон таго валот а топавтат — а арсяткак Лилямезнень варштамодо. Истя содат кить тейнить? Э-эх тон! Ней? Мезе ней, сундерькст якить, виренть уш талай пештизь. Сундерькстнэ — вень ушодкс. Зярс шлямот-нардамот, чокшнень ярсамот — карми ве. Весе, аля! Вандыс», — кудов молемстэ онкстнесь, виде-аволь прянь ветямозо, Видяй.
Прядовсь тевде пешксе чись, мельганзо ютась виень таштыця весь. Сась од, исень кондямо маней, сэтьме чи.
Мекс-бути лоткась потявомадо лисьмасто ведь. Теке панинупальсэ потомсть крантнэ. Васенцекс тень редизе Юлия Григорьевна. Серьгедсь Видяйнень. Сон сайсь эрявикс кедьёнкст ды валгсь лисьмалангов. Эрявсь варштамс, мезе лиссь ведьс нолдазь потякаенть марто.
Вант вана! Исяк чокшне «пивсэсь» эсь прянзо алтазенть а топавтоманзо кис, мекс эзь пачкоде шабратненень, течи... Лиля лисьмастост таргась ведь.
— Шумбрат, шабрань ава! — пшкадсь Видяй ды... визделгадсь: Лиля, валскень экшенть лангс апак вано, оршазель экшелямонь оршамосо.
[104] «Мезть визделгалемс, теке васенцеде истя неса. Те мезе... Сон пси читнестэ потензэяк а кекшни... Бреньк-бреньк яки пиреванзо». Виздть-иля, Видяйнень эрявсь таргамс лисьмасто потякаенть.
— Шумбрат! — кепедизе Лиля, каизе лисьмасто таргазь ведранть эсензэ ведрас, велявтсь Видяй ёнов. — Тонгак ведьс? Мекс ведравтомо? А-а, допрок стувтыя — Лисьмасонть потякай.
— Ды вана, — невтизе Видяй кедьёнксонзо, — потякаесь та-мекс лепиясь, а поти... Тон. Лиля, течи ошов а арсят ардомо?
— Арась. А мезе?
— Мезеяк арась. Истяк. Тынь чокшне кудосо карматадо?
— Карматано. А мезе?
— Инже сындеряй, а кшувавтсынк?
— А чарькодян...
— Сы — чарькодьсак! — пейдезь мерсь Видяй.
— А-а-а, оно мезе. Сак, сак, кие каршо...
Лиля кепедизе-саизе чапонть лангсто пешксе ведранзо ды ютась пирявксонь панжадо кенкшканть эсест пелев.
...Эзь кенере сундерьгадомо, Видяй панжизе Сурайкинтнэнь ёнов пирекенкшкенть. Кудось, конань сеть рамизь дачакс ды косо эрить лембе шкань перть, пурназь эчке лазсто-щитстэ. Покш. Кавтонь туртов истямось тунь аволь эряво. Лембенть эйсэнзэ стака кирдемс.
Видяй шалтадсь кудокенкшентень, панжизе ды макссь вайгель:
— Сован?
— Совак, совак, — вастызь мельцек-мельцек кавто вайгельть; ават-тейтерть стясть — ютасть совицянть каршо.
«Те кона ёндо вармась кандызе тенек? — арсезевсь Лилянь авазо, Клавдия Ивановна. — Зяро иеть эрятано...»
Видяй комась, каинзе пильгестэнзэ карсеманзо, ютась икелев. Мерсть тензэ озамс кудокуншкасо кирьксала стуворонть экшс. Кудосонть коштось марявсь экшелакс, прок мацтс валгить. Аватнень лангсольть халатт, Лилянь — чопода-якстере. Теде пирева пельсштапо яксиця Лиля [105] неявсь аламнеде лиякс. Рунгозо марявсь седе эчкекс, чамакиськезэ — седе валанякс ды мельс туицякс.
— Те кода истя кадовить? — нупальстэнть лисемстэ мерсь Клавдия Ивановна.
— Эрси, Клавдия Ивановна, кавто чувто юткскак кадновить, — мельганзо пшкадсь Видяй.
— Ды кода? Ламо тевть сявордыть лавтовот лангсто? Кадовсть зярояк? — важов вайгельсэ кортазевсь Лиля стуворонть тона ёнов, Видяень каршо, озамсто. Кедензэ путынзе стуворонть лангс.
— А лововить! Сынтемест, монень маряви, эрямоськак олы-руми. Неик, валске марто потякаенть лисьмасто таргия? Тетянь марто пельчи карынек, мейле... Каня весе лововить.
— Миньгак чоп тевсэ ульнинек. Ламотне эйстэст а неявитькак — шка саить. Кудоютконсетнеде ансяк зяро: тень шляма, тонань костяма, сень урядама, анокстама ярсамс... — теде-тонадо кортазевсь Лиля. — Модань тевтнеде а мезть ледстнемскак.
— Те виде. Лиясто теке мезеяк а теяткак — чоп пильге-лангсат... Лиля, ёвтык, иля покордаво, мекс ськамот? — апак учо полавтызе кортамо лувонть Видяй, куш содась — кевкстемазо казямонь кондямо. — Нолдык чумом виде кевкстеманть кис.
— Мекс тон? — эзь покордаво, пейдезевсь авась. — Киненьгак, лисни, эзинь эряво, — нусманясто ёвтынзе меельце валонзо.
— Мекс мон? Ёвтаса, видькстан, куш аволь эрявояк. Урьвакстнинь, — вийсэ, мелень каршо ливтизе кургостонзо валонть Видяй ды чатьмонезевсь.
— Ды мезе? — сеске пештизе кашт пелькскенть Лиля.
— Мезе... Кадымим...
— А-а-а, оно кода...
— Мекс?
— Теде иля кевкстне, Лиля...
— Паро. А карман.
— Эсеть уцяскадот мезе ёвтат? — омбоцеде текеде пшкадсь каршонзо якстере халатсо аштицянтень Видяй.
— Эрьвань эрямозо ашти кавто ёнкссто: кудораськень эсеть тевстэ-мелявкссто ды вейсэнь покш тевсэ важодемасто. Мон важодинь телевизоронь заводсо. Ветешка иеть, кода кадыя, полавтыя пирень тевтнень лангс... Налкставкшнось ламо ломань ютксо улемась. Лепштясь те эйсэнь. Секс... Кодамо тонь «омбоце ёнксот»?
— Кемат, теньсэяк теть колиякс саван. Теке ве заводсо теимизь. Прядынь экономфак. Кувать важодинь модань микшнемань-тешкстнемань фирмасо. Тевесь тень вечкевсь. Пандсть аберяньстэ. Ансяк шкань ютазь минек фирманть «нилизе» седе покш фирма. Ды теевинь теть, — пейдезевсь Лиля, — шабракс! Вана истя.
— Каить лангозот нулат-валат, саить койме, ушодыть лия эрямо... Истя? — аламнеде лиякс ёвтынзе Лилянь валонзо Видяй. Сонсь арсезевсь: «Авидестэ мерезь: эрьва пайстомо кудораськесь пайстомо эсензэкс. Улить вейкетькак: мон ды Лиля».
— Истя, истя, Видяй! Те ней, зярдо лембе, ялгакс ловат койменть ды ангорькаенть. Сы тарди сёксь, мельганзо теле. Сестэ кода? Койменть ошов а сайсак, ниле стенатнень юткс а стявтсак, — тешкстызе Лиля, копордась кечинестэнзэ чай.
— Мон ошсо эрямстон витнян компьютерт, программат кинень кодат эрявить аравтнян, лездан... Истя ютыть экше-якшамо ковтне, — вал мельга вал ёвтызе, мезе ёвтыксэль, цёрась.
— Монгак малав текекс. Лован-топавтан кинень мезе эряви. Теде велькска, кемат, — кончтась сельмесэнзэ, кепедизе вановтонзо Лиля, — «ваинь» Викшнемантень. Превскак эзь сакшно: те истямо келей, тюссо кувтолдыця мастор. Эрьва оля чим максан те масторонтень. Вана истя. А пештиндерясак ськамот эрямонть эрьва кодамо тевсэ, куш шкадо икеле [107] кандолазт теевть! Тонсь арсек, ниле стенатнень ютксо чинек-венек авань, сыре ломань марто... Лиясто маряви, мазый конёвсо артозь стенатне састо-састо шаштыть карадо-каршо ды, сы шка, мотердятадызь, теке карвонть.
— Саты, саты, Лиля, — каясь трокс вал Видяй, — монень те ёжось содавикс, паряк, тондеть пек... Яла кортыть, эрьвась теи уцясканзо сонсь. Кода тон ванат те меленть лангс? — допрок лиядо кевкстизе Лилянь. Умоктояк умок, эзь стувтово, кортнекшнесь теде нурька шкань нинзэ, Катя марто.
— Виде истяяк, лиякскак. Мертяно, кавто эйкакшт чачсть юрга кедтеме. Вейкесь эйстэст кедензэ полавтсынзе пильгесэнзэ. Весементь пильгесэ тееме карми. Кода весе, урьваксты, эйкакшт чачты... Лиякс меремс, уцясканзо тейсы сонсь. Омбоцесь нолдасы прянзо. Каяви симемас эли седеяк курок прядсы эрямо кинзэ.
— Те тон, Лиля, аволь эсенек пиретнес кевнетнень ёртнят? — ледстизе валъёвтавксонть каршонзо аштицясь.
— Эзинь арсеяк. Лисни, эсенектнес, — Лиля мерят лоткамо тешкс путсь, чатьмонезевсь.
— Мезе, мон монсь уцяскам теия? — аламос аштезь поладызе кортамонть Видяй.
— Эно кие? Эрият, пире кирдят, якат-пакат, машинасо ардтнят, ней вана кортнетяно. Те каня а уцяска? Оно кодат вастневить, пряст а ёмавтнить, а минь минек орматнень марто... — чевтестэ гайгезевсь Лилянь вайгелезэ.
Неть валтнэнь марязь, сась Видяень превс шкась, зярдо сон эль эзь нолажтокшно чапамонь чеядавксонтень, зярдо весе вийсэнзэ стякшнось те апаронть каршо. Сась икелензэ ломанесь, заводонь прявтось, ледстявсть превей валонзо, конатне теевкшнесть се чинев чеядавксстонть лисемстэ нежекс. Се шканть кувалма визькстэнть совась потмозонзо кодамо-бути кельме ёжо.
— Те истя. Прям ванстыя — уцяска. А вана ормам, улемс тетякс, эрямс ни марто... эзь изняво. Каня а уцяска те? — видькставсь Видяй, сонськак эзизе редя, сеньсэ, мезде кирдсь мель чатьмонемс.
— Кодаяк а арсян. Моли сон ды моли: пирень, кудонь тевть, Интернет, ошов-ков ардтнемат. Ней арсетяно баня путомс. Арсетяно полавтомс кудонть латонзо. Тевть, тевть, тевть... Вана кодат арсеман.
— Кодамо тон аволь чарькодицят, Видяй, — тей-тов прянзо чиртнезь, ёвтынзе валонзо Лиля. — Мон каня истямо «полавтомадо» кевкститинь? Теевемс седе... малавиксэкс. Вана мезе мериксэлинь...
Видяй арсезевсь.
— Арась, Лиля...
Ёвтазь мельденть башка, токизе Видяень лия: «Те, лисни, ютак ломанень пирес, шабрань вана те кудонтень. Эряк тесэ. Арась, арась! А Лиля сонсь саволь тенек?».
— Бути варчамс? — лип чатьмонемадо мейле лавшо вайгельсэ, виздезь мерсь авась.
— Малавгалить... Мон... — эзизе прядо арсеманзо, сускизе келензэ Видяй. «Каня а чарькоди, мезде моли кортамось?» — юрк ютась превганзо.
— Налкставсь, Видяй, ськамочись. Модадо башка эрямосон мезеяк арась... Стувтовсь уш: сондензэ башка, ули менель. Чистэ текесь: пире, пире, пире... Паро, лиснян вирев. Лезды, ледстяса, викшнемась. Сонтемензэ... Каня ансяк тень кис сынь эрямонтень?
Видяй кортамонь те «пиксэнть» понамо-поладомо эзь карма:
— Кода кортыть, инжентень кецнить кавксть: зярдо сы ды зярдо... Шказо, Лиля...
Видяй стясь. Мельганзо текень теизе, чожк шаштызе алонзо озамканть, инжень вастыцяськак.
— Илямизь стувтне, варштнек кой-зярдо.
Совась Лилянь авазо.
— Я, те тон мекс истя курок? Аштевлить, — каятотсь аволь гайгиця, сэтьме вайгелезэ.
[109] «Мезе, Лиля — авась аволь чаволатнеде, машты прянзо ветямо, ламо соды, арсиця, ёжонь мариця... А вечки тевтеме шкань ютавтнеме. Аволь кодамояк лаборкайне. Теяк паро. Вастневить, ды аволь чуросто, истят ават — кортамосост пес пантядызь, цякскадат эйстэст. Лиля эзь ёвта велькска валгак. Корозо? Те уш лия ёнксось. Сонзэ содамга, кода умок редязь, вейсэ пондо сал сэвема. Вант, илязо саво омбоцеяк.
Сялдомс аванть а кона ёндо. Мекс эно эри пайстомочисэ? А мирде, а эйкакшт... Сынст полавты авазо. Ужока, ужока... Кода истя, пайстомо? Ансяк кортынек...
Арась, арась, аволь уш истят пайстомот минь Лиля марто! Куш монь уцяскам а путови сонзэнть ваксс, седеяк — ловнозь ёвтнемастонть Артёмонсенть малас. Эрьвань эсензэ», — истя арсесь Видяй, зярс эскелясь Лилямезень кедьстэ эстест.
Кудосо тетязо ды авазо вансть телевизорга «Пачань мастор» невтевксэнть. Авазо кепедизе вановтонзо совиця цёранзо лангс ды ледстизе:
— Ярсак, весемесь стувор лангсо...